Lukka 1
1
1Aba gideaba ng'asheesu ning'waar Fuga saang'a nea gooroottooschi, aba iitta ng'asheega ghayi sisin aba dageascheedeanya, 2gawuurji gidaghayi goondaneasa mushoodiga daa ea aba heeda fuga rukkwiida ng'asheenda, 3Ak ea nadaayi eara Aniini gideaba ghwahit, ak ea neasikteawi muuchchi gidaghayi ng'eatta ng'asheesu seaniin aba beanatta, ak geang'orneey ng'asheesu nea ghadoabiiwji Diofilooyda mureeda, 4abeeda gay nala humeanda appadayda ng'asheega ghayi sibean surukneeyi.
Geergu jeatta Yohaaneeda Abattiisachchi
5Damanda waseewa Heroode sugoochcheada Yudeeya, abeeda gwanda ashoohoochcheanji suguura Sakkariya, bea gharmuchcheanda Abiya, nea gwandeawa gatmoadaannyi bea haweega Aron, nea gheawungaaschi geguura Elisabeetti. 6Nea abeeda saawa ea doobiweadi aba madeeda Aseetta, nea ghoang'ng'waay muuchchi digheanynyeekka sean ea humeannyeekka Ng'uttamiida nea meerukunana badahuukka ng'asheega munyas. 7Abeeda ea mandeawana jeepta aba gideaba Elisabeetti sonnooda nea nuwoosiidi sean. 8Nea aba damanda sineewa gadiyeeda ashoohoochcheandumeeda aba madeeda Aseetta nea abeeda ea galannyeanda sineewa gadiyeeda lugoodaannyi, 9aba seareetta bea gissiniida ashoohoodiga gadiyeedean, inyessa ghwaloat Aseetta siida gawa jeeda gheeda sibatta Aseetta bea Ng'uttamiida ghaghwarda geetta sing'ng'andiitta. 10Nea aba damani sing'ng'andiida gheedean abeeda gwanda Emeessean daghatta gheeda ghamwaash Aseetta. 11Hean goobeersa Malaykajeanda Ng'utamiida ak ghaminada aba murdeeda geattinda dugwa bea heeda wagiida siyiina geetta sing'ng'andiitta. 12Daa Sakkariya gwahirbaban nea ghabeal. 13Ak gwayeeshsha Malaykajeanda, “Adibeal, Sakkariya, aba gideaba siyiiy gidumwaashi, nea eara Elisabeetteeda was gatmoadaang'u gaygwajiilneey balleanda, ak gaygureewana ghawungaaschi Yohaana.
14Ak gay hoosana nea ging'weelayi muuchchi,
nea eara fuga saang'a gaygahoosassa jeattaannyi;
15aba gideaba gaygwaheedu aba madeeda Ng'uttamiida,
Mayghwali difaayi ghana gichchea gooboogit,
ak gajeannyiit Gurorooda Ghaydit, ghang'eada jeeda ghaamwat.
16Ak gaygooguumsa balloojiga saang'a bea Israeeli Ng'uttamiida was Aseetta nyaawa,
17ak Gaygosheedeawa aba jeeda gurorooda ea uurda Eliya,
ak ghwayam guroruunatka ghweaniga gagal diibiga,
nea fuga mandeawana mureeda ghoadaw weaghumeeda doobiiwnatta,
ak gwasissa Ng'uttamiida fuga hideadi.”
18Ak gwayeeshsha Sakkariya malaykajeanda, “Gaydajeeng'daydaan ng'asheanji? Aba gideaba aniini nawaasiichchi nea eara gatmoodeanyu ea nuwaasiit.” 19Ghwasha Malaykajeanda nea gwayeeshsha, “Aniini geawoschi Gabrieleeda minaada aba madeeda Aseetta, ak gechcheakneani headaang'u deanneay Giijasi miyiin. 20Asi ng'ulla, gayghwaroat ghuuttaang'u ea eamudammuussa baloola ea ghwahita eaweeda jea ghang'attaawa ng'asheesu, aba gideaba mumwasi ng'asheegeasu jea gwasa aba damanda nyaawa.” 21Nea gafurriida buuneeda Sakkaria, ghahamng'eanyi sean aba gideaba nishiing'da aba jeeda gheeda sibatta Aseetta. 22Hean nea gwardu jarooda, ghwaraay goobalool buuneeda, ak gwajeeng'u buuneeda gideaba sihhiimsa gil aba jeeda gheeda sibatta Aseetta; goobaloola geattinga nea niroat ghuutta. 23Duulean galandaannyi bea gadiyeada, gawa gheannyi. 24Ng'atta eawoojusu ng'ay ghwadurmaniit gatmoadaannyi suguura Elisabeetti, ak ghafuy geaw sheamuut nea gwayi, 25“Nii gissinnean Ng'uttamiida aba eaweeda ng'ulleewanean ak gageandeawean rearga aba jeeda buuneeda.”
Geergu jeatta Yeesu
26Sheedeaba lah goojeakta Aseetta malaykajeanda suguura Gabrieli gawa mujiineeda Nasareetti mida ng'eanyiida Galilaaya, 27hichpa hudi miyeasat suguura Mariya, anyeari siisi suguura Yoseefu bea dooshagi sea sugoochcheanda sugura Dawdi. 28Ghwahidu headaannyi ak gwayeeshsha, “Seayuu ang'iing'eeda siittaw dagheerjeandumeeda ang'iing'i gindeayi sea Ng'uttamiida!” 29Hean gwadeawiit muuchchi aba ng'asheanji ak goottemsheesa seayoani giduurji. 30Gwayeeshsha Malaykajeanda, “Adibeali Mariya, aba gideaba nugoonnyi Aseetta dagheerjeandumeeda. 31Asi ngulla, gaygweayiida ak Gayjiila balleanda, ak gayguureewana gheawungaaschi Yeesu.
32Nea gajeahaw, ak gajeeguura Balleanda Aseetta haw mida humng'eeda;
nea gayghoadaw Ng'uttamiida was Aseetta hoorgeeda sugoochcheandumeeda Dawdi was ghwaan,
33nea gayghoahaaghwa gheeh Yakkobo ea ghoaw gweanyeekka manda muudeanooda;
nea sugoochcheandumeedaannyi ea maygwanda muudeanooda.”
34Gwayeeshsha Mariya malaykajeanda, “Gayghoawattaan ng'asheanji nea aniini ea meandeawani siyeeda?” 35Gwayeeshsha Malaykajeanda,
“Gaygwashubeseey Gurorooda Ghaydit,
nea uurda Aseetta haw gaygookwealseey jirooneeda;
aba sareani jeepta jea eeji gajeeguura siida ghaydit,
Balleanda Aseetta.
36Asi ng'ulla, buweachcheandaang'u was Elisabetti eara niny nigweayiit aba jeeda woosindaannyi ak gaygwaji balleanda; nea nii ea sheedeaba lahi; nea niny abeeda geeguura sonooda. 37Aba gideaba manda ng'asheanda jea ghwaraay Aseetta.” 38Gwayeeshsha Mariya, “Ng'ulla, anini geawoschi soomjeanda Ng'uttamiida, nung' gwasa aba heeeanyu ng'asheanji inyashiin.” Ak ghabeawa headaannyi Malaykajeanda.
Mariya gabareasa Elisabeetti
39Askwearjoojikka ghang'eat Mariya ak ghwalamwajaada gawa ng'eanyiida heayeeniiga jeeda mujiineeda Yuuda. 40Ak Gawa jeeda gheeh Sakkariya ak googeachchi Elisabeetti; 41Iiy Elisabeetti giigeachcheeda Mariya, ghwadanghan jeepta miida jeadaannyi ak geannyiit Elisabeetti Gurorooda Ghaydiit 42goojuur aba ghuutta haw nea gwayi, “Sugoonnyi ghawooda aba jeeda gadeemga, ak ea sittaw ghawooda dea jea jiila! 43Gayghoawdaani aba heedeanyu, gideaba ghwahidu heedeanyu gheamatta Ng'uttamiideanyu? 44Aba gideaba ng'ulla, iyayiinyi ghuutta seayoadaang'u ghwadanghan jeepta mida jeedeanyu aba ng'weellooda. 45Ghang'wana siida jea ghamwas gideaba gay gwasa ng'asheega rukusa Ng'uttamiida.”
Sarmeeda Mariya bea duumsheesiinda
46Gwayi Mariya,
“Jeedeanyu ghoaghambiit Ng'uttamiida,
47Nea guroroodeanyu gahoosasa Aseetta was lealnochcheandeanyu
48Aba gideaba nidaah nyootta uurda soomjeandaannyi.
Asi ng'ulla, ghang'eada ghamneawa gaygaguureewean jeachcheenga sean dea sing'ushsha;
49Ak ea nisinneani siida sittaw ghawooda hoauur ng'asheega hees muuchchi,
ak gheawungaschi ea ghaydiit.
50Nea baydeaydaannyi gwanda heeda buuneessean awal gheang'daannyi
ghang'eada jeachcheenga ea gagul jeachcheenga.
51Ak ea nihiimu uurda aba geattindaanyi,
nea ghoadabwarda fuga ghwarjajeega aba jeesinga nyaawa,
52Ak ea nirareang'na fuga mideawa uurjeenga hoorgajeega nyaawa bea sugoochcheandumeeda,
ak goodiing'u fukka mandeawana uurjeengean;
53Ninnyiit fuga bearji jalooda aba haleanjeeda miyaas,
nea meanang'oodiga gaweay nea ghwadalaada.
54Ak anuweat soomjeandaannyi was Israeeli,
aba giipkeatta baydeaydaannyi,
55gawuurji gidaghayi rukusiinda ghwaanigaasa,
ea Abrahaamu ea jaattaannyi aba gweannyeekka manda muudeanooda.”
56Gwandeayi niny sea Mariya ea goosha sheah samwagu, imuchchu gabiiktta gheannyaawa.
Jeatta Yohaaneeda Abattiisachchi
57Iiduw nea ghwahitta damandaannyi bea jeatta gwaji Elisabeetti jeepta was balleanda. 58Iiy gischeawdaannyi ea buweadeagaaschi gideaba nubwayda Ng'uttamiida Elisabeetti gang'weela sean. 59Eaweetteaba siis geayaat jeepta ghasmeahooda; ak ghwanyawa gajeeng'assa gheawunga ghwaan siyi Sakkariya, 60ak gwayeeshsha ghamwat, “Manda; gajeeguura Yohaana.” 61Ak geeyeeshsha, “Aba buweadeagaagu manda siida sing'assa gheawung'su.” 62Iiduw geeng'wachsa geadi ghwaan gwargu gheawunga gasa gang'assa. 63Gamus eeyeasa beehiida jea ghang'waar, ak ghang'waar gideaba, “Gheawungaaschi Yohaana.” Ghahamng'eanyi sean. 64Deagheatta ghwajaat ghuutta nea goottina ng'ushapta ak gabadiischeesa Aseetta. 65Hean ghang'ut muuwda gischeewda nyaawa sean. Ak gageawiit iitteaba ng'asheesu aba heayeeniga sean mida ng'eanyiida Yudeeya; 66Fuga sean iiy iitteaba ng'asheesu gaba nii ang'ng'ooysa jeadaannyi nea gwayi, “Jeebi gayghoaw siida uurjiin?” Aba gideaba geattinda Ng'uttamiida gwanda badaydaannyi.
Ramooraneeda Sakkariya
67Nea Sakkariyaayda was ghweanda jeepta geannyiit Gurorooda Ghaydit ak ghwaramoaran nea gwayeena,
68“Dumsheesiinda gaba Ng'uttamiida was Aseetta Israeeli,
aba gideaba nibareassa ak gwalealu buneadaannyi,
69nimiinda gujaweeda lealnooda
aba jeeda gheeda soomjeandaannyi was Dawdi,
70Gawuurji gidaghayi rukuteayda aba ghuutta sibangaaschi ghaydidi ghang'eada garayi,
71ak gajeelealnaneasa heeda weajoodigaasa,
ea geattinga fuga sean sideasa;
72ak gayghabwayda ghwanigaasa aba gidaheelleesa,
nea ghoapkaat neajeadaannyi ghaydit,
73ak gweaksa habeawooda Abrahamooda was ghweandeanya,
74ak gagooneasa
gideaba gajeelealnaneasa geattinga weajoodigaasa,
ak geaghadoawannyi nea meawwali gil,
75aba ghaydidanda ea doobiiwnatta galeagasean amwadeadaannyi aba jeeda eaweegaasa sean.
76Nea ang'iing'i jeepta, gajegureweey sibaneeda Aseetta haw;
aba gideaba gajasheedeawana Ng'uttamiida sissiina naweadingaaschi,
77Nea gwarukusa fugaaschi ghwanal fughareeda lealnooda
aba samsiinda aba geandeayda riing'eega nyaawa,
78Aba baydeayda Aseetteanya,
nirearseasa weeshinda leabu humng'eeda,
79ak gayghoabwaay fuga sean mida jeeda misaneeda haw bea jirooneeda miyeeda,
ak ghoadoabiiw geashangaasa eayaada naweeda miy bea hoyyoo.”
80Ak gwahissa heeda jeepta nea ghwanyas uurda aba gurorooda, nea goobiitta dareapcheenda ea ghwahitta eaweedaannyi jea goohimsina geaw fuga Israeeli.
Currently Selected:
Lukka 1: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
