Yoane 19

1NKAKO Pilato aokola Yesu, ko aolokunda la lojiji. 2Ko soldats baotonga likuka j’aeke, ko baolafya liko nd’otsa’okande, ko baololotsa bonkoto wa écarlate, 3ko baoy’el’ende, ko baolokela, Bokulaka ow’a-Yuda, wandao! ko baolosakola ntaka. 4Ko Pilato aolola lenkina, ko aolakela, Bala, njooz’ende el’inyo, wae inyo lea wete mpen’eloko ea likambo el’ende. 5Koko Yesu aolola, la likuka j’aeke nd’otsa, ko alota bonkoto w’écarlate. Ko Pilato aolakela, Loala bont’one! 6Aki nkanga ya joso la police oenak’ende, baobeleza, bakela, W’oake nd’ekulusu, w’oake nd’ekulusu Pilato aolakela, Inyo mongo lokol’ende, ko loaka nd’ekulusu: ele mpen’eloko ea likambo el’ende, 7Ba-Yuda baoloamba, Iso tole l’esekyelo, ko lim’esekyelo eko ende eji l’iwa, eki’nd’okelak’ende mongo bona owa Nzakomba. 8Aki Pilato okaka joi liko, aangaki o mbaanga mongo: 9ko aolotswa lenkina nd’ilombe ya Pretoire, ko aokela Yesu, Oya lima nko? Lolo Yesu ntoamba nye. 10Nd’ewel’eko Pilato aolokela, Ofotefeel’emi nde? Ofea wae nde la mpifo wete nkotungole, ko nde la mpifo wae nkoake nd’ekulusu? 11Yesu aoloamba, Nga mpifo ntekaemak’ele we lim’aliko, siki ntoata mpifo el’emi nye. Nd’ewel’eko, ondekyak’emi ele we, ale la bobe bondekola. 12Lim’ako aolasa wae otungole; lolo Ba-Yuda baobeleza, bakela, Nga w’otungola bont’one, ofa lilongo ja Kaisala: wengi’onto okel’ende mongo bokulaka owa roi, aoswela la Kaisala likulaka. 13Aki Pilato okaka baoyi’ako, aoloza Yesu nd’anza, ko aokit’ase nda ngwende e’akambo nd’itenela itangema Le Pavé, lolo nda lofoso ja Ba-Ebele, Ngabata. 14Mbil’eko eki ea njeeza e’elambo e’Efendelo, jefa liki nga heure botoa. Koko aokela Ba-Yuda, Loala Bokulak’okinyo! 15Nd’ewel’eko, baobeleza, W’oimole, w’oimole, w’oake nd’ekulusu. Pilato aolakela, Na! Mbake Bokulak’okinyo nd’ekulusu? Nkanga ya joso baolamba, Tofa la Bokulak’omo, imola nko Kaisala. 16Nkako aololekya el’iyo, wae aakeme nd’ekulusu.

17Koko baokola Yesu, ko aolola ayotombe ekulusu ekae mongo, ko aokenda nd’itenela itangema Itenela ya Loelenge, nda lofoso ja Ba-Ebele, Ngolongota: 18ko baoloak’eko nd’ekulusu, ende la bam’afe, oi wiji, oi wiji, ko Yesu nd’atei. 19Koko Pilato aokot’etangelo, ko aak’eko nd’ekulusu. Ekotelo eko eki wae, YESU OWA NAZALETA, BOKULAKA OW’A-YUDA. 20Bouke wa Ba-Yuda baandaki etangelo ene, eki itenela iki’nde oakemaka nd’ekulusu ikotutsi l’onanga; ko ekotelo eko ekotama nda lofoso ja Ba-Ebele, ko la ja Ba-Elene, ko la ja Ba-Loma. 21Nd’ewel’eko, nkanga ya joso ya Ba-Yuda baokela, Pilato, tokotake Bokulaka ow’a-Yuda: iolo kota, ende akelaki, Emi nde Bokulaka ow’a-Yuda. 22Pilato aokaola, Joi liki’m’okotaka, njokota.

23Aki soldats oakaka Yesu nd’ekulusu, baokola benkoto bekande, ko baokafola baondo banei, wengi soldat wengi liondo. Ko la bonkoto wa bonai, boko ntaboki l’osambo, boko bouma bofomama lim’aliko. 24Nd’ewel’eko, baotefelana, Tofate boko, lolo kela tota mbese wae tea os’oata boko: wae ekotelo ea Nzakomba ekelame, wete

Baokafa benkoto’ekami el’iyo mongo,

Ko baota mbese nd’eloko ea bonkoto’okami.

Soldats baokela baoyi’ako. 25Lolo nyango ea Yesu, l’okune owa nyango, ko la Malia waji owa Keliopa, la Malia Mangandala bakemi eko ntutama l’ekulusu ea Yesu. 26Aki Yesu oenaka nyango ekae la bokimi oki’nd’ookak’eefe bakemi eko, aokela nyango ekae, Bomoto, bala, bona’oke. 27Nkako aokela bokimi’oko, Bala, nyang’ekawe. Koko lima ekek’eko bokimi’oko aolotomba nd’ola’okae mongo.

28Nd’afeka ba joi liko, aki Yesu oeaka wae baoyi’auma baosil’okelama, la ncina wete ekotelo ea Nzakomba ekelame, ende akela, Ndoka mposa e’asi. 29Ekala ekemi eko ekama la vinaigre to, ko baolila linyuka likama la vinaigre nd’okombe, ko baotomba liko nd’omwa’okande. 30Koko aki Yesu oambaka vinaigre, akela, Joi josila: ko aosuny’otsa, ko aokenza bolimo’okande.

31Ba-Yuda baondaki Pilato wae baune nkolo ikiyo, ko baimole nd’ewela wae mbil’eko eki ea njeeza (mbil’eko ea Sabata eki mbile e’enene) ko nd’ewela wae tolaka tofocikale nda bikulusu nda Sabata. 32Ko soldats baoy’ouna nkolo ya owa joso ko y’onkina oakemaki nd’ekulusu l’ende: 33lolo ak’iy’okitaka ele Yesu ko baolena wae aowa, iyo ntabuna nkolo ikae: 34lolo omo owa soldats aoka lofanje lokae la likonga, ko nkakoyoko balongo l’asi baolola. 35Koko ondenaki aosanga, ko nsango ekae ele ea nsosolo: ko ende ea wae atefela nsosolo, wae inyo limeza ngoko. 36Ele baoyi’ane baoliela wete ekotelo ea Nzakomba ekelame, Nko wese’omoko’okande ounya. 37Ko lenkina ekotelo emo ea Nzakomba eokela, Bifoal’ende ok’iy’ookaka.

38Nd’afeka ba baoyi’ako, Yosefa, bosi Alimataya, oki bokimi owa Yesu, lolo la wisisa, eki’nd’oangaka Ba-Yuda, ende aondaki Pilato ilaka ya Yesu, wae imol’iko. Ko Pilato aolimeza. Nd’ewel’eko aoy’oimol’ilaka ya Yesu. 39Koko Nikodemo, oko oyaki ele Yesu nda joso l’otso, aoya ngoko, ko aoyela mula esangana la baimi nga kilos ntuku inei l’itano. 40Ko baokol’ilaka ya Yesu, ko baoomb’iko l’aimi la bito bia mbenza, eleng’ele ekundelo ea Ba-Yuda. 41Nd’itenela iki’nd’oakemaka nd’ekulusu, lisala liki eko; ko boomba w’aeyoko boki eko nda lisala, boki bonto otafambema. 42Baolambya Yesu eko, nd’ewela ea mbile ea njeeza ea Ba-Yuda, (eki boomba okotutsi).

Currently Selected:

Yoane 19: NTMN58

Highlight

Copy