Luka 4

1Biabia Yesu badi muule na Kikudi-E-Selelee, bālukile ku Yodano, bakunkushibwe na Kikudi-E-Selelee mu mahia a kabāka. 2Batompibwe na kafilefile mafuku makumi ananka. Tamudi kintu mu aa mafuku, anka hābaku mbene nsala yibamukwete. 3Biabia kafilefile bamulungwile’shi: Su obe we mwan’Efile Mukulu, kamika dino ebwe dialulukye dimpa. 4Yesu bamwālulwile’shi; Kibafundjibwe’shi: Muntu takekala na muwa ku dimpa bisumanga, ooo, anka ku myanda yoso yabākwile Efile Mukulu. 5Henyihaha kafilefile hakumukamishe ngulu yikata, bamulesheshe mafumu oso a hanohansenga mu kahindji kahela. 6Binyibiabia kafilefile bamulungwile’shi: Nankakuha ano matalwa oso, na ntumbo yao, mwanda bibampelwe, na kwi ese ankyebe nankamuha’bio. 7Biabia, s’okandangwila’mi, bioso abikekala biobe. 8Anka Yesu bamwālulwile’shi: Nda ku nyima kwande obe Satana, mwanda ubafundjibwe’ shi: Okalangwile Yehowa Efile Mukulu obe, ank’E nyi okafubila. 9Binyibiabia bamufishishe ku Yelusalema, bamukamishe ha musaka wa ntempelo, bamulungwile’shi: Su obe we mwan’Efile Mukulu, weituhikye hanka hashi, 10mwanda ubafundjilwe’shi: Akalayila bamwikeilu be, bakulame. 11Na mās’abo akakutwala, tala okakokola lwā lobe kwibwe. 12Biabia Yesu bamwālulwile’shi: Ubākwilwe’ shi: Obe tokatompanga Yehowa Efile Mukulu obe, ooo. 13Kafilefile habahudishe mitompo yoso, bakatukile kwadi kihindji.

14Henyihaha Yesu bālukile ku Ngadilea mu bukome bwa Kikudi-E-Selelee: ntumbo ye yibahalakene ku mpese yoso. 15Biabia balambukishe mu bitumbwilo biabo, badi atumbishwa kwi boso.

16Bafikile ku Nasaleta ku bakudile, batwēle mu kitumbwilo h’efuku dia Sabado, bu bibadi kihikwa kie, baimene kubala (mukanda w’Efile Mukulu). 17Biabia kubamuhelwe mukanda wa mutemuki Esaiye. Habafungulwile mukanda, basañene hantu habafundjibwe’ shi: 18Kikudi a-Yehowa e handji’mi, mwanda banshingile (mwimu) mu kulungula mukāndu-wibuwa kwi balanda; bantumine kusangulusha mashimba abenyengye; kulungula kuhosolwa kwa misungi, na kubūlwa kwa meso kwi bampofu, kuhosola bafwambukye. 19Kulungula kwa kihwa kikuminyibwe kia Yehowa. 20Henyihaha bafungile mukanda, bewalwishe kwi mulungudi e Efile, bashalele: Biabia meso a boso abadi mu kitumbwilo abamutadile swee, swee. 21Babangile kwibalungula’shi; Lelo uno kino kifundwe ki Efile kibakumbashwa mu matwi enu. 22Na boso abamwakwidile bibuwa, abakanyine ku bishima bia bu-muntu bibatukile mu kanwa mwe. Biabia abehwishe’shi: A uno tamwan’a Yosefe su? 23E, bebalungwile’shi: Binyibinyi anukangyele luno lukindji’shi: Obe ñanga ehash’obe na mwinyi: Biatubahushishe bibakitshinwe mu Kahenauma, okite namu muno mu nsenga yenu. 24Ank’ebambile’shi: Binyibinyi nenulungula ’shi: Takwi mutemuki akuminyibwa mu nsenga ya kwabo. 25Anka nenulungula biabinyibinyi’shi: Kubadi bakashi-ba-bafwe bebungi mu Isalele mu mafuku a Elaidja, hakubashitshilwe eilu bihwa bisatu na mieshi yisamombo, habafikile kihuha kikata kia nsala ha nsenga hoso. 26Anka Elaidja tamutumibwe kwi umun’abo, anka ku Saleheta, (kibalo) kia Sidona, kwi mwana mukashi badi a mufwe. 27Kubadi namu basha-kifwi bebungi mu Isalele mu kihindji kia Elaisha mutemuki; takubadi umune mutoshwe, anka Nāmana mwina Sydia. 28Henyihaha boso abadi mu kitumbwilo, hakuhusha yino myanda, abaule nansunguyikata, 29Abebwele, abamutakwile hasha ha kibalo abamukunkwishe ku mulomo wa ngulu habadi hebakwe kibalo kiabo, babadia kumwelē’lundu, akahone mbā. 30Anka e bakile munkatshi mwabo, ēnda mwishinda die. 31Biabia, bālalele ku Kahenauma, kibalo kia ku Ngadilea, bebalambukishe ha mafuku a Sabado. 32N’abo abakanyine ku lulambukisho lwe; mwanda eyi die dibadi na matalwa.

33Mu kitumbwilo mubadi muntu na kiso kia kikudi kibi, kibēle musase n’eyi dikata’shi, 34Aaa! twi n’obe mwanda kinyi obe Yesu a Nasaleta? Bofiki kwitulwisha su? Nankwiuk’obe n’obe Muhatulwe-a-kishila ’Efile Mukulu. 35Biabia Yesu bamusashile’shi: Umina nyaa, tuka munda mwe. Biabia kikudi kibi hakumuhonesha hashi munkatshi mwabo, batukile munda mwe, tamukumbile, ooo. 36N’abo boso abakanyine, abākushene munkatshi mwabo’shi: Dino eyi ndia kinyi? mwanda akamikā bikudi bibi na matalwa na bukome, n’abio abituku. 37Biabia ntumbo ye yibahalakene ku mpese yoso ya nsenga yibadi hehi.

38Henyihaha bēbwele mu kitumbwilo, batwēle mu nshibo ya Shimona. Muko a Shimona mukashi badi mukwatwe na busungu bukata bwa mbidi yi kālo; biabia abamwiyayile ha mwanda we. 39Biabia bayinamine kwadi, batosheshe busungu bwa mbidi yi kālo, bubamukatukile: kahindji n’aka babukile, ebafubila.

40Henyihaha nguba hakuhona, aba bantu boso abadi na bakumbi ba masungu a bihaso na bihaso, abebafishishe kwadi; batentekyele boso maas’e, bebahashishe. 41Bikudi bibi namu bibatukile munda mwa bantu be bungi, bibēlele musase’shi: Obe we Kidisitu Mwan’Efile Mukulu. Bebisashile na kwibilekesha kwakula: mwanda bibamwiukile’shi, E nyi Kidisitu. 42Habubatokyele, bakatukile, bayile mu mahia a kabāka: na bibumbu bia bantu bibadi abimukimbi, abafikile kwadi kumushadika’shi: Tokatukanga kwatudi. 43Biabia bebalungwile’shi: Tandji n’au ngwa kulungula mukāndu-wibuwa wa bufumu bw’Efile Mukulu ku bingi bibalo namu: nyiu natuminwe. 44Binyibiabia balungule (mukānduwibuwa) mu bitumbwilo bia mu Ngadilea.

Currently Selected:

Luka 4: NTLK52

Highlight

Copy