Lukka 6

Iitta Sabatto

(Mat 12:1-8; Mark 2:23-28)

1Eaweeda Sabatto damanda beawa gwasik jeesinga madameega, hean ghwalajaada ginealangaaschi muschoonga, ak gang'ealng'ealsa jeesinga baneaguukka nyaawa ak ghwaak. 2Gwayeeshsha Farisayajeega mwaatkwa, “Ghwasaan anda goosinnyi ng'asheanda mwadoabiiwa eaweeda sabatto?” 3Ghwasha Yeesu nea gwayeeshsha, “Miyoassoamwana gidaghayi sin Dawdi iyeachchih. 4Gidabeada jeeda gheeda Aseetta, ak gageanu ak ghwaak mukkattajeega siyiin madeeda Aseetta, nea mwadoabiiwa aba hichpa siinuut geaghus ghwaak ashoohoodiga, ak ghoadaw eara fuga mideayi sea niny?” 5Ak gwayeeshsha, “Balleanda Siida Ng'uttamiida sabattoohi.”

Siida aptu geattinda

(Mat 12:9-14; Mark 3:1-6)

6Eaweechcha nuut bea sabatto, damanda beawa jeeda ghooriida sinnealshachcheewa ak goonealshi, gwanda jeeni siisi apttu geattinda dugwa. 7Gang'ula Ng'oorshoodiga ea Farisayajeega eadaa ea jea ghoahaap siidida eaweeda sabatto, aba sareani geegasa gichchea eanyasta ramaseanda jea eahhaktaawa. 8Hean ghwanal gidamida jeesinga nyaawa, ak gwayeeshsha siidida aptu geattindean, “Beenni miinaada aba hiji.” Ak ghang'eat ak ghamiinaada aba hoowa. 9Ak gwayeeshsha Yeesu, “Gaydanyasheagwa, aba eaweetta sabatto, ghwadoabiiwi gideaba geesin ng'asheanda miyi ghana ng'asheanda muy. Ghang'wana gighuuyda eaweega ghana ng'wana lakkunooda?” 10Ng'atta ghoaduup ghaang' buuneeda aba murdajeega sean ak gwayeeshsha siidida, “Asi adoabiiwa gattindaang'u.” Hean ghoadoabiiw ak gabiikta geattinda gamajeegiit. 11Ghwanyareas muuchchi fugiga ak geebalool eegasa gichchea eehinda Yeesu.

Yeesu ghwaloat giijasoodi damaniyyeenya

(Mat 10:1-4; Mark 3:13-19)

12Askwearjoojikka gawa iheenga heayeeniga ghamwaash Aseetta; ghamwaash Aseetta eaweesean. 13Iimuchchu, Gaguursa ginealangaaschi, ak ghwaloat damaniyyeenya aba jeennyaawa, ak gaguura malaykajeega; 14Nea Simoneeda suguura gheawungaaschi Betrohi, ea oorjeeda ghaamwat siyi Andreya, ea Yakkobo ea Yohaana, ea Filippo, ea Bartolomayo, 15ea Mattayo, ea Domaso, ea Yakkobo balleanda Alfayo, ea Simoneeda suguura Selotte, 16ea Yuuda balleanda Yakkobo, ea Yuudayda Iskariyoti, was siida amaduw ghwala bwadaw.

Yeesu gonealshi nea ghoahaap fuga miyeani

(Mat 4:23-25)

17Iiduw nea ghwararang'aan sea saawa ak ghamiinaada aba heeda miy ng'eanyi, abeeda gwandeawa fuga saang'a was ginealangaaschi ea emeettuw leabu meatkwajeega sean bea Yudeeya, ea Yerusaleemu ea ghuutta basooda Diro, ea Sidooni, nea ghapka gooleeysiit niny nea geahaap geyoonung'eakka nyaawa; 18Ak ghoahaap eara fugiga bearji meangeenda munyasiin. 19Gagasa emeessean ghawaas niny, aba gideaba uurda gwaleabu headaannyi ak ghoahaap sean.

Hoseaneega ea giseaneega

(Mat 5:1-12)

20Iiduw gagatgat gheanyangaaschi goong'weersa ginealangaaschi, ak gwayeeshsha:

“Ghoang'wani agogeeda barbari, aba gideaba sugoochcheandumeeda Aseetta deang'wa.

21Ghoang'wani agoogeeda yeadeagwa jih ghamneawa, aba gideaba gajoolang'uuda.

Ghoang'wani agoogeeda oyyeawdi ghamneawa, aba gideaba gajoayaaga rear.

22Ghoang'wani agoogeeda sideagwa buuneeda, nea gwahistaneegwa nea gong'eawweegwa ak geemmunyasiidi gheawungeagwa, appadayda Balleanda Siida!

23Ahoosana aba eaweettida, nea ghoang'waschi aba hooseaneega, aba gideaba gimeardeang'wa aahaw aba humng'eeda, aba gideaba nii gidaghayi hinda ghweaniga nyaawa sibanga.

24“Asi ashageada agoogeeni owoschi baruurjeewiin, aba gideaba noanyaaschi hawdeayda.

25Ashageada agoogeeni owoschi lang'uudeat ghamneawean, aba gideaba gajadaaha jalooda. Ashageada agoogeeni oayaaji rear ghamneawean, aba gideaba gajaguttuuni heareega nea gooyeawdi.

26Ashageada agoogeeni, jea gagwarseegwa buuneessean iin aba gideaba eara ghweaniga nyaawa ghayi gwahindunu sibanga ng'uyeega.”

Bariinyeega weajoodiga

(Mat 5:38-48; 7:12a)

27“Asi Geayeeshshineegwa agoogeeni oyiing'shiin, abwariinya weajoodigeagwa, asissiina geamiyaas fuga sideagwa, 28Abadiischeesiina fuga morridaneegwa, amwaasha Aseetta appadahuukka fuga ghabwaseegwa. 29Siida iilas madang'daang'u, giidawi eara meatkweeda niirja; iiyareannyi sih hang'daangu ginung'usi eara shaatteadaang'u. 30Siida musnyi gil adawa, nea siida arreannyi halanjeadaang'u ea adimaseawi. 31Asi gidoogasayi gwasinneegwa buuneeda agooga, asissina eara saawa.

32“Iyoabwariinyi fuga bwarinyeagwa, abeeda ghoahhiimu naaha miy? Aba gideaba eara fuga ring'eega ghabwariiy fuga bwariiy saawa. 33Iyoosissi geamiyaas fuga sinnuneegwa gea miyaas, abeeda ghoahhiimu naaha miy? Aba gideaba eara fuga riing'eega gwasna gea urjunu. 34Iyoanung' goleakshi fuga oanalli gideaba gay ghoaghuumneagwa abeeda ghoahhiimu naaha miy? Aba gideaba eara fuga riing'eega gooleaksheewa heeda fuga ring'eega, aba gideaba ghwanal gideaba gay ghoaghuumu. 35Asi abwariinya weajoodigeagwa, nea goosinnyi gea miyaas, nea ghoanung' goleakshi, nea adoofurdi godelneegwa gil; abeeda gimeardeang'wa gajaahaw, ak gajahuuwa balloojiga Aseetta haw mida humng'eeda; aba gideaba niny aamiy aba fuga mabadiischeesiina ea gea geawwi gheanyan. 36Andeawana baydeayda, ak gawuurji gidamideayeatta Ghweandeang'wa baydeayda.

Girgweaksiinda buuneeda

(Mat 7:1-5)

37“Adoorgweakkiisi buuneeda, ak ea majeergweakseegwa; adooyeatti ghuussi, buuneeda ak ea majeeyeatteeweegwa ghuussi; asammisiina buuneeda, ak gajeesamseagwa; 38oattawa buuneeda haleanjeeda ak gajeegoneegwa; daanyiit, sidaksa, siittuumduum, ea ghwanawda, ea gichchea gagoneegwa. Aba gideaba giideennooda ootteennidi gichchea eetteenneegwa.”

39Gabalool nea gagalla geat ng'asheega: nea gwayeeshsha, “Heappi siida ng'oaw gayghoammu ghoadoabiiw siinuut ng'oawi? May ghoabitta duwaawi jeeshshoomanda? 40Ginealaneeda mwang'ala ginealshoochcheandaannyi, geaghus ea niduulu ginealshooda abeeda gaygwadeennyi sea ginealshochcheandaannyi. 41Ghwasaan anda gung'ulayi hararooyeanda mida jeeda gheang'da oorjeeda geamadu nea mung'ulli geetta mida jeeda gheang'daang'u? 42Ak gajammuustaan eshshiina oorjeeda geamadu, ‘Oorjeeda iyya, nung' dageanu hararooyeanda mida gheang'daang'u,’ nea midaahi geetta mida gheang'daangu ang'iing'i. Siida ammiittu geaw, nyoo ghanyi geanda geetta mida ghang'daang'u, abeeda gaydaaha muuchchi gichchea geandeayda hararooyeanda mida gheang'da oorjeeda geamadu.”

Geetta ea haghweagaaschi

(Mat 7:16-20; 12:33-35)

43“Geetta miiy majiilla hagheega munyas, eara geetta muy ea majiilla haghweega miyaas; 44aba gideaba gilinyoo ea geadi geenalla haghweagaaschi. Aba gideaba mwaang'wa eebinna gulageetka geetta halaghweenga, ghana mwoang'wa ebiinna misabiibu heeda yudeeda. 45Siida miy aba jeeda gheaseedaannyi miy bea guroroadaannyi goruuttu gea miyaas, nea siida muy aba jeeda gheaseedaannyi muy iissa goruuttu gea munyas; aba gideaba ghuutta gabaloolla gea nyiit jeeda jeeda guroroadaannyi.

Fii iyyeenya deekshi

(Mat 7:24-27)

46“Ghwasan anda googurewean ‘Ng'uttamiida, Ng'uttamiida,’ nea moosinni gidearukneegwa? 47Siida wassean wuh heedeanyu ak ghwayiiy ng'asheegeasu ak gwasin, gaydahiimu giduurji: 48gawuurji sea siida deekshi, ghurghurda daranajeega muuchchi ak ghwayiin sindeetta heeda mida lagheanga; hidu guldeayda eenda, gagulsa gheeda, ak ea mwabwaanya, aba gideaba sideas muuchchi. 49Nea siida iiy ng'asheegeasu ak ea masna gawuurji siida deeksa gheeda badayda ng'eanyiida nea manda sindeetta; hidu guldeayda, deagheatta ghabwaay, ak habitkweedeaba gheetta ahaw muuchchi.”

Currently Selected:

Lukka 6: DTGANT09

Highlight

Copy