Lukka 4

Gidasisimsimda Yeesu

(Mat 4:1-11; Mark 1:12-13)

1Iimuchchu nea ninyas Yeesu Gurorooda Ghaydit, gabiikna Yordaan ak ghoadoabiiw Gurorooda 2gobiida dareapchcheeda askwearjooji haradam nea gwasimsim Meangnyeandeenda. Amwaaga gil eawoojusu seaniin; ng'atta askwearjoojusu, ghwayeachchi. 3Gwayeeshsha meang'nyeandeenda, “Iiwosi Balleanda Aseetta ginung' ghoaw lagheaneeni mukkatte.” 4Ghwasha Yeesu nea gwayeeshsha, “Geang'waar gideaba, ‘Siida moammu goobideewa ng'eanyiida mukkatte akghwahit.’” 5Ghwaat Meang'nyeandeenda ak goodiing'da heeda miy ghaang' ak goohiimsa daroorakka sean bea ng'eanyiida gili nuwaas. 6Ak gwayeeshsha, “Gaydagoonnyi gheambalmeani seaniin ea gigheambiitta nyaawa; aba gideaba sigoonan, ak gaydaadaw siida wassean eagasayi. 7Iighadoawannyaan, gayghoaw haleanjeeni seaniin gaagu.” 8Ghwasha Yeesu nea gwayeeshsha, “Geang'waar gideaba,

‘Ghadoawana Ng'uttamiida was Aseetttaang'u,

nea gigadiyeesi niny akghwahit.’”

9Hean ghwaat Yerusaleemu, ak godiing'da uhuuda gheeda sibatta Aseetta heeda geaw, ak gwayeeshsha, “Iiwosi Balleanda Aseetta, ging'adaattaawi geaw hiji; 10aba gideaba geang'waar,

‘Gaygoojeagu malaykajeagaaschi ak gafurnyi,’

11Ea gideaba,

‘Gayghwadeabwaneey geattinga nyawa,

ea mwalasa geeshtang'u lagheaneeda.’”

12Ghwasha Yeesu nea gwayeeshsha, “Ghayi geeyi, ‘Adisimsimi Ng'uttamiida was Aseetttaang'u.’” 13Hean ahiit meang'nyeandeenda giliwas simsimda, ghanyi gawa ea ghwanyas gheatta damannuut.

Yeesu ghoang'eat gadiyeadaannyi aba Galilaaya

(Mat 4:12-17; Mark 1:14-15)

14Iiduw gabiigu Yeesu aba uurda Gurorooda ak gawa Galilaaya, ak gageawiit iitaannyi aba daroorakka sean neekki. 15Goonealshachi aba jeeda ghoorajega nyaawa sinealshachcheewa, nea ghooghambiit buuneessean.

Yeesu geaheawa aba Nasareetti

(Mat 13:53-58; Mark 6:1-6)

16Iiduw ghwahidu Nasareetti, heeda ghayi hissiina heeda, ak gawa jeeda ghooriida sinnealshachcheewa, gawuurji gideajusu bea geallaan, aba eaweeda sabatto. Ghamiinaada ak ghoassoamwa; 17geattaw gittaabooda sibaneeda suguura Isaaya. Ghoayyaaw gittaabu ak ghwanyas heeda sing'oorsa gideaba,

18“Gurorooda Ng'uttamiida gwanda badaydeanyu,

aba gideaba nimwaaran dawa darukkwiisa fuga barbari Giijasta Miiy.

Gojeaknean darukusa fuga mida ghealooniga siksiinda nyaawa

nea fuga ng'oowwi gayghoang'wearda,

ak gojeaknean dalealu fuga sighabwas,

19nea gearukuti gweayda sumwas bea Ng'uttamiida.”

20Hean ghwarat gittaabu, ak ghoadaw siida gadiyeeda, ak goopteada; ak gohang'ooysa ghaang' buuneessean mida jeeda ghooriida sinnealshchcheewa. 21Ghoang'eat baloaldaannyi nea gwayeeshsha, “Eannean ng'ooruussu nisa aba jeeda iidigeagwa.” 22Gabaloola sean ng'asheega miyaas appadaydaannyi nea geahamng'eanyi isiyiiy ng'asheega dagheerjeandumeeda baloola. Ak geeyi, “Neada siisi ea mii balleanda Yoseefu?” 23Gwayeeshsha saawa, “Geasikteawi gideaba gajoorukuneani ghwasildeanga gideaba, ‘Bwanamwagaanga, ahaabwa geaw'; ng'asheega siyiinyi ghayi isni aba Gapernaumu, sina earaba ng'eanyiidaang'u.’” 24Ak gwayeeshsha, “Aba huumwa geayeeshshineegwa manda sibaneeda jea eamwas aba jeeda ng'eanyiidaannyi. 25Asi aba huumwa geayeeshshineegwa, ghayi gwanda masiinung'weega saang'a ng'eanyiida Israeeli aba damanda Eliya, damanda roada roopta gweannyeew samwagu ea shealaah, ak ghwahidu gejeeda haw jeeda ng'eanyiisean; 26eara Eliya ea mechcheakta gawa hichpa nuut, geenung' gawa heeda masiinung'weanda assagi mida Serepta, mida ng'eanyiida Sidoni. 27Abeeda gwanda fuga saang'a bearji udamusuura aba ng'eanyiida Israeeli gweayda waseewa Eliisha sibaneeda; ak ea meammiinna eara siyagi, geaghus Naamaneeda ng'eanyiida Sirya.” 28Iyiiy ng'asheanji Fuga mida jeeda ghooriida sinnealshachcheewa gwanyareesi sean. 29Ak ghang'eatng'eat erruteawa mujiini, ak geayaat mareetta heayeeda sideeksa mujiineeda nyaawa, nea geegasa eang'ng'adattaawa uhuuda heayeeda. 30Ghang'eat ak ghwalach bugusta nyawa ak gawa.

Siida beardooschi meangeenda

(Mark 1:21-28)

31Ak ghwararang'aada gawa Gapernaumu, was mujiineeda Galilaaya. Ak ghoanaal saawa eaweeda Sabatto; 32ghahamng'eanyi buuneeda aba ginealshoadaannyi, aba gideaba ng'asheandaannyi gwandeawa gheambalmeeda. 33Nea aba jeedeaba ghooriitta sinnealshachchewean gwanda Siisi mideawa gurorooda meangeenda muy hean; gojuur muuchchi aba ghuutta haw, 34“Seh! Akayhindaneasan ang'iing'i Yeesuuyda Nasareetti? Ghwasaan anda gineayaneasa? Ghanalli siiduwosi guwosi dea Ghaydit bea Aseetta.” 35Goojuursa Yeesu niny nea gwayeeshsha, “Siinda, ak giritteawi siisi!” Ghwanung' Meangeenda ghoabeada siida aba bugusta buuneeda, ak gwaritteaysa siidida nea mii gwasawan. 36Hean ghahamng'eanyi sean ak gaba nii eshsha nuut, “Nii ana ng'ashaani? Iissa Gwarukutteawa uurda ea gheambalmeeda nea gwayeeshsha meangeenda aritta ak gwaritta.” 37Gageawiit iittaannyi aba jeedeaba ng'eanyiitta seaniin eageng'oojiga.

Yeesu ghoahaap fuga saang'a

(Mat 8:14-17; Mark 1:29-34)

38Iiduw ghang'eat ak gwaritteawa jeeda ghooriida sinnealshachcheewa, ak gawa gheeh Simon. Nea abeeda gheamatta agweaji Simon ghamnyaan, gabearji sheagheeda ng'waan ak geemus ghoahap. 39Gawa heeda mida gheamattida ak ghamiinaada aba murdeadaannyi, ak goojursa sheagheeda, ak ghahabwa gheamatta sheagheadaannyi; deagheatta ghang'eat ghoang'aatta saawa.

40Damanda mikteawa aseetta, ghapka Buuneeda sean headaannyi nea gweadu fuga miyean bea siisi bearji geeyoadaannyi, ak ghwayiin geattingaaschi iheenga fuga miyeani ak gaheaba sean. 41Gwaritteaysa fuga saang'a meangeenda nea gojuuri nea gwayi, “Ang'iing'i guwosi Balleanda Aseetta!” Gowoowusa saawa, ak ghwarat ghuusiga ea mabaloola aba gideaba eara saawa ghwanal niny Gristo gil.

Yeesu gwarukwiida ng'asheega aba ghoorajeega sinnealshachcheewa

(Mark 1:35-39)

42Muchchu sakteayda ghang'eat gawa heeda manda sii, ak gagaseada Buuneeda ama sihiitta heeda geegasa eatteal ea manung'usiina heeda; 43gwayeeshsha saawa, “Gaydawa darukkwiida Giijasta Miy bea sugoochcheandumeeda Aseetta aba mujiinajeega suurja, aba gideaba suu gea sichcheaknaneani.” 44Abeeda gwarukkwiida Giijasta Miy aba jeeda ghoorajeega sinnealshachcheewa aba ng'eanyiida Yudeeya.

Currently Selected:

Lukka 4: DTGANT09

Highlight

Copy