Luka 11

Yesu loekesa baeki ndosombola

1Yesu ayaläkä nda elela ɛmɔi nda lisomboli; asiläk’Inde, ɔmɔi wa baeki bande loonga lande mbo— Ngɛnɛ, ekesaka iso ndosombola, kwa aekesäkä imɔ ko Yoane baeki bande. 2Inde loonga lau mbo— Akasombokolek’ino, waongaka mbo—

Sango; lina liaɛ lilitesomoko,

Bɔkɔta waɛ boyeke.

3Fak’iso louse bieka ya lise la lise,

4Mɛsɛlɛk’iso batwanelo basu,

Eoka iso angɛnɛ tosomɛsɛlɛ batotina njasɔ ibe yau.

Okɛsɛ̈k’iso nda lisoshela.

5Inde loonga lau mbo— Ndai wanu, eyala la wina, kɔkɛ end’inde la ɛsɔkɔ ya ocho okaonga lande mbo, 6Wina, faka’mi sumbu beila bisatɔ sɔmbya, eoka wina wami asoya nda lɔkɛndɔ loingala la iti la yeka yof’inde? 7Limɔ wina oyale nda ndakɔ koonga mbo— Ofëke’mi likati, bome bosokandomo yumwa la iso la bana bami toingali nde nda tange, itikɔkɔlɛ imɔ ndoemala la ndofaef’aɛ yeka. 8Imi mbo— Ango aitoemala ndof’inde bieka ko eoka mbo ayali wina lande, nde ko l’eoka ya bolïlïya wande, atoemala ndokaf’inde bitotina ebitoeno inde.

9Imi nd’atoonga lanu mbo— Felaka, limɔ bitofomo ino; lukaka limɔ ino koosha eyetoluk’ino; titaka limɔ bome kolioelomo ino. 10Eoka boto la boto oyatofela, inde kɔɔlɔ; oyatoluka, inde koosha; ende inde oyatotita, wao koliolomo.

11¿Boni boto wanu, wana wande efel’inde boila, atof’inde litalɛ? 12Kwa efel’inde swi, inde kof’inde njɔ? 13Eokao, eyambo ino, bato abe oluwi ndofaefa bana banu bafi balau, nde simbi to Sango wanu oyayali nda Use, efaka Bolimo Botanu ende ebatofel’Inde.

Lioi lia Yesu eoka ya Satana

14Lise limɔi Yesu akusoläkä bolimo wa euma la akuswäkä bolimo, limɔ boto wa euma loonga. 15Lamao bato lomwaala nde bamɔi loonga mbo— Atokusola belimo ebe ko la lisungi lia Balasebula, ako Bɔkɔta wa belimo ebe. 16Bato basi lokotel’Inde, iyo lofel’Inde mbo ɛnɛsɛk’iyo ndembe yosekwa nda Use. 17Yesu alembeeläkä baenyeli bau; Inde loonga lau mbo— Bato ba yese ɛmɔi ebatonana iyo angɛnɛ, bato ana batosɛɛsɛlɛsɛ yese; ko ongoma bokulü kokwesa bokulü angɛnɛ. 18¿Eya to mbo Satana imɔ kowesana l’ebande angɛnɛ, bɔkɔta wande kokɔkɔmɔ moni? Iongi nde ani eoka ino mbo isokusola belimo ebe ko l’isosha sha Balasebula. 19Eya mbo Imi nd’atokusola belimo ebe ko la Balasebula, bana banu nd’atokusola yao ko la ndai? Eokao, iyo batoyala nde bakomyi banu. 20Nde, eyambo Imi nd’asokusola belimo ebe la isangakala sha Mungu, aambo Bɔkɔta wa Mungu bosoya tina lanu.

21Atolamba Bowangä wa engä mbo akukyeke likula liande la biɛla yande ya bita, limɔ bieto la biengo yande bisotekama teka; 22Kongo ko atoya wasi wolongel’inde la bofoka, atokwesak’inde, atɔɔnɔkɔlɔk’inde biɛla la nguwa ebilendeluk’inde, inde kokaelaka findaka eyind’inde. 23Oyatikɛndɛnɛ lami, inde ende wiyani lami; oyatisɔnjɛ lami, inde nd’atomelesa.

24Bolimo wa lilo bosekwa to ende boto, wao atotandela bilela ebiti la balia okaluke fofe yolengela omao, kongo ko angotɛnɛ yao; inde koonga mbo— Itoinwa nda ndakɔ yami olo asekweliki’mi. 25Akayek’inde omao, atoosha yao wase, esoombomo la esokomyomo. 26Limɔ atɔkɛ okɔsɔ belimo osambale ebisoet’inde la obe, la iyo yaatotina kɔɔtɔkɔ ndakɔ okayalaka ina; limɔ boyaeli wa mbisa ya boto ona bosoetela ewa oso la bobe.

27Aongäk’Inde baoi-ba, otomali oyayali nda ekuke loila limiki liande mbo— Limɛngɔ lifi liyala nde la sɔlɔ eyaotäk’Aɛ, la baɛlɛ ebamwesäk’Aɛ. 28Nde Yesu loonga mbo— Eingo nde bende la limɛngɔ lioeta ebatooka Lioi lia Mungu la ebatokɔkɔmɛlɛ liao.

29Asɔngɔkɔmɔ̈kɔ̈ bikuke yasi ya bato, Inde loakola ndoonga mbo— E-fɛtɔ-ye ende fɛtɔ ya obe, basokaluke ndembe ya ikesa, angwɛnɛ ango ɛmɔi kofomo iyo, sakolo ngo ko ndembe ya Yona. 30Kwani ayaläkä Yona ndembe ende bato ba Ninewe, ko ongoma Wana wa Boto eyalaka ndembe ende bato ba e-fɛtɔ-ye. 31Bɔkɔta otomali wa yese ya Sheba atoemesana la e-fɛtɔ-ye nda lise lia Likomyi, la atof’iyo se, eoka asokwäkä olo nda liko lia wenda ndoyoka wɛlï wa Solomo, nde tɛnɛngɔ elolongeli Solomo ngo ko eyamaya. 32Bato ba Ninewe batoemesana la bato ba e-fɛtɔ-ye yanu nda lise lia Likomyi, la iyo batof’ino se, eoka iyo nd’akalanganäkä eoka ya inangö sha Yona, nde tɛnɛngɔ elolongeli Yona ngo ko eyamaya.

33Atoanesa boto täla, aitokasɛlɛ yao nda liöndo, kwa ose ya ɛɛngɔ kangä nda esolo, mbo ebatɔtɔ ndakɔ bɛnɛkɛ liamela lia yao. 34Täla ya bindo ende liso, eokao liso liaɛ liyala fololo, bindo yaɛ bitotina bitoana swaa; nde ango liso liaɛ liyala libe, bindo yaɛ imɔ bitosɔlɔnɔ sɔlɛ̈ la lilima. 35Tichaka to mbo liamela elile laɛ litayala ko lilima. 36Eya ngo mbo bindo yaɛ bitotina bisoana swa, angwɛnɛ imɔ lilima ango sinyo, aambo yao bitoana kwani atoana täla eyoanes’aɛ la liamela lia twangakeli.

Baɛngɔ bawau ende BaFalusi

37Aongäkä Yesu baoi-ba, BoFalusi ɔmɔi lofel’Inde mbo aleke bieka olo eyande; Inde lɔɔtɔ lande, Inde loyala se nda bieka. 38Nde ɛnɛ̈kɛ̈ BoFalusi mbo Yesu atitasoole bindo oso wa bieka, inde lomwaala. 39Nde Ngɛnɛ loonga lande mbo— Kwani ino BaFalusi otosoolaka lousa loa kɔpɔ la lɔfɛfɛ, kongo ko atiteni yanu etumi nde la bolole la lisiela. 40Ino bibebe, ¿Oyakeläkä lousa, atikele imɔ ko atiteni lisanga? 41Takaelaka to ebile atiteni, limɔ wɛnɛkɛ mbo bitotina bit’imɔ la bokili end’ino.

42Aeko wale end’ino BaFalusi, eoka ino otofaefa likaɔ lia botüku wa liu nda kasakasa ya lɔɛtɛ, kongo ko osounga ndola yoeta ya liengani la losamɔ loa Mungu; lole loanu ndokɔcha yao, ani ebimɔi imɔ biti yoomelomoko. 43Aeko wale end’ino BaFalusi, eoka otolola kangala ya oso nda bisɔngɔmɛlɔ la ndolamokolomoko nda baöngo. 44Aeko wale end’ino, eoka wende kwa kito ebitiɛnɛlɛ ebitomatakelomo la bato ebatilembeele yao.

45Bosanokoli ɔmɔi wa Bikela lomutola la Yesu mbo— Boekesi, atoonga Aɛ ongoma, osochambola imɔ ko iso. 46Yesu mbo— Aeko wäle end’ino Basanokoli ba Bikela imɔ, eoka ototolesa bato bekuku ebitookes’iyo bolito wäle, nde ino angɛnɛ angosung’iyo ango la isangakala simɔi shanu.

47Aeko wäle end’ino, eoka otoswa tɔsɛɛlɛ toenyekela batɔndɔli, ani bangau banu nd’aoläk’iyo. 48Nde ino osokulya eyakeläkä bangau banu la osoaolel’iyo; bangau baoläkä nd’iyo; ino ososwaka kito yau. 49Eokao, Wɛlï wa Mungu loonga mbo— Itotomela bato la Batɔndɔli la Batomomu; beolaka nde bamɔi, bekongolaka nde bamɔi; 50mbo bakila ba batɔndɔli batotina ebasondo-lomökö, konda baakoelo ba wenda, bakungameke ende eba fɛtɔ-ye; 51bako ko bakila ba Abela, ko bakila ba Sekalaya oyaseɛsɛlɛ̈kɛ̈ atiteni ya etambelo ya lifaefi la Ndakɔ ya Mungu; eingo ko, Imi mbo bafelomoko ende eba fɛtɔ-ye.

52Aeko wäle end’ino Basanokoli ba Bikela, eoka osɔɔnɔkɔlɔkɔ lofungola loa liluwani; ino angɛnɛ otiaɔtɛ, la osokufesa imɔ ebakɔɔtɔ ina.

53Asokwäk’Inde omao, Batikasa ka BaFalusi loakola ndosungamel’Inde la bofoka, iyo lofɔɔl’Inde mbo aongeke baoi wike, 54ani iyo lolamba bao mbo baundeke lioi lia bɔnɔkɔ wande.

Currently Selected:

Luka 11: NTKE58

Highlight

Copy