Mariko 14

Embita yeritsimba Yesu

1A Nikwa enyuma webiro bibiri mohabya ePasaka nerirya ryobundu bute mo kihamya. Abahereri bakulu na basaki mobasonda erimutsimba na menge, erimwita; 2kusangwa babuga bati, Butsira oko mugulu werirya, abandu sibatwe isesi.

Eriuturirwa kwamalasi

3Nomugulu abya eBetania omo nyumba ya Simoni muhaga, abere anikere okwirya, mohasa omukali iniawite okwitambya yeribwe rihenirye ryamaguta agowene wamalasi wobuguri bunene, mwatularyo mutulirago oko mutwe wuwe. 4Nikwa ihari bandi bakabuga omwisi syabo nerihitana bati, Busana naki amaguta aya amaheribwa atya bosa kwehi? 5Kusangwa ama guta aya anganaguribwe esyofaranka kwilaba amaelfu asatu, isyagabirwa abera. Mobamwagarirwako. 6Nikwa Yesu mwabuga ati, Mumuleke; mukamwendereraya busana naki kwehi? Amangolera omubiri mubuya. 7Kusangwa abera bari nenyu ebiro byosi, nekiro mwamasonda mukakolabo ndeke; nikwa simwendisyabya nage ebiro byosi. 8Abirikola ekyangatoka; abirihakabya omubiri wage busana neritago. 9Kwenene ngabuga nenyu, aho engulu yowene yasyakangiriribwa omo kihugo kyosi, ekyo abirikola kikandisyatulwa busana nerimwibuka.

Oluhota lwerigulya Yesu

10Neryo Yuda Iskariota, abya muguma wo kwikumi na babiri, mwaya oko bahereri bakulu erimuhotera kubo. 11No mugulu bowa mobatsema, mobamulaga erimuha esyofaranka. Naye mwasonda-sonda omwanya werimuhotera.

Erirya ryePasaka

12Oko kiro kyerimbere kya Mandu ate ko Kihamya, omu gulu baherera ekyana kyembuli kye Pasaka, abiga buwe moba buga naye bati, Ukasonda uti, tuye hahi erikokotya erirya ryePasaka kwehi? 13Neryo mwatuma abiga babiri buwe mwabwirabo ati, Muye oko muyi, omulume mukandihindana naye anahekire erilega ryamagetsi; mumukwame, 14naha akandingira, mubwire omwenye nyumba, muti, oMukangirirya ati, Engonde yage ya bageni iri hahi, aho ngandirira ePasaka haguma nabiga bage kwehi? 15Naye akandibakangya engonde nene eyendata eyabirikokotibwa eyitolere ndeke; eyo mutukokoteraye. 16Abiga mobahongoka mobaya oko muyi oyo, mobeya iko bine ngoko abwirabo; mobakokotya ePasaka.

17Neryo ryamabibya igologolo mwasa nerikumi na babiri. 18Neryo babere bane oko butara bakarya, Yesu mwabuga ati, Kwenene ngabuga nenyu, omuguma kwinywe akandisyanyi hotera, omuguma oyu karya haguma nage. 19Mobatsuka eribya nobulige, neribuga naye muguma, muguma, bati, Ni ingye kwehi? 20Neryo mwabuga nabo ati, Ni muguma werikumi na babiri, oyu kakoleraya omo kisya haguma nage. 21Kusangwa oMugala womundu akagenda ngoko kisakire busana naye, nikwa obulige oko mundu oyu kahotera oMugala womundu! Kumbe ryowene omundu oyo nga siabutawa.

Obutara bwoMukama

22Neryo abere akarya, mwimya obundu, mwatsumulabo, mwatsutsangabo, mwahabobo, mwabuga ati, Mwimaye; oyu ni mubiri wage. 23Mwimya nolutehi, abere abiha ewasingya mwaha lobo, nabo mobapulya kulo abosi. 24Neryo mwabwirabo ati, Oyu ni musasi wage werilagana rihyarihya, owakutawa busana na bangi. 25Kwenene ngabuga nenyu, sindiendisyaswapulya oko biguma byebinyu erihika oko kiro nasyapulyabyo bihyabihya omo bwami bwoMungu.

26Babere babiimba olwimbo, mobaya oko kitwa kye Mizeituni. 27Yesu mwabwirabo ati, Inywe bosi mwasyatwi kala imwatswa; kusangwa kisakire kiti, Nasyaswirya omulisya, Ilesyombuli isyapanzikana. 28Nikwa nasyabya nabilubukibwa, nasyagenda embere syenyu eGalilaya. 29Petero mwabuga naye ati, Nomwa bosi bangatswa, ingye eyihi, sindiendisyatswa. 30Yesu mwamubwira ati, Kwenene ngabuga nawe omo kiro eki, engokolume iteyabika kabiri, ukandinyigana ngendo isatu. 31Nikwa mwayitsinga kutsibu ati, Kyamabya kitolere inahola haguma nawe sindiendisyakugana. Nabosi mobabuga batya.

Getesemane

32Mobahika ahakahulawa mo Getesemane; neryo mwabwira abiga buwe ati, Mwikale hano, omugulu ngasaba. 33Neryo mwimya Petero na Yakobo na Yoane, kandi mwatsuka eriagalwa nerihahukya omutima. 34Mwabuga nabo ati, Omutima wage ari nobulige bungi, bukasonda erinyita; musigale hano, mute gaye. 35Neryo mwasegera emuliro hake, mwagwa ahisi mwasaba ati, kyamatokekana, endambi eyo imulweko ilabe. 36Neryo mwabuga ati, Aba, Tata, emyatsi yosi ikatokekana ukuwe; unyilusaye kwo lutehi olu; nikwa butsira ekyo nyanzire, nikwa ekyo wanzire. 37Neryo mwasa, mweyabo ibayire to, mwabuga na Petero ati, Simoni, wayire to kwehi? Suritatoka eriteya endambi nguma kwehi? 38Mutegaye musabe isimwa ngingira okwilengwako; ekirimu kyanzire, nikwa omubiri ni molo. 39Kandi mwagenda mwasaba, mwasuba mubyo. 40Kandi mwasa mweyabo ibane to, kusangwa ameso wabo iniaritoherere; mobataminya nga bangamusubiryaki. 41Kandi mwasa engendo ya kasatu, mwabwirabo ati, Mukinagotsere mukaluhuka kwehi? Bingaho; endambi yamahika; oMugala womundu akahoterawa omo byala bya bakola nabi. 42Mu hangane, tubye tukagenda; lebaya, omuhoteri wage ari hakuhi.

Oluhota lweritsimba Yesu

43Neryo-neryo omugulu akinabuga, Yuda mwasa, omuguma werikumi na babiri, nomulondo haguma naye ibahekire emiyari namahumo, bakalwa oko bahereri bakulu na basaki nabakulu.

44Nikwa omuhoteri iniabirihabo ekiminyikalo, ati, Oyo nga ndiryatsirira iyo mundu oyo; mumutsimbe mumutwale ndeke.

45Abere ahika mwaya ahabya, mwabuga ati, Mukama! Mwamuryatsirira. 46Neryo mobamuhamba mo byala moba mutsimba. 47Nikwa muguma ogoko bahangeneho mwakura omuyari wuwe mwabanda omukobe womuhereri mukulu mwatwa okutu kuwe, 48Yesu mwabulyabo ati, Mukahuluka imunahekire emiyari na mahumo erinyitsimba ngomurahi kwehi? 49Oburi kiro inandi haguma nenyu omo hekalu ngakangirirya, simwetanyitsimba. Nikwa muleke amasako abererere. 50Nabosi mobamusigania, mobatibita.

51Nomulwana muguma mwamukwama, iniambite olukimba lwomusohe oko mubiri wuwe; mobamutsimba, 52nikwa mwasigania olukimba luwe lwomusohe mwatibita iniane ndumbu.

Yesu emuliro waKayafa

53Neryo mobamutwala oko muhereri mukulu; nabahereri bakulu bosi nabakulu nabasaki mobahindanaho. 54Petero naye mwamukwama iniakengehere, mwahika omo muhana gomuhereri mukuru; mwikala haguma nabateya, iniakota oko muUro. 55Na behereri bakulu nabo mwibugiro bosi mobasonda-sonda ebyerihandikirira Yesu imobatoka erimwita; mobabulabyo. 56Kusangwa bangi mobamuhandikirira na mabihi, neritulago ryabo moritahikana. 57Nabandi mobaha ngana mobamuhandikirira na mabihi, bati, 58motukowa aka buga ati, Nasyasambula ehekalu eyi eyihimbirwe omo byala, nomo biro bisatu nasyahimba eyindi, eyitehimbawa omo byala. 59Kandi eritulago ryabo moritahikana.

60Omuhereri mukulu mwahangana omukati-kati kabo, mwabulya Yesu ati, Surisu baya kwehi? Ni byahi ebyo abandu aba bakakuhandikirira kwehi? 61Nikwa mwabya obukutu mwatasubirya. Kandi oMuhereri mukulu mwamubulya ati, Uri Kristo, oMugala wogo Muyisa kwehi? 62Yesu mwabuga ati, Indi ye; Mwasya lebya oMugala womundu inianikere oko byala byamali bya Maka, neriasa nebitu byelubula. 63OMuhereri mukulu mwa tulanga esyongimba siwe, mwabuga ati, Tukaswasonda abandi balangiri baki kwehi? 64Mwabiriowa eritsuma riwe. Muka ganirayaki kwehi? Nabosi mobamutswera bati atolere erihola. 65Nabandi mobatsuka erimutwira kwa matandi, neriswika obusu buwe, nerimuswirya ebikundi, bati, Minyerera! Naba teya mobamwimya bakamuswirya esyongumbe.

Petero akagana Yesu

66Petero abya eyikwa omo muhana, muguma woko bana bato bomuhereri mukulu mwasa; 67mwalola ku Petero akota omuliro, mwamutungerera, mwamubwira ati, Nawe wabya nomuNazareti, Yesu. 68Nikwa mwayigana, ati, Ingye sinyasi kutse sinditaminya ekyo ukahula. Naye mwalwayo mwaya omo muhana ekyaswa; nengoko lume moyabika. 69Omwanamuto oyo mwamulolako, mwatsuka eriswabwira ababya bahangene ho ati, Omundu oyu ni wakubo. 70Nikwa kandi mwayigana. Nenyuma wekatambi kake kandi ababya bahangeneho moba bwira Petero bati, Kwenene uri muguma wakubo; kusangwa uri muGalilaya. 71Nikwa mwatsuka eriyitsuma nerilahirya ati, Sinyasi omundu oyu mukahula. 72Neryo-neryo engoko lume moyabika engendo ya kabiri. Petero mwibuka ngoko Yesu amubwira ati, Embere yengoko lume eribika kabiri, wasyanyi gana kasatu. Nomugulu aganiraya ekyo, mwarira.

Currently Selected:

Mariko 14: NTN62

Highlight

Copy