Piiligu 13
13
Abram ni Loti barigi taaba niŋi
1A zu, Abram ni o poga nyisigi Yijipiti paaligu kiŋkagili sagbinni, a pori n kpe Keenan paaligu kiŋkagili sazu, a ni o bindaalim bini zaa, ka Loti gba paag u gaari. 2Abram daa niŋini bindaana, a mari peeri, buusi, naagi, gbitisi a ni sugasi. 3Niŋi n na, o nyisigi seela o n zi maa, a poli n jili n ti paa Betel ni Aii sunsuuniŋi, seela o n daa daŋŋi n zi la, ka zi niŋi. 4Seela o n daa n me sariga daaŋu ti Duuma la, ka nyisi sariga nisaaniŋi.
5Loti, so ninu n daa n chaŋina maa gba, daa marini peeri, buusi, naagi ni o laanta dima 6Ama, buŋkobiri moŋobira zii daa bi zoo, ba niriba bayi maa zaa di n lagimi n zi, a kpali bo, buŋkobiri maa daa n niŋi aligaaya. 7Lala zu, zabiri daa li Abram buŋkokpagiriba ni Loti buŋkokpagiriba niŋi. Lala jemani maa ka Keenan nivusi ni niseesi ba n boona Periziti dima la n daa n ba tiŋgbaŋŋu maa niŋi.
8Niŋi n na, Abram yeli Loti, “Ti niŋini dogim luŋko, a bi daga e buŋkokpagiriba ni m buŋkokpagiriba ba zabira, 9Ka tiŋgbaŋŋu maa n do ŋa? Ti barigi taaba. Ka e gaa nuzaa, m ni gaa nudiya, ka e mi gaa nudiya, m ni gaa nuzaa.”
10Loti nyaasi n poli n jili, ka nye maa Joodan falimini, a wa ti paa Zowa, ka niŋi n mari koom nene, a maa Duuma pu la, koo Yijipiti tiŋgbaŋŋu. Ŋama zaa nyaaŋa poin, ka Naawunni daa muri Sodom ni Gomora. 11A zu, Loti nyisi Joodan falimini maa, a kaasi n naag o zu to wuluŋpusigu. Seema a n di niriba bayi maa barigi taaba niŋi n na la. 12Abram zi Keenan tiŋgbaŋŋu maa niŋi, ka Loti mi zi tiŋsi sunsuuniŋi, a yi falimini maa niŋi, a leeli Sodom 13Nisaaniŋi niriba maa daa niŋini ferebeeri dima, ka niŋi yabeeri ga kpe Duuma niŋi.
Abram nyisigi n gaari Hebiron
14Loti ni gaa maa nyaaŋa, Duuma yeli Abram, “Za seela e n be ŋa, ka lalli e nufu nyaasi kiŋkagili sagbinni, sazu, a ni wuluŋpusigu ni wulunliya. 15M ya n naani tiŋgbaŋaa, e n nyaasi a ti e ni e yaŋsi, o niŋi ya toori, a ma n wara. 16M ya n ti i ni yaŋdamta, seesi nisaala zaa di n ki tee n ba kaali, ka nira yi tee n kaali tiŋgbaŋŋu a niŋi tanni, lala wune, ba ni tee kaali e yaŋsi gba. 17Pimparaŋa, nyisigi n poli n jili tiŋgbaŋŋu maa zaa, a nyaasi u, a kpali bo, m ya naagi u ni ti i.”
18Niŋi n na, Abram nyisigi seela o n daa zi la, a wa ti zi n begi Mamiri titintaasi, a yi Hebiron, nisaaniŋi n na o me sariga daaŋu ti Duuma.
Currently Selected:
Piiligu 13: hag
Highlight
Share
Copy
Want to have your highlights saved across all your devices? Sign up or sign in
© 2015, Ghana Institute of Linguistics, Literacy and Bible Translation (GILBTT)
