Mateo 14

1Mu aa mafuku (nfumu) kilolo Heloda, bahushishe ntumbo ya Yesu; 2bakwile kwi bafubi be’shi: Uno nyi Yoano mubatshishi basangukile ku lufu: biabia bikitshino bia bukome abimwekyelwa mwadi.

3Mwanda Heloda bahwile kukwata Yoano kala, bamwanyine, bamwelele mu nshibo ya lukano ha mwanda wa Helodiasa, mpian’a mukwabo Fidipa. 4Mwanda Yoano badi mulungule’shi: Nyi kishila kumuata. 5Na habakyebele kumwihā, batshine kibumbu, mwanda’bo abamutemwine bu mutemuki. 6Anka hakubafikile efuku dia kusehela kwa kutandwa kwa Heloda, mwana mukashi a Elodiasa badi ashimasha munkatshi mwa’bo, baseheshe’shimba dia Heloda. 7Ha uno mwanda batshihile mutshiho’shi; Nankakuha kioso kiotekye. 8N’e, badi mulungudibwe kwi nyin’e kwibedi’shi: Ompe anka hano, mutwe wa Yoano mubatshishi mwilonga. 9Biabia eshimba dia nfumu dibafitshile; anka ha mwanda wa mutshiho we, n’ababadi bashale n’e ha bidibwa, bakamikile’ shi; muhe’yo. 10Batakwile, bakukatshiba mutwe wa Yoano mu nshibo ya lukano. 11Mutwe we ubafishishwe h’elonga, ubahelwe kwi nsongwakashi; n’e beufwishishe kwi nyin’e. 12Henyihaha balondji be abafikile, abātshile mbidi, abeishikile, abayile mu kulungula Yesu.

13Habeuhushishe Yesu, bakungulukile hanka mu bwato, mpaa namu kabāka ka ku luhese; habeuhushishe bibumbu, bibatukile mu bibalo, bibamulondele mu ngwa. 14Yesu batukile mbwato, bamwene kibumbu kikata, bakwatshibwe na kanye kakishekishe kwabadi, bahashishe basha masungu.

15Hakufika kiolwa kukilutokena, bana be-ba-bukishi abafikile kwadi’shi; hano nyi kihindji kia kabāka, nguba namu bende; halakasha kibumbu kiabadia kwenda mu bibalo mu kwiudila biakudia. 16Anka Yesu bebalungwile’shi: Ta be na kia bakatukila, anwe nwibahe biakudia. 17Abo abamwalulwile’shi: Twi n’anka mitanda ya mikate itano, na mishiha yibidi kuno. 18E bambile’shi: Nwiifwishei kwandji’mi. 19Balungwile kibumbu kushala ha nyoe; bātshile mitanda ya mikate yitano, na mishiha yibidi, batadile kwiilu, beitekyele mwabi, beitshokwele, bahele mitanda ya mikate kwi bana be-ba-bukishi, na bana ba-bukishi beihele kibumbu. 20Na boso abadīle abekwite; abasangwile bia bifingifingi bibashele, bisele bwikumi na bibidi. 21N’abo abadīle babadi bana balume bu binunu bitano, na bana bakashi na bana namu.

22Kahindji n’aka Yesu banyishishe bana babukishi kukekila mbwato, na kubadila kumpala kwe ku adi’eshia, mpa n’ahabahalakeshe bibumbu. 23Habadi ahalalasba bibumbu, bakamine ku ngulu buhenka bwe mu kuteka Efile; habafikile kiolwa kwi lutokena, badi kwanka buhenka. 24Anka bwato binobino bubadi munkatshi mwishiba, bu batenkatenka na mambundambunda (a mema), mwandaluhahi lubadi aluhukuma kumpala. 25Ha kilo kia kananka kia bufuku, Yesu bayile kwabadi, atambuka hanundu ha mema. 26Bana ba-bukishi, habamumwene atambuka hanundu ha mema, abakwetwe na katshima munda’shi; Nyi kikudi; abasamine kudila ha mwanda wa moo. 27Anka Yesu kahindji n’aka bebambile’shi; Sangulushai mashimb’enu, n’ami uno, tanutshinanga moo. 28Henyihaha Petelo bamwālulwileshi; A Mwanana, su n’obe, ondungule nfikye k’odi ha mema. 29Bamulungwile’shi: Fikanga; Na Petelo hababukile mbwato batambukile hanundu ha mema, tende kwi Yesu. 30Anka habamwene luhahi lubadi aluhukuma, bakwatshilwe na moo; na hakubanga kwitshika, belele musase’shi: A nfumwa’mi, mpashe’mi. 31Kahindji n’aka Yesu bōlwele mboko, bamukwete, bamulungwile’shi: Aeee! Obe sha lukuluhilo luhela, a ha kinyi hodi na mealasheno? 32Habayikile mbwato, luhahi lubalekeshwe. 33Henyihaha abo babadi mbwato abafikile, abamulangwile’shi; Binyibinyi, obe we mwan’Efile-Mukulu.

34Habadi abuka adi’eshia, abafikile ku nsenga ya Ngenasalete. 35Habamwiukile bantu b’alwa luhese, abatumine ku nsenga yaiya yoso yifunye, abamufwishishe boso abakumbu kubofula kwa mbidi. 36Abamusendele’shi; tukume anka mutelo wa kifwalwa kie; na boso abamukumine babadi bahashibwe mpaa.

Currently Selected:

Mateo 14: NTLK52

Highlight

Copy