Matayo 7
7
Kusambala kua Yesu ku Muiduko.
1Tamusungie, buno munavua kusungibua. 2Kubuno lusungio lulo lumukusungia, ululo lumukasungibua; nu kulindika kumukulindika, ukuko kumukalindikua. 3Nuwe, buni bukulola kikolokolo kili mu liso lia munyobe tondo ntukumona ku lubabu luli mu liso liobe? 4Buni bunavuama kutenda ku munyobe bune, Munane, vua tanga nkutikie kikolokolo kili mu liso liobe, nuwe uli na lubabu lunene mu liso liobe? 5Uwe muengelezi, tikia tanga lubabu luli mu liso liobe; nti ubunavuama kutikia kikolokolo kili mu liso lia munyobe.
6Tamukase mboa kikio kiasuaga, aba tamuise busanga bueinyu bua bukunza bubibu gakutinga ngulube, zinavua kubunyanta na magulu mazo, nu gazabunyante nti zabuata.
7Segazi, nu nti muakasue; londazi, nu nti muamone; kokomonazi, nu nti muigulilue. 8Kubuno unsania ukusega, nti akasue; nuwe ukulonda, nti amone; nuwe ukukokomona, nti igulilue. 9Nazi wa kumuli, unasegua na muana wage kampampa, nu nti amukasa ikozi? 10Aba ndi ekumusega kiena ndi nti amukase nzoka? 11Kubuno ndi inyue, bantu babi, muizi kukasa bana beinyu bisoga, embe Soinyue lino uli muigulu ndi ntanamenya kubakasa bisoga babo bakumusega? 12Umpanga bubo bumukutunda bango bantu kumukitila, ububo nuinyue bumubakitila; kubuno bubo u mulembe nu bulengania.
Nzila Ibili.
13Ingilazi ku muingilo wabumbutana: kubuno kuli ungo muingilo wa tanuka, nzila zago zenda ku kuzimina, nu beingi bekuingilaga mugo. 14Kubuno wozo muingilo uli wabumbutana, nu kuzinda kua nzila zago kuli kalamo, nu bekukamona tabeli beingi.
Balengania ba Buza.
15Nikumutonda bune, Kukavua balengania ba buza beingi, bantu bakavua ku lukita lua nsulu za mikoko, tondo munda muabo muli anga mboa nkali za lubanda. 16Mukabamenya ku biguma biabo. Ndi bantu bekukola biguma ku mikele? Aba figi ku binkelenkele? 17Bubo muti unsania musoga ukukolama biguma bisoga; nu muti mubi ukukolama biguma bibi. 18Tondo muti musoga tagunakolama biguma bibi; aba muti mubi kukolama biguma bisoga. 19Muti unsania utakolama biguma bisoga nti wasesue, nu nti weisoe mu keiya. 20Bubo mukabamenya ku biguma biabo. 21Ta na muntu na muntu ukumbula buno, Mukota, Mukota, ukengila mu bukota bua meigulu, tugu wozo ukukita kusombola kua Tatane uli muigulu. 22Beingi bakambula ku busi bubo buno, Mukota, Mukota, ndi tatualenganizie muizina liobe? nu ndi tatuabingaga basumbu kuizina liobe, nu ndi tatuakitaga migeleko mingi kuizina liobe? 23Nu nkababula bune, Nsiamumenyine nunse: tukazi, bakiti ba bubi.
Bobaki Babili.
24Muntu unsania ukunguaga ku malagi mane mamano, nu kumanza, akalingimanibua na muntu wa menge, wobakile numba zage ga luanda; 25mbula zitikide, muiyalo wavule, nu kisoa kitile, nu kidibuide ku zezo numba; nu tazaguide: kubuno mango mazo mabezaga ga luanda. 26Nu muntu unsania ukungua ku mamano malagi mane nu ntakumanza, akalingimanibua na kikongolo, kiobakile numba zage ga misege: 27mbula zitikide, muiyalo wavule, kisoa kitile, nu kidibuide ku zezo numba, nu zaguide; nu kugua kuazo kuabede na kilumo kinene.
28Nu gasilile Yesu kuigisia bitondo bibio musanganano wangamine na meigisia mage; 29kubuno abegisizie anga uli na buangato, nu nteigisizie anga basanzi babo.
Currently Selected:
Matayo 7: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
