Juan 16

1Qaq nagui qami' sa'axatema de'eda, yaqto' sa ishit qome da qauashiiuec. 2Qami' qaÿamaqdauec qome da huaigui ana laponaxaqui na judiopi, qataq ivida'a qome da huo'o ca ishit da qami' ÿalaua't, nachi camayi ipi'itaxaatega da i'ottac cam l'onataxanaxac ñi Dios. 3Qaq i'ot qome de'eda namayipi, cha'ayi sa ishit da ÿauatton ñi ita'a, nataq'en aÿim. 4Qaq nagui qami' sa'axatema de'eda, yaqto' qom ivita ca laloqo', nachi qami' ishit da qauennachi da mashi sogote da qami' sa'axattapeguema damayi.

Dam l'onataxanaxac som Espíritu Santo

Sa ishit da qami' sa'axatema de'eda co'ollaq chita'ague da so'onataxan, cha'ayi aÿim ñaq qami' soota'agueta. 5Qalaxayi nagui aÿim ashic da ñoqo'ona ñim aÿim namaq; qaq sa ishit da huo'o ca 'oonolec da qoñiita da aÿim inattac da chaq hua'ague ca sataigue. 6Chaqdata da qami' qauaquicoita, souaxat da qami' sa'axatema de'eda. 7Qalaxayi ÿataqta 'eesa de'eda qami' sa'axatema, mayi 'eeta': Aÿim ÿaÿamaqchiguiñi da ashic souaxat da qoñiita. Cha'ayi da sa ishit da ashic, nachi sa ishit qome da anac da qami' hueta'agueta cam qami' itaua'n qataq qami' i'añaqchi't. Qalaxayi da aÿim ashic, nachi ñamaq qome camayi. 8Qaq qom ivita da anac camayi, nachi ÿaÿajnaxanaxanec nam shiÿaxauapi mayi huetalec ana 'alhua da 'itaxaloxoicpi, qataq da huo'o ca nqa'aic mayi ÿaÿamaqchiguiñi, qataq da ñi Dios ÿauo'o qome ca nhuaxanaguec namayipi. 9Namayipi huo'o da lasouaxashit, cha'ayi sa ishit da aÿim i'amaqten; 10qataq namayipi qome ishit da ÿaÿaten da huo'o ca nqa'aic ÿaÿamaqchiguiñi, cha'ayi aÿim saigue da neta'ague ñi ita'a, nachi qami' qome sa ishit da aÿim qauloÿa'a; 11qataq namayipi qome ÿaÿaten da ñi Dios ÿauo'o ca nhuaxanaguec, cha'ayi mashi sogote da qaÿauo'o da nhuaxanaguec som damaxasoxonapec ana 'alhua.

12Qaq aÿim qalota na i'aqtacpi da qami' sa'axatema, qalaxayi sa ishit da qauaÿajñi nagui. 13Qalaxayi qom anac cam Espíritu mayi ÿoqta 'eesa, nachi camayi qami' ÿapaxaguenque 'enauac nam lataxaguesat mayi 'eesa; cha'ayi camayi sa ishit da maichi nalligoxottela't ca l'aqtaxanaxac, chaqdata da i'axat 'enauac nam hua'aqchigui, qataq qami' ÿaÿajnaxanaxanque cam ñaq naÿa'cna. 14Qaq camayi qome ÿataqta aÿim ÿi'oxoden, cha'ayi camayi ÿaconguet nam ÿalamaxatpi, nachi qami' ÿaÿajnaxanaxanque. 15Cha'ayi 'enauac nam lalamaxatpi ñi ita'a, namayipi nataq'en ÿalamaxatpi. Qaq ÿoqo'oyi aÿim shinapec da que'eca Espíritu ÿaconguet qome nam ÿalamaxatpi, nachi qami' ÿaÿajnaxanaxanque.

Da naquicoxo nañigui qanqoÿin da tonaxac

16Qaq mashi yaqta'a da qami' sa ishit qome da aÿim qauloÿa'a, qalaxayi saqaÿaloq qome da qaltaq aÿim qauloÿa'a, cha'ayi aÿim saigue da neta'ague ñi ita'a.

17Nachi som lapaxaguenatacpi huo'o na nnattega't, 'eeta':

–¿Chaq huá'ague ca 'eetec ca naigui da l'aqtac? Da 'eetega da saqaÿaloq qome da sa selaqa'a, qalaxayi nataq'en saqaÿaloq da qaltaq selaqa'a, cha'ayi souaxat da taigue da neta'ague ñi lta'a. 18Qaq ¿chaq huá'ague ca 'eetec de'eda 'eeta': “saqaÿaloq qome da aÿim sa qauloÿa'a?” Qomi' sa ishit da saÿajnaq chaq negue't ca 'eetega.

19Nachi so Jesús noma'a da huotaique da qainat, nachi 'enapega somayipi, 'eeta':

–Aÿim shinapec da mashi saqaÿaloq da aÿim sa qauloÿa'a, qalaxayi saqaÿaloq qome da qaltaq aÿim qauloÿa'a. Qaq ¿nachida peta'a da qannachiitapigui qami'? 20Qaq ÿataqta 'eesa de'eda qami' sa'axatema nagui, da qami' qome qanoÿiñiitac, qataq qauaquicoita, qaq nam shiÿaxauapi mayi huetalec ana 'alhua, namayipi qome machiguiñi. Qalaxayi nai'ctaxa qome da qami' ÿataqta qauaquicoita, qalaxayi de'eda qadaquicoqoi, damayi naigui ca qantonaxaqui. 21Aca 'alo da ivita yi laloqo' da deco'o, qalaq ÿataqta dachitata, cha'ayi mashi ivita yi laloqo' da nqui'ic. Qalaxayi da mashi ñiguiñi ca llalec, nachi acamayi icoua'ai so nqui'ic, souaxat da ntonaxac da ñiguiñi so nogotolec ana 'alhua. 22Qaq nachi 'eetec nataq'en da qoñiita nagui huo'o da qadachitataiqui, qalaxayi aÿim qami' ñi'iguelaxalo qome, nachi da qadquiyaqteÿaxaqui ÿataqta nlaqchigui da qantonaxaqui, qaq que'eca qantonaxaqui sa ishit qome da huo'o ca nqat.

23Qaq que'eca na'a'q qome, nachi sa ishit da huo'o ca aÿim inattac da qoñiita. Qaq ÿataqta 'eesa de'eda qami' sa'axatema, da ñi ita'a qami' ÿanema qome 'enauac ca qauÿaxañiÿaique da qoviilec da i'enaxat. 24Qaq chochi ivitta'a nagui da qami' saxanaxa da huo'o ca qauÿaxañiÿaique da qoviilec da i'enaxat. Qaq qauÿaxañi qome, nachi qauacoñiiguet ca qauÿaxañiÿaique, yaqto' ÿataqta qami' nlaqchiguilo da qantonaxaqui.

So Jesucristo loxonec na 'onataxac ana 'alhua

25Qaq qami' sa'axatema 'enauac ne'ena, qalaxayi sauota'alo naua ÿaloqnaxanqa'te. Qalaxayi natai' ca laloqo' da sa ishit qome da sauota'ai naua ÿaloqnaxanqa'te, chaqdata da ÿataqta qami' sa'axattema ñi ita'a. 26Nachi que'eca na'a'q qome, ÿataqta qoviilec da i'enaxat da qauÿaxañi, qaq aÿim shinapec da sa ishit qome da qami' ñachoxodeetapeguelguete da seÿaxanot ñi ita'a, 27cha'ayi ñimayi maichi qami' ÿauoteque. Qami' ÿauoteque, cha'ayi aÿim qauauochiic, qataq qau'amaqchiñi da aÿim sachigoqtot ñimayi. 28Aÿim sachigoqtot co'ollaxa ñi ita'a da ñanaÿa ana 'alhua, qalaxayi nagui aÿim shica'ai ana 'alhua da shi'iguelaxa ñi ita'a.

29Nachi so lapaxaguenatacpi 'enapeco':

–Nagui mayi ÿataqta ÿataqteguelo naua 'ad'aqtaqa, sa ishit da 'auauota'a ca 'adaloqnaxanaxat. 30Qaq nagui mayi saÿajnaq da 'am 'auaÿaten 'enauac na lataxaguesat, qaq sa ishit da 'auen da huo'o ca 'am inat. Qaq ÿoqo'oyi sa'amaqtenaq da 'am 'auachigoqtot ñi Dios.

31Nachi so Jesús 'enapeco':

–Qaq ¿'eesa peta'a da qami' qau'amqajnataxañi nagui? 32Qalaxayi nagui mashi ivita yi laloqo', qaq nachina nagui na huetoigui, da qami' qanlagaxachiitac qome, ñi 'oonolec maichi ÿoiqueetac ca dataigue, nachi aÿim qaualachiÿa'a't qome. Qalaxayi aÿim sa ishit da aÿim 'oonolec, cha'ayi ñi ita'a aÿim hueta'aguet. 33Qaq aÿim qami' sa'axatema 'enauac de'eda, yaqto' huo'o da qadlagaxayiqui da aÿim qan'ayiitau'a. Qami' ana 'alhua mayi qoviitalec huo'o qome da qanque'ejnaxaqui. Qalaxayi qan'añaxachi qome, cha'ayi aÿim mashi sogote da ÿoxonec nam 'onataxac mayi huetalec ana 'alhua.

Currently Selected:

Juan 16: TBSNT

Highlight

Copy