Mattayo 26

Geamwaal gichchea enuusta Yeesu

(Mark 14:1-2; Luk 22:1-2; Yoh 11:45-53)

1Iiduw nea ghoahiit Yeesu ng'asheesu seaniin gwayeeshsha giinealangaaschi, 2“Mwoanali gideaba ing'atta eawooji iyyeenya abeeda gajea ghweelmeeda Basakka gil, ak gajeattayda Balleanda Siida engoor.” 3Aba damandida gabassa geat Ashoohoodiga hees ea gweargwa seammooda gheeh Gayaafa nea ashoohoochcheanda haw gil. 4Gabaloola gichchea ghoang'ng'wayda Yeesu aba seachta ak geenuus. 5Iiduw gwaneaji gideaba “Adeesinnyi ng'asheanji eaweetta ghweelmeeda aba gideaba gajiiduw ghwadaakghuyan emeeda.”

Yeesu geayeasha nagheeda aba Bettaniya

(Mark 14:3-9; Yoh 12:1-8)

6Damanda mideewa Yeesu gheeh Simoneeda suguura siida bearji udamusuura, 7ghwahidu headaannyi gatmooni eattu gideeshteayda nyiit nagheeda ng'andit guuyi sakghwiloah bissa gaba sheaydeeda haw, ghwahidu nea goobiitpiit gheatta agiischooda, ak goodalealsa uhuuda nagheetta ng'andidiin. 8Daa Giinealanga ng'asheanji gwanyareesi, nea gwayi, “Darariini gaba naaha? 9Nagheani gwachchi isishayda gayghwanyas lappiyeeda saang'a jea eattaw fuga barbari.” 10Gwajeeng'u Yeesu gidabaloola jeesinga nyaawa ak gwayeeshsha, “Ghwasaan andagootteawiichi gatmooda? Niny gwasinnean ng'asheanda miy. 11Aba gideaba fuga barbari goondeaydooscheewi galeegasean, amaduukku aniini ea majeendeayeena galeegasean. 12Gatmooni goodalealsean nagheeda ng'andit aba gideaba gwasissinan aba bunyitteanyu. 13Aba huumwa geayeeshshiineegwa, heeda wassean aba muunda ng'eanyiida surukwiideaysa Giijasi Miyiin, gili sin gatmooniin, gajeebaloolla aba giipkeattannyi.”

Juuda ghamwas ghwala bwadaw Yeesu

(Mark 14:10-11; Luk 22:3-6)

14Muchchu gawa nisih Yudaayda Iskariyotte nea gaba jeedeaba giinealangiga attamaniyyeenyean heeda ashoohoodiga hees. 15Hitta gwayeeshsha, “Gajagoonean naaha iyalaapchi bwadaw niny ak geagoonnyeegwa?” Geeyittisa geattinga shilingaji diktam ea damanamughuush. 16Ghang'eada damandida gagaseadayyi gheatta gichchea ghwalaapta bwadaw.

Yeesu ghwaak hamitta basakka sea ginealangaaschi

(Mark 14:12-21; Luk 22:7-13, 21-23; Yoh 13:21-30)

17Eaweetta madeada nea miighwahidu ghwelmeeda mukkattajeega miigamattawiidi, gaweay Giinealanga heeda Yeesu ak gwayeeshsha, “Gigasayi esinney hamitta basakka aba yeenu?” 18Gwayeeshsha Niny, “Aweayeena mujiini gheappa sih ak gooyeeshshi, ‘Gwayi Ginealshoochcheanda, nigul damandeanyu ak geagasayi daak hamitta Basakka sea giinealangeasu aba jeedeaba gheang'u.’” 19Gwasinda Giinealanga ng'asheega gidarukusiinda Yeesu ak ghoang'eat sinooda Basakka. 20Huuw shing'ada goopteada Yeesu sea giinealangaaschi attamaniyyeenya nea gweagiischi. 21Damani agiischeewean, gwayeeshsha, “Aba huumwa, geayeeshshineegwa, siyagi aba jeedeang'wa gayghwalaabwan bwadaw.” 22Gagiisan giinealanga muuchchi, ak gaba siisi anyaashta nea gwayeeshsha, “Siida aniini Ng'uttamiida?” 23Ghwasha nea gwayeeshsha, “Siida jea dang'utta buurda sea niny nii siida jea ghwalaabwan bwadaw gil. 24Balleanda siida gaygawa, gawuurji gidaghayi sing'oorsiinda, amaduw eadashageada siidida jea ghwala bwadaw Balleanda Siidean! Siisi ghang'wana gwachchi ea meeji.” 25Gwayeeshsha Yuudayda jea ghwala bwadaw, “Rabi, aniini ghanea?” Gwayeeshsha niny, “Girgu ang'iing'i.”

Hamitta Ng'uttamiida

(Mark 14:22-26; Luk 22:14-20; 1Gor 11:23-25)

26Damanda agiischooda gageanu Yeesu mukkatte ak gang'ushsha, ak ghabwanach, ak ghoadaw giinealangaaschi nea gwayeeshsha “Oang'ng'waanya ak ghooyaaji, nii sasedeanyu gil.” 27Ng'atta gageanu bayookta, ak gabadiischeesa, ak ghoadaw nea gwayeeshsha, “Aleayda bayoogi oagasean. 28Aba gideaba suu foojeandeanyu bea neajeeda gil, ak geahiida appadahuukka fuga saang'a aba geandeayda ring'eeda. 29Gaydayeeshshineegwa maygudu dabiikta dali gichcha difaayeeda sabiibu ea eaghus dabiikta dali gichcha gea eashish sea agooga aba jeeda sugoochcheandumeeda Bwaabwa.” 30Iing'atta sarmeeda duumda, ghang'eatng'eat gaweay uhuuda gijeeda masaytunajeega.

Yeesu gabean gwargu sheang'da Betro

(Mark 14:27-31; Luk 22:31-34; Yoh 13:36-38)

31Gwayeeshsha Yeesu saawa, “Aweani bea ghamneawean gajastaan oagasean aba gideaba geang'waar, ‘Gaydabwar jeagiischoochcheanda, ak gayghwadarda hawanda gisilga.’ 32Iimuchchu nea ghang'atta dunnoodeanyu gaydeasheedeawaneegwa dawa Galilaaya.” 33Ghwasha Betro nea gwayeeshsha niny, “Eara ghamwachmwachnyi buuneeda ak gwanung'useey heeda, aniini maydanung'useey heeda eara hay.” 34Gwayeeshsha Yeesu niny, “Aba huumwa geayeeshshineey aweani bea ghamneawean heeda mii googuuleewa nnghaghooda, gajeenishaang'nyaan niba samwagu.”

35Gwayeeshsha Betro, “Eara ghoaw miyeeda emewdeayeena maydashaang'nyi eara hay.” Ghwanyaashtunu giinealanga sean.

Yeesu ghamwaash Aseetta aba Getsemaani

(Mark 14:32-42; Luk 22:39-46)

36Iiduw goodeayi Yeesu ea saawa jeeda madamnyeanda mwanang' suguura Getsemaani, ama ng'atta gwayeeshsha giinealangaaschi, “Oppitpiida aba hiji dawa hoowa damwaash Aseetta.” 37Ghwaat Betro sea orju iyyeenya bea Sebedaayo, ak ghang'ut giseaneega ea gwadeawiit. 38Miighoaw gil gwayeeshsha, “Guroroodeanyu eagisaneat muuchchi ea ghwariikghta dami, ooppitpiida aba hiji nea ghoang'ng'wearu sea aniini. 39Hean gawa mwadi gilimwanang' ak gwatkuy ak gakkula gheamamdaannyi ng'eanyi ak ghamwaash Aseetta nea, gwayi Ea Bwaabwa, iimmuusi ginung' ghwasajaadawanaan bayoogi, ea adaghoaw gideagassiidi aniini, nung' ghoaw gidigassiidi ang'iing'i.” 40Ghang'eat gawa heeda giinealanga ak ghwahitta nea nilil. Gwayeeshsha Betro, “Heappi mimmuusi gideaba gajang'wearni eara jeemba aseedeanagi eesa aniini? 41Oang'ng'wearni nea ghoamwaashchi Aseetta ea mwoappittani jeeda simsimda; gurorooda ghwanyawa gagasa, amaduw ang'arng'ar saseeda. 42Gabiikta deabiyyeenya ak ghamwaash Aseetta nea gwayi, ea Bwaabwa, iimay ghwasajaadawanaan bayoogi ea eeghus daleayda nung'waanda gwasa gidigassiidi ang'iing'i.” 43Gabiikta gichcha heeda giinealanga ak ghwahitta nea nilil aba gideaba nudurmaniidi gheanyanga nyaawa aba ruweanga. 44Gabiikta gwanung'sa heeda ak gawa ghamwaash Aseetta deaba samwagu nea gwargu ng'asheega gwachchi. 45Ng'atta gabiigu heeda giinealangaaschi ak gwayeeshsha, “Abissiina alla nea goofuufchi? Adaaha nihidu damanda ak Balleanda Siida gajeayiin geattinga fuga riing'eega. 46Ang'eatng'eada, eweaya; oang'ng'wearda siida jea ghwalaabwan bwadaw nukkwa nineekkiit.”

Ging'ng'ooyda Yeesu

(Mark 14:43-50; Luk 22:47-53; Yoh 18:3-12)

47Damanda duugwandeawa hoowa nea gabalool ghwahidu Juuda nea gaba jeedeaba giinealangiga attamaniyyeenyean, nea goodeannyi sea emeeda mideawa bwaangajeega ea gulupkeakka nea goojeagu ashoohoodiga hees ea gweargwa. 48Iiduw siitta jea ghwala bwadaw Yeesuun abeeda ea nigeawiit ghoadaw gwadeagooda nea gwayeeshsha, “Siitta jea dasamiin ajeeng'ni gideaba niny gil, abeeda ghoang'ng'waanyi.” 49Hean gwanekkiissa Yuuda Yeesu ak gwayeeshsha, “Seayu Siida haw!” Amwahit ghwasam. 50Gwayeeshsha Yeesu niny, “Ea siideaduupcheewi, ghwasaan anda gindi hiji?” Ng'atta ghwahidu Fugiga ak ghoang'ng'waay Yeesu. 51Gageanu Oorjeanagi aba jeedeaba oorjookka gwachchi mideawa Yeesuun, ak ghoahakta geadi ak gafagu bwaangeadaannyi, ak ghwalas soomjeandida bea ashoohoochcheanda hawiin, ak ghwalach iitta. 52Gwayeeshsha Yeesu niny, “Adealda bwaangeadang'u jeeda labaldaannyi, aba gideaba siida bwarda bwaanga, eara niny gajeabwara bwaanga. 53Moanali gideaba gwachchi ghammuuschi damus Bwaabwa ammiih ghoaw gil gaygoojeagu lugooda saang'a bea malaykajeega? 54Abeeda gaygwasamwattaan Ng'ooruutka ayi nii gidamiisa ghoawda baloolda gil?” 55Damandida gwayeeshsha Yeesu emeeda, “Assagooga ghoapkaannyi oang'ng'wanyaan nea gooyeadu bwaangajeega ea gulupkeakka ghoanung' dawuurji mareanghweanda? Eawoojusu geabiitti gheeda sibatta Aseetta nea geanealshi ak ea moong'ng'oonnyean! 56Ghamneawa eanisa ng'asheesu seaniin gwasa Ng'ooruutka ghayi bea sibaneeda.” Iiduw gwanung'usa heeda giinealanga ak gwasalda.

Yeesu aba madeeda girgweageeda

(Mark 14:53-65; Luk 22:54-55, 63-71; Yoh 18:13-14, 19-24)

57Hean gageanu Fukwachchi ang'ng'waay Yeesu ak ghwaat gheeh Gayafeeda was ashoohoochcheanda haw, nea nibattiisa geat ng'oorshoodiga ea gweargwa. 58Ghwaat geeshta Betro nea gameaji ea sheagi ea ghwahitta seammooda gheeda ashoohoochcheanda haw, gaweay jeeda gheeda nea goodeayi furiischoodiga nea gagasa ghwadaa gichchea eesin. 59Hean gagasa Ashoohoodiga hees ea gweargwa sean bea gheeda girgweageeda ng'asheanda ng'uyyeega jea emuuwwu appadayda Yeesu jea iiduw eenuuksa, 60iiduw ea mudughwanyas ng'asheanda jea ennoas earappeadi buwa mushoodiga saang'a bea ng'uyyeega. Hean iiduw aba huydeanda ghwahidu fii iyyeenya 61ak gwayeeshsha, “Siisi ghayi gwayi, ghammuuschi danyarja gheawi Sibatta Aseetean ak geabiikti dadeas gichcha aba askwearjooji samwagu.” 62Ghang'eat Ashoohoochcheanda haw ak ghoanyaash, “Heappi mwayshaaha eara ng'ashaani? Fiisu gamuuwu naaha appadaydaang'u?” 63Ghwasiinda Yeesu. Gwayeeshsha Ashoohoochcheanda haw, “Eaniyean aksiina Aseetta majeek habeawooda rukuneasa ang'iing'i ea guwosi Gristo, Balleanda Aseetta.” 64Gwayeeshsha Yeesu niny, “Girgu ang'iing'i. Asi gaydayeeshshineegwa, ghang'eada ghamneawa gajadaaha Balleanda Siida nea goopteada aba meatkweeda geattinda dugwa hoauur, nea ghwaana badayda shamooghuutka humng'eeda.” 65Aba damani ghabwashaada ashoohoochcheanda haw hang'weakkaschi ak gwayi, “Ning'eawi Aseetta. Gudeegassa mushooduspwa naaha gichcha? Asi ghamneawa nukkwa siyiinyi ging'wakkaaschi. 66Gooyeennyiin agooga aba girgweageedeang'wa?” Ghwasha Saawa nea gwayeeshsha, “Gammiisa gideaba gajeenuus.” 67Hean geeng'ng'uriisa ng'usheega gheamamdaannyi, nea geabwar digeanga; nea suurja gagul, 68nea gwayeeshsha, “Ea Gristo! heappi daaha aajaanala siida lasnyi?”

Betro ghwashaang' Yeesu

(Mark 14:66-72; Luk 22:56-62; Yoh 18:15-18, 25-27)

69Aba damandida Betro goopteada aba seammooda. Hean gaweesa hudagi bea gadiyeeda ak gwayeeshsha, “Eara ang'iing'i gindeaydooscheewi Yeesuyda Galilaaya.” 70Ghwashaang' Betro aba madeeda buuneeda nea gwayeeshsha, “Aniini mwanali eara gidurgu” 71Iiduw nea gwaritteawa gidaghuut gabiikta ghwadaa hut nuut bea gadiyeeda ak gwayeeshsha, fuga ghwanyawa mida hoowa, “Siisi gwachchi gwandeayi sea Yeesuuyda Nasareti.” 72Gabiikta ghwashaang' Betro nea ghwaak habeawooda nea gwayeeshsha, “Aniini siisi mwanali” 73Ng'atta gheadi nuwaas gaweay Fukwachchi mida hoowa heeda Betro ak gwayeeshsha, “Aba huumwa earang'iing'i guwosi siyagi aba jeedeaba fukka aba gideaba ghoahiimu baloaldaang'u.” 74Damani ghamwaashta geaw Betro nea ghwaak habeawooda nea gwayeeshsha, “Aniini siisi mwaanali.” Deagheatta googuul nnghaghooda. 75Hean ghoapkaat Betro ng'asheega heetta rukusa Yeesu, bea gideaba, “Damanda migooguula nghaghooda gajeenishaang'nyaan niba samwagu.” Gwaritta jarooda ak gooyyeawda.

Currently Selected:

Mattayo 26: DTGANT09

Highlight

Copy