Matayo 24
24
1KOKO Yesu aolola lim’ilombe ya Nzakomba, ko aocwa, ko bakimi’akande baoya oeney’ende ntena y’ilombe ya Nzakomba. 2Yesu aolakela, Lofene belemo bene beuma? Nsosolo, nsangel’inyo, nk’ekenje ekotai nd’ekenje emo eciki lifi efausama nd’ase.
3Aki’nd’okit’ase nda ngongo ea Bilaya, bakimi baoy’el’ende la lokuko, bakela, Otosangele, ekeke ee baoyi’ane okelama na? ko lotaza j’eyelo ekawe la nsukela ea ekeke lole na? 4Yesu aolamba, aolakela, Loalaka; nyango bafungy’inyo. 5Ele bant’auke bifoya nda lina likami, ko bifokela, Emi nde Masiya: ko bifungya bant’auke. 6Ko lifoka besako bia bitumba ko la benkindo bia bitumba; talokakaanake: ele baoyi’ane biel’olo: lolonde nsukela efino. 7Ele bonanga wifouna la bonanga’omo, ko la likulaka la likulaka; ko bieto bia nzala la nkangi bifoya, ko bekili bifofuka nda totenela tomo. 8Lolo baoyi’ane bauma bale iango ya ndomatswa. 9Ko bifoleky’inyo nda bonyoko, ko bifoom’inyo; ko benanga beuma bifin’inyo nd’eloko ea lina likami. 10Ko bam’auke bifokwa l’ekunumwelo, ko bifangelana biango, ko bifinana. 11Ko bateli ba mpafomba bifiela, ko bifungya bant’auke. 12Ko lolango j’ant’auke lifokokwa, ele bobe bolekola. 13Lolo ociniana loncinji elaka nko nsukela ifoikyama. 14Ko bosako’one wa likulaka w’olotsi wifongwana nd’enanga beuma nga lotaza ele banto ba benanga beuma: lim’ako nsukela ifoya.
15Nd’ewela eko, anden’inyo emelengano ea linyamo eki Danyele owa boteli otelaka njemala nd’itenela ibuzama nd’oeko (kel’ende oanda ekele ncina), 16kel’iyo bale nda Yudea balote nda ngongo, 17ko ende ole nd’aliko b’ilombe afokitela oimola baumba bale nd’ilombe ikande; 18ko ende ole nda lisala afut’okola bonkoto’okande. 19Lolo elo el’iy’ale l’aemi, ko ele bialekeli nda bembile beko. 20Loonda wae elotelo ekinyo efiela nd’ekeke ea mpio, nkina nda mbile ea Sabata; 21elo mongo ifenya nd’ekek’eko ng’etafenya lim’iango ya bokili elaka nk’aeyoko, ko efaenya lenkina eleng’eko nye. 22Lako ekek’eko uezamaki, siki nk’onto oika: lolo ekek’eko ifuezama nd’eloko ea ba-sonami. 23Nd’ekek’eko ayak’onto aosangel’inyo, Bala, Masiya al’ane, nkina Mpiko; talimezake. 24Ele Bamasiya ba mpafomba la bateli ba mpafomba bifiela, ko bifeneya ntaza ya nene la belemo bia nkakamwa; nga bakuseya, bifungya ba-sonami mongo. 25Bala, nsangel’inyo nda joso. 26Nd’ewela eko, nkina baosangel’inyo, Bala, ale nd’etekeleke; taloewake; Bala, ale nda mbulu ya lokuko; talimezake. 27Eleng’ele likalili jokalingana lima wiji wa Est, ko jolenya nda wiji wa Ouest; eyelo ea Bona ow’onto ifoyalema nk’eleng’eko. 28Endambi etuji, bianganga bifotakana nk’eko.
29Lim’ako, nd’afeka b’elo ea bembile’eko, jefa lifolinda yo, ko nsonge efaongesa, ko tooci tifokwa lima loola, ko belemo bia loola bifofukyama; 30nkako lotaza ja Bona ow’onto lifenya nda loola; ko beloi bi’anto b’okili bouma bifolela la lilelo mongo, ko bifena Bona ow’onto aoya nd’atute ba loola la mpamba la jilangi mongo. 31Ko ende ifotoma bikima bikande l’ilola ya lofoso ja lonene, ko iyo bifotakanya ba-sonami l’ende lima biji bia bempompo bek’enei, ko lima ntundo ya loola ik’ife.
32Lolo lolakemaka l’esonganya lima botamba wa liteli; akela etafi boju, ko amel’eko ntongi, lea wae ekeke ea biane eotutama: 33o nk’eleng’eko, anden’inyo baoyi’ane bauma, lea wete ende aotutama, ale nda biso. 34Nsosolo, nsangel’inyo, eotswelo ene efaimana, elaka nko baoyi’ane bauma baoliela. 35Loola la bokili bifimana, lolo baoyi’akami bafaimana nye. 36Lolonde nk’onto ondea mbil’eko la heure eko, la bikima bia loola, la Bona, nk’onto ondea, ondea wae Fafa kika. 37Eyelo ea Bona ow’onto ifoyalema ng’ekek’eki Noa. 38Ngok’iyo nd’ekek’eki nda joso ja mpela, baleki, bamelaki, baalanaki, balekyaki bana nda liala, elaka nko mbil’eki Noa okondelaka nda wato, 39ko iyo ntabeaki, elaka nk’aki mpela oyaka, ko imolak’iy’auma bwo; eyelo ea Bona ow’onto ifoyalema nk’eleng’eko. 40Bant’afe bifosala nda lisala, omo ifotombama, ko onkina ifocikala; 41bamat’afe bifominyol’asangu nd’eminyelo; omo ifotombama, ko onkina ifocikala. 42Nd’ewela eko, lesanyaka: el’inyo lofea mbile ee Nkolo ekinyo oya. 43Lolo lofonga jea joi line, nga bomong’ilombe eaki heure ea eyelo ea wiyi, siki esanyaki, ko ntatocik’ilombe ikande iooza mbaoza. 44Nd’ewela eko, inyo lofonga jelama; ele Bona ow’onto ifoya nda heure ef’iny’okanela. 45Ole bokwala owa nsosolo la wanya na? Oki Nkolo ekande oilaka bofongi nda boloi’okande, wae aka toma tokiyo nd’ekeke endeji. 46Ae Nkolo ekande oya, ko atana wae bokwala ayokele ngoko, bokwala’oko ifosakema l’okako. 47Nsosolo, nsangel’inyo, ifil’ende bofongi owa toma toat’ende touma. 48Lolonde nkina bokwala’oko ow’obe akela nd’otema’okande, Nkolo ekami aotema; 49ko aanga lokunda bakwala basala l’ende, ko ayole, ko ayomele l’iy’alangwa; 50nkolo ea bokwala’oko ifoya nda mbile ef’end’olendeza, ko nda heure ef’end’ea, 51ko ifokunda la njiji, ko ifokaya liondo likande la bekakatano; lilelo ja mpisali la nkesanya e’aino ifoyal’eko.
Currently Selected:
Matayo 24: NTMN58
Highlight
Share
Copy
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
