Juan 15

Aca nanguishi uva qataq ana lcouepi

1Qaq aÿim mayi shiita'am aca ÿoqta 'eesa nanguishi uva, qaq ñim ita'a, qalaq ñimayi 'eeta'am cam ilotague' aca'aca nanguishi. 2Qaq ñimayi iquesoxouec acamachaqaca ana icouepi da huo'otaq sa ishit da huo'o aca ala, qataq ñimayi nqat ana llaxataxa ana lcouepi mayi huo'o ana ala, yaqto' ÿacteec da huo'o ana alapi. 3Qaq qami' sogote da qami' qui'itte' souaxat naua ÿapaxaguenataxanaxaco mayi qami' sanema. 4Qaq nachi 'eetai' qome da aÿim qan'ayiitau'a, 'eeta'am da 'eetec da aÿim qami' ñi'atta'agueta. Cha'ayi acam lcoue sa ishit da maichi huo'o ana ala, da sa ishit da ÿoqta n'attau'a acam lamo. Qaq nachi 'eetec nataq'en da sa ishit da maichi huo'o ca alaÿaxac da qoñiita, da huo'otaq sa ishit da aÿim qan'ayiitau'a.

5Qaq aÿim mayi shiita'am aca nanguishi, qaq qami' nachiqami' icoue. Qaq cam nachi 'eetai' da aÿim n'attau'a qataq ñi'atta'ai', nachi camayi ÿataqta qalota da alaÿaxac, cha'ayi qami' sa ishit da huo'o ca qoñiic da huo'otaq sa ishit da aÿim qan'ayiitau'a. 6Qaq cam sa ishit da aÿim n'attau'a, nachi camayi qaÿasaxauec, nachi daqaqa, 'eeta'am ana lcouepi mayi qalaÿona't, nachi qaÿasaxangui ca nodec da qaÿavigaxat.

7Qaq qami' da nachi 'eetai' da aÿim qan'ayiitau'a, qataq sa ishit da qaucouai'ai na ÿapaxaguenataxanaxacpi, qaq da huo'o ca qauÿaxañiÿaique, nachi qami' qoÿanema. 8Ñi ita'a huo'o da ñi'oxonnataguec da huo'otaq ÿataqta qalota da alaÿaxac da qoñiita, nachi qami' ishit da ÿataqta qaviyiÿa'a da qami' ÿapaxaguenataqa. 9Aÿim ÿataqta qami' sauoteque, shiita'am da 'eetec ñi ita'a da ÿataqta aÿim ÿauotec. Qaq qami' qome ÿataqta qoquiitegue da 'eetec da qami' sauoteque. 10Qaq da qaualaqaiguet na ÿamaxasoxonaxacpi, nachi qami' ishit da qoquiitegue da 'eetec da qami' sauoteque, 'eeta'am da shiitec da ÿataqta salaxaguet na lamaxasoxonaxacpi ñi ita'a, qataq shictegue da 'eetec da lauotaxanaqtaic aÿim ñimayi.

11Qaq shiitec de'eda da qami' shinapegalo, yaqto' qami' ishit da aÿim qantonaxauai, nachi qami' ÿataqta qami' nlaqchiguilo da qantonaxaqui. 12Qaq dam ÿamaxasoxonaxac mayi qami' sanema 'eeta': Ñi 'oonolec da qoñiita ÿataqta ÿauotec ca lÿa, 'eeta'am da 'eetec da ÿataqta qami' sauoteque. 13Qaq dam nauotaxanaqtaic mayi ÿataqta lta'adaic 'eeta': Ca shiÿaxaua ishit da ÿaalec da nachaalataxac na nauochaxauapi. 14Qaq qami' nachiqami' ñauochaxa'u, da qau'ochi dam qami' samaxalguete. 15Nagui sa ishit da qami' samata'aque da qami' nlataqa, cha'ayi ca chochi nlatac sa ishit da ÿaÿaten cam i'ot ca n'aco'. Qaq nagui qami' samata'aque da qami' ñauochaxa'u, cha'ayi qami' sauattonaxanaxanque 'enauac nam l'aqtacpi ñi ita'a mayi aÿim ÿami'. 16Qami' sa ishit co'ollaxa da aÿim qalca'aguishiqui, aÿim mayi qami' llica'agui'shi. Nachi qami' shinapegalo da yaqto' ÿataqta qalota da alaÿaxac da qanachaalataxaqui, qaq de'eda alaÿaxac da qanachaalataxaqui, damayi nachi 'eetai'. Qaq yaqto' ñi ita'a qami' ÿanema 'enauac nam qauÿaxañiÿaique da huo'otaq qoviilec da i'enaxat. 17Qaq 'eda qome da qami' samaxalguete, 'eeta': Ñi 'oonolec qome da qoñiita ÿataqta ÿauotec ca lÿa.

Nam huetalec ana 'alhua namayipi ÿataqta nquiÿa so Jesús qataq nam lalamaxatpi

18Nam shiÿaxauapi mayi huetalec ana 'alhua da qami' nquiÿalo, qalaq qami' qauaÿajñi da aÿim mayi aÿim l'auaxanec da aÿim nquiÿa. 19Qami' da huo'otaq qami' lashi' ana 'alhua, nachi nam shiÿaxauapi mayi huetalec ana 'alhua, namayipi ishit da qami' ÿauoteque, 'eeta'am da 'eetec da ÿauotec nam lalamaxatpi. Qalaxayi aÿim qami' llica'agui'shi, qami' sachigoxottoiguilo nam huetalec ana 'alhua. Qaq ÿoqo'oyi namayipi ÿataqta qami' nquiÿalo, cha'ayi qami' sa ishit da qami' lashi' ana 'alhua. 20Qaq qauennachiÿa'a qome da i'aqtac mayi qami' sanema co'ollaq shiita': “Qaica ca nlatac da huo'otaq ishit da napacalec ca n'aco'.” Qaq da huo'otaq aÿim qaicaatac co'ollaxa, qaq nataq'en da qoñiita huo'o da qancanaguiiqui. Qaq da ÿataqta qaÿalaxalec da ÿapaxaguenataxanaxac, qaq nataq'en qome ÿataqta qaÿalaxaguet da qadapaxaguenataxanaxaqui. 21Qaq 'enauac qome ne'ena qami' qai'oteque souaxat aÿim, cha'ayi namayipi sa ishit da ÿauatton ñim aÿim namaq.

22Namayipíctaxa sa ishit da huo'o ca lasouaxashit, da huo'otaq sa ñanac da setaxaÿot. Qalaxayi namayipi nagui sa ishit da ÿoqolguet da huo'o da lasouaxashit, 23cha'ayi ca aÿim nquiÿa, camayi nataq'en nquiÿa ñi ita'a. 24Qaq namayipíctaxa sa ishit da huo'o ca lasouaxashit, da sa ishit da huangui ñaq'en namayipi da so'ot nam sa ishit da huo'o ca ÿañoxot da i'ot; qaq namayipi sogote da ÿauaachigui ne'ena so'otpi, qalaxayi ñaqaiyita sa ÿaqalan da aÿim nquiÿa, nataq'en ñi ita'a. 25Qalaxayi damayi nachi lliquiaxac qanqoÿin, yaqto' ishit da ipacchigui da n'aqtac mayi nanettañi nam nqataxacpi mayi qoÿami' co'ollaxa namayipi, mayi 'eeta': “Aÿim nquiÿa namayipi, qamaq qaica ca sasouaxat.”

26Qalaxayi qom ivita da anac cam qami' itaua'n qataq qami' i'añaqchi't, cam Espíritu mayi ÿoqta 'eesa, cam qami' ñamaxalo qome mayi chigoqo'ot ñi ita'a, qaq camayi qome aÿim i'axat. 27Qataq qami' nataq'en aÿim qau'axachi, cha'ayi nachi 'eetai' da aÿim qoviita'aguet co'ollaq chita'ague da so'onataxan.

Currently Selected:

Juan 15: TBSNT

Highlight

Copy