Matayo 21

1AK’IY’OTUTAMA la Yelusalema, ko baokita nda Betefange, nda ngongo ea Bilaya, Yesu aotoma bakimi bafe, 2aolakela, Lokenda nd’onanga wij’oi, nkakoyoko lifotana mpunda etungi ko la bona; lotungole, ko lonjel’iko. 3Ayaka bonto atefela l’inyo, lokela, Nkolo alanga mpunda ine, ko ifonsokoza nkakoyoko. 4Joi line joliela nd’ewela wae joi liki boteli otelaka likelame, aokela,

5Losangela bona owa Ziona ow’omoto,

Bala, bokulaka’okawe owa roi aoy’ele we.

Ale bongengo, ko afema nda mpunda,

Wae bona owa mpunda.

6Ko bakimi baocwa, baokela ngoki Yesu oatomaka. 7Baoyela mpunda ko l’ona, ko baolafya benkoto’ekiyo nda mpunda: ko aolafem’eko. 8Ko bant’auke b’etukuluku baotanda benkoto’ekiyo nda mboka; ko bamo baotena bitafi bi’etamba, ko baotanda biko nda mboka. 9Ko banto ba bitukuluku bandoleka nda joso l’iy’akima nd’afeka, baobeleza, bakela, Ozana ele Bona owa Dawidi; oyei nda lina ja Yawe aosakema l’okako: Ozana nd’itenela ileki nd’aliko. 10Aki Yesu omotswaka nda Yelusalema, bonanga bouma bofuka o mpafuka, bakela, One na? 11Banto ba bitukuluku baokela, One wete Yesu, boteli lima Nazaleta ea Ngalilaya.

12Koko Yesu aolotswa nd’ilombe ya Nzakomba, ko aooz’iyo batekyak’aoka l’asombak’aoka nd’ilombe ya Nzakomba bauma, ko aokalimola bamesa ba banto baenzanyaki francs, ko la mbata ya banto batekyaki bimbenga, 13aolakela, Joi jokotama, Ilombe ikami ifotangema ilombe ya boondo: lolo inyo lokel’iko etakanelo ea baiyi. 14Ko banto bawei’aiso la betengu baoy’el’ende nd’ilombe ya Nzakomba, ko aolaikya. 15Aki nkanga ya joso l’akoci b’enkanda oenaka belemo bi’ofilo beki’nd’okambaka, ko l’anolu bayobeleza nd’ilombe ya Nzakomba, bakela, Ozana ele Bona owa Dawidi; iyo baolemwa bolemo mongo, 16ko baolokela, W’oka nde baoyi batefela bane? Ko Yesu aolakela, Onde, inyo ntaloandaki, Oongya imemya lima bemwa bia tonkune la belelaki? 17Ko aolacika, aolola lim’onanga, ko aocwa nda Betania oetam’eko.

18Ko la nkesa aki’nd’ute nd’onanga, aoloka nzala. 19Ko aolena botamba wa liteli wemi nd’ompempe wa mboka, ko aokit’eko, ko ntatana limuka nye, nko nkasa kika; ko aokela botamb’oko, Lim’aeyoko tocwake lenkina bamuka bikeke biuma nye. Nkakoyoko botamba wa liteli bonyeela. 20Aki bakimi oenaka ngoko, baokamwa, bakela, Botamba wa liteli bonyeela nk’aeyoko ngamo? 21Yesu aolamba, aolakela, Nsosolo, nsangel’inyo, ng’inyo lole l’imeezo, ko lofikya bikoli, lofaokela joi line lindokelama ele botamba wa liteli kika: lolo nga lokela ngongo ene, Imana, ko wusame nda ntando ea nene, joi liko lifokelama. 22Ko baoyi’auma nko loswele banduol’inyo nd’oondo l’imeezo, lifamba.

23Aki’nd’otswaka nd’ilombe ya Nzakomba, ko aolak’anto, nkanga ya joso la bingambe bi’anto baoy’el’ende, bakela, Okela baoyi’ane la mpifo ea na? Okokaaki mpifo ene na? 24Yesu aolamba, aokela, Emi njifuol’inyo joi limoko; nkina lonsangele joi liko, njifosangel’inyo mpifo ekel’emi baoyi’ane. 25Inelo eki Yoane lima nko? La lima loola, nkina lim’el’anto? Ko baanga wango, bakela, Nga tokela, Lima loola, ifotokela, Inyo ntalimezak’ende lae? 26Lolo nkina tokela, Lim’el’anto, toang’anto ba linyenga; ele bant’auma batanga Yoane boteli. 27Iyo baolamba Yesu, bakela. Iso tofea. Ende aolakela, Ko emi mposangel’inyo mpifo ekel’emi baoyi’ane. 28Lolo okanel’inyo na? Bont’omo aki la bana bafe baende, ko aoy’ele owa nsomi, akela, Bona, kenda yosale mbil’ene nda lisala likami ja bekoli bia vina. 29Aolamba, akela, Mpange; lolo nd’afeka aoloka lokeseli, ko aocwa. 30Ko aoy’ele ow’akuka, ko aolokela eleng’eko. Ende aolamba, akela, Nkende, Nkolo; ko ntacwa. 31L’iy’ak’afe, okelaki joi lik’ise ekande olangaka na? Bakela, Owa nsomi. Yesu aolakela, Nsosolo, nsangel’inyo, batakanyi ba mpuci la banto ba linsamba botswa nda likulaka ja Nzakomba nda joso likinyo. 32Eki Yoane oyaka el’inyo nda mboka ea liongi, ko inyo ntalimezak’ende; lolo batakanyi ba mpuci la banto ba linsamba boimezaki: ko inyo, ak’iny’oenaka, ntaloututalaki baoyi’obe nd’afeka wae limez’ende.

33Lokoz’esonganya emo; bont’omo, bomong’ilombe, onaki lisala ja bekoli bia vina, ko aosamanya liko la betamba nga lobala, ko aocima lifoku j’eoka ea ntatoka ea bamuka, ko aotong’ilombe y’eliko, ko aosombya liko ele bafongi, ko aocwa nd’ese enkina. 34Aki eleko e’amuka otutama, aotomele bafongi bakwala’akande, la ncina wete bambe bamuka’akande. 35Ko bafongi baokanda bakwala’akande, baokund’omo, ko baoom’onkina, ko baolusela bonkina bikenje. 36Lenkina aotoma bakwala’amo bandekola baki joso l’auke; ko baokeel’iyo nk’eleng’eko. 37Lolo nd’afeka aolatomela bona’okande, akela, Bifofik’ona’okami. 38Lolo aki bafongi’ako oene bona, baotefela l’iyo mongo, One wae bosangoli, loyaka, toome, mpanga tokole lisango likande. 39Baolokanda, ko baolooza lima lisala ja bekoli bia vina, ko baolooma ci. 40Aya lifi bomongo lisala ja bekoli bia vina, akeele bafongi’ako na? 41Iyo baolokela, Ende ifomelenganya bant’ako b’obe o mmelenganya, ko ifosombya lisala ja bekoli bia vina ele bafongi bamo bandokaya bamuka nda bileko bia bamuka. 42Yesu aolakela, Inyo ntaloandaki nd’enkanda bia Nzakomba wae,

Ekenje eki batongi otonaka,

Eko eoyalema ea joso nda likono;

Line joya lim’ele Yawe,

Ko joyalema ja nkakamwa nd’aiso’akiso?

43Nd’ewela eko, nsangel’inyo, likulaka ja Nzakomba lifokolama lim’el’inyo, ko lifokaema ele banto b’ese emo bacw’amuka ba likulaka liko. 44Wengi’onto okwa nd’ekenje ene, ifotatenya: lolo bonto nko loswele boe ekenje ene okwela, ifominyol’ende nga biucu. 45Aki nkanga ya joso la Bafalusi ookaka bisonganya bikande, baokotola wae aotefela nd’eloko ekiyo. 46Ko ak’iy’oase wae bokande, baoanga bitukuluku bi’anto, ek’iy’otangak’ende boteli.

Currently Selected:

Matayo 21: NTMN58

Highlight

Copy