Matayo 6
6
Kusambala kua Yesu ku Muiduko.
1Nkumutonda buno kuisanana kueinyu takube ku bantu buno, mumenyue nabo; ndi muakita bubo tamuli na lukalilo lusoga ku Soinyue uli muigulu.
2Kungua ukukita bantu mponga, ntuide monze, anga bukukita bengelezi ku numba za musanganano nu mu nzila, buno baganunue na bantu. Lebelebe nkumubula bune, Babo bakasilue lukalilo luabo. 3Tondo kungua ukukita bantu mponga, kuboko kuobe kuaseikazi takumenye bukukita kuboko kuobe kuaseidume; 4bubo ndi wakita bantu mponga zibe ku lumbisombiso, nu Soinyue ukumona mu lumbisombiso nti akukase lukalilo lusoga.
5Nu ndi ukusega Kalaga, ntube anga bengelezi; kubuno babo bekuelama kusega Kalaga nti bemana mu numba za musanganano nu mu ndenge za nzila buno bamonekeko na bantu. Lebelebe, nkumubula bune, Babo bakasilue lukalilo luabo. 6Tondo, ndi ukusega ku Kalaga, nti wingila mu numba zobe nu nti wasega ku lumbisombiso, nu nti wigala luibi, nu nti wasega Soinyue uli mu lumbisombiso, nu Soinyue ukumona mu lumbisombiso; akukase lukalilo lusoga. 7Tondo, ndi mukusega ku Kalaga, tamulalukelaluke anga bukukitaga baBilongo; babo bakukengelaga bune, Bamenyue ku kutendatenda kuabo. 8Umpanga tamube anga babo; kubuno Soinyue eizi bimukuiyanina kungua tamumusega. 9Segazi ku Kalaga anga bubuno; Tateisue uli muigulu izina liobe liganunue. 10Bukota buobe buvue, kusombola kuobe kukitue ku kisi anga bukukukitua muigulu. 11Tukase lelo idia lietu. 12Tusigilile misako za buagi bueitu anga butukusigililaga bekutuagilaga, 13aba ntutuenzie ku malindiko, tondo tonie ku wozo mubi, kubuno uli na bukota, nu magala, nu lutanuno, aba ku nkiko zitanakuzinda. 14Kubuno ndi mukusigilila bantu misako za buagi buabo, nti Soinyue nuwe uli muigulu amusigilile misako za buagi bueinyu. 15Tondo ndi tamukusigilila bantu misako za buagi buabo, nu Soinyue nuwe ntakamusigilila misako za buagi bueinyu.
16Lingo ndi tamulia, tamube anga bengelezi bekukandaga malanga; buno bantu babamenye buno batakulia. Lebelebe, nkumubula bune, Bakasilue lukalilo luabo. 17Tondo uwe ndi ntukulia, ibongie muambo kuitoe, nu nti woga ku meiso; 18tondo ndi ntukulia, ntumenyue na bantu; tondo Soinyue ukumona mu lumbisombiso akukase lukalilo lusoga.
19Tamuibikile bikagi ku kisi, kuli kagembe nu nkisa kubibigia, gena gakuita beibi buno beibe; 20tondo ibikilazi bikagi bienyu muigulu, kuteli kagembe nu nkisa kubibigia, nu lingo gatanavuama kuita beibi buno beibe; 21kubuno gago geli kikagi kiobe, ugago gakaba mutima wobe. 22Kasuku ka mubili keli liso: tondo ndi liso liobe lili isoga, mubili wobe unsania nti uli na kiengi. 23Tondo ndi liso liobe lili ibi, mubili wobe unsania nti uli na kapilo. Ndi kikio kiengi kili muguli kise kapilo; nti keli kapilo nunse. 24Takuli muntu unavuama kukambila bakota babili: embe nti asombe umozi, nu nti atunde ungo; embe anze umozi, nu abenge ungo. Tamunavuama kukambila Kalaga nu bikulo. 25Kubuno nkumubula bune, Tamulemanine mu kalamo keinyu, buno tualie kikizi? aba tuanue kikizi? aba ku mubili weinyu, buno tuavuale kikizi? Ndi kalamo takatinga idia, nu ndi mubili tawatinga nsulu? 26Lolazi ku tuzoni tua mu mpelela, tatukuyika aba tatukutubula mbuto, aba tatukukundamania mu bigenge, tondo Soinyue wa muigulu ekutulisagia. Inyue tamuatinga tuzoni ku busoga? 27Nazi wa kumuli unalemanina kuitalikila ingo nkiko mu kalamo kage? 28Buni bumukulemanina nsulu? Kengelazi lukita lua maluba ma mu masoa, lukita lumakuasa; tamakukita mulimo, aba tamakulukaga; 29tondo nkumubula bune, aba Solomo mu lutanuno luage lunsania ntavualikizibue anga busoga bua limozi lia mamo? 30Tondo ndi Kalaga ekuvualikia bisugu bia masoa, biligo lelo, nu lubi bikutebua mu ngulumina za keiya; ndi ntakamuvualikia inyue beli basosu mu bukatizio bueinyu. 31Tamulemanine nu tamutende bune, Tualie kikizi? aba, Tuanue kikizi? aba, Tuavuale kikizi? 32Kubuno baBilongo bekulondaga bibino binsania; tondo Soinyue wa muigulu eizi binsania bimukuiyanina. 33Tondo londazi tanga bukota bua Kalaga, nu kuisanana kuage; nu muatalikilue binsania. 34Umpanga tamulemanine bia lubi, kubuno busi bua lubi buidemanine bubuenyene. Bubi buabo buasuage kubo.
Currently Selected:
Matayo 6: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
