Mateo 15

1Henyihaha abafikile kwi Yesu Bafundji-ba-mikanda, na Bafadiseo, baba ba mu Yelusalema, eshi: 2A nkinyi bana bobe ba bukishi abashula lungalunga lwa bakulu, mwanda tabeoshā māsa habadile bidibwa? 3Ank’e bebālulwile’shi: A nkinyi anwe namu anushula mulangilo w’Efile-Mukulu na lungalunga lwenu? 4Mwanda Efile-Mukulu bakamikile’shi: Nemekai shobe na nyin’obe; dimo’nyi’shi; Yawa akaa nshye sunga nyina afwe lwinyi lufu. 5Ank’anwe’shi: Muntu ese akākula kwi nshye su kwi nyin’e: Kintu kiokyebanga kutambula kwandji’mi, tankia mulambu kw’Efile. 6E namu tanemeka nshye sunga nyin’e (akekala bu muluñantu) Biabia nyi mwa nushilwilwa mulangilo w’Efile-Mukulu ku lungalunga lwenu. 7Anwe bansesa, Esaiye benutemukidile’nwe biya’shi: 8Bano bantu abefubula kwandji’mi na mukanwa mwa’bo, aba’nemeka na milomo yabo, anka eshimba diabo di kula n’ami. 9Anka abandangwila bu bisumanga, kwete kulambukisha lulambukisho, yingi milangilo ya bantu.

10Baitanyine kibumbu, bebalungwile’shi: Hushai, nushingule: 11Kushī kiakia akitwele mukanwa akīlwisha muntu, ooo; anka kiakia akituku mukanwa nyi akilwisha muntu. 12Henyihaha bana be-ba-bukishi abafikile, abamwihwishe’shi: Twemwiuka’shi, Bafadiseo babadi abakokolwe habadi abehusha uno mwanda? 13Anka e bebālulwile’shi; Mutshi woso ushī ukunwe na Shami a mwiilu aukashudibwa. 14Nwibalekye, abo mbampofu, bakunkushi ba bampofu; biabia su bampofu abakunkusha bampofu, bubidi bwabo abakahono mbwina. 15Binyibiabia Petelo bamwālulwile’shi; Etuhatulwile uno mwele. 16Yesu bambile’shi: Anwe namu nukī bashī bashingulwe su? 17Tanukī beuke’shi, bioso abitwela ’mukanwa abiende mwifu, abisumbulwa mu nkumbu? 18Anka’bia bintu abituku mukanwa abifiki kwishimba, n’abio abilwisha muntu. 19Mwanda kwishimba akutuku binangu bibi, matombo, masandji, makyebanokyebano, bwifi, misambo ya madimi, bakānyi-ba-milomo. 20Nyi bino bintu abilwisha muntu; anka kudia biakudia na māsa ashī eoshwe, ta kulwisha muntu, ooo.

21Henyihaha Yesu bakatukile kwanka, bayile mu mpese ya Tyile na Sidono. 22Henyihaha talangai, mwana mukashi mwina Kanana bakatukile mu yaya mpese, bamwele musase’shi: Onfwile lusa, Mwanana, mwan’a Dafidi, mwana’nde mukashi bamweshwa malwa na mukishi ubi. 23Anka e tamwalule sunga kishima; Na bana be-ba-bukishi abafikile, abamusendelele’shi: Mutume, mwanda etudidila’twe. 24Anka e bālulwile’shi; Nki mutuminyibwe, anka ku mikoko yishimine ya ku nshibo ya Bena Isalele. 25Binyibiabia bafikile, bamulangwile’shi: A Mwanana, onkwashe’mi. 26Anka e bamwālulwile’shi; Tankuhwandji kile kuata mampa a bana, na kwisohela kwi mbwa. 27Anka e bamwālulwile’ shi: A Nfumwami mbinyibinyi, anka sunga mbiabia mbwa ayidi bifingifingi ayihono ku mesa kwa nfumu ayo. 28Henyihaha Yesu bamulungwile’shi: A mwana-mukashi, lukuluhilo lwobe ndukata akikukitshinwe’nka mo kyebela. Na mwan’e mukashi badi muhashishwe ank’akia kihindji. 29Yesu bakatukile kwanka, befubwile hehi na kwishiba dia Ngadilea; bakamine ha ngulu, bashalele hanka. 30Bibumbu bikata abifikile kwadi, babadi n’abo basha bilema, bampofu, tumama, balemane, na bangi be bungi namu, bebatudile hashi ku ngwa ya Yesu; n’e bebahashishe. 31Nyi h’anka biabia kibumbu kia bantu abakanyine, habamwene tumama atwakula, na balamane tabadi musangyelo, basha bilema kutambuka, na bampofu abatala: Biabia abatumbishe Efile-Mukulu a Isalele.

32Henyihaha Yesu baitanyine bana be-ba-bukishi kwadi e eshi: Nyi na kanye ku kibumbu, mwanda abashala n’ami binobino mafuku asatu, tabe na biakudia namu; tankebatakula na nsala, tala bakahungila mwishinda. 33Bana beba-bukishi abamulungwile’shi: Atumono kwi kunyi mampa e bungi muno mahia a bisumanga, mwa kwikutshisha kibumbu kikata ki bino’nyi? 34Yesu bebehwishe’shi: A nwi na mampa anga? Abamwitabile’shi: musambobidi na kisoselo kia tushiha. 35E bakamikile kibumbu kushala hashi. 36Bātshile mitanda ya mampa musambobidi na mishiha, batumbwile Efile-Mukulu, beitshimwine, beihele bana-beba-bukishi, n’abo kwi kibumbu. 37Boso abadīle, abekwite; abasangwile ku bifingifingi bibashele bisele musambobidi biule ndaa. 38Abo abadīle babadi balume bu binunu binanka, na bakashi na bana namu. 39Biabia bahalakene kibumbu, bayikile mbwato, bafikile ku bukunkula kwa Mangadala.

Currently Selected:

Mateo 15: NTLK52

Highlight

Copy