Mateo 19
19
1Bitabibakitshine, habahwile Yesu kwakula yino myanda bakatukile ku Ngadilea, batwelele mu mpese ya Yudea, adi’eshia dia Yodano. 2Bibumbu bikata bibamulondele, E bebahashishe hanka.
3Bafadiseo namu abafikile kwadi, babamutompele’shi: Nyi nkishila muntu kubinga mpian’e su mpa mwanda kinyi, su mpa mwanda kinyi su? 4E bebālulwile’shi: Tanwi babale’shi: Yawa bebahangile ku mbangilo, bebahangile bu mulume na mukashi? 5Bambile’shi: Ha uno mwanda mulume akalamunuka nshye na nyin’e, akalamata kwi mpian’e, na bubidi bwabo abakekala tambidi yimune? 6Biabia tabakī babidi, ooo, anka bu mbidi yimune. Binyibiabia akia kibalungile Efile-Mukulu muntu takumanga kwikitshiba, sunga ngumune. 7Abamwambile’shi: A binyibiabia, mwanda kinyi Mosesa bakamikile’shi: Bibuwa bamuhe mukanda wa kuhwisha bulunda, na kumukatusha? 8Bebālulwile’shi, ha mwanda wa bukoho bwa mashimb’enu, Mosesa bakuminyine’nwe kukasha bakashi benu, anka ku mbangilo takubadi biabia, ooo. 9N’ami nenulungula’shi: Muntu ese akasha mpian’e, anka su ha mwanda wa lukyebanokyebano akabamba mungi, biabia basolo mwanda w’ebasa: ese muntu namu abamba mukashi mutushwe biabia basolwe ebasa namu.
10Bana-be-ba-bukishi abamulungwile’shi: Su mwanda wa mulume na mukashi wi biabia, kubamba takwi buwa. 11Anka E bebalungwile’shi: Bantu boso tabeuku kutambula uno mwanda, anka baba beuhebwe. 12Mwanda kwi batungulwe abatandjibwe biabia mpaa na ku mafu a banyin’abo; kwi bamo batungulwe namu, abakitshinwe biabia kwi bantu; kwi batungulwe namu abekitshine abo banabene bu batungulwe ha mwanda wa bufumu bwa mwiilu. E, euku kutambula uno mwanda atambule’o.
13Henyihaha bana bakinga babidi abamufwishishwe’shi, atentekye māsa mu kwibatekyela; anka bana-ba-bukishi abebatosheshe. 14Anka Yesu bambile’shi: Kuminai bana bakinga, tanwibatoshanga kufika kwandji’mi, mwanda bufumu bwa mwiilu nyi anka bu abo. 15E bebatentekyele māsa, bakatukile kwanka.
16Talangai, umune bafikile, bamwihwishe’shi: Mulambukishi e buwa, nankakitshi kinyi kibuwa kia kumwena muwa wa ikala-ika? 17Bamwālulwile’shi: A nkinyi kiontemwina’mi bu ebuwa? Takwi ebuwa, anka umune, yawa Efile-Mukulu; Anka s’okyebe kutwela mu muwa, olame nyi bishila. 18Bamwambile’shi: A bishila kinyi? Yesu bambile’shi: Twehanga muntu, twendanga lusandji, twibanga, todimbilanga mukwenu madimi. 19Nemeka shobena nyin’obe; Okafule mukwenu kifulo bu’be na mwinyi. 20Yawa nsongwalume bamwakwile’shi: Bino bioso nebilamine mpaa na ku bukinga bwande; kiandji mukutwe nkinyi? 21Yesu bamulungwile’shi: S’okyebe kwikala mulombashwe mpaa, nd’okahane bioso biodi n’bio, okebihe balanda, biabia biokikamona bineme mwiilu; ofikye, ondonde. 22Anka nsongwalume habeuhushishe, bakatukile n’eshimba difite fututu; ha mwanda badi na buheta bwi bungi.
23Henyihaha Yesu balungwile bana-be-ba-bukishi’shi: Binyibinyi nenulungula’shi: Kwi bukoho muntu mpeta kutwela mu Bufumu bwa mwiilu; 24Na dimonyi nenulungula’shi: nkikilekubofula (nyama) ngamedia kutwela mwiiso dia shindanyi, na he muntu mpeta kutwela mu Bufumu bwa mwiilu. 25Bana be-ba-bukishi, hababeuhushishe, abakanyine bikata, tabamwihusha’shi: A biabia akahanda nanyi? 26Anka Yesu bebatadile swee, bebalungwile’shi: kino nkikambilwe na bantu, anka kw’Efile-Mukulu bintu bioso abiuku kukitshibwa.
27Binyibiabia Petelo bamwālulwile’shi: Talanga, atwe tubalekye bioso, tubakulondo; A biabia atukatambula kinyi? 28Yesu bebalungwile’shi: Binyibinyi nenulungula’shi: Anwe abandondo baba mwifuku dia kuhangilwadimo, ahakashala Mwan’a Muntu ha luhun’a nsulu lwe lwa ntumbo, anwe namu anukashala ha mpun’a nsulu ekumi na yibidi, anukatshibila myanda ya bisamba ekumi na bibidi bia bena Isalele. 29N’ese muntu akuleka mashibo e, su mbakwabo balume su mbakwabo bakashi, su nshye, su nyina, su mpian’e, su bana, su nsenga, ha mwanda w’eshina diande, akatambula bifwime misusa lukama, akahyana namu muwa wa ikala ika. 30Anka be bungi ba kwibedi abakekala kunyima; na ba kunyima abakekala bu ba kwibedi.
Currently Selected:
Mateo 19: NTLK52
Highlight
Share
Copy
Want to have your highlights saved across all your devices? Sign up or sign in
© 1952 Alliance Biblique de la République Démocratique du Congo
