Yoane 18

1AKI Yesu otefelaka baoyi’ako, ende l’akimi’akae baolola, ko baofend’ikeli ya Kilidona, ko baolotswa nda lisala liki eko, ende l’akimi’akae. 2Ko Yudasa, ondoangel’ende eaki itenela iko: eki Yesu otakanaka l’akimi’akae eko betakana beuke. 3Aki Yudasa oamba boloi wa soldats la police lim’ele nkanga ya joso la Bafalusi aocw’eko la totswa la benoi, la bifeko bi’etumba. 4Nd’ewel’eki Yesu oeaka baoyi’auma bacw’okelam’el’ende, aolola, ko aolakela, Ondas’inyo na? 5Baoloamba, Yesu owa Nazaleta. Yesu aolakela, Em’one. Ko Yudasa, ondoangela, akemi eko l’iyo. 6Aki’nd’okelaka Em’one: baolututa, ko baokwa nd’amoci. 7Aolauola lenkina, Ondas’inyo na? Baokela, Yesu owa Nazaleta. 8Yesu aolamba, Nsangelak’inyo, Em’one; nkina londas’emi, kela bane bakende ek’iyo; 9la ncina wete joi liki’nd’okelaka likelame, Lim’el’iyo baki w’onkaaka ncicwey’omoko. 10Simona Petelo, oki la ifaka y’etumba, aolosol’iko, ko aokota bokwala owa nkanga ea joso mongo, ko aotena litoi likae se. Lina ja bokwala’oko wete Maluko. 11Yesu aokela Petelo, Il’ifaka nd’ekofa: ekala eki Fafa ekami onkaaka, la mpaomel’eko nde?

12Nkako boloi wa soldats, la capitaines la police b’a-Yuda baokanda Yesu ko baolotungya, 13ko baolotomba nd’okala ele Anasa, oki bokilo owa Kayafa, nkanga ea joso mongo nd’année eko. 14Kayafa aki wae ende ondosangelaki Ba-Yuda wae eonga wete bont’omoko awe nd’eloko ea bant’auma.

15Koko Simona Petelo la bokimi’omo baokima Yesu. Nkanga ea joso mongo aolea bokimi’oko, ko ende aolotswa la Yesu nd’ilombe ya nkanga ea joso mongo. 16Lolo Petelo aolemala nd’anza nda joso ja wiso. Nkako bokimi’oko oki nkanga ea joso mongo oeaka, aolola, ko aotefela la bomoto ondesanyaki wiso, ko aolotsweya Petelo. 17Nkako bomoto ondesanyaki wiso aokela Petelo, W’ofa omo ow’akimi b’ont’one? Ende akela, Emi, nye. 18Bakwala la police bakemi eko, ek’iy’oambolaka tsa ta baala: nd’ewel’eki mpio: ko boka tsa: koko Petelo akemi l’iyo, ko oka tsa.

19Nkanga ea joso mongo aoluola Yesu nd’eloko ea bakimi’akae ko la lilako likae. 20Yesu aoloamba, Njotefeela banto’auma nd’esayenge: ndakaki banto nd’asunagoga wengi’aefa, ko la nd’ilombe ya Nzakomba, wae totenela totakanaka Ba-Yuda; ko ncitefela joi limoko ja wisisa. 21Onjuol’emi lae? W’auol’iyo bandokaki baoyi baki’m’oasangelaka: bala, bane bea baoyi baki’m’otefelaka. 22Aki’nd’otefelaka baoyi’ane, omo owa police akemi eko ko aosakola Yesu lotaka, akela, Wamba nkanga ea joso mongo eleng’eko? 23Yesu aoloamba, Nga ntefelaki bobe, sanga bobe’oko: lolo ng’olotsi, onsakola lae? 24Nkako Anasa aolotoma ele Kayapa, nkanga ea joso mongo, ntungama.

25Simona Petelo akemi ko oka tsa. Baolokela, We ofa omo ow’akimi’akae? Aolangana, akela, Emi, nye. 26Omo ow’akwala ba nkanga ea joso mongo, oki eoto ea bonto oki Petelo otenaka litoi, akela, Ncikenaki we nda lisala l’ende? 27Petelo aut’oangana: koko nkakoyoko nsoso eoeka.

28Ko la nkesa baotomba lim’ele Kayapa, ko baolotomba nd’ilombe ya pretoire: iyo mongo ntabotswa nd’ilombe ya pretoire, nyango bafofomwa mbindo, lolonde bale elambo e’Efendelo. 29Nd’ewel’eko, Pilato aolol’el’iyo, ko akela, Likambo liak’inyo bont’one na? 30Iyo baolamba, baolokela, Nga bont’one ntaki bokeli ow’obe, sik’iso ntatoleky’ende ele we. 31Nkako Pilato aolakela, Inyo mongo lokol’ende, ko lotene likambo likae eleng’ele bisekyelo bikinyo. Ba-Yuda baolokela, Iso tofa la mpifo wae toom’onto; 32wete joi likelame liki Yesu otefelaka, liki’nd’oeneyaka elenge e’iwa i end’owa.

33Nkako Pilato aolotswa lenkina nd’ilombe ya pretoire, ko aoleta Yesu, ko aolokela, La we, ole bokulaka owa roi owa Ba-Yuda? 34Yesu aolamba, Otefela joi line lim’ele we mongo, nkin’amo bakosangelaki nd’eloko ekami? 35Pilato aolamba, La emi nde bosi Yuda? Banto b’ese eke mongo, la nkanga ya joso bakolekyaki el’emi: joi liki w’okelaka na? 36Yesu aolamba, Likulaka likami lifa ja bokili’one: nga likulaka likami lile j’okili’one, siki basali’akami baunaki wae mpolekyama ele Ba-Yuda: lolonde likulaka likami lifa lim’endo. 37Nd’ewel’eko, Pilato aolokela, Siki nde we ole bokulaka owa roi? Yesu aolamba, We okela wae emi nde bokulaka owa roi. La ncin’ene mbotswaki, ko la ncina ene njoya nd’okili, wae nsange nsango ea nsosolo eko. Wengi’onto ole owa nsosolo, okoza lofoso lokami. 38Pilato aolokela, Nsosolo eko ele na?

Koko aki’nd’otefelaka joi line, aolola lenkina ele Ba-Yuda, ko aolakela, Mpen’eloko ea likambo el’ende nye. 39Lolo inyo lole l’elenge wae ntungoel’inyo bont’omoko nd’ekeke e’elambo e’Efendelo: lolanga nde ntungoel’inyo bokulaka owa roi owa Ba-Yuda? 40Nkako baobeleza, bakela, Afa bont’one; lolonde Balaba. Ko Balaba aki wiyi.

Currently Selected:

Yoane 18: NTMN58

Highlight

Copy