Mariko 13
13
Erihimbula hekalu
1Omugulu ahuluka akalwa omo ehekalu, muguma goko biga buwe mwabuga naye ati, Mukangirirya, lebaya, amabwe weriswekera angaha na manyumba weriswekera angaha! 2Yesu mwabuga naye ati, Wamalebya amanyumba aya manenemanene kwehi? Sihendisyasigala eribwe neriguma endata oko rindi, eritinda-syaguswa ahisi.
Emyatsi yomugulu wenyuma
3Nomugulu abya ikere oko Kitwa kya Mizeituni ahisirya oko hekalu, Petero na Yakobo na Yoane na Anderea mobamubulya bubi-sobiso, bati, 4Utubwire, ebyo nga byasyabya mugulu wahi, nekiminyikalo kyeribererera ryemyatsi eyi kya syabya kiti kwehi? 5Yesu mwatsuka eribuga nabo ati, Mutegaye sihabye omundu ukabatalaya. 6Abangi basyasa omo rina ryage, bati, Ingye ndi ye! basyatalya abangi. 7Omugulu mwasyowa malwa negulu ya malwa, simusyehahukaya emitima; ebi bitolere ibyahika, nikwa enduli isiriyahika. 8Kusangwa ekihanda kikandisyalwa nekindi kihanda, nobwami bwasyalwa nobundi bwami; hasyabya emisiki ehandi nehandi, hasyabya esyonzala; eki ni tsuka ryamagali.
9Nikwa muyitegaye; kusangwa basyabahotela omwibuyiro; mwasyaswiriribwa omo manyumba werihindana; mwasyaha ngana embere syabasoki bakulu nabami busana nage, busana neritulago embere syabo. 10Ritolere engulu yowene iyatsuka erikangiriribwa oko bihanda byosi. 11Nomugulu bakabaleta omo lubanza neribahotera, simusyeyiswekera embere nga mwangabugaki; nikwa mubuge ebyo mwasyahabwa oko ndambi eyo, kusangwa inywe mutendisyabuga, nikwa kyeKirimu Kibuyirire. 12Omugala wabo asyahotera omugala wabo ati itawe, nise womwana asyamuhotera, nabana basyalwa naba butabo ibitisyabo; 13kandi mwasyakubwa obusu nabosi busana nerina ryage. Nikwa oyo wasyasika erihika oko nduli asyalamibwa.
14Nikwa omugulu mwasyalangira ekyerihalya ekikaheraya ikinahangene ahatatolere (Oyu kasoma aminye), abari eYudea basagire oko bitwa; 15noyuri endata oko nyumba siakime kutse singire omo nyumba eriheka ekindu; 16noyuri mwirima siasubire olukimba luwe. 17Nikwa obulige oko bakule noko bakaha abana mabere oko biro ebyo! 18Musabe sibibye oko mugulu weritsuku. 19Kusangwa oko biro ebyo hasyabya amagali owataheretabya eritsuka erihangika eryo Mungu ahangika eriswahika na lino, kandi siendisyabyaho na kera. 20Kandi kumbe oMukama atakuhihya ebiro, nga sihari mundu angalamibwa; nikwa busana nabayisogawa, abo ayisoga, mwa kuhihya ebiro. 21Noko mugulu oyo omundu amabuga nenyu ati, Langira, Kristo ane hano! kutse Langira, ari erya! isi mwaliga. 22AbaKristo bamabehi nabaminyereri bamabehi basyahangana basyakangya ebitikotiko nebyeriswekera, eritalya abayisogawa, kyamatokekana. 23Nikwa mutegaye; nabiriba bwira emyatsi yosi iteyabya.
24Nikwa oko biro ebyo, enyuma wamagali, eryuba ryasyabya mwirimya, nomukera siendisyaswakola, 25nesyongununu sya syatogonga erilwa elubula, nebymaka ebyomo lubula byasya tengatenganibwa. 26Neryo basyalangira oMugala womundu akasa omo bitu neritoka rinene nolukengerwa. 27Neryo asyatuma abamalaika, asyahindania abo ayisoga erilwa oko mahunga ani, erilwa oko syonduli sye kihugo erihika oko nduli yelubula.
28Mwiyire oko omusyo womuti womutini: omugulu akato heraya omutahi wago akabya molomolo akalasaya ebikoma byago mukaminya ko mututa ari hakuhi. 29Ritya, omugulu mwasyalangira emyatsi eyi ikabyaho, imwaminya kwari hakuhi, kwamahika okwirimbo. 30Kwenene, ngabuga nenyu, olulengo olu si lwendisyalaba emyatsi eyi iteyabererera. 31Elubula ne kihugo byasyalenga, nikwa ebinywa byage sibyendisyalaba.
32Nikwa ekiro ekyo kutse endambi eyo sihari wasi, nomo bangabya abamalaika omo lubula, kutse oMugala, nina Tata. 33Mutegaye, mulebaye; musabe, kusangwa simwasi nga ni mugulu wahi. 34Riringene nomundu oyu kagenda olugendo omo kindi kihugo, akasiga enyumba yiwe kandi akasigira abagombe buwe, oburi mundu nomubiri wuwe, iniakategeka omuteya woluyi erilebya. 35Neryo mutegaye—kusangwa simwasi omugulu omukama mwenye nyumba asyasa, omwigolo golo, kutse omukati kanene, kutse engoko yahasabo, kutse bwasesukala— 36akasyababurikirania akeya imune to. 37Nebyo ngabuga nenyu ngabuga nabosi: nyiti, Mutegaye.
Currently Selected:
Mariko 13: NTN62
Highlight
Share
Copy
Want to have your highlights saved across all your devices? Sign up or sign in
Le Nouveau Testament et les Psaumes en Ndandi © British and Foreign Bible Society, 1962.
