Yoane 21
21
1ND’AFEKA ba baoyi’ako Yesu aoleney’ende mongo ele bakimi’akae nda lieke ja Tibelia; aoleney’ende mongo eleng’ene. 2Simona Petelo la Toma, otangema Jasa, la Natanaele, bosi Kana ea Ngalilaya, la bana ba Zebedayo, la bakimi’amo bafe bakotakai, 3Simona Petelo aolakela, Njocw’oasa nse. Iyo baolokela, Ko iso tocwa la we. Baocw’okondela nda wato, ko bots’oko ntabaoma nse nye. 4Nd’ekyelo ea jefa, Yesu akemi nd’eselo, lolo bakimi ntabea wae ende ale Yesu. 5Ko Yesu aolakela, Bana, la loata nde yomba ya, ndala? Baolamba, O mpampa. 6Aolakela, Lusa botai nda wiji w’elome ko lifotana nse. Nkako baolus’otai, ko ntababeley’oko nd’ewela ea bofula wa nse. 7Koko bokimi’oko oki Yesu ookak’eefe, aokela Petelo, Ale o Nkolo! Aki Simona Petelo ookaka wae ale Nkolo, aolot’onkoto’okae (eki’nde l’otaka), ko aokwel’asi ba lieke. 8Lolo bakimi’amo baoya nd’iatato ek’iyo ntabaki esi lim’okili, nkina mètres bonkama, koko baobel’otai bokama la nse. 9Ak’iy’osafwa nd’okili, baolen’eko tsa ta baala, ko nse njafema nda tsa, ko la mampa. 10Yesu aolakela, Loyele nse ek’iny’oomaka aeyoko. 11Simona Petelo aosafwa ko aobel’otai nd’okili, bokama la nse inene, bonkam’omoko la ntuku itano la nse isato: ko la bouke wa nse ngoko, botai ntaboatsa. 12Yesu aolakela, Loyaka, lole toma. Nk’omo owa bakimi akuseya louol’ende, We na? ek’iy’oeaka wae ende ale Nkolo. 13Yesu aoya ko aokola mampa ko aolakaya, ko la nse o ngoko. 14Bone wae wenya w’esato boki Yesu oenyaka ele bakimi lim’eki’nd’oetswaka lim’ele bawei.
15Ak’iy’oleka toma, Yesu aokela Simona Petelo, Simona bona owa Yoane, we onjok’emi eefe endekola eefe ea bane? Aokela, Onde, Nkolo, we wea wete nkolanga we. Yesu aolokela, Leya bana ba mpate bakami. 16Aolokela lenkina, Simona bona owa Yoane, onjok’emi eefe? Aolokela, Onde, Nkolo, we wea wete nkolanga we. Yesu aolokela, W’esanya mpate ikami. 17Aolokela bokela w’esato, Simona bona owa Yoane, ondang’emi? Petelo aoloka lokeseli nd’ewel’eki Yesu okelak’ende bokela w’esato, Ondang’emi: ko aolokela, Nkolo, we wea baoyi’auma, wea wete nkolanga we. Yesu aolokela, Leya mpate ikami. 18Nsosolo, nsosolo, nkosangela, aki we bosekota olembaki bombembe’oke we mongo, ko okendaki wiji boki w’olangaka, lolo ae w’okita mpaka, wifosembol’akata ko omo ifokolembel’ombembe, ko ifokotomba wiji bofa w’olange. 19Atefelaki joi liko wae eney’elenge e’iwa i end’omemya Nzakomba. Aki’nd’otefelaka joi line, aolokela, Onkim’emi. 20Petelo aokengwana, ko aolena bokimi oki Yesu ookak’eefe ayokime, wae oko okeki nda ntolo ea Yesu nd’elelo ea toma e’okolo, ko okelaki, Nkolo okangela na? 21Aki Petelo oenak’ende, akela Yesu, Bont’one mpang’ende akele na? 22Yesu aolokela, Ayaka ndanga wae acikale elaka nk’a em’oya, la joi like? Onkim’emi. 23Etefelo ene eolongwana ele balongo, wete bokimi’oko afaowa: lolo Yesu ntakel’ende wae afaowa; lolonde, Ayaka ndanga wae acikale elaka nk’a em’oya, la joi’like nde?
24One wete bokimi osanga nsango ea baoyi’ane, ko okotaki baoyi’ane: ko tea wae nsango ikae ile ya nsosolo.
25Koko baoyi’amo bauke baki Yesu okelaka bal’eko: nga bakotama bauma, ntanga wae bokili mongo bauma bofokoke l’enkanda beokotama.
Currently Selected:
Yoane 21: NTMN58
Highlight
Share
Copy
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
