Juan 17
17
So Jesús nqouagaxaueelec som lapaxaguenatacpi
1Qaq co'ollaq ime da 'enapec de'eda so Jesús, nachi ÿamato'ot na piguem, nachi 'enapeco':
–'Am ita'a, mashi ivita yi ÿaloqo'. Nagui 'avi'oxoden qome na 'ai'alec, yaqto' na 'ai'alec nataq'en 'am ÿi'oxoden. 2Cha'ayi 'am 'ai'anem co'ollaxa da l'añaxac na 'ai'alec, da yaqto' ilo'ogue 'enauac na shiÿaxauapi, qataq da yaqto' ÿanem da lca'alaxa mayi chochaq tateec 'enauac nam 'ai'anempi namayi. 3Qaq de'eda achaalataxac mayi chochaq tateec, damayi nachida da naigui da 'am qaÿauatton, 'am Dios mayi nachi'amta qataq 'am 'eesa, qataq na 'ai'alec Jesucristo mayi 'anamaq co'ollaxa.
4Qaq aÿim ÿataqta 'am shi'oxodeetac nagui da soota'a ana 'alhua, qataq ÿataqta sematta da aÿim 'auamaxalec da so'ot. 5Qaq nagui, 'am ita'a, ñishitaique da sootau'a na 'adaÿi, da aÿim 'ai'anem da ÿi'oxoyic mayi saatañi co'ollaq 'am sooto'ot co'ollaq saxanaqaca ana 'alhua.
6Qaq nam 'adca'aguishicpi mayi 'auachigoxottoigui co'ollaxa nam huetalec ana 'alhua da yaqto' aÿim 'ai'anem, namayipi sogote da sa'axattem da qoneta. Namayipi 'adalamaxatpi, qalaxayi aÿim 'ai'anem, qaq namayipi ÿataqta ÿalaxaguet da 'ad'aqtac. 7Qataq namayipi ÿaÿateeta da 'enauac nam aÿim 'ai'anem 'am chigoqtot, 8cha'ayi mashi sanem dam 'ad'aqtac mayi aÿim 'ai'anem. Qaq namayipi ÿaconguet, qataq ÿaÿateeta da ÿoqta 'eesa da 'am sachigoqtot, qataq i'amaqten da aÿim 'adamaxashic.
9Qaq aÿim 'am ñachoxonnot souaxat namayipi. Qaq sa ishit da ñachoxodeetapeguelec nam huetalec ana 'alhua, chaqnata nam aÿim 'ai'anempi, cha'ayi 'adalamaxatpi. 10Cha'ayi 'enauac nam ÿalamaxatpi, namayipi 'adalamaxatpi, qaq nam 'adalamaxatpi, namayipi nataq'en ÿalamaxatpi. Nachi da ÿi'oxoyic qaila'a da huetaigui namayipi. 11Qaq aÿim mashi sa ishit da soota'a ana 'alhua. Qalaxayi namayipi ñaq huetalec ana 'alhua, qaq aÿim nagui ashic da 'am ñoqo'ona. 'Am ita'a mayi 'am qui'itta, 'au'ogoxona qome da 'ad'añaxac da 'antela'a nam aÿim 'ai'anempi, yaqto' namayipi ÿataqta n'atta't, 'eeta'am da 'eetec 'am qataq aÿim. 12Co'ollaq soota'aguet namayipi ana 'alhua, qalaq aÿim so'ogoxona da 'ad'añaxac da ñitela'a qataq da ñipaxattalec nam aÿim 'ai'anempi. Qaq sa ishit da huo'o ca daqat namayipi, chaqsota som nal'ena da taÿa'a da daqat, yaqto' ÿataqta ipacchigui dam 'enapec naua nanettrañi n'aqtaqa.
13Qaq nagui mashi 'am ñoqo'ona, qalaxayi nagui da ñaq sootalec ana 'alhua, qalaq aÿim shinapec de'eda, yaqto' namayipi ÿataqta nlaqchigui da ñitonaxac. 14Qaq aÿim sanem namayipi da 'ad'aqtac, qalaxayi nam huetalec ana 'alhua ÿataqta nquiÿa namayipi, cha'ayi namayipi sa ishit da lma' ana 'alhua, 'eeta'am da 'eetec da aÿim sa ishit da ima' ana 'alhua. 15Qaq aÿim sa ishit da 'am seÿaxaatacot da yaqto' 'anqateeguesop namayipi ana 'alhua, chaqdata da 'am seÿaxaatacot da 'anpaxatalec namayipi, souaxat so shiÿaxaua lma'na. 16Qaq de'eda 'eetec da aÿim sa ishit da ima' ana 'alhua, qaq nachida da 'eetec namayipi da sa ishit da lma' ana 'alhua. 17Qaq 'auÿotauga qome namayipi, da yaqto' 'adalamaxatpi, 'auachigoxotchigui dam 'eesa lataxac; dam 'ad'aqtac mayi ÿataqta 'eesa. 18Qaq de'eda 'eetec da aÿim 'anamaxa na huetalec ana 'alhua, qaq nachida da shiitec nataq'en da aÿim samaxa namayipi nam huetalec ana 'alhua. 19Qataq souaxat namayipi nachi aÿim ÿataqta 'am ñañanot, yaqto' namayipi nataq'en ishit da 'am nañanot, chigoqchigui dam 'eesa lataxac.
20Qalaxayi sa ishit da nachaqnata namayipi da ñachoxodeetapeguelec, nataq'en cam aÿim i'amaqtenpi qome, qom hua'axaÿa ca l'aqtaxanaxac namayipi. 21Qataq 'am seÿaxanot, 'am ita'a, da yaqto' 'enauac namayipi ÿataqta n'atta't, da ÿataqta 'oonolec ca lataxac da qomi' n'attau'alo, yaqto' ishit da 'eeta'am da 'am aÿim qoueta'aguet, qataq aÿim 'am soota'aguet. Qataq ñishitaique da namayipi ÿataqta n'atta't, yaqto' nam huetalec ana 'alhua ishit da i'amaqten da aÿim 'adamaxashic. 22Qataq aÿim sanem namayipi dam ÿi'oxoyic mayi aÿim 'ai'anem, yaqto' namayipi ÿataqta 'oonolec ca lataxac, 'eeta'am da 'eetec 'am qataq aÿim da ÿataqta 'oonolec da qadataxac. 23Aÿim soota'aguet namayipi, qataq 'am aÿim qoueta'aguet, yaqto' namayipi ishit da ÿataqta 'oonolec ca lataxac, qaq yaqto' nam huetalec ana 'alhua ishit da ila'a da 'am aÿim 'adamaxashic, qataq da ÿataqta 'auauotec namayipi, 'eeta'am da 'eetec da ÿataqta aÿim 'auauotec.
24'Am ita'a, namayipi aÿim 'ai'anem co'ollaxa, qaq ÿoqo'oyi ñishitaique da namayipi aÿim hueta'aguet qome cam soota'a, yaqto' ÿauaachigui cam ÿi'oxoyic mayi aÿim 'ai'ami'. Cha'ayi 'am nal'ena co'ollaxa da ÿataqta aÿim 'auauotec co'ollaq saxanaqaca ana 'alhua. 25'Am ita'a mayi ÿataqta ÿaÿamaqchiyiñi naua 'au'o't, nam huetalecpi ana 'alhua sa ishit da 'am ÿauatton. Qalaxayi aÿim 'am sauatton, qaq ne'enapi mashi sogote da ÿaÿaten da 'am aÿim 'adamaxashic. 26Aÿim mashi saÿajnaxanaxanec namayipi da qoneta, qalaxayi ñaqaiyita aÿim ñaq shicto'ot da 'am sa'axattac, yaqto' dam 'adauotaxanaqtaic da shiita nachi 'eetai' da huetaigui namayipi, qataq yaqto' aÿim nachi 'eetai' da soota'aguet namayipi.
Currently Selected:
Juan 17: TBSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
