Lukka 5

Yeesu gaguursa ginealanga madeeda

(Mat 4:12-22; Mark 1:16-20)

1Eaweechcha nea gwanda murdeeda basooda Genasareetti gwaneaweesa buuneeda nea goleeysiit ng'asheega Aseetta. 2Ghwadaa maleambaji iyyeenya aba murdeeda basooda, nea abeeda ea nuweay fiibwa gohuun gheareedanga nyaawa sing'ng'oonnya ghweayeega. 3Gawa jeemba maleamboonagi was dea Simon, gwayeeshsha seabwa nung' gosiipta maleambooda gil mwanang' gawa jeeda basooda ak goopteada ak ghoanaal buuneeda nea gwanda jeeda maleambooda. 4Rat ghuutta baloolda, gwayeeshsha Simon, “Asiipsiina heeda saang'a beega, ak ghoapputti ghearedangeagwa alealni ghweayeega.” 5Ghwasha Simon nea gwayeeshsha, “Siida haw, geegadiyi aweasean ak ea meang'ng'waanyi gil! Ama ninyaashtunu gaydabuutta gheareedanga.” 6Iing'atta sinoodeaba nii, ghoang'ng'waay ghweayeega saang'a; ea ghwariikghta gang'ada gheareedanga nyaawa, 7Gang'wachsa geadi fiisu mida jeemba maleambooni neekki ghapka ghaweat. Geegawusa maleambajeega duwaaw ea gwaramagu gwalik beega. 8Daa Simon Betro ng'asheanji, gobeedeaysa madeeda Yeesu nea gwayeeshsha, “Ea Ng'uttamiida, asiipteawana heedeanyu, aba gideaba geabea riing'a.” 9Ghahamng'eanyi sea fukka sean mideayiin, aba ghweayeega siing'ng'waay; 10nea abeeda gwanda Yakkobo ea Yohaana was balloojiga Sebedaayo sinuudayi gadiyeeda sea Simon. Ng'atta gwayeeshsha Yeesu Simon, “Adibeali; ghang'eada ghamneawa gaylealluuni buuneeda.” 11Aruunna maleambajeega nyaawa jeeda basooda ghang'eatng'eat gwanung'sa heeda haleanjeessean ak geayaat geeshta.

Yeesu ghoahaap siida

(Mat 8:1-4; Mark 1:40-45)

12Eaweechcha nea gwanda jeemba mujiinajean, ghwahidu headaannyi Siisi bearji udamusuura, daa Yeesu, gobeedeasa madeadaannyi ak gamus nea gwayeeshsha, “Ng'uttamiida, iigasayi gimmuusi amminnaan.” 13Ghoahaakta geadi Yeesu ak ghawaas nea gwayi, “Geagasayi; miinni.” Deagheatta gwaritteaysa udamusuura. 14Ghamiin gheang'da ea marukusiina sih; nea gwayeeshsha, “Una ahimsiina geaw ashoohoochcheanda, ak gisabi geadi haleanjeeda siyeada ghadooweeda was gidaghayi rukuteayda Muusa, asi abeeda gajeadaah gideaba simminneey.” 15Ak gageawiit iitta aba daroorakka sean, ak ghapka Emeeda headaannyi goleeysiit nea ghoahaap fuga bearji geyoonung'weakka. 16Iiduw gwajireada ak gawa dareapcheeda ghamwaash Aseetta.

Yeesu ghoahaap siida abittu damealga

(Mat 9:1-8; Mark 2:1-12)

17Eaweechchanjagi aba jeedeaba eawoojikka gonealshi, abeeda goobiitpiit Farisayajeega ea ginealshoodiga deaweeda leabu gilinyoo ea gharang'da Galilaaya, ea Yudeeya ea gealeabu Yerusaleemu; nea gwandeawa uurda Ng'uttamiida ak ghoahaap buuneeda. 18Asi ng'ulla, ghapka Buuneeda nea gwasareenna muunda siisi abittu damealga, ak geegasa gichchea eayaatta gah, ak geeyiin madeeda Yeesu; 19iiduw nea mwanyasa gheatta gichchea gweetteayda gah aba seang'ayda emeeda, gwading'da uhuuda gheeda ak geerrareang'u sea muundaannyi gwasku seawadeeda ea eayiin madeeda Yeesu. 20Daa masaweega nyaawa gwayi, “Siida, sisamsa ring'eegaagu.” 21Gonyeari geat Farisayaajeega ea ng'oorshoodiga nea gwayeena, “Siisi ng'eaha ang'eawi Aseetttean ghanyeamanda siisi ammu gwasamsa ring'eeda geaghus Aseetta akghwahiit.” 22Jeeng'u Yeesu ng'asheega anyeari geat gwayeeshsha, “Ghwasaan anda gonnyearayi geat ng'asheesu aba guroruunatkeagwa? 23Awussis anneeda, gideaba dayi, ‘Ring'eegaagu sisasmsa,’ ghana dayi, ‘Ng'eada ak guwi?’ 24Asi geagasayi anala gideaba Balleanda Siida gwandeawa gheambalmeeda aba jeeda ng'eanyiida jea gwasamsiina ring'eega iiduw gwayeeshsha siitta abittu damealgeani, geayi, ng'eada, sareana muundaang'u ak guwi ghoah.” 25Deagheatta ghang'eat siidida aba madeennyaawa, ak ghwasar muundaannyi ak gawa ghoah nea ghoaghambiit Aseetta. 26Ghahamng'eanyi sean, nea geakghambiit Aseetta nea ghang'uut muuwda nea geeyi, “Eannean sidaayi ng'asheega deamdeameadi.”

Yeesu gaguursa Laawi

(Mat 9:9-13; Mark 2:13-17)

27Iiduw gwaritta jarooda ak ghwadaa siisi ang'ng'oonyi gwaadi suguura Laawi, nea goopteada aba gheeda sing'ng'waanya gwadiin; ak gwayeeshsha, “Eanni geeshteanyu.” 28Ghang'eat ak gwanung'usa heeda halanjeasean, ak ghwaat geeshta.

29Gwasissa Laawi ghwelmeeda haw aba gheannyi; ak gweagiischi nea gambuuchchi fuga saanga ang'ng'oonyi gwaadi ea buuneeda suurja. 30Hean goniiksa Farisayajeega ea ng'oorshoodiga nyaawa ginealangaaschi, nea gwayeeshsha, “Ghwasaan anda goyeagiischi nea goleeshi sea fuga ang'ng'oonyi gwaadi ea fuga ring'eega?” 31Ghwasha Yeesu nea gwayeeshsha, “Fuga majeekcheewi magaseadayyi bwanamwagaanga geaghus gagasa gea miyeani. 32Aniini mwaawuni daguursa fuga doobiiweadi, ghawunnyi daguursa fuga ring'eega gwadukkuuna ring'eega nyaawa.”

Iitta giluuldeaydeaba geaw

(Mat 9:14-17; Mark 2:18-22)

33Hean geeyeeshsha, “Anda ginealanga Yohaana goluulliida geat nea ghamwaash Aseetta, ak eara ginealanga Farisayajeega gwasiniidunu, nea gaagu gweagiischi nea gwaleeshi.” 34Gwayeeshsha Yeesu, “Ghoammu gwaliilda rabasta nyeangiida nea gwandeayi sea siida geeshshi? 35Amaduw gwanda eaweetta jea egeandeawa siida geeshshi aba jeennyaawa, eaweechcheanji gaygwaliilda.” 36Hean gwarukusa galeega nea gwayeeshsha, “Manda siida jea ghabwaash weasta hang'deesh ak ghawaasa hang'da waas, iisindunu gayghabwaash dea eesh, ak abeeda weastida bea hang'deeshiin maygweatteayyi sea dea waas. 37Ak ea manda siida jea ghwayiin difaayeeda mii ghwaheas jeesinga ghadeatka woosi; iisindunu, gaygwanyarjeaweada difaayeeda mii ghwaheas ghadeatka ak gaygaweay difaayeeda, ak gwanyara ghadeatka. 38Difaayeeda mii ghwaheas geaghus eyamsa jeesinga ghadeatka eashiish. 39Ea manda siida jea iing'atta leeyda difaayeeda heeseadi jea gagasa gea mii heeseadi; aba gideaba gaygwayi, ‘Gea heeseadi amiyaas.’”

Currently Selected:

Lukka 5: DTGANT09

Highlight

Copy