Juan 4

So Jesús qataq aso 'alo mayi lma' yi Samaria

1Na fariseopi mashi ÿaÿaten da so Jesús nquictauec na lataxanatacpi qataq napacalec so Juan na lachilaxanatacpi. 2Qaq nai'ctaxa da so Jesús sa ishit da nachiso so dachilaxanataxaatac, cha'ayi nachiso som lapaxaguenatacpi so dachilaxanataxaatac. 3Qaq co'ollaq ÿaÿaten de'eda so Jesús, nachi ca'ai yi Judea, nachi ÿi'iguelaxa yi Galilea.

4Qaq de'eda lli'iguelaxasoxoc, somayi tajlec yi 'alhua Samaria. 5Qaq co'ollaq ivita so pueblolec yim Samaria, l'enaxat Sicar, somayi sa qaÿapeque som 'alhua mayi ÿami' co'olloxochiyi so Jacob so llalec José. 6Nachi naña somayi aso ñi'illoxoqui mayi qoÿinac lli'illoxoqui so Jacob. Qaq cha'ayi so Jesús mashi nasamñi, nachi somayi nso'ootalec co'ollaxa na alap asa'aso ñi'illoxoqui. Cha'ayi mashi yaqta'a da na'a'q. 7-8Qaq soua lapaxaguenataqa tadeu'a se'eso pueblo da deshijnaxaadaique ca alo'q. Nachi nvidaxasom aso 'alo mayi lma' yi Samaria da naÿaxaama asa'aso ñi'illoxoqui da huotaique da nqatshiguem ca 'etaxat. Nachi so Jesús 'enapega asomayi, 'eeta':

–'Auauo'o ca ÿaquip.

9Nachi aso 'alo mayi lma' yi Samaria 'enapeco':

–¿Tá'ainec 'am, yi 'am judío l'ec, qalaqca da ishito' da aÿim 'auÿaxanot ca 'adaquip, yi aÿim Samaria lashi?

(Cha'ayi nam judío l'ec yi sa ishitaxat da detaxaÿapegue' nam l'ec yi Samaria.)

10Nachi so Jesús 'enapeco':

–Nashíctaxa da 'am 'auauatton cam ÿan ñi Dios, qataq nam 'am iÿaxaatacot ca laquip, nachi yi'oqtáctaxa da 'am ishit da aÿim 'auÿaxanot, nachi aÿímctaxa 'am sanem ca 'etaxat mayi npaxaatashiguem.

11Nachi aso 'alo 'enapeco':

–'Am ÿataxala', qaica ca 'adasaxasoxonaxat da 'anqatshiguem ca 'etaxat, qataq anam ñi'illoxoqui yi ÿataqta qaÿoqtegue. Qaq ¿chaq huá'ago' ca 'auachigoxota'ague que'eca 'etaxat mayi npaxaatashiguem da aÿim 'ai'anem? 12Som hua'au qadta'a Jacob co'ollaxa qomi' n'onaxata'agueta ana'ana lli'illoxoqui. Anamayi nachana co'ollaxa ana yi'illiitapigui qataq som llalaqpi, qataq som n'atetpi. Qaq, ¿'am peta'a 'anapacalco' somaxa?

13Nachi so Jesús 'enapeco':

–'Enauac nam nÿomtapigui ana'ana, namayipi qaltaq ÿi'iguelaxalec da huo'o na laquip. 14Qaq cam nÿomgui ca 'etaxat mayi sanem, camayi sa ishit da ÿi'iguelaxalec da huo'o na laquip. Cha'ayi cam 'etaxat mayi sanem, camayi ÿataqta npaxaatashiguem, 'eeta'am na l'auaxac pa'ataigui camayi. Qaq nachica ca ividaxata'a cam nca'alaxa mayi chochaq tateec.

15Nachi aso 'alo 'enapega somayi, 'eeta':

–'Am ÿataxala', aÿim 'ai'anémctaxa que'eca 'etaxat, yaqto' aÿim sa ishit da qaltaq huo'o na ÿaquip, qataq sa iuen da ñanaxaama ana'ana ñi'illoxoqui, da ñaqatshiguem ca 'etaxat.

16Nachi so Jesús 'enapega asomayi, 'eeta':

–'Auesoma qome, 'avi'iguena'ata ca 'adhua, nachi 'auanaxaama ne'ena.

17Nachi aso 'alo 'enapeco':

–Aÿim qaica ca iua.

Nachi so Jesús 'enapeco':

–Ÿataqta 'eesa de'eda qonapec da qonetega qaica ca 'adhua. 18Cha'ayi 'am ivi' cinco co'ollaxa so 'adamoxouapi. Qaq ñim qoneta'aguet nagui ñaqaiyita sa ishit da ÿoqta 'adhua. Qaq de'eda qonapec, damayi ÿataqta 'eesa.

19Qaq co'ollaq hua'axaÿa de'eda aso 'alo, nachi 'enapeco':

–'Am ÿataxala', aÿim sela'a da ÿoqta 'eesa da 'am l'aqtaxanaxanec ñi Dios. 20Qaq som hua'au qadta'alpi co'ollaxa mayi lma' na Samaria, somayipi co'ollaxa da natamnot ñi Dios, qalaq hualec naq'en aña'añi qasoxonaxa. Qalaxayi qami' judío lashi' qoñiÿapec da nachiyi yi Jerusalén yim huaña da qomi' ñatamnaqot ñi Dios.

21Nachi so Jesús 'enapeco':

–'Am 'alo, aÿim 'au'amaqten qome, ten, mashi anatai' ca laloqo' da qami' sa ishit da iuen da qanqo'oñiishiguemec aña'añi qasoxonaxa, huo'otaq yi Jerusalén, da qanatamñiÿot ñi Dios. 22Qami' Samaria lashi', qami' sa ishit da qauaÿajñi cam qanatamñiitacot. Qomi', qalaxayi ÿataqta saÿajnaqta ñim ñatamnaqtacot. Cha'ayi da nca'alaxa, damayi chigoqtoigui na judiopi. 23Qalaxayi mashi ivita yi laloqo', qaq nachina nagui na huetoigui da nam ÿoqta 'eesa da ÿi'oxodeetac ñi qadta'a ishit da ÿi'oxoden ñimayi, qalaxayi saq cha'a da lli'oxonnataxanaxac qataq ÿataqta 'eesa. Cha'ayi ñi qadta'a nachida da 'eetapeguec da qaÿi'oxoden. 24Ñi Dios, ñimayi saq cha'a. Qaq ÿoqo'oyi cam ÿi'oxoden ñimayi, qalaq iuen da saq cha'a naq'en da 'eetec ca lli'oxonnataxanaxac qataq ÿataqta 'eesa.

25Nachi aso 'alo 'enapeco':

–Aÿim saÿaten da anac qome ca Mesías –mayi naigui da Cristo, nta'a nca'alaxaqui–. Qaq qom ivita da nvi', nachi camayi qomi' da'aqtaxanema qome 'enauac na lataxaguesat.

26Nachi so Jesús 'enapega asomayi, 'eeta':

–Que'eca 'au'axattac, nachaÿim mayi 'am setaqtague'.

27Qalchaq mashi nvilyi' soua lapaxaguenataqa, nachi soomayi ÿataqta huo'o da l'aalqa' da 'alo aso detaqtague' so Jesús. Qalaxayi sa ishit da huo'otaq huo'o ca inat somayi da chaq negue't ca 'eetapeguec asomayi, huo'otaq cam n'aqtaxaatrapigui soomayi. 28Nachi aso 'alo n'onaxatchigui aso laco'oña da jec da nqo'oneu'a so pueblo. Nachi da'aqtaxaatapeguem na shiÿaxauapi, 'eeta':

29–Ña qauanaqui qome, ña qamejnaxañiuga da shiÿaxaua mayi i'axatau'a 'enauac nam so'otpi co'ollaxa. ¿Peta'a nachida da nta'a nca'alaxaqui?

30Nachi anac nam chigaqau'a yi pueblo, nachi qananauga ca hueta'a so Jesús. 31Nachi soua lapaxaguenataqa ÿoqopitaxaata'pe da nachoxodeetracot somayi, qoÿiita':

–'Am mayi 'auapaxaguenataxaatac, ña cada'ac 'auque'e qome.

32Qalaxayi so Jesús 'enapeco':

–Aÿim huo'o da anoq mayi qami' sa qauaÿajñi.

33Nachi soua lapaxaguenataqa nnattega't, 'eetra':

–¿Ÿoqta da huo'o co'ollaxa ca ndoi' ca aloq damaxa?

34Qalaxayi so Jesús 'enapeco':

–Dam anoq, nachida da 'eetapeguec ñi ita'a mayi aÿim namaq, da yaqto' semat da l'onataxanaxac. 35Qami' qoñiÿapec naxa da qad'aqtaqui: “Saxanaqcaua caua cuatro ca'agoxoiqa, nachi iviteuga ca laloqo' da qanqat na ala na nanguishic.” Qalaxayi aÿim qami' shinapegalo: Qanamachiÿashiguem qome, qataq qauloilec na nanguishic, da mashi ÿi na ala, da yaqto' qanqat. 36Qaq cam daqataxaatac, camayi ÿaconguet ca nshiitenaguec. Qaq nam ala na nanguishic mayi nqattac, namayi naigui ca nca'alaxa mayi chochaq tateec, yaqto' cam danaxaatac qataq cam daqataxaatac ishit da 'eeta'a't da ntootapigui'salo. 37Cha'ayi ÿataqta 'eesa de'eda 'enapec da n'aqtac naxa, mayi 'eeta': “Huo'o cam danaxaatac, qataq huo'o ca daqataxaatac.” 38Aÿim qami' sama'q, da yaqto' qanqachi na ala na nanguishic mayi sa ishit co'ollaxa da qanque'etaxañiitapigui da qai'añiitapiguiñi. Qaq ÿaqa'a co'ollaxa som do'onataxaatacpi, qaq qami' chochi qauacoñiitelec dam l'onataxanaxac somayipi co'ollaxa.

39Qaq ÿataqta qalota nam lma' yi pueblo Samaria nam i'amaqten so Jesús souaxat de'eda l'aqtaxanaxac asa'aso 'alo co'ollaq 'eeta': “I'axatau'a 'enauac nam so'otpi co'ollaxa.” 40Nachi som lma' yi Samaria mayi nauga so Jesús, somayipi nachoxodeetacot somayi da ñaq hua'aguet somayipi. Nachi so Jesús ivi' naua dos na'axa'te da hueta'aguet somayipi. 41Nachi nquigueec qalota na i'amaqten somayi co'ollaq maichi n'axaÿaxaatega na l'aqtacpi. 42Nachi qoÿiitega aso 'alo, qoÿiita':

–Nagui sa ishit da chaqdata da 'ad'aqtaxanaxac da sa'amaqtenaq, cha'ayi qomi' nataq'en maichi ñi'axaÿaxanaqtega somayi, qataq saÿajnaqta da somayi ÿoqta 'eesa da nachiso so nta'a som lca'alaxaqui nam shiÿaxauapi mayi huetalec ana 'alhua.

So Jesús nataden so llalec so ltaua so nta'a

43Qaq co'ollaq mashi inoxoodeec soua dos na'axa'te, nachi so Jesús ca'ai yi Samaria, nachi taÿa yi 'alhua Galilea. 44Cha'ayi somayi nachi 'enapeco' co'ollaxa da ca l'aqtaxanaxanec ñi Dios, camayi sa ishit da huo'o ca ñi'oxonnataguec cam maichi lalamaxat lma'. 45Qaq co'ollaq mashi ivita yi Galilea, nachi na lma' yi'iyi 'alhua ÿataqta huo'o da lqochoxo da ilo'oguet somayi. Cha'ayi somayipi nataq'en ÿalectauo yi Jerusalén, ÿalectau'a se'eso na'a'q mayi huetoigui da qaiuennate so na'a'q co'ollaq qanayica'ai yi Egipto. Qataq somayipi ÿauaachigui 'enauac nam i'otpi so Jesús se'eso na'a'q naponaxaqui.

46Nachi somayi qataq nqo'ona yi Caná mayi nachi huaigui yi'iyi Galilea yim huaña co'ollaq so 'etaxat nañigui naq'en na lataxa. Nachi huo'o so ÿi'oxodaic ltaua so nta'a, qaq somayi huo'o so llalec sa no'on, hueta'a yi Capernaum. 47Qaq se'eso ltaua so nta'a co'ollaq l'axaÿaxac so Jesús da chigaqa'ague da Judea da nvita yi Galilea, nachi nqo'ona cam hueta'a, nachi nachoxodeetot somayi, da yaqto' taÿa ca lma' da nataden so llalec mayi mashi ileetapigui'. 48Nachi so Jesús 'enapega somayi, 'eeta':

–Qami' sa ishíttaxa da qau'amqajnataxañi da huo'otaq saxanaxa da qauauañiichigui na n'anecpi qataq nam sa qaÿauanapigui.

49Qalaxayi se'eso ltaua so nta'a 'enapeco':

–'Am ÿataxala', ÿataqta sa 'anaÿaloxon qome da qojec, llaxatemallaxa yi ÿalec da saxanaxa da ileu.

50Nachi so Jesús 'enapeco':

–'Aue, 'avi'iguelaxa qome ca 'adma'; ca 'ai'alec nca'aleec.

Nachi se'eso shiÿaxaua ÿataqta i'amaqten da l'aqtac so Jesús. Nachi jec. 51Qaq co'ollaq mashi nayiitau'a so lma', nachi so l-latacpi huaqata'aguet somayi, nachi qai'aqtaxaatapeguem, qoÿiita':

–Yi 'ai'alec, yimayi nca'aleec.

52Nachi somayi denataxanec da chaq ñichiguiña co'ollaxa aso nala' da ÿaÿamaxañi so llalec. Nachi qai'axatem, qoÿiita':

–Qomyi shicait so dashita aso nala', nachi ÿaxaneec so l'edaxa.

53Nachi so lta'a ÿaÿaten da nachiso so huetoigui co'ollaq so Jesús 'enapega somayi 'eeta': “Ca 'ai'alec, camayi nca'aleec.” Nachi somayi qataq so llalaqpi i'amaqten so Jesús.

54Qaq 'eda da lÿa n'anec mayi sa qaÿauanapega mayi i'ot so Jesús co'ollaq chigoqta'a yi Judea da naÿa yi Galilea.

Currently Selected:

Juan 4: TBSNT

Highlight

Copy