Mateo 18
18
1Ha yinyi nsa bana-ba-bukishi abafikile kwi Yesu’shi: Mu Bufumu bw’Efile-Mukulu, a mukile bukata nanyi? 2Yesu betanyine mwana mukinga kwadi, bamutudile munkatshi mwabo; 3eshi; Binyibinyi, nenulungula’shi: Su tanwi bālule mashimba kwikala bu bana bakinga, tanukatwele mu Bufumu bwa mwiilu, ooo. 4Binyibiabia muntu oso akehelesha bu uno mwana, e winyi mukile bukata mu Bufumu bwa mwiilu. 5Na muntu oso atambula mwishina diande umune bu uno’nyi, antambula’mi. 6Anka muntu oso akakokosha umune a bano bana abakumina mwandji’mi, nkikile buwa kwi’wa (muntu)’ shi, ebwe dia kuhela bukula dimwanyine ku nshingo ye, eshīkye mu bula bwa mema-akata.
7Mpombo kwi bahanohansenga, ha mwanda wa biakukokosha! Mwanda biakukokosha tabikakutwa kufika; anka mpombo kwi yawa akebifwisha. 8Binyibiabia su easa diobe, sunga lwā lwobe abikokosha, webitshibe, webisumbule; mwanda nkikile buwa obe kutwela mu muwa na kishetshi sunga nkilema, na he kwikala na māsa abidi, sunga ngwa yibidi, na kwelwa mu kālo ka ikalaika. 9Su eiso diobe adikukokosha, editongobole, wedisumbule, mwanda kutwela mu muwa n’eiso dimunenka, nkikile buwa kwedibwa mu kālo ka Ngehena na meso abidi. 10Dimukai, tanubendanga umune a bano bana, mwanda nenulungula’shi: Mwiilu bamwikeilu babo ababandjile mafuku oso mpala ya Shami e mwiilu. 11Mwanda Mwan’a Muntu bafwile mu kuhasha kibadi kishimine. 12Anwe anutentekyesha naminyi? Su muntu e na mikoko lukama, ahakashimina umune, takalekye yaya yi makumi kitema na mikoko kitema, ēnde mu mangulu mu kukimba wawa batuhilw’eshinda su? 13Na su akeumono, binyibinyi nenulungula’shi: Akakidi kusehela ha mwanda w’awa mukoko, na he yaya yi makumi kitema na kitema yishī badi yishimine. 14Anka biabia namu, eshimba dia Shyenu e mwiilu tadikakyebe’shi, umune ā ku bano bana bakinga akashimina, ooo.
15Dimonyi, su mukwenu akakusola mwanda, wende, omulungula kusola kwe, obe n’e bubidi bwenu buhenka; su akakuhusha, biabia bohu kumwobesha. 16Anka su e akahele nkuhusha, wende na mungi su bangi babidi, eshi, ’mukanwa mwa tumonyi tubidi su ntusatu, bishima bioso abikashimata. 17Su e akahele kwibahusha, olungula kikofieno ki’Efile; anka su akahele kuhusha kikoñeno ki’Efile, ekale bu musendji na bu musangishi-a-milambu kodi’be. 18Binyibinyi nenulungula’shi: Kioso kianukānya hano hashi, akikānyibwa mwiilu; na kioso kianukahosola hano ha nsenga, akikāhosolwa mwiilu. 19Dimonyi nenulungula’shi: Su babidi bwēnu anukalombana hano ha nsenga ha kintu kioso kianutekye, akikenukitshinwa kianka kwi Shami e mwiilu. 20Mwanda habakekoñena mwishina diande su mbabidi su mbasatu, biabia ami nyi munkatshi mwabo.
21Binyibiabia Petelo bafikile kwadi, eshi, A Nfumwami, mukwetu akansola mwanda misusa yinga n’ami kumulekyela? mpaa na misusa musambobidi su? 22Yesu bamwālulwile’shi; Ami tankulungula’shi, mpaa na ku misusa musambobidi, ooo, anka mpaa na ku misusa makumi musambobidi.
23Binyibiabia Bufumu bwa mwiilu mbuhwandjikila na nfumu badi akyebe kulumbula na bahika be. 24Hababangile kubadika, umune badi mufwishwe kwadi e badi n’e kishio kia ntalenta bu binunu ekumi. 25Anka ha mwanda tabadi n’abio kufuta, Nfumu e bakamikile’shi: Bibuwa aulwe, na mpian’e na bana be, na bioso bibadi n’abio, eshi afute kishio. 26Biabia yawa mpika bahonene hashi, bamulangwile’shi: A Mwanana ekale n’ami lwishinko, n’ami nankakufuta bioso. 27Henyihaha nfumu a winyi mpika bakwatshilwe na kanye, bamuhoswele, bamulekyele kishio. 28Anka winyi mpika bakatukile, bahetele mungi mpika n’e, badi n’e kishio kia nfalanga ya ndenadi bu lukama; e bamukwatshile, bamufinyine lukono’shi: Nfute kibonahwile. 29Mpika n’e bahonene hashi ku ngwa ye, bamusendele’shi: Ekale n’ami lwishinko, n’ami nankakufuta bioso. 30Ank’e batunyine, bayile, bamwele mu nshibo ya lukano, mpaa na hādi akafuta kishio. 31Biabia habamwene bangi bahika n’e mubakitshinyinwe, abenyengyele ’mashimba, abafikile kulungula Nfumwabo bioso bibadi bikitshinwe. 32Henyihaha Nfumu e hakumwitanyine, bamulungwile’shi: Obe mpika mubi, nakulekyela kiakia kishio kioso, mwanda bonyiyayile. 33N’obe namu tobodia kufwila mpika n’obe lusa, mu nakufwidile lusa’nyi? 34Biabia nfumu e badi na nsungu, bamufwishishe kwi ba kumwesha malwa, mpaa n’ahakafuta kishio kioso. 35Anka biabia namu akikenukitshinwa kwi Shami e mwiilu, su anwe mu mashimb’enu, tanukalekyela bakwenu kusola kwa myanda yabo, muntu na mukwabo muntu na mukwabo.
Currently Selected:
Mateo 18: NTLK52
Highlight
Share
Copy
Want to have your highlights saved across all your devices? Sign up or sign in
© 1952 Alliance Biblique de la République Démocratique du Congo
