Luka 2

1Bitabibakitshine mu aa mafuku kubatukile kishila kwi Kesala Auguseto eshi: Ba ku nsenga yoso babadikwe ku mashina’bo. 2(Kuno kubadikwa kubakitshinwe kwibedi habadi Kileniusa mutontshi-mukata hanundu-ha-boso a Sidya). 3Biabia boso abayile mu kufundjibwa, ese muntu ku kibalo kiabo. 4Yosefe namu bakatukile ku Ngadilea ku kibalo kia Nasaleta ēnda ku Yudea, ku kibalo kia Dafidi akilumbwa bu Betelema, mwanda badi a ku nshibo na ku kifuko kia Dafidi. 5Kufundjibwa na Madiya mpian’e muladikwe, badi n’eimi. 6Binyibiabia habadi kwanka, mafuku e akutanda abakumbene. 7Batandjile mwan’e mulume a kwibedi; bamuhombele mu kilamba, bamuladika mu kidilo kia nyama, mwanda mu nshibo ya benyi mubakutshilwe mbalo.

8Ku ya nsenga kubadi balami ba mikoko, abadi bekale ’mahia abalama lombe lwabo bufuku. 9Talai, mwikeilu a Yehowa baimene habadi na ntumbo y’Efile Mukulu yibamunyikile mpese yoso mwabadi; n’abo abadi na moo ukata. 10Biabia, mwikeilu bebalungwile’shi: Tanutshinanga moo. Talangai! nenufishisha mukāndu-wibuwa wa kusehela kukata, aukekala ku bantu bosa. 11Mwanda lelo kubenutandjilwa mu kibalo kia Dafidi, Muhashi E nyi Kidisitu Nfumu. 12Na kino akikekala bu kitundwilo kwanudi’shi: Anukasañana mwana muhombēle mu kilamba, muladikwe mu kidilo kia nyama. 13Kahindji n’āka kibumbu kia masalai a mwiilu abafumankene na mwikeilu yawa, abadi abalangwile Efile Mukulu’shi: 14Ntumbo kw’Efile Mukulu mwiilu mukile, na hanohansenga kufukama, n’eshimba dibuwa dikale kwi bantu. 15Bitabibakitshine, hakukatuka bamwikeilu kwabadi kwaluka mwiilu, balami ba mikoko abelungushene’shi: Twendengei binobino ku Betelema tukatale uno mwanda ubafikye, ubetuukisha Yehowa. 16Biabia abafikile lubilo, abasañene Madiya na Yosefe, na mwana mukinga mulale mu kidilo kia nyama. 17Habeumwene abeukishe kosokoso dino eyi dibebalungwilwe dia uno mwana. 18Na boso abeuhushishe, abakanyine ha uno mwanda ubebalungwile balami ba mikoko. 19Anka Madiya balamine yino myanda yoso, beyinangushenanga mwishimba die. 20Biabia balami ba mikoko abālukile, abatumbishe na kulangwila Efile Mukulu ha mwanda wa myanda yoso yiabehusha na yiabamono, bu biabebalungwile.

21Habakumbene mafuku mwanda, a kusala mwana, eshina die dibatemwine bu Yesu, bu dibamuudikile mwikeilu kwibedi kwa kumwimita mwifu. 22Habakumbene mafuku a kusudibwa kwe mwiyile kishila kia Mosesa, bamufishishe ku Yelusalema kumulubwila kwi Yehowa. (23Mwakibafundjilwe mu mukanda-wa-bishila wa Yehowa’shi: Ese mwana mulume a kwibedi ashitula efu, akaitanyinwa bu muhatulweakishila a Yehowa). 24Na kulambula kitahilo mwakibākwilwe mu mukanda-wa bishila wa Yehowa’shi: Tukutshikutshi tubidi, sunga ntwana twa nkudimba tubidi. 25Talai, mu Yelusalema mubadi muntu eshina die bu Shimeone; e badi muntu mululame, n’eshimba dimune, badi atengyela kisengyelo kia Isalele: na Kikudi-E-Selelee badi hadi. 26Kikudi-E-Selelee bamufumbwidile mwanda’shi: Tokamono lufu anka s’okamono Kidisitu a Yehowa kwibedi. 27Batwele mu ntempelo mu Kikudi-E-Selelee, biabia basha mwana, habafishishe mwanka mwana Yesu, kumukitshina mwiyile kihikwa kia mukanda-wa-bishila. 28Henyihaha bamwātshile mu maboleo e, atumbisha Efile mukulu’shi: 29Efile Mukulu, Mwanana, olekyele mufubi obe ende na kufukama, mwiyile eyi diobe. 30Mwanda meso ande abamono kihandjilo kiobe; 31kibolumbulwile kumpala kwa bantu boso. 32Etata dia kumunyika Badjentaila, na ntumbo ya bantu bobe ba Isalele. 33Yosefe na nyin’a mwana abakanyine ku’ya myanda yabākwile ha mwanda we. 34Na Shimeone bebahele mwabi, balungwile Madiya nyin’e’shi: Tala, uno mwana ’mutudilwe mwanda wa kuhonesha na kubusha dimo kwa bebungi mu Isalele. 35(Ee, luhete-lwa-ngoshi alukatubula mwishimba diobe na mwinyi namu) ’shi, binangu bia mashimba e bungi abikasokoka. 36Kubadi namu mwana mukashi mutemuki, eshina die bu Ana, mwan’a Fanuele, a ku kisaka kia Asha. E badi mununu a bihwa bibungi, bekele na mulume bihwa musambobidi mpaa na ku hukamame bwe. 37E badi mukashi a mufwe ku bihwa malsumi mwanda na hinanka, tamutukye mu ntempelo, bafubile Efile Mukulu na kushīla biakudia, badi na nteko bufuku na kanya. 38Ha yawa nguba ebatwēle mwanka, foatumbwile Efile Mukulu hamune, bākwile mwanda we kwi boso abadi batengyela kikudilo mu Yelusalema. 39Habahushishe myanda yoso yilombane mu mukandawa-bishila wa Yehowa, abālukile ku Ngadilea, ku kibalo kiabo kia Nasaleta. 40Na mwana bakule, banyingile eshimba, badi muule nda na binangu, na bumuntu bw’Efile Mukulu bubadi hadi.

41Ku kihwa na kihwa nshye na nyin’e abendanga ku Yelusalema ku Kidibwa kia kusehela kia Pāque. 42Habakumbene bihwa ekumi na bibidi, abayile ku Yelusalema muyile kihikwa kia Kidibwa kia kusehela. 43Biabia habakumbeshwe mafuku, hakwaluka kwabo, mwana Yesu bashele kunyima mu Yelusalema; na Yosefe na nyin’a mwana tabadi beukye. 44Anka’bo abadi abatentekyesha’shi, e mumilongo ya bantu, abayile luendo lw’efuku dimune; abamukimbile munkatshi mwa bakwabo, na kwi’ba bantu babadi beukye. 45Biabia habakutshilwe kumumona, abālukile ku Yelusalema kumukimba. 46Bitabibakitshine ha kukila mafuku asatu, abamusañene mu ntempelo, mushale munkatshi mwa balambukishi, badi e batee matwi, na kwibehusha ngihusbo. 47Na boso abamuhushishe abakanyine ku kushingula kwe, na ku mlalulo ye. 48Habamumwene abakanyine; na nyin’e bamwakwile’shi: A mwan’ande, a nkinyi kiobwetukitshina bino? talanga, shobe n’ami biatubakukimbi na kwinyenga. 49E, bebālulwile’shi: A nunkimbilanga kinyi? tanwibeukye’shi, nkihwandjikile’mi kufuba mufubo wa Shami. 50Ank’abo tambashingule eyi dibebalungwile. 51Biabia ebalalele n’abo, bafikile ku Nasaleta, badi mwibakokyele; anka nyin’e balamine yino myanda yoso mwishimba die. 52Na Yesu bafwime mu binangu na mu kishisha kie, na mu lukumino kumpala kw’Efile Mukulu na kwi bantu.

Currently Selected:

Luka 2: NTLK52

Highlight

Copy