Mattayo 27

Yeesu geayaat madeeda Bilatto

(Mark 15:1; Luk 23:1-2; Yoh 18:28-32)

1Imuchchu nea ghaghar gayeew gagasa Ashoohoodiga hees ea gweargwa gichchea gwanuusta Yeesu. 2Geerada aba biingu ak geayaat heeda Bilatto nea siida ambal ng'eanyiitta gil.

Miyeeda Juuda

(Gadi 1:18-19)

3Iiduw nea ghwadaa Yudaayda heetta lah bwadaw Yeesu gideaba sirgweaksa, ghang'ut giseaneega ak googuumsa ashoohoodiga hees ea gweargwa shilingajeekka attiktam ea damanamughuushiin. 4Gwayeeshsha, “Neadiinyi aba gideaba ghadaydi siida manda gidinyeanda ennus.” Gwayeeshsha Saawa, “Neada ghwadaseasaani aseasa? Ng'asheanji gabeachcheeweey ang'iing'i.” 5Hean gwahisa niny shilingajeekka jeeda gheeda sibatta Aseetta, ak ghang'eat gawa amwahitta ghwaratta geaw. 6Gageanda ashoohoodiga hees shilingajeekka nea gwayi, “Mammisiina gideaba gajeayiina jeeda gheaseeda aba gideaba suu lappiyeeda foojeanda gil.” 7Gwaneaji ak ghwashaaha lappiyeetta madamnyeamba siisi sineadayyi dahuundiga ak ghoaw heeda jea ebunnyiisa rabasta. 8Ghoaw gida duueguureewa madamnyeandida madamnyeanda foojeanda ea ghwoaw ghamneawa. 9Ak gwasa ng'asheega ghayi rukuta sibaneeda suguura Yeremiya gideaba, “Gageanda lappiyaji diktaam ea damanamughuush moonneeda ghayi bea siida mwas fuga Israeeli gideaba gayghoadayda, 10ak ghwashaaha madamnyeanda siida sina dahuundiga gawuurji gidaghayi eshshindanean Ng'uttamiida sinnda.”

Bilatto goonyeari Yeesu ng'asheega

(Mark 15:2-5; Luk 23:3-5; Yoh 18:33-38)

11Geanung' ghaminaada Yeesu aba madeeda siida haw bea ng'eanyiitta. Hean ghoanyaash Siitta haw bea ng'eanyiidean nea gwayeeshsha, “Ang'iing'i guwosi sugoochcheanda fuga Yahuudi?” Gwayeeshsha Yeesu, “Girgu ang'iing'i.” 12Nea aba damandida argweaksiina ashoohoodiga hees ea gweargwean ghanyea mwasha eara ng'ashaan. 13Hean gwayeeshsha Bilatto, “Miyiinyi ng'asheesu sean sumuwwunaneeyiini?” 14Ghanyea mwasha Yeesu eara ng'ashaanjagi ea ghahamng'eanyi siitta haw bea ng'eanyiittean muuchchi.

Yeesu gergweaksiina miyeeda

(Mark 15:6-15; Luk 23:13-25; Yoh 18:39—19:16)

15Iissa eaweeda ghweelmeeda gageanu siida haw bea ng'eanyiida ak goottin siyagi wassean mida ghealooniga gasa emeeda. 16Aba damandida gwanda siisi nalaat muuchchi was siida ghealooniga suguura ghawungaaschi Baraaba. 17Hean iiduw nea ghabwat geat buuneeda ghoanyaash Bilatto gideaba, “Googasayi deattin ng'eaha, Baraabahi ghana Yeesuuyda suguura Gristo?” 18Ghoanyashtaydunu nea ghwanal gideaba geayaat headaannyi aba lachng'eanyiida. 19Damanda mideawa Bilatto uhuuda hoorgeeda argweachcha goojeakta gatmoadannyi siida weah gwayeeshsha, “Adiiduw gighasi geaw siisi doabiiwaadiin, aba gideaba geesawanan muuchchi aba jeeda girgweatka appadaydaannyi.” 20Gageanu ashoohoodiga hees ea gweargwa ak ghaghoash buuneeda nea gwayeeshsha, amsa ettinneegwa Baraaba ak geenuus Yeesu. 21Ghoanyaash siida haw bea ng'eanyiitta nea gwayeeshsha, “Googasayi deattin ng'eaha aba jeedeaba fiisu assiyyeenyean?” Gwasha saawa, “Baraaba.” 22Gabiikta Bilatto ghoanyaash nea gwayeeshsha, “Ghamneawa googasayi dahindaan Yeesuyda suguura Gristo?” Gwayeeshsha sean, “Anngoora.” 23Ghoanyaashta Bilatto nea gwayeeshsha, abwanaaha? Neada ea nidiinya naaha? Gabiikta saawa ghoaraanya gijuureanda nea gwayeeshsha, “Angoora” 24Daa Bilatto gideaba mwanyasa gil ghoahaada nyarasta, gageanu beega ak goohuun geattingaaschi aba madeeda emeeda ak gwayeeshsha, “Aniini manda gichchea ghwaagan aba foojeadeaba siisi asawsiina agooga nea goobwageat.” 25Ghwasha Buuneessean nea gwayeeshsha, “Nung'waada foojeandeaba siisi ghapka badahuukkaasa ea gea diibigaasa!” 26Hean gageanu ak goottissa Baraaba, hit bayiiga Yeesu aba mughoowooda ghoadayda Yeesu enngoorsa uhuuda beehiida.

Shirikkara gwajuuga Yeesu

(Mark 15:16-20; Yoh 19:2-3)

27Gageanu shirikkarajeanda siida haw bea ng'eanyiitta ak ghwaat Yeesu jeeda gheeda sugoochcheanda, ak gabassa geat shirikkareeda sean. 28Geafwakta hang'weakkaschi ak geekkwealsa hang'da oomu. 29Geanap shiipka halaghweenga, ak geayiin uhuuda Yeesu, nea geegeanu muudeanda ak geayiin gattindannyi bea dugwa. Iissa geetkuy ammwadeadaannyi nea geejuuga nea geeyeeshsha, “Seayu, Sugoochcheanda Yahuudi!” 30Geeng'ng'urriisa ng'usheega nea geegeanu muudeanda ak geabwara uhuuda. 31Iing'atta jukkooda geegeanda hang'dida ak geeshuup hang'weakkaaschi hii geayaat engoor.

Yeesu gengoor

(Mark 15:21-32; Luk 23:26-43; Yoh 19:17-27)

32Iiduw nea gaweay geadaah siyagi suguura Simoneeda ng'eanyiida Girene, ak geediing'sa ghwasar behiidaannyi. 33Sihitta hiji suguura Golgootta (nea gideaba dea Geapkeeda Uhuuda gil,) 34geattaw difwayeeda sikkuuyi sea gidang'weanda, hean samu niny ghaheawa ghwali. 35Iiduw nea ning'atta gingoorda geelaja hang'weakkaschi nea geeng'alealleesa; 36gobiitpiit nea gafur. 37Geayiin deascheeda uhuudaannyi ng'asheega siihaaktaaw sung'waardunu, “Nii Yeesu gil sugoochcheanda Yahuudi.” 38Abeeda gwanda fii iyyeenya was mareanghooga siingoruudayi sea niny, dea manda meatkweadaannyi bea geattinda dugwa, niirja gwanda meatkweeda geattinda ghaadaam. 39Iissa fuga ng'atta aba naweeda goong'eawi nea goodiindiil iheenga nyaawa nea gwayeeshsha, 40“Ang'iing'eeda jea gwanyarja gheeda sibatta Aseetta ak ghwadeas aba eawooji samwagu, asi lealni geaw! Iiwosi Balleanda Aseetta, girarang'aanani uhuuda beehiida.” 41Gwasunu eara ashoohoodiga hees ea ng'oorshoodiga ea gweargwa, gabarra budeay nea gwayeeshsha, 42“Gwalealu suurja ak amwoammu gwalealu geaw. Niny sugoochcheanda Israeeli gil; asi dararang'aanana uhuuda behiida ghamneawa ak abeeda earaseasa gajeamwasa. 43Niny ghaghus Aseetta ea dalealna ghamneawa iigasa, aba gideaba gwayi, ‘Aniini Balleanda Aseetta.’” 44Eara Fukka was mareanghooga singooruuday sea ninyiin gong'eawi.

Miyeeda Yeesu

(Mark 15:33-41; Luk 23:44-49; Yoh 19:28-30)

45Ghang'eada aseetteaba lah ea ghwahitta aseetteaba shageash gwadukta ng'eanyissean misaneeda. 46Iiduw nea nihitta aseetteaba shageash gooyyeawuda Yeesu nea gooheedu daghatta nea gwayi, “Eloyi, Eloyi lama sabaktani?” Nea gideaba, “Aseetteanyu, Aseetteanyu, anda nunung'usean heeda?” 47Iing'shi fukka gwachchi miinaada aba hoowean ng'asheesu gwayeena gaguursa Eliya. 48Ghafwach Siyagi ak gageanu ghabuscheanda ak ghoannyit beega ng'weani ak ghwayiin uhuuda muudeanda ak ghoadaw ghwali. 49Gwayeeshsha buuneeda mwaatkwa, “Oommeasa eadaaha ea jea ghwaan gwalealu.” 50Gabiikta Yeesu gooyyeawda nea gooheedu daghatta amang'atta ghoabitta gurorooda. 51Ghabwaasha, hang'da subwaasha gheeda sibatta Aseetta nibiyyeenya, ghang'eada humng'eeda ea gagul ng'eanyi, gwasim geaw ng'eanyiida ak gabearshachchi lagheanga hees; 52ghwajaada ghuusiga bung'eadinga ak ghang'eatng'eat sasanuukka saang'a bea fuga ghayi lil. 53Rinna jeesinga bung'eadinga nyaawa ing'atta dunnoadaannyi, gaweay jeeda mujiineeda ghaydit ak goohiimsa geat fuga saang'a. 54Hean daa shirikkarajeanda haw ea fukwachchi fur Yeesu gidasimda geaw ng'eanyiida ea ng'asheekka ghwanyawa bunuun, ghabeal muuchchi nea gwayi, “Aba huumwa siisi Balleanda Aseetta gil!” 55Abeeda aba hoowa gwanda gadeemga saang'a ng'ula nea sheagi. Suh gadeemga ghayi eadu geeshta Yeesu nea gwaleabu Galilaaya nea gagadiyeesa. 56Aba jeannyaawa gwanda Mariyaayda suguura Magdaleena ea Mariya gheamatta Yakkobo ea Yoseefu, ea gheamatta oorjooga Sebedaayo.

Bunyitta Yeesu

(Mark 15:42-47; Luk 23:50-56; Yoh 19:38-42)

57Iiduw nea ghoaw shing'ada ghwahidu siyagi was meanang'oochcheanda bea ng'eanyiida Arimattaya suguura Yoseefu. Nea abeeda eara niny ea giinealaneeda Yeesu gil. 58Gawa heeda Bilatto ak gamus saseeda Yeesu, hean ghwanung Bilatto eattawa. 59Gageanda Yoseefu saseeda Yeesu ak gookwealsa hang'deesh miy. 60Ak ghwayiin jeeda bung'eadaannyi eesh ghayi gurgursa jeeda harearacheanda amwahit gooreakreaksa lagheaneeda haw ghuutta bung'eeda ak gawa. 61Damandida goobitpiit Mariyaayda Magdaleena ea Mariya niirja nea goofuursa jeesinga nyaawa bung'eeda.

Furitta bung'eeda

62Hitta eaweetteaba iyyeenya was eaweeda giding'ding'deayda, gabassa geat ashoohoodiga hees sea Farisayajeega heeda Bilatto, 63gwayeeshsha, “Ea Siida mureeda, sipkaachchi gidaghayi rugu siitta milmiliin damanda mii ghameawa gideaba, ‘Ing'atta eawooji samwagu gaydaduudu.’ 64Asi nung' eefur bung'eeda muuchchi ea ghang'atta eawooji samwagu, aba gideaba gajiiduw ghapka giinealangaaschi ak gwajagwat amaduw gwayeennisa buuneeda, ‘Niduunna miyeeda,’ Rengaweega huydean gayghwalaabwa hoowa dea madeeda.” 65Gwayeeshsha Bilatto saawa, “Goondeawi furiischoodiga aweayeena afra muuchchi aba gidoammuusti.” 66Hean gaweay ak gafur muuchchi heeda sibunnyiisa buuneeda nea geerroor lagheaneetta ak geayiin furiischoochcheanda.

Currently Selected:

Mattayo 27: DTGANT09

Highlight

Copy