Matayo 20
20
1ELE likulaka ja loola lile ngole bomong’ilombe, ondolaki la nkesa oetaka basali wae basale nda lisala likae ja bekoli bia vina. 2Aki’nd’imezaka l’asali wete aka iyo wengi mbile franc emoko, aolatoma nda lisala likande ja bekoli bia vina. 3Aki jefa okite neuf heures, aolola, ko aolena bamo bemi nd’itenela y’esombe nk’osala, 4ko aolakela, Ko inyo lokenda nda lisala, ko njifoka inyo bofuto bondeji. Ko baocwa. 5Aolola lenkina nda midi, ko lenkina nda trois heures, ko aokela eleng’eko. 6Aki jefa okite cinq heures, aolola lenkina, ko aotana bant’ankina bemi: aolakela, Lemal’endo mbile mbile nk’osala lae? 7Baolokela, Nk’onto otetak’iso nda bosala. Aolakela, Inyo lokenda nda lisala ja bekoli bia vina. 8Aki bokolo okite, nkolo ea lisala aokela wesanyi ow’aumba’akande, Eta basali, w’afute bofuto’okiyo, banga l’asali b’afeka, ko sukela la ba joso. 9Ak’iy’andetami nda cinq heures oyaka, bambaki wengi’onto franc emoko. 10Aki basali ba joso oyaka, baokanela wae bifamba bofuto wa ndekola; lolo iyo bambaki wengi’onto franc emoko. 11Ak’iy’ambaka franc emoko, baomemesanela bomong’ilombe, 12bakela, Bane b’afeka basalaki heure nk’emoko, ko iso tosalaki mbile mbile la wane mongo; ko otez’iso l’iyo o fio. 13Lolo aolamb’om’okiyo, aokela, Lilongo, emi mpokokeele we bobe; kamba ntawimezaki l’emi franc emoko? 14Ambola ene ekawe; ko kenda; ndanga wae nka one ow’afeka elenge ekoka emi we. 15Mpokel’elenge elang’emi la baumba’akami mongo? Kamba liso likawe lile bobe nd’ewela wete emi nde bolotsi? 16Eleng’eko b’afeka bifoyala nda joso, ko ba joso bifoyala nd’afeka.
17Acwa Yesu nda Yelusalema, aotomba bakimi jom l’afe lokuko, ko aolakela nda mboka, 18Bala, tocwa nda Yelusalema; ko Bona ow’onto ifolekyama ele nkanga ya joso l’akoci b’enkanda; ko bifoloumb’ende wae awe, 19ko bifolekya ele Bafaya wae bolengole, ko bosakole, ko boake nd’ekulusu; ko nda mbile e’isato ende ifoetswa lim’iwa.
20Nkako nyango ea bana ba Zebedayo b’aende aoya la bana’akande, ko aokusam’el’ende, aolouola joi. 21Ko aolokela, Olanga we na? Ende aolokela, Kela wete bana’ane’akami bafe b’aende bakit’ase, omo nda wiji wa lo loke j’elome, ko onkina nda lo loke ja waji, nda likulaka likawe. 22Lolo Yesu aolamba, akela, Inyo lofea joi linduol’inyo. Lomeleya ekala e em’omela, ko linameya l’inamelo endinam’emi? Iyo baolokela, Tokuseya. 23Aolakela, Lifomela ekala ekami nsosolo, ko lifinama l’inamelo endinam’emi; lolonde bokit’ase nda wiji wa lo lokami j’elome la lo lokami ja waji bof’okami wae nkaya; lolo ifokaema el’iyo baki Fafa ekami oaelezaka. 24Aki bakimi’amo jom ookaka, baolemwa bakimi bak’afe. 25Lolo Yesu aolaet’el’ende, akela, Lea wae bakulaka ba Bafaya baotuk’anto bakiyo: koko balekola nda mpifo batomak’iyo ntomo. 26Lolo el’inyo afaoyala ngoko, lolo os’olanga wae ayale nda joso likinyo, kel’ende ayale bokambyi’okinyo: 27ko os’olanga wae ayale bonto owa joso, kel’ende ayale bokwala’okinyo: 28eleng’eki Bona ow’onto ntayaki wete banto bosael’ende, lolo asael’anto, ko la ncina wae alekya loiko lokande nsiko nd’eloko e’ant’auke.
29Ak’iy’ole lima Yeliko, etukuluku e’anto baolokima. 30Ko bala, baend’afe bawei’aiso baokit’ase nd’ompempe wa mboka, ko ak’iy’okaka wae Yesu ayoleke, baobeleza, bakela, Nkolo, bona owa Dawidi, otok’is’isei. 31Ko bamo b’etukuluku baolasasa wete bambya lofoso, lolo bakongobeleza mbeleza mongo, Nkolo, bona owa Dawidi, otok’is’isei. 32Yesu aosilama, ko aolaeta, akela, Joi lilang’inyo wae nkeel’inyo na? 33Baolokela, Nkolo, tolanga wae baiso’akiso balifwa. 34Koko Yesu aolaok’isei, ko aofomwa baiso’akiyo: nkakoyoko baolena, ko baolokima.
Currently Selected:
Matayo 20: NTMN58
Highlight
Share
Copy
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
