Mateo 17
17
1Habakile mafuku asamombo Yesu bātshile Petelo, Yakoba, na mukwabo Yoano, bakamine n’abo mu ngulu yila, buhenka bwabo. 2N’E bālulukile kumpala kwabo; mpala ye yibahenyahenya bu nguba, na bilamba bie bibālulukile bitoka bu kanya. 3Talangai, kubebamwekyelwe Mosesa na Elaidja, abadi abākula n’e. 4Henyihaha Petelo bālulwile kwi Yesu’shi: A Nfumwetu, mbibuwa atwe kwikala hano; s’okyebe, tushimikye bitanda bisatu hano; kimune nkiobe, kingi kia Mosesa, na kikwabo’nyi kia Elaidja. 5Habadi kwete kwakula, talangai, ekumbi ditoka selelee dibebahutshile; talangai, eyi dibatukile mwikumbi’shi: Uno nyi mwan’ande a kifulo andji mutokyele mwishimba, numuhushei. 6Habedihushishe, bana-be-ba-bukishi, abahonene hashi ha mahala’bo, abatshinyine bimoo. 7Binyibiabia Yesu bafikile bebakumine, bakwile’shi: Ebwei, tanutshinanga. 8Hababulwile meso abo, tabamwene muntu, anka Yesu buhenka. 9Habadi abayiki ku ngulu, Yesu bebakamikile’shi; Tanulungulanga muntu mwanda wa kimonwa, mpaa n’ahakasanguka dimo ku lufu Mwan’a Muntu. 10Bana-be-ba-bukishi abamwihwishe’shi: A binyibiabia, a nkinyi bafundji-ba-mikanda abākula’shi: Elaidja badi akubadila kufika? 11Yesu bebālulwile’shi: Binyibinyi Elaidja badi akubadila kufika mu kulumbula bintu bioso. 12Anka’ mi nenulungula’shi: Elaidja tahwile kufika kala; anka’bo tabamushingule; abamukitshine bioso bia babadi abakyebele. Anka biabia namu Mwan’a Muntu akafwambuka kwabadi. 13Henyihaha bana-ba-bukishi abashingulwile’shi, Etwakula mwanda wa Yoano Mubatshishi.
14Habafikile kwi kibumbu, kubafikile muntu kwadi, bamufukamine, bakwile’shi: 15A Mwanana, fwila mwan’ande mulume lusa; mwanda e na mombe, amono malwa e moo: misusa na misusa ahono mu kālo, na mu mema hamunenka. 16Namufwishishe kwi bana-ba-bukishi bobe, n’abo abakutshilwe kumuhasha. 17Henyihaha Yesu bālulwile’shi: A ee, anwe kifuko kishī na lukumino, na basha mpuha; kihindji kiankekala n’enu kinyingye ki na minyi? mufwishe kuno kw’andji’mi. 18Biabia Yesu basashile mukishi; n’e bakatukile mwanka; na mwana bahashishwe ha kiakia kihindji kīnyi. 19Henyihaha banaba-bukishi abafikile kwi Yesu ku luhese, eshi: A nkinyi kiatushībeukye kumutusha? 20Yesu bebalungwile’shi; Mwanda wa kushīlukumino lwenu; mwanda binyibinyi nenulungula’mi’shi: Su anwe nwi na lukuluhilo aluhwandjikila na katete ka mutāde, anukalungula yino ngulu’shi, katuka kuno wend’ekwaa, n’ayo ayikakatuka; takukekala kintu akikenukambila. 21Sunga biabia, kino kihaso (kia mukishi) taukatukanga anka ku nteko na kushila kwa biakudia.
22Habadi bekale mu Ngadelea, Yesu bebalungwile’shi: Mwan’a Muntu akehulukwa mu māsa a bantu; 23abakamwihā, na h’efuku dia kasatu akasangulwa dimo’nyi. Abo, abafitshile bibi ku mashimba.
24Biabia habadi bafikile mu Kahenauma, baba abatambwile milambu abafikile kwi Petelo, abamwihwishe’shi: Mulambukishi enu tafutā kitadi su? 25Eshi, ee (afuta). Habatwelele mu nshibo, Yesu babadidile kumwihusha’shi: Otentekyesha na minyi Shimona? Banfumu ba hanohansenga abatambula milambu kwi banyi? kwi bana babo’nyi, su kwi benyi? 26Petelo bamwālulwile’shi: Kwi bēnyi. Yesu bamulungwile’shi; Biabia bana be be baluñantu. 27Sunga mbiabia, tala twebakokoshanga, obe ndanga kwdshiba, wele’mo bulobo, wāte mushiha aubadila kulobola, na hakwiuasamisha mukanwa, okamono lufalanga lwa shekela mwanka. Wate’lo webahe’lo ku kitadi kiande na kiobe.
Currently Selected:
Mateo 17: NTLK52
Highlight
Share
Copy
Want to have your highlights saved across all your devices? Sign up or sign in
© 1952 Alliance Biblique de la République Démocratique du Congo
