Luka 12
12
Beimo ya Yesu ende Baeki bande
1Nda mbile-ao, bilɛfu ya bato losɔngɔkɔmɔkɔ end’Inde, iyo lomatakelanaka, la Yesu loakola ndoonga la baeki bande oso, Inde mbo— Ɛnɛkɛ la wɛlï ndoengwa lisoo lia lituma lia BaFalusi, liko liisi lia wewe; 2eoka angwɛnɛ angɔmɔi eyisami sakolo ko yoisolomo mbisa; angwɛnɛ eloisomu, ko mbo lolüwomoko mbisa. 3Eokao ebisoong’ino nda lilima, yao yokanaka nde nda löwa; la bitotina ebiong’ino iyoiyoi nda kuku ya ndakɔ, yao bitakomoko boeki nda bɛtɔndɔ ya ndakɔ.
4Itoonga lanu ako baina lami, Imi mbo— Owängëke ebatoola bindo, nde batikɔkɔlɛ okel’imɔ loasɔ loasi. 5Nde itotaim’ino loasɔ loa oyengani ndowängomo; wängaka nde Inde oyale la isosha, mbisa ya liwa, ndoumbola nda Ngehena, eingo, Imi nd’asoonga lanu mbo— Wängaka nd’Inde. 6¿Mbo bɛnjwɛɛ bɔɔmwi biitoungesomo la bakute bambale? Nde ango ɔmɔi wa yao angoungomo la Mungu. 7Aambo eyanu swee ya betö bisoluwana loketi; eokao owangëke eoka ino nd’asolongela bɛnjwɛɛ wike.
8Itoonga imɔ lanu mbo— Boto eaolela’mi nda baiso ba bato, ambo Wana wa Boto aolaka nde inde nda baiso ba bakitomo ba Mungu. 9Nde boto eanganya Imi nda baiso ba bato, inde eanganyomoko nda baiso ba bakitomo ba Mungu. 10Boto esingwa lioi lia litɔ̈ngi lia Wana wa Boto, atomɛsɛlɔmɔ, kongo ko oyatosɛɔlɔ Bolimo Botanu aitomɛsɛlɔmɔ.
11Atokɛsɛ iyo okɛs’ino oso wa bekumi nda bisɔngɔmɛlɔ, kwa oso wa eba isosha, otakelëke bolenda ani atomutol’ino, kwa atoong’ino, 12eoka Bolimo Botanu atoekes’ino ko la mbile-ao yao ebikaongek’ino.
Loasɔ loa oyati Lifoka nda baiso ba Mungu
13Limɔ boto ɔmɔi nda ekuke loonga la Yesu mbo— Boekesi, ongaka la boloo wami mbo akaeke botiko lami. 14Nde Yesu lomutoel’inde mbo— ¿Boto, ndai ati nde Imi wateli la bokaeli wanu? 15Inde loonga la bato mbo— Lambaka la tinganaka la wɛlï loasɔ loa bolole bototina, eoka liwawi lia boto liitolendelo ko shetesele sha yao ebisɛlɛ inde.
16Limɔ Inde lotel’iyo bombila, Inde mbo— Elanga ya lifoka lotaka tuma la bieka wike wike; 17la inde loenyela nda botema wande mbo, Ikeleke to iye eoka iti’mɔ la biiselo yoengana yoisa tuma twa elanga yami? 18Inde mbo— Itokel’ani, itoukola bikukelo ebile lami la itoswa yasi yolonga bifi, limɔ itoisa la befonga la biengo yami ina. 19La itoonga la liwawi lia botema wami mbo— Liwawio, ososɛlɛ bieka la bieto likama ebisois’aɛ yoengana miaka wike; ɛumaka, laka, mwaka, kelaka limɛngɔ! 20Kongo ko Mungu loonga lande mbo— Ebebe, ako aɛ; la ocho-bo, liwawi liaɛ litɔɔsɔmɔ end’aɛ; limɔ ebisokukya aɛ nda yiselo, ndai atɔɔlɔ yao? 21Lole ko ongoma la oto oyatosɔnja bieto end’inde angɛnɛ; nde atifote l’eya Mungu.
22Lamao Yesu loonga la baeki bande mbo— Eokao, itoonga lanu Imi mbo— Otakelëke bolenda loasɔ loa liwawi lianu mbo ¿Totola to nd’iye?; la eoka ya bindo yanu mbo ¿Totowata nd’iye? 23Liwawi lisoeta yeka yola la bindo bisoeta bisinda yowata. 24Tichaka la enyelaka nɔli biko bengate, biitolɔɔ koto, biitotwaka eula, biti la biiselo kwa kumbo, nde Mungu nd’atoles’iyo bieka; ino oisolongela nɔli la loketi? 25¿Ndai wanu kokɔkɔlɔ ko l’iyeli kongo, ndotalia ango sinyo kwa linganjo nda liwawi liande? 26¿Eokao, otikɔkɔlɛ ndokela loasɔ-lo lɔkɛkɛ, monito ototakela bolenda nda yasi? 27Tichaka la enyelaka fototo, ani atokonda yao; biitokuwa, biitotita elamba; nde itoonga lanu mbo, ango Solomo angɛnɛ la bɔfɛkɔ wande wa likama, atiawatäkä bɔfɛkɔ woengana bɔfɛkɔ wa lɔfɔtɔtɔ lɔmɔi. 28¿Ango Mungu asowatesa ko chwingi etosoyala louse nda elanga nde lɛlɛngɔ totoumbolomo nda litumbo, nde simbi to Inde aitowates’ino, bato ba lilendelu likɛkɛ?
29Otalukëke mbo bini ebitolak’iso la bini bitomwak’iso ko la toloi nda betema, eoka bato ba wende batokalukake bieka-bi, 30Nde Sango wanu nd’aluwi mbo otoeno bieka-bi.
31Talükaka Bɔkɔta wa Mungu, limɔ ebi-bitotina kofomoko imɔ ino. 32Ino ba itutunda, owangëke, eoka lisangi lia Sango wanu lile ko ndofaef’ino Bɔkɔta. 33Ungesaka yao ebisɛl’ino la kaaka yao likaela (eoka ya ngandi); kelaka batanga boisa bieto ebatiweke liyele, ango bondanda olo nda Use eboitoomelo, olo wiya angoiyela, olo sambola angobebesa wao; 34eoka olo ayali bondanda waɛ, botema waɛ ngo ko omao.
Bofiili la Likɔkɔmɛlɛ
35Wanjaka bɛkɔli ngau nda tɛta yanu la undaka täla yanu bianesomu, 36ani oyali ngo ko kwa bato ebakoumbakela liinwi lia ngɛnɛ wau nda elambɔ ya lisɔngɔni, mbo akayeke inde la akatiteke inde, limɔ iyo kolioel’inde bome lisasaya. 37Bɛkɔwa ana bende la limɛngɔ, eoka akayeke ngɛnɛ wau, inde koosh’iyo ani bakolamb’inde. Itoonga lanu wewe, mbo ngɛnɛ ona kokanda bɔkɔli, atoyales’iyo se, limɔ atoya okael’iyo bieka. 38Eya ngo ko nda ɛsɔkɔ, ambo ko la yömbe kongo, nde inde koosh’iyo ongoma, bɛkɔwa ana bende la limɛngɔ fuu.
39Olüwi nde ndolüwa mbo eya ngo mbo ngɛnɛ wa ndakɔ alüwäkä oso ko mbile eyekayeke ewa wiya, ani alambäkä la botengu l’ani atiamachäkä mbo ndakɔ yande efindolomoko la wiya. 40Eokao enganaka yose, eoka Wana wa Boto eyaka nda mbile eyeitoenyela lanu.
41Petelo loonga mbo— ¿Ngɛnɛ, osotela nd’iso ebombila-bo kwa eoka ya bato batotina? 42Limɔ Ngɛnɛ mbo— ¿Ndai to atoyala bonyafala wa likɔchi la wa wɛlï oyasotalia inde bonyafala wa bato bande mbo akaelek’iyo bieka yau la lisho lioengana? 43Bɔkɔwa ona ende la olau la limɛngɔ ani ngɛnɛ wande atoyaosh’inde nda likuwa lia bɔfɔnɔ-bo. 44Isoonga lanu wewe mbo atotalia boto ona bonyafala wa yeka yande bitotina. 45Nde eyambo bɔkɔwa ona obe, eonga nda botema wande mbo— Ngɛnɛ wami asoumwaka oya; lamao inde koakola oomaka bɛkɔwa batolome la batomali, la ndolaka la ndomwaka, la ndowaka bänä, 46limɔ ngɛnɛ wa bɔkɔwa ona eyaka nde nda bocho ebotïlüwe inde la ebotiwɛlɛ inde ngɛnɛ baiso, atomomol’inde la fimbo la atosɛl’inde amamwito la ebatilendelomo. 47Nde bɔkɔwa ona oyalüwäkä lisangi lia ngɛnɛ wande nde angokomyel’inde, angolitesa lisangi liande, inde ekuchomoko la tɔnyɔlɛ wike; 48kongo ko oyatialüwäkä, nde kokelaka njasɔ yoengana likuchi, inde ekuchomoko la tɔnyɔlɛ tɔmyo kongo. Eingo, ebafomu nde wike, ambo befelomoko imɔ ko wike; la oyasotaliomo, ona efelomoko botalia imɔ.
Tokange etwaokäkä Yesu
49Isoya oyata bösä nda wenda-bo. ¿Iye eyelɛmbi nde’mi eyambo wao bokongana? 50Yende la lilufi elikalufimoko’mi, aina tokange etokanjomu Imi konda akakɔchɔmɔkɔ liao! 51¿Otangi nde mbo isoyasɛlɛ lilatemi nda wenda-bo? Mbayɔ, Imi mbo, kangä liwesani. 52Ko anyo bato bɔɔmwi nda ndakɔ ɛmɔi batokaakana, basatɔ kowesana la bambale, bambale la basatɔ. 53Batowesakana, sango la wana wande; wana otolome la sango; nyango la wana otomali; la wana la nyango wande; boïlana la wali wa wana; la wali wa wana la boïlana.
54Limɔ Inde loonga imɔ la bikuke ya bato mbo— Wɛnɛ bafita la mbole, ino koonga lisasaya mbo— Mbula y’efalala etotɔnɔ, la etotɔnɔ ongoma. 55Wɛnɛ lofofo lotosokwa fangi ya liɔmbɛlɛ, ino koonga mbo— Buse botoya l’etao; la botoya nde l’etao ongoma. 56Ino balimbakeli, bolüwi nde ndolembeela wɛnɛli wa buse la se; ¿Monito otilüwe ndoleembela wɛnɛli wa mbile-ye?
57¿Monito boitoleembela, ko ino angɛnɛ, yao ebiengani ndokela. 58Atɔkɛ aɛ la wiyani okakomyelomo loasɔ oso wa bokumi, kotaka ndosilesa loao nda mboka mbo atakɛs’aɛ ende juge, la mbo juge atakɛs’aɛ ende Botingani wa bɔnyɔlɔlɔ, mbo bonyafala atakand’aɛ bɔnyɔlɔlɔ. 59Isoonga laɛ mbo otiasekwe omao ko nd’akakambeke aɛ bitotina fɛɛ, angotikala ango sɛngi.
Currently Selected:
Luka 12: NTKE58
Highlight
Share
Copy
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
