Mariko 4
4
Omusyo womubibi
1A Kandi mwatsuka erikangirirya oko musike wengetsi. Nendeko nene kutsibu moyahindana erimutimbako, kyo kyaleka iningira omo bwato mwikala mubo omo ngetsi; nendeko yosi moyabya oko musike wengetsi oko kitaka. 2Naye mwakangiriryabo myatsi mingi omo misyo, nomwikangirirya riwe mwabwirabo ati: 3Muhurikirire! Omubibi mwaya biba embuto. 4Nomugulu abiba, esindi mbuto mosyatogera oko nzira, nesyonyonyu mosyasa mosyatomengerasyo. 5Esindi mbuto mosyatogera oko kitaka kyamabwe ahate mukungu mungi, neryo-neryo mosyalasa, kusangwa mutaka si muli-muli; 6neryuba ryabere ryasingirira mosyahya, kusangwa sisiwite emirihi mosyoma. 7Esindi mbuto mosyatogera omo mahwa namahwa mwalasa mwanigasyo, mositabuta embuto. 8Nesindi esyombuto mosyatogera omo kitaka kyowene mosyabuta embuto, mosyalasa mosyakanya neributa ngendo makumi asatu namakumi endatu nerigana. 9Neryo mwabuga ati, Oyu awite amatwi weriowa, owe.
10Nomugulu abya iyowene, ababya bamutimbireko haguma nerikumi nababiri mobamubulya busana nemisyo eyo. 11Neryo mwabwirabo ati, Inywe mwabirihabwa eriminya ekibisamire kyobwami bwoMungu, nikwa busana nabari eyihya ebyosi biri omo misyo; 12neryo erilebya balangire, kandi sibalangire; neriowa bowe, sibaminye; na ritya ibatabinduka kandi neribu yirwabyo. 13Neryo mwabuga nabo ati, Simwitaminya omusyo oyu kwehi? Neryo mwasyaminya emisyo yosi muti kwehi? 14Omubibi akabiba eKinywa. 15Nesiri oko nzira syesi, aho kinywa kikabibawa; abo babakowa, neryo-neryo Satani iyasa iyalusya eKinywa ekyabibawa omwisi syabo. 16Nesyabibawa oko kitaka kyamabwe nabo baba omugulu bakowa eKinywa neryo-neryo bakangirirakyo nobutseme; 17kandi sibawite omurihi omwisi wabo, bakasika akatambi kake; neryo, omugulu obulige neriendirerya bikahuluka busana nekinywa ekyo, neryo-neryo bakatswa, 18Nesindi syenesyo sikabibawa omo mahwa; abo babakowa eKinywa, 19nikwa eriyigenya rye kihugo nobutseme bwebindu, neriyitsutsa ebindi bindu, bikingira ibya niga eKinywa, ikitera. 20Nikwa esyo syaherawa oko kitaka kyowene babakowa eKinywa ibaligakyo ibabuta ebiguma, engendo amakumi asatu namakumi endatu nerigana.
Oluseke na kalengi
21Neryo mwabuga nabo ati, Oluseke lukaletawa erihirwa omwisi wekitiri, kutse omwisi wengingo kwehi? butsira oko kikatekawa kwesiseke kwehi? 22Kusangwa sihari ekibisamire, ekitindasyaminyikalibwa; kutse sihari kindu kibisamire, ekiti ndasyahika omo kyakakala. 23Omundu amabya namatwi weriowa, owe. 24Neryo mwabwirabo ati, Mulebaye ebyo mukowa; olulengero mukalengamo lo munemwendisyalenge rwamo, kandi mwasyahabwa kwilaba aho. 25Kusangwa oyu wite asyahabwa bingi kwilaba aho; kandi oyu tawite asyasa gulwa nekyalwa awite.
26Naye mwabuga ati, Obwami bwoMungu buringene nomundu oyo wagusanga embuto oko kitaka, 27mwagotsera kandi mwabuka omo kiro nomwitungi, nesyombuto mosyalasa mosyakula, isiasi ngasikakula siti. 28Ekitaka kikabuta ebiguma kyokyene, erimbere emigera neryo ehikoma, nenyuma waho erisohola, nenyuma waho amakundi awerire. 29Nikwa omu gulu embuto yamabiera, neryo-neryo akahira omutemi, kusa ngwa erigesa ryamahika.
30Kandi mwabuga ati, Twangaringirania obwami bwo Mungu naki kwehi? kutse omusyo wahi twasyatwa busana nabo kwehi? 31Buringene nembuto ye haradali, eyo ikaherawa oko kitaka, ni kakekake oko mbuto syosi syamuna kihugo; 32nikwa omugulu yamabiherwa ikakula iyabya nene oko biti byosi, ikalasaya emitahi mineneminene, nesyonyonyu syomo kyanya sikayira esyonyutu omo kitsutsu kyayo.
33Omo misyo mingi ngeyi mwabwirabo eKinywa, ngoko bangatoka eriowakyo; 34mwatabuga nabo atetwirabo musyo, nikwa mwaswakumburira abiga buwe ebyosi ahate bandi.
Yesu mwabonderya engetsi
35Noko kiro ekyo, erigologolo iryamabihika, mwabwirabo ati, Tusokere eyisirya. 36Mobasiga endeko, mobamutwala haguma nabo omo bwato, ngoko anabya. Nawandi mato abya haguma naye. 37Nerigunga inene yekihunga moyahuluka, nebisunda mobyayikuba omo bwato, nobwato mobwasonda eriusula. 38Nikwa abya enyuma omo bwato, iniayireto oko musegemo; neryo mobamubukya bati, OMukangirirya, sutu tsomene ko tukahwa kwehi? 39Naye mwabuka mwakunga erihunga, mwabuga nengetsi, ati, Obuholo! Ubye bukutu! Nerihunga moryumbya, kandi mohabya eriyibombeka. 40Naye mwabuga nabo ati, Busana naki mukubaha kwehi? Simuwite erikirirya kwehi? 41Nabo mobusula nerisweka, mobabwirana bati, Kwoyu ni ndi, erihunga nengetsi bikamowa kwehi?
Currently Selected:
Mariko 4: NTN62
Highlight
Share
Copy
Want to have your highlights saved across all your devices? Sign up or sign in
Le Nouveau Testament et les Psaumes en Ndandi © British and Foreign Bible Society, 1962.
