Yoane 20

1NDA mbile ea joso ea semaine la nkesa mongo nd’imong’otso, Malia Mangandala aoya nd’oomba, ko aolena ekenje eolimana lim’oomba. 2Aolikumwa ko aoy’ele Simona Petelo, ko ele bokimi’omo, oko oki Yesu ookak’eefe, ko aolakela, Baolimola Nkolo lim’oomba, ko tofea itenela ik’iy’oambyak’ende. 3Nkako Petelo la bokimi’oko baolola ko baocwa nd’oomba: 4iy’ak’afe baolikumwa bolongo, lolo bokimi’omo aolekola Petelo la loangu, ko aokita nd’oomba nda joso. 5Ko aosunama aala nd’etei, ko aolena bito bia mbenza biambi, lolo ende ntotswa nd’etei. 6Simona Petelo aoloiela nd’afeka, ko aolotswa nd’oomba, ko aolena bito bia mbenza biambi, 7ko l’itambala iki nd’otsa bokae ntiambi la bito bia mbenza lolo iombi nd’itenela imo nk’iko mongo. 8Nkako bokimi’omo oyaki nd’oomba nda joso aolotswa, ko aolena ko aolimeza njimeza. 9El’iyo nd’ekek’eko batafea ekotelo ea Nzakomba wae ifoetswa lim’ele bawei. 10Nkako bakimi baoluta nd’ela bekiyo.

11Lolo Malia akemi nd’anza b’oomba ayolele: ko alel’ende, aosunama ko aala nd’oomba, 12ko aolena bikima bia loola bife baolota bito bia fe, baokit’ase nd’itenela iki ilaka ya Yesu okambi, oi nda wiji boki botsa, oi nda wiji boki bakaka. 13Ko baolokela, Bomoto, olela lae? Aolakela, Ek’iy’oimolaka Nkolo ekami, ko mpea itenela ik’iy’oambyak’ende. 14Aki’nd’otefelaka baoyi’ako, aokengwana, ko aolena Yesu akemi, lolo ntea wae ende ale Yesu. 15Yesu aolokela, Bomoto, olela lae? Ondasa we na? Malia atangaki wae ale wesanyi owa lisala, ko aolokela, Fafa, nkina w’imolak’ende lim’ane, onsangele itenela iki w’oambyaka, kela njoimole. 16Yesu aolokela, Malia. Ko ende aokengwana, aolokela nda lofoso ja Ba-Ebele, Laboni (wae Bolaki). 17Yesu aolokela, Tonkitake: el’emi ncifulela ele Fafa ekami; lolo nco ele bakune’akami ko w’asangele, Njulela ele Ise ekami la Ise ekinyo, ko ele Nzakomba ekami la Nzakomba ekinyo. 18Malia Mangandala aoy’ele bakimi, ko aolasangela, akela, Njolena Nkolo: ko aolasangela baoyi baki Yesu osangelak’ende.

19Bokolo wa mbil’eko, wae mbile ea joso ea semaine, aki bikuke okombamaka nd’ilombe iki bakimi okotakai, ek’iy’oangaka Ba-Yuda, Yesu aoy’oemala nd’etei ekiyo. Ko aolakela, Kuci el’inyo. 20Aki’nd’okelaka ngoso, aolaeneya bakata’akae la lofanje lokae. Aki bakimi oene Nkolo, baosalangana. 21Yesu aut’okel’iyo, Kuci el’inyo; eleng’eki Fafa ontomak’emi, emi ntom’inyo o ngoko. 22Koko aki’nd’okelaka baoyi’ane, aolafufola loi, ko aolakela, Lamba Bolimo w’olotsi: 23banto nko loswele ba iny’otungola lim’aoyi’obe, iyo baotungwa lim’ako: ko banto nko loswele ba iny’okatemeza baoyi’obe, baoyi’ako baokatemel’iyo.

24Lolo Toma, omoko ow’a-jom-l’afe, otangema Jasa, ntaki l’iyo aki Yesu oyaka. 25Bakimi’amo bokelaki, Tolena Nkolo. Lolo aolakela, Ayaka mpaena bifoya bia mpota iki nsete nd’akata’akande, ko mpaila bosai bokami nda bifoya bia nsete, ko mpaila likata likami nda lofanje lokande, mpaimeza nye.

26Koko nd’afeka ba bembile mwambi, bakimi’akande baki nd’etei lenkina, ko Toma aki l’iyo. Aki bikuke okombamaka, Yesu aoy’oemala nd’etei ekiyo, akela, Kuci el’inyo. 27Nkako aokela Toma, Tomb’osai’oke endo, ko bala bakata’akami; ko tomba likata like endo ko ila liko nda lofanje lokami; tawikyake bikoli; lolonde wimeza o ndimeza. 28Toma aolamba, aolokela, Nkolo ekami la Nzakomba ekami! 29Yesu aolokela, Kamba olimeza eki w’onjena? iyo batafonjena lolonde baolimeza, baokem’ekemo.

30Yesu aokela bouke wa ntaz’imo nd’aiso ba bakimi’akae, iko ifokotame nd’onkand’one; 31lolo ntaza ine ikotama wete limeza wae Yesu ale Masiya, Bona owa Nzakomba, ko endimez’inyo loate loiko nda lina likande.

Currently Selected:

Yoane 20: NTMN58

Highlight

Copy