Mateo 20
20
1Mwanda Bufumu bwa mwiilu mbwifwane na sha nshibo, batukile namashika ese mu kutula bafubi mwifuba die dia nfinyo. 2Habahwile kulombashena n’abo mwa kwibafutshila nfalanga ya ndenadi kwifuku, bebatumine mwifuba die. 3Ha nsa yisatu E batukile, bamwene bangi bemane bisumanga ku kisalwe; 4Bebalungwile’shi: Ndai anwe namu mwifuba, na kioso akilombana, nankenuha’kio; N’abo abayile kwanka. 5Dimonyi, batukile hehi na nguba mitwe, na ha nsa yisatu ya kiolwa bakitshine mpamune. 6Habafikile nsa hehi yitano, batukile, bahetele bangi bemane bisumanga; bebalungwile’shi: A nkinyi nwibemane hano bisumanga ngub’ese? 7Abamwalulwile’shi: Mwanda takwi muntu betuhele mufubo. E bambile’shi: Ndai namu mwifuba dia nfinyo; na kioso akilombana nankenuha’kio. 8Biabia nguba hakuhona, sh’ēfuba balungwile mulami a bintu bie’shi: Itanyina bafubi, webahe efuto diabo, kubanga na a kunfundilo, mpaa n’a kwibedi. 9Habafikile baba abatudilwe mufubo ha nsa yitano, abatambwile muntu ndenadi, muntu ndenadi. 10Anka habafikile baba ba kwibedi, abatentekyeshe’shi: Atwe atukakila kutambula; n’abo namu abatambwile muntu ndenedi, muntu ndenedi. 11Habadi abaditambula, tabamumūna sh’efuba’shi: 12Bana ba ku nyima abafubile nsa umune, n’obe, bwebahwandjikisha hamunenka n’atwe abatuhutanga na kanya ngub’ese. 13Anka E bālulwile kwi umune a abo’shi: A kūku, nkimukukitshine shī buwa, ooo, atatubalombashene efuto dia ndenadi umune su? 14Ata kiakia nkiobe, wende; nankaha uno a kunfudilo munakuhela’be. 15Bi kishila kukita bintu biande mwa nkyebela ami na mwinyi su? Eiso diobe di bubi su mwanda’mi nyi buwa’nyi? 16Biabia e a kunfudilo akekala bu a kumpala, n’a kumpala akekala bu a kunfudilo; mwanda be bungi abetanyinwe, anka bahela abasangulwa.
17Yesu hakukamina ku Yelusalema, bātshile bana-be-ba-bukishi buhenka bwabo mwishinda, bebalungwile’shi: 18Talangai, biatwende ku Yelusalema, na Mwan’a Muntu abakamwihulukila kwi batshiite-bakwidi bakata, na kwi bafundji-ba-mikanda, n’abakamuhīsha mpaa na ku lufu. 19Abakamutula kwi Badjentaila, mu kumusenga, na kumukuhila, na kumubamba ha mutshi uhingakane, na kwifuku dia kasatu akasanguka dimonyi.
20Henyihaha kubafikile kwadi, nyin’a bana ba Sebede na bana be balume, kwete kumulangwila, na kukyeba kintu kwadi E. 21Bamwihwishe’shi: Okyebe kinyi? E bamwā-lulwile’shi: Akula bano bana bande balume babidi, bashale mu Bufumu bwobe, umune ku mboko yi balume, mungi ku mboko yi bakashi. 22Anka Yesu bālulwile’shi; Tanwiuku bianutekye. Anwiuku kutoma kwikoho diankatomo’mi su? sunga nkubatshishwa na lubatshisho lwankabatshishwa n’alo’nyi? Abamulungwile’shi; Atwiuku. 23E bebalungwile’shi: Anukatomo binyibinyi kwikoho diande, anukabatshishwa na lubatshisho lwanbatshishibwa n’alo; anka kushala ku mboko yande yi balume na ku yi bakashi, tankwande kuha, ooo, anka akikahebwa baba babalumbulwilwe kwi Shami. 24Habeuhushishe ba b’ekumi, abakwatshile nsungu kwi bakwabo babidi. 25Anka Yesu bebaitanyine kwadi E’shi: Anwiuku’shi, banfumu ba Badjentaila abebamunu namu nganka Badjentaila, na baba nyi bakata abebamunu na matalwa. 26Anka takikekalanga biabia munkatshi mwenu, ooo; anka muntu ese akukyeba kwikala bu mukata munkatshi mwenu, ekale bu mufubi enu; 27Muntu ese namu akyebe kwikala hanundu henu, ekale bu mpik’enu: 28Mwanda Mwan’a Muntu tamufwile kufubilwa ooo; anka kwibafubila, na kuhana muwa w’e bu nkūlo ya be bungi. 29Habadi abatuku ku Yediko, kibumbu kikata kibamulondele.
30Talangai, bampofu babidi abadi bashale ku bukunkula kw’eshinda; habahushishe’shi, Yesu ngiu akidi, abēle musase’shi: Etufwile lusa, obe Nfumwetu, Mwan’a Dafidi. 31Binyibiabia kibumbu kibebatosheshe’ shi; Uminai; anka’bo abanyishishe kwela musase’shi: Etufwile lusa obe Nfumwetu Mwan’a Dafidi. 32Yesu baimene, bebetamine’shi: A nkinyi kianukyebe’mi nyi nukitshine? 33Abo namu’shi: A Mwanana, meso etu abulukye 34Biabia Yesu bebakwatshile kanye, bebakumine meso abo; biabia, kahindji n’āka meso abo ababulukile; Tabamulondo.
Currently Selected:
Mateo 20: NTLK52
Highlight
Share
Copy
Want to have your highlights saved across all your devices? Sign up or sign in
© 1952 Alliance Biblique de la République Démocratique du Congo
