Hechos 5
5
Da lasouaxashi't soua Ananías qataq aso Safira
1Qalaxayi so lÿa shiÿaxaua l'enaxat Ananías qataq aso lhua Safira, soomayi ime'n so n'alhua. 2Qaq se'eso shiÿaxaua n'onaxatañi aso laÿi mayi lashiue so lma', qaq aso laÿi idou'alo soua namaxa'shi, 'eeta'am naq'en da nalota't. Qaq aso lhua ÿaÿaten 'enauac de'eda. 3Nachi so Pedro 'enapego' somayi, 'eeta':
–Ananías, ¿tá'ainec yi 'aunoxonaqchitoigui añi 'adquiyaqte so Satanás da yaqto' 'auatenachit naq'en so Espíritu Santo, nachi 'an'onaxatañi aso laÿi aso lashiue so 'adma'? 4¿Sa ishito' peta'a da 'adalamaxat som 'alhua? Cha'ayi co'ollaq 'aumen somayi, qaq ¿sa ishito' peta'a da maichi 'adalamaqte aso lashiue? ¿Tá'ainco' yi tachiguio' yi 'adhuel da 'au'ot de'eda? 'Am 'auatenachit ñi Dios, sa ishit da nachica ca yi'oqchigui shiÿaxaua.
5Qaq co'ollaq hua'axaÿa de'eda so Ananías, qaq huañi, nachi ileu. Qaq 'enauac nam ividauga da ÿaÿaten de'eda ÿataqta huo'o da lcolanaxa. 6Nachi ana'c soua nso'q, nachi qoÿaxategue somayi, nachi qaidouec da qailayiñi.
7Qaq co'ollaq mashi ivi' soua tres horas, nachi nvideuo aso lhua. Qaq asomayi sa ishit da ÿaÿaten de'eda. 8Nachi so Pedro inattac asomayi, 'eeta':
–Ñaq aÿim 'au'aqtaxanem. ¿Peta'a nachaso aso lashiue cam qadmayi mayi qaumiñi aso qandoiuo?
Nachi asomayi 'enapeco':
–Aja', nachaso.
9Nachi so Pedro 'enapego' asomayi, 'eeta':
–¿Tá'ainco' qami' yi qautaqÿapigui co'ollaxa da qauatenachichi so Espíritu mayi chigoqo'ot ñi Dios? Qaq nagui mashi nvildeuo nam idodeec da ilalyiñi so 'adhua. Qaq nagui nataq'en 'am qaidouec.
10Huaña, nachi asomayi huañi da ileu, huaña ca hueta'a so Pedro. Qaq co'ollaq nnoxoodeuo soua nso'q, nachi qailalec asomayi, nachi qanqateec da qailayiñi, qaÿauaxaÿaxaate' so lhua. 11Nachi 'enauac nam shiÿaxauapi 'amqajnataxanaxaicpi qataq 'enauac na laÿipi co'ollaq ÿaÿaten de'eda, nachi ÿataqta qalota da lcolanaxa.
Qalota na sa qaÿauanapigui qataq na n'anecpi
12Qaq ÿataqta qalota na n'anecpi qataq na sa qaÿauanapigui da i'o't soua namaxa'shi da huaigui naq'en na shiÿaxauapi. Qaq 'enauac namayipi lapootega't, hueta'a cam qaÿamata'ac nqasoxoc so Salomón. 13Qalaxayi huo'o na laÿipi shiÿaxauapi na sa ishit da ÿalegoigui namayipi, qalaxayi 'enauac ne'ena sa ÿalegueuopi ÿataqta ÿi'oxodeetac namayipi. 14Qaq ivida'a da ÿataqta qalota na i'amaqten so qadataxala', na ÿallippi qataq na 'alpi. 15Qaq ÿoqo'oyi ivida'a da qanqateec na dalolaxaicpi, qaÿachitalguete naua lmala'te qataq naua lacanqa, da qaidougalo na nqa'aico, yaqto' da huo'o ca nateuga so Pedro, nachi nai'ctaxa da huo'otaq chochi lpaqal ca tajlec ca 'oonolec namayipi. 16Nataq'en nam sa qaÿapeque pueblopiolec ÿataqta qalota na anac shiÿaxauapi da anaÿa yi Jerusalén da ndoi' nam dalolaxaicpi, qataq nam huo'o na l'ec leguemaxaic, nachi 'enauac namayipi qanataden.
So Pedro qataq so Juan qaicaata'pe
17Nachi som lta'a na ntaxaÿaxanaxanecpi qataq na quetague' na saduceopi mayi hueta'aguet somayi ÿataqta nquiÿalo soua namaxa'shi. 18Nachi ÿaconeu'alo soomayi da icoñi't, ÿaadaigui aca ncoñitaxanaxaqui late'edai. 19Qalaxayi so lamaxashic piguem l'ec ñi qadataxala' ÿauatoiguilo soua laso'mi aso ncoñitaxanaxaqui se'eso pe, nachi nqatreec soomayi. Nachi 'enapegalo', 'eeta':
20–Qauesomiÿa qome, qanqo'oñiÿa añi n'onaxanaxaqui. Huaña, nachi qau'aqtaxañiim 'enauac na shiÿaxauapi dam nca'alaxa dalaxaic.
21Nachi co'ollaq hua'aqchiyigui de'eda, nachi so lÿa na'a'q ña nte'etom nachi nqo'oodeu'a aso n'onaxanaxaqui, nachi qaltaq dapaxaguenataxaata'pe.
Qaq se'eso lta'a na ntaxaÿaxanaxanecpi qataq som ltauapi i'ot so laponaxac, ÿataxana't na nta'alpi mayi loicnatac na lataxaguesat. De'eda naigui da anac 'enauac nam lquedoxonecpi na llalaqpi so Israel. Nachi qaÿamaxasoxoneu'alo soua Jesús lamaxa'shi mayi netraigui aso ncoñitaxanaxaqui. 22Qalaxayi som huataxanaqpi co'ollaq ivideu'a aso ncoñitaxanaxaqui, nachi sa ishit da ÿanatalo soomayi. Nachi ÿi'iguelaq da ÿachi de'eda n'axaÿaxac, 23'eeta':
–Qomi' semejnaqtac añi ncoñitaxanaxaqui da ÿataqta qaÿapochigui, qataq huo'oi daua huataxanaq lashi' mayi nauaata'pe naua laso'mi. Qalaxayi can sauataxaigui, nachi sa ishit da huo'o ca selaqa'a na pa'auo.
24Nachi co'ollaq hua'axaÿa de'eda som lta'a na ntaxaÿaxanaxanecpi qataq som lta'a nam ilotague' aso n'onaxanaxaqui, qataq som lataxala'pi na ntaxaÿaxanaxanecpi, nachi somayipi nnattega't da chaq 'eetec qome ca taÿa'a 'enauac de'eda. 25Huaña, nachi nvideuo so shiÿaxaua, nachi da'aqtaxanem somayipi, 'eeta':
–Dam shiÿaxa'u mayi qami' qai'añiÿaiguilo añi ncoñitaxanaxaqui, daamayi qataq huetra'a añi n'onaxanaxaqui, ÿapaxagueetrac na shiÿaxauapi.
26Nachi som lta'a na huataxanaqpi jec, lÿa som nallippi da naueguedeuo soomayi. Qalaxayi sa ishit da sa iyina'pe soomayi, cha'ayi ñi'itega na shiÿaxauapi da huo'otaq ÿasaq somayi na coma'. 27Qaq co'ollaq nvidaxatreuo soomayi, nachi nachaalataxanguilo na laiñi som nta'alpi mayi loicnatac na lataxaguesat. Nachi som lta'a na ntaxaÿaxanaxanecpi 'enapegalo soomayi, 'eeta':
28–Qomi' mashi qami' sellaqpeguema co'ollaxa da sa ishit da qauapaxaguenataxañiic da l'enaxat so Jesús, qalaq ¿huá'ague ca 'eetec de'eda qau'ochi? Qami' mashi qanlaxachiichigui 'enauac na Jerusalén da qadapaxaguenataxanaxaqui, qataq qanshiitaique da qomi' qauasaqailguete da l-leuaxa se'eso shiÿaxaua da qadasouaxashit.
29Nachi so Pedro qataq soua lÿa't namaxa'shi 'ena'po':
–Qomi' iuen da hua'auñi da ÿataqta salaxasoxoguet ñi Dios, ime, qataq jec na yi'oqchigui shiÿaxauapi. 30Ñim nDios so hua'au qadta'alpi, ñimayi qaltaq nca'alaxateec co'ollaxa so Jesús, som qami' qaualauachi co'ollaxa, nachi qauaxañiiguet so npe'enaxaqui. 31Qalaxayi ñi Dios ÿaueegue somayi da piguem, nachi ÿana'ague naq'en da aloic, qataq ÿanagui da nta'a qataq nca'alaxaqui. Cha'ayi ñimayi nshitaique da na Israel llalaqpi da ñaq ca'aisalo naua n'onataxaco, nachi qaÿapalaxat na lasouaxashitpi. 32Qaq de'eda nachiqomi' mayi sa'axataqtac, qataq so Espíritu Santo nataq'en i'axattac, qaq ñi Dios ÿanem somayi cam ÿalaxaguet ñimayi.
33Qaq co'ollaq qai'axaÿa de'eda, nachi somayipi ÿataqta dalemata, nachi qaÿauotaique da qaÿalaua't soomayi. 34Qalaxayi se'eso nta'alpi nachi ÿalectaigui som chigaqaigui na fariseopi, l'enaxat Gamaliel. Somayi nachi dapaxaguenataxaatapeguec na nqataxacpi, ÿoqo'oyi ÿataqta huo'o naq 'enec qanqoÿin. Nachi somayi nachajñi, nachi damaxasoxoolec da cada'ac da qanqatreec soua namaxa'shi. 35Qaq co'ollaq ime, nachi 'enapego' so nta'alpi, 'eeta':
–Qami' Israel l'ecpi, maxatchaxa qome da qadvichiÿalguete de'edaua shiÿaxa'u da huo'o ca qau'ochiique. 36Cha'ayi qami' qauennachii da huo'o so na'a'q co'ollaxa da nachajñi so Teudas, nachi 'enapec da huo'o naq 'enec, nachi ivi' cuatrocientos so shiÿaxauapi mayi quegue somayi. Qalaxayi somayi co'ollaxa qaÿalauat, nachi 'enauac som quetague'pi somayi nlagaxattac. Huaña, nachi imeuo da l'onataxanaxac. 37Qaq co'ollaq qaÿata'ague de'eda, nachi qaltaq huetoigui so na'a'q co'ollaq qoÿiyiñi 'enauac na shiÿaxauapi da qanaloqna't, nachi nachajñi so Judas, Galilea l'ec. Qaq nachi 'en'am ÿataqta qalota na quegue somayi. Qalaxayi somayi nataq'en qaÿalauat, nachi 'enauac nam quetague'pi nlagaxattac. 38Qaq ÿoqo'oyi qami' no'on da qauauaqaita'alo qome de'edaua shiÿaxa'u, sa ishit da sa qaualemaxachi'. Cha'ayi de'eda i'ottrac qom chochi shiÿaxaua ca l'onataxanaxac, nachi ishit qome da imeuo. 39Qalaxayi damayi da huo'otaq nachiñi ñi Dios da chigoqo'ot, nachi qami' sa ishit da qanlaxachiiñi. Ÿoqo'oyi qadvichiÿalec qome damayi. Ten, qom 'eeta'am da qanpa'aguiñiitague' ñi Dios.
40Nachi 'enauac somayipi ÿaÿamaxadeeta da 'enapec se'eso Gamaliel. Nachi qaiÿaxaneugalo soua Jesús lamaxa'shi, nachi qaiuaxaata'pe qataq qoÿinapegalo da sa ishit da i'axattrac da l'enaxat so Jesús. Ime, nachi qaisodeec. 41Nachi se'esoua Jesús lamaxa'shi chigoqtoiguilo so nta'alpi ÿataqta huo'o da ntonaxa'c, cha'ayi ñi Dios ÿashiitegueta soomayi da huo'o da nque'ejnaxa'c, huasoidelec da l'enaxat so Jesús. 42Nachi soomayi quetoto da dapaxaguenataxaata'pe qataq i'axattrac so Jesús 'enauaque naua na'axa'te, huo'o da huetra'a aso n'onaxanaxaqui, huo'otaq naua nma'te.
Currently Selected:
Hechos 5: TBSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
Hechos 5
5
Da lasouaxashi't soua Ananías qataq aso Safira
1Qalaxayi so lÿa shiÿaxaua l'enaxat Ananías qataq aso lhua Safira, soomayi ime'n so n'alhua. 2Qaq se'eso shiÿaxaua n'onaxatañi aso laÿi mayi lashiue so lma', qaq aso laÿi idou'alo soua namaxa'shi, 'eeta'am naq'en da nalota't. Qaq aso lhua ÿaÿaten 'enauac de'eda. 3Nachi so Pedro 'enapego' somayi, 'eeta':
–Ananías, ¿tá'ainec yi 'aunoxonaqchitoigui añi 'adquiyaqte so Satanás da yaqto' 'auatenachit naq'en so Espíritu Santo, nachi 'an'onaxatañi aso laÿi aso lashiue so 'adma'? 4¿Sa ishito' peta'a da 'adalamaxat som 'alhua? Cha'ayi co'ollaq 'aumen somayi, qaq ¿sa ishito' peta'a da maichi 'adalamaqte aso lashiue? ¿Tá'ainco' yi tachiguio' yi 'adhuel da 'au'ot de'eda? 'Am 'auatenachit ñi Dios, sa ishit da nachica ca yi'oqchigui shiÿaxaua.
5Qaq co'ollaq hua'axaÿa de'eda so Ananías, qaq huañi, nachi ileu. Qaq 'enauac nam ividauga da ÿaÿaten de'eda ÿataqta huo'o da lcolanaxa. 6Nachi ana'c soua nso'q, nachi qoÿaxategue somayi, nachi qaidouec da qailayiñi.
7Qaq co'ollaq mashi ivi' soua tres horas, nachi nvideuo aso lhua. Qaq asomayi sa ishit da ÿaÿaten de'eda. 8Nachi so Pedro inattac asomayi, 'eeta':
–Ñaq aÿim 'au'aqtaxanem. ¿Peta'a nachaso aso lashiue cam qadmayi mayi qaumiñi aso qandoiuo?
Nachi asomayi 'enapeco':
–Aja', nachaso.
9Nachi so Pedro 'enapego' asomayi, 'eeta':
–¿Tá'ainco' qami' yi qautaqÿapigui co'ollaxa da qauatenachichi so Espíritu mayi chigoqo'ot ñi Dios? Qaq nagui mashi nvildeuo nam idodeec da ilalyiñi so 'adhua. Qaq nagui nataq'en 'am qaidouec.
10Huaña, nachi asomayi huañi da ileu, huaña ca hueta'a so Pedro. Qaq co'ollaq nnoxoodeuo soua nso'q, nachi qailalec asomayi, nachi qanqateec da qailayiñi, qaÿauaxaÿaxaate' so lhua. 11Nachi 'enauac nam shiÿaxauapi 'amqajnataxanaxaicpi qataq 'enauac na laÿipi co'ollaq ÿaÿaten de'eda, nachi ÿataqta qalota da lcolanaxa.
Qalota na sa qaÿauanapigui qataq na n'anecpi
12Qaq ÿataqta qalota na n'anecpi qataq na sa qaÿauanapigui da i'o't soua namaxa'shi da huaigui naq'en na shiÿaxauapi. Qaq 'enauac namayipi lapootega't, hueta'a cam qaÿamata'ac nqasoxoc so Salomón. 13Qalaxayi huo'o na laÿipi shiÿaxauapi na sa ishit da ÿalegoigui namayipi, qalaxayi 'enauac ne'ena sa ÿalegueuopi ÿataqta ÿi'oxodeetac namayipi. 14Qaq ivida'a da ÿataqta qalota na i'amaqten so qadataxala', na ÿallippi qataq na 'alpi. 15Qaq ÿoqo'oyi ivida'a da qanqateec na dalolaxaicpi, qaÿachitalguete naua lmala'te qataq naua lacanqa, da qaidougalo na nqa'aico, yaqto' da huo'o ca nateuga so Pedro, nachi nai'ctaxa da huo'otaq chochi lpaqal ca tajlec ca 'oonolec namayipi. 16Nataq'en nam sa qaÿapeque pueblopiolec ÿataqta qalota na anac shiÿaxauapi da anaÿa yi Jerusalén da ndoi' nam dalolaxaicpi, qataq nam huo'o na l'ec leguemaxaic, nachi 'enauac namayipi qanataden.
So Pedro qataq so Juan qaicaata'pe
17Nachi som lta'a na ntaxaÿaxanaxanecpi qataq na quetague' na saduceopi mayi hueta'aguet somayi ÿataqta nquiÿalo soua namaxa'shi. 18Nachi ÿaconeu'alo soomayi da icoñi't, ÿaadaigui aca ncoñitaxanaxaqui late'edai. 19Qalaxayi so lamaxashic piguem l'ec ñi qadataxala' ÿauatoiguilo soua laso'mi aso ncoñitaxanaxaqui se'eso pe, nachi nqatreec soomayi. Nachi 'enapegalo', 'eeta':
20–Qauesomiÿa qome, qanqo'oñiÿa añi n'onaxanaxaqui. Huaña, nachi qau'aqtaxañiim 'enauac na shiÿaxauapi dam nca'alaxa dalaxaic.
21Nachi co'ollaq hua'aqchiyigui de'eda, nachi so lÿa na'a'q ña nte'etom nachi nqo'oodeu'a aso n'onaxanaxaqui, nachi qaltaq dapaxaguenataxaata'pe.
Qaq se'eso lta'a na ntaxaÿaxanaxanecpi qataq som ltauapi i'ot so laponaxac, ÿataxana't na nta'alpi mayi loicnatac na lataxaguesat. De'eda naigui da anac 'enauac nam lquedoxonecpi na llalaqpi so Israel. Nachi qaÿamaxasoxoneu'alo soua Jesús lamaxa'shi mayi netraigui aso ncoñitaxanaxaqui. 22Qalaxayi som huataxanaqpi co'ollaq ivideu'a aso ncoñitaxanaxaqui, nachi sa ishit da ÿanatalo soomayi. Nachi ÿi'iguelaq da ÿachi de'eda n'axaÿaxac, 23'eeta':
–Qomi' semejnaqtac añi ncoñitaxanaxaqui da ÿataqta qaÿapochigui, qataq huo'oi daua huataxanaq lashi' mayi nauaata'pe naua laso'mi. Qalaxayi can sauataxaigui, nachi sa ishit da huo'o ca selaqa'a na pa'auo.
24Nachi co'ollaq hua'axaÿa de'eda som lta'a na ntaxaÿaxanaxanecpi qataq som lta'a nam ilotague' aso n'onaxanaxaqui, qataq som lataxala'pi na ntaxaÿaxanaxanecpi, nachi somayipi nnattega't da chaq 'eetec qome ca taÿa'a 'enauac de'eda. 25Huaña, nachi nvideuo so shiÿaxaua, nachi da'aqtaxanem somayipi, 'eeta':
–Dam shiÿaxa'u mayi qami' qai'añiÿaiguilo añi ncoñitaxanaxaqui, daamayi qataq huetra'a añi n'onaxanaxaqui, ÿapaxagueetrac na shiÿaxauapi.
26Nachi som lta'a na huataxanaqpi jec, lÿa som nallippi da naueguedeuo soomayi. Qalaxayi sa ishit da sa iyina'pe soomayi, cha'ayi ñi'itega na shiÿaxauapi da huo'otaq ÿasaq somayi na coma'. 27Qaq co'ollaq nvidaxatreuo soomayi, nachi nachaalataxanguilo na laiñi som nta'alpi mayi loicnatac na lataxaguesat. Nachi som lta'a na ntaxaÿaxanaxanecpi 'enapegalo soomayi, 'eeta':
28–Qomi' mashi qami' sellaqpeguema co'ollaxa da sa ishit da qauapaxaguenataxañiic da l'enaxat so Jesús, qalaq ¿huá'ague ca 'eetec de'eda qau'ochi? Qami' mashi qanlaxachiichigui 'enauac na Jerusalén da qadapaxaguenataxanaxaqui, qataq qanshiitaique da qomi' qauasaqailguete da l-leuaxa se'eso shiÿaxaua da qadasouaxashit.
29Nachi so Pedro qataq soua lÿa't namaxa'shi 'ena'po':
–Qomi' iuen da hua'auñi da ÿataqta salaxasoxoguet ñi Dios, ime, qataq jec na yi'oqchigui shiÿaxauapi. 30Ñim nDios so hua'au qadta'alpi, ñimayi qaltaq nca'alaxateec co'ollaxa so Jesús, som qami' qaualauachi co'ollaxa, nachi qauaxañiiguet so npe'enaxaqui. 31Qalaxayi ñi Dios ÿaueegue somayi da piguem, nachi ÿana'ague naq'en da aloic, qataq ÿanagui da nta'a qataq nca'alaxaqui. Cha'ayi ñimayi nshitaique da na Israel llalaqpi da ñaq ca'aisalo naua n'onataxaco, nachi qaÿapalaxat na lasouaxashitpi. 32Qaq de'eda nachiqomi' mayi sa'axataqtac, qataq so Espíritu Santo nataq'en i'axattac, qaq ñi Dios ÿanem somayi cam ÿalaxaguet ñimayi.
33Qaq co'ollaq qai'axaÿa de'eda, nachi somayipi ÿataqta dalemata, nachi qaÿauotaique da qaÿalaua't soomayi. 34Qalaxayi se'eso nta'alpi nachi ÿalectaigui som chigaqaigui na fariseopi, l'enaxat Gamaliel. Somayi nachi dapaxaguenataxaatapeguec na nqataxacpi, ÿoqo'oyi ÿataqta huo'o naq 'enec qanqoÿin. Nachi somayi nachajñi, nachi damaxasoxoolec da cada'ac da qanqatreec soua namaxa'shi. 35Qaq co'ollaq ime, nachi 'enapego' so nta'alpi, 'eeta':
–Qami' Israel l'ecpi, maxatchaxa qome da qadvichiÿalguete de'edaua shiÿaxa'u da huo'o ca qau'ochiique. 36Cha'ayi qami' qauennachii da huo'o so na'a'q co'ollaxa da nachajñi so Teudas, nachi 'enapec da huo'o naq 'enec, nachi ivi' cuatrocientos so shiÿaxauapi mayi quegue somayi. Qalaxayi somayi co'ollaxa qaÿalauat, nachi 'enauac som quetague'pi somayi nlagaxattac. Huaña, nachi imeuo da l'onataxanaxac. 37Qaq co'ollaq qaÿata'ague de'eda, nachi qaltaq huetoigui so na'a'q co'ollaq qoÿiyiñi 'enauac na shiÿaxauapi da qanaloqna't, nachi nachajñi so Judas, Galilea l'ec. Qaq nachi 'en'am ÿataqta qalota na quegue somayi. Qalaxayi somayi nataq'en qaÿalauat, nachi 'enauac nam quetague'pi nlagaxattac. 38Qaq ÿoqo'oyi qami' no'on da qauauaqaita'alo qome de'edaua shiÿaxa'u, sa ishit da sa qaualemaxachi'. Cha'ayi de'eda i'ottrac qom chochi shiÿaxaua ca l'onataxanaxac, nachi ishit qome da imeuo. 39Qalaxayi damayi da huo'otaq nachiñi ñi Dios da chigoqo'ot, nachi qami' sa ishit da qanlaxachiiñi. Ÿoqo'oyi qadvichiÿalec qome damayi. Ten, qom 'eeta'am da qanpa'aguiñiitague' ñi Dios.
40Nachi 'enauac somayipi ÿaÿamaxadeeta da 'enapec se'eso Gamaliel. Nachi qaiÿaxaneugalo soua Jesús lamaxa'shi, nachi qaiuaxaata'pe qataq qoÿinapegalo da sa ishit da i'axattrac da l'enaxat so Jesús. Ime, nachi qaisodeec. 41Nachi se'esoua Jesús lamaxa'shi chigoqtoiguilo so nta'alpi ÿataqta huo'o da ntonaxa'c, cha'ayi ñi Dios ÿashiitegueta soomayi da huo'o da nque'ejnaxa'c, huasoidelec da l'enaxat so Jesús. 42Nachi soomayi quetoto da dapaxaguenataxaata'pe qataq i'axattrac so Jesús 'enauaque naua na'axa'te, huo'o da huetra'a aso n'onaxanaxaqui, huo'otaq naua nma'te.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.