Lukka 2
2
Jeatta Yeesu
(Mat 1:18-25)
1Askwearjoojikka ghoadayda Gaysaari Aguusto digheanda nea gwayeeshsha, ang'waara monneeda buneassean mida jeeda ng'eanyiida. 2Ng'oordi dea madeeda, nea gwanda sugoochcheandumeeda Sirya Gireeniyo. 3Gaba siisi weah eang'waar aba mujiineeda ng'eang'da nyaawa. 4Hean ghwascheang'da Yoseefu ghabeawa Galilaaya, nea ghabeawa mujiineeda Nasaretti, ak gawa Yudeeya, ea ghwahitta mujiineeda Dawdi, suguura Betleheemu, aba gideaba gaba dooshta Dawdi, 5Gawa eang'waar sea Mariyaayda was huuda anyeari, nea abeeda ea gweayiideat. 6Damanda mideewa hooweani ghwahitta damanda jea gwajiila. 7Gwaji duweachcheadaannyi was balleanda ak gookkwealsa hang'weakka jeepcheandumeeda ak goluul aba jeeda daghwalda leehha dugwa beega, aba gideaba mwanyasa heeda jea gwalla aba ghoorida rabasta.
Jeagiischoodiga ea malaykajeega
8Nea aba damandida abeeda gwanda ng'eanyiitta Jeagiischoodiga fur gisilga nyaawa eawa. 9Gabussa saawa Malaykajeanda Ng'uttamiida, ak ghoabwaay murdajeega nyaawa sean gigheambiitta Ng'uttamiida, ak ghang'ut muuwda. 10Ak gwayeeshsha Malaykajeanda, “Adoobealli; ang'ulla geayeanneegwa giijasta miy bea hoseaneega jea gwahiissa buuneessean. 11Aba gideaba eannean aba mujiineeda Dawdi siji appadahuukkeagwa, lealnoochcheanda, niny Gristoyda was Ng'uttamiida gil. 12Nea gwadeagooda jea adaaha ea nihi; gajadaaha jeepta sikkwealsa hang'weakka jeepcheandumeeda nea geelluul aba jeeda daghwalda leehha dugwa beega.” 13Deagheatta gwandeayi sea malaykajeanji lugooda saang'a bea humng'eeda ak gwaduumsheesa Aseetta nea gwayi,
14“Gigheambiita gaba Aseetta mida humng'eeda,
ak aba ng'eanyiida ghoaw hoyyoo aba heeda fuga ahoosan!”
15Iiduw nea nibiikta Malaykajeega humng'eeda, gwayeenniissa geat Jeagiischoodiga, “Asi eweaya Betleheemu eadaaha gidabunu, rukuneasa Ng'uttamiida.” 16Gaweay nea ghwalamwajaada ak geanyasa Mariya ea Yoseefu heeda mida jeepta nea gwalil aba jeeda daghwalda leehha dugwa beega. 17Daa gwarukuta gidagwachcheaya surgu aba badaydeaba jeebi; 18ghahamng'eanyi fukka sean iyiiy gidaruksa jeagiischoodigean. 19Nea Mariya gong'ng'ooysa jeadaannyi ng'asheesu seaniin, nea gottemsheesa geaw. 20Iiduw gabiikta jeagiischoodiga nea ghoaghambiit nea gwaduumsheesa Aseetta aba ng'asheega siyiiy ea gea sidaah, gawuurji gissurukusiinda.
Yeesu geeng'assa gheawunga
21Ng'atta eawooji sis nea siyaat ghasmeahooda geeguura Yeesu, gheawunga ghayi ng'assa malaykajeanda nea mii ghwanyas ghaamwat gweayumeeda.
Yeesu geayaat gheeda sibatta Aseetta
22Iimuchchu nea ghwahitta damanda nyaawa bea gimmiinnooda gawuurji ginnyaashta deaweedeeda Muusa, hean geayaat niny Yerusaleemu ak geattaw Ng'uttamiida 23(gawuurji gissung'waarda aba jeeda deaweedeeda Ng'uttamiida, “Gilinyoo ea balleanda was duweachcheeda gil gajeeguura siida ghaydiit bea Ng'uttamiida,)” 24ak ghoadayda haleanjeeda sisapa geadi gawuurji gidanyaashta deaweedeeda Ng'uttamiida, “Was bakpakchooji iyyeenya ghana dayi iyyeenya bea ghariibajeanda.” 25Nea abeeda gwanda Yerusaleemu, siisi suguura gheawungaaschi Simon, nea siisi abeeda ea doabiiwaat, nea gabada Aseetta, nea goomuukku hawdeayda fuga Israeeli, nea gwanda badaydaannyi Gurorooda Ghaydit. 26Nea ea nigeawiit goohiimsa Gurorooda Ghaydit gideaba mayghami nea mighwadaah Gristoyda Ng'uttamiida. 27Ak ghwaat Gurorooda Ghaydit gawa jeeda gheeda sibatta Aseetta; nea ghwaat ghwaan ea ghaamwat Yeesu jeeda gheeda nea geehinda giduurji ng'asheega deaweeda, 28ghoang'ng'waay aba geattingaaschi ak gabadiischeesa Aseetta nea gwayi,
29“Ng'uttamiida, biissiina siksiina soomjandaang'u gabiissa gawa nea ghwaat hooyyoo,
gawuurji ginnyah ng'asheandaang'u;
30aba gideaba gheanyangeasu nidaa lealeanoodaang'u
31ghayi isni nea ghwadaa buuneessean,
32Weeshinda jea ghoabwaay emoojiga,
ak ghoaw gigheambiitta aba heeda fugaagu was Israeeli.”
33Hean eara Ghwaan ea ghaamwat ghahamng'eanyi aba gissirgu appadaydaannyi; 34Gang'ushsha Simon saawa nea gwayeeshsha Mariyaayda was ghaamwat,
“Ng'ulla, jeebi gajeenung ghoaw gibeedeayda ea ng'eedooda fuga saang'a bea Israeeli,
ak gayghoadaw gwadeagooda jea ghaheawa buuneeda
35(nea jeadaang'u gayghwalach barda)
nea ng'asheega jeesinga fuga saang'a gajeattaajiit.”
36Ghayi gwanda gatmooni was sibaneeda, suguura Ana, was hudeaba Fanuweeli, bea emeeni siyi Asheeri; ak ea nuwasiit muuchchi, ghayi geaghi nea miyeasat ak gwandeawa siyeeda gwaannyeaw ispwa, 37goobida masinung'weandumeeda gweannyew seedam ea ang'waan. Nea mii gwaheelli gheeda sibatta Aseetta, nea gagadoowani nea gwarada jalooda nea gamoora Aseetta eawa ea askweari. 38Gwardu aba damandida ak gabadiischeesa Aseetta, ak goobaloola niny ng'asheega sean bea fuga amuukku lealnooda Yerusaleemu.
Biikteayda Nasareetti
39Iiduw nea nihiit sinooda ng'asheega sean gawuurji ginnyaashta deaweedeeda Ng'uttamiida, gabiikta Galilaaya, mujiineeda gheannyawa was Nasareetti. 40Gwahiissa heeda jeepta nea ghwanyas uurda, ak geannyiit weaghumeeda; nea gwandeawa dagheerjeandumeeda Aseetta.
Balleanda was Yeesu aba jeeda gheeda sibatta Aseetta
41Nea Ghwaan ea ghaamwat gabadiini gilakkweay Yerusaleemu aba damanda ghwelmeeda Basakka. 42Iiduw nea nihiitta gweannyeew damana iyyeenya, ghwascheang'da gawuurji gideajusu bea geallaan; 43duulean ghwelmeeda, damanda biikteawa, geeppuussa bwadaw balleanda was Yeesu aba Yerusaleemu nea ghwaan ea ghaamwat ea majeeng'na. 44Gearar gideaba gwanda jeeda bareanda ak gaweay ea gamikta, geang'ng'eat ghuutta gassooda aba jeeda buweadeega ea fuga sinal; 45ama duuw nea mudeanyas, Geebiikta Yerusaleemu nea geegaseadayyi. 46Muchchu nea ning'atta eawooji samwagu geanyasa jeeda gheeda sibatta Aseetta, nea goopteada aba bugusta ginealshoodiga, nea gooleeysiit nea Gonyearriida ng'asheega; 47nea fuga sean iiy ghahamng'eanyi isiidaa gidabwaraayda uhuuda ea gisheahiida ng'asheega sinnyaash. 48Sidaah niny geahamng'eanyi; ak gwayeeshsha Ghaamwat, “Balleanda, ghwasaan anda gihinduneasa? Ng'ulla, aniini ea gweanu sinyarji aba gassodaang'u.” 49Hean gwayeeshsha saawa, “Ghwasaan anda googaseadayean? Neada ea mwoonali gideaba gammisean giibinda jeeda ghooriida Bwaabwa?” 50Nea saawa ea majeeng'na ng'asheanda rukusa. 51Ghwararang'aada godeayi ea ghwahitta Nasareetti, nea gwasissa mureada; nea ghaamwat ghwayiin jeedaanyi ng'asheesu seaniin.
52Gwahissa heeda Yeesu aba weaghumeeda ak gohoosan Aseetta ea buuneeda.
Currently Selected:
Lukka 2: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
