Marko 1

Girrukkwiida Yohaaneeda abattisachchi

(Mat 3:1-12; Luk 3:1-18; Yoh 1:19-28)

1Nii gidangeatta Giijasta Miy bea Yeesu Gristohi was Balleanda Aseetta. 2Gawuurji gissung'waarda aba jeeda gittabooda sibaneeda suguura Isaaya gideaba, Gwayi Aseetta,

“Ng'ulla gaydeajeagu giijasoochcheanji itteanyu

jea gosheedeawaneey ak gayghoaw Siichchea

gwasinney naweadaang'u.

3Gwanda Siisi nyearra ghuutta jeeda dareapcheeda

Asissiina Ng'uttamiida naweeda

olleappa naweadingaaschi.”

4Yohaaneeda Abattisachchi gedeaksa jeettareapcheeda nea gwarukkwiisa buuneeda gideaba adukkuunana ng'asheega munyas ak geppattiisan ak gwasamsa Aseetta ring'eega nyaawa. 5Goreemsa Yohaana Emeettuw leabu ng'eanyiissean bea Yudeeya eaghoaw fuga Yerusaleemossean, ak gwadukkuuna ring'eega nyawa ak geppattiisan aba jeedeenda Yordaan. 6Abeeda Yohaana gokkwealli hang'da sisna budeega ngamiya nea gwarattiisa manandannyi ghealooda. Ghoaw daghwardaannyi deashamga ea maleeda dareabeetta. 7Gwarukkwiida Yohaana ng'asheega nea gwayeenniisa, “Gwanda sichchea ghwahidu jea ghwaduupnanaan geash. Siisi gaburdeawean uurda eara aniini mammisean dahiiy geaw ak geameewji deandoadaannyi. 8Aniini geabattisananeegwa beega, Niny gaygobattisaneegwa aba Yeammeeda Ghaydit.”

Gibattiisanda ea gissimsinda Yeesu

(Mat 3:13—4:11; Luk 3:21-22; 4:1-13)

9Damandida ghwahidu Yeesu nea gwaleabu mujiineeda siyi Nasareetti mida Galilaaya, ak gobattiisan Yohaana aba jeedeenda Yordaan. 10Siyeeng'na jeedeenda deagheetta ghwadaa nea ghwajaada bugusta humng'eeda ak gwashubeesa Yeammeeda Ghaydit nea gawuurji ghariibajeanda. 11Ghwanya Ghuutta leabu humng'eeda nea gwayeeshsha, “Ang'iing'i guwosi Jeepteanyu abwariinyi gwadan jeedeanyu.” 12Miighoaw gil ghwaat Yeammeeda Ghaydit ea gawa dareapcheanda. 13Gobiida hoowa askwearjooji haradam nea gwasimsim Shattaani. Abeeda aba hoowa gwandeaydooschi diyeanga jarooda, nea ghaweadaada giijasoodiga humng'eeda.

Yeesu gaguursa fii ang'wan leallu ghweayeega

(Mat 4:12-22; Luk 4:14-15; 5:1-11)

14Iiduw nea sijaksa Yohaana ghealooniga gawa Yeesu ng'eanyiida Galilaaya, nea gwarukkwiida Giijasta Miy bea Aseetta 15nea gwayeenniisa, “Nugul damanda, nea gheambalmeeda Aseetta ea nineekkiit, Adukkuunana ring'oojiga ak ghoamwaschi Giijasta Miy.” 16Iiduw nea Gwasik ghuutta basooda Galilaaya ghwadaa fii iyyeenya leallu ghweayeega nea Simon gil ea oorjeeda ghaamwat siyi Andereya nea gwatealluuna ngheearga nyaawa ghweayeega.

17Gwayeeshsha, Yeesu, “Ayeanni geeshteanyu. Gaydanung' ahuuwa fuga jea gwaleallu buuneeda.” 18Gwanungu'sa heeda gheareedanga nyaawa aba geeshangiga ak ghwaat geeshta Yeesu. 19Gawa Yeesu mwadi gili mwanang' ak ghwadaa Yakkobo ea Yohaana, oorjooga Sebedaayo nea gwanda jeeda maleambooda nea ghwanapnap gheareedanga nyaawa. 20Deagheatta gaguursa Yeesu ak gwayeeshsha, oyeanni geeshteanyu, Ghwanung'wa heeda ghweanda nyaawa was Sebedaayo sea fuga gadiyeeda jeeda maleambooda ak ghwaat geeshta Yeesu.

Siida bearji meang'nyeandeenda

(Luk 4:31-37)

21Ghwahitta Yeesu ea ginealangaaschi mujiineeni suguura Gapernaumu. Hean hitta eaweetta sabatto gawa Yeesu jeeda ghooriida fuga Yahuudi sinnealshachcheewa ak ghoang'eat ginealshooda. 22Iiy Buuneessean aleeysiit ghwanung' ghahamng'eanyi aba ginealshoadaannyi, aba gideaba niny monealsheatta ginealshoodiga diineeda Yahuudi niny gonealsheatta siida mideawa gheambalmeeda 23Deagheatta gwarinna jeeda ghooriida sinnealshachcheewa Siisi bearji meang'nyeandeenda 24Gojuur nea gwayi, “Gendeayeesi naaha sea ang'iing'i Yeesuyda Nasareetti? Guwuni lasa uhuudeanya? Ghanalli siiduwosi guwosi siida Ghaydit bea Aseetta!” 25Gojuursa, Yeesu meang'nyeandeenda nea gwayeeshsha “Siinda! Ritteawana Siisi.” 26Godumduum Meang'nyeandeenda siidida ak goguul aba nyeashta haw ak gwaritteaysa. 27Ghahamng'eanyi Buneassean, nea gonyeari geat, “Suuh ana ng'asha? Heappi, nii ginealshooni bunuu? Siisi gwandeawa gheambalmeeda ea joriichooda hoana meangeenda nea ghoawal gheang'da!” 28Gabay gageawiit iitta Yeesu aba jeeda ng'eanyiida sean bea Galilaaya.

Yeesu ghoahaap fuga saang'a

(Mat 8:14-17; Luk 4:38-41)

29Deagheatta gwaritteawa Yeesu jeeda ghooriida sinnealshachcheewa ak gawa nea godeayi Yakkobo ea Yohaana ea gaweay jeeda gheeda geaba Simon bea Andereya 30Abeeda gwanda Gheamadoanagia agweaji Simon nea gwanda muunda gabearji sheagheeda ng'waan. Duughwahidu Yeesu geebay eattaw iitta. 31Gaweesa ak ghoang'ng'waay geattinda ak gagatgat, ak gwaritteaysa sheagheeda, ak ghang'eat gagadiyeesa buuneeda. 32Mikta Aseetta ghapka Buuneeda heeda Yeesu nea geyeassa fuga sean miyeani ea fuga bearji meangeeniga. 33Gabassa geat Fuga sean bea mujiineetta madeeda gheeda. 34Ghoahaap Yeesu fuga saang'a bearji geyoonuung'weakka sean nea ghahoan meangeeniga saang'a, ak ea meanung' ghwanya ghuusiga meangeenda aba gideaba ghwanal niny siida was.

Yeesu gwarukkwiida ng'asheega aba Galilaaya

(Luk 4:42-44)

35Muchchu nea gudea beashatta gil gawa Yeesu hichpa geaw ak ghamwaash Aseetta 36Gawa Simon nea godeayi oorjooga suurja gagasa Yeesu 37Sidaah geyeeshsha, “Gagaseadayyeey Gilinyoo ea siida.” 38Gwayeeshsha Yeesu, “Essiipta eweaya darooraw suuk darukuta ng'asheanda Aseetta eara aba hoowa aba gideaba gidaghayi ang'waarji gil.” 39Iiduw gawa gwaneayeewa jeeda ng'eanyida Galilaaya sean nea gwarukkwiida ng'asheega aba ghoorajeega nyaawa sinnealshachcheewa sean nea ghahoan meangeenda.

Yeesu ghoahaap siida bearji udamusuura

(Mat 8:1-4; Luk 5:12-16)

40Iiduw ghwahidu heeda Yeesu Siisi beardooschi udamusuura hidu gwatkuy ak gamus nea gwayeeshsha, “Iigasayi gimmuusi amminnaan!” 41Ghabwayda Yeesu siidideani, ak ghoahaakta geattindaannyi ak ghoang'ng'waay ak gwayeeshsha, “Geagasayi miinni!” 42Gwaritteaysa siida udamusuura aba geeshangiga ak ghammiidu. 43Hit ghamiin gheeng'da ak ghwanung' gabay ghabeawa howa nea gwayeeshsha, 44“Asi Una nea adirukusi sih ng'asheanji. Una ahimsiina geaw ashoohoochcheanda, ak gidaydi haleanjeeda siyeada ghadooweeda was gidaghayi rukutteayda Muusa, eanal gideaba ang'iing'i nihaabi.” 45Beawa hoowa Siidida gwarukusa siisi roonnyi sean, ea ghwayiiy gilinyoo ea siida gil. Iiduw Yeesu ea mudu ghwanung' ng'asheesu gabadaksa beatta jeeda mujiini. Gwajireada gawa hichpa geaw ak eara gwasa goremsiina Buuneeda meadajeega sean aba hoowa midean.

Currently Selected:

Marko 1: DTGANT09

Highlight

Copy