Marko 2
2
Yeesu ghoahaap siida abittu damealga
(Mat 9:1-8; Luk 5:17-26)
1Iing'atta eawoojusu ng'ay gabiikta Yeesu ng'eanyiida Gapernaumu ak gabay ghwanyas Buuneeda iitta gideaba gwanda ghoah. 2Goweameesa Fuga saang'a ghoah ea gwadukuta eara seawadeeda gidaghuut. Gwarukkwiida Yeesu Giijastaannyi. 3Iiduw ghwahidu Fii ang'wan nea gwasareennu siisi miyaan bearji gibittunooda damealga 4Sihhiidu siida miyaan nea geegasa eayaat gah heeda mida Yeesu ghwaroat naweeda aba seang'ayda buuneeda. Gaweay ak ghwasaaw uhuuda gheeda deascheeda mida Yeesu, ak gessiik siitta miyaniin nea gwanda badayda muundaannyi, ea eaghatghat ammadeeda Yeesu. 5Daa Yeesu masaweega nyaawa gwayeeshsha siida miyaan, “Jeepteanyu, ring'eagaagu sisamsa.” 6Abeeda gwanda hoowa Ginealshoodiga mwaatkwa bea diineeda Yahuudi gwachchi abitppiit nea gwayeena aba jeesinga nyaawa 7“Assiisi gwarukutaydaan ng'asheesu? Nii gong'eawi Aseetta! Ghanyeamanda siisi ammu gwasamsa ring'eemba nuut, geaghus Aseetta akghwahit.” 8Gwajeeng'u Yeesu ng'asheega baloola jeesinga nyaawa ak gwayeeshsha, “Ghamwach-mwach naaha jeesing'eagwa? 9Awussus anneeda aba hedeang'wa gideaba gearukusi siisi abittu damealgean gideaba, ‘Sisamsa ring'eedaang'u ghana gideaba geyeeshsha ng'eada, Geanda mundaang'u ak guwi?’ 10Asi geagasayi anala gideaba Balleanda Siida gwandeawa Gheambalmeeda jea gwasamsiina buuneeda ring'eega aba ng'eanyiida.” Ng'atta gwayeeshsha Yeesu siidida bearji gibittunooda damealgean. 11Geayi ng'eada, “Geanda mundaang'u ak guwi ghoah.” 12Ghang'eat ak ghamughut muunda ak gawa nea geadahaada sean. Ghwanung' ghahamng'eanyi buuneessean ak ghoaghambiit Aseetta nea gwayi, “Ng'asheanji miyeadaaha eara heeda ghayi.”
Yeesu gaguursa Laawi
(Mat 9:9-13; Luk 5:27-32)
13Iiduw gabiikta Yeesu hoowa bea ghuutta basoodean. Gaweay emeettuw hoowa mida ninyiin, ak ghoang'eat ginealshooda. 14Gawa Yeesu ghwaat naweeda ea ghwadaa nisiih Lawiiyda Alfaayo nea goopteada aba hoowa sing'ng'oonnya gwadiin. Gaguursa ak gwayeeshsha, “Benni eanni geeshteanyu.” Ghang'eat Laawi ghwaat geeshta Yeesu. 15Iiduw nea gweagiischi Yeesu aba gheeh Laawi, goreemsa Fuga saang'a ang'ng'oonyi gwaadi ea fuga ring'eega, nea abeeda niny gweagiischi sea ginealangaaschi ea fuga mwaatkwa ghwanyawa eattu geashtaannyi. 16Daa fuga mwaatkwa was Ginealshoodiga diineeda Yahuudi was Farisaayajeega gideaba Yeesu gombuuchchi fuga ring'eega geannyaash ginealanga gideaba, “Anda Yeesu ghwasaan inyas gombuuchchi sea fuga ring'eega ea gea ang'ng'oonyi gwaadi?” 17Iiy Yeesu ng'ashesu gwayeeshsha saawa, “Fuga majeekcheewi magaseadayyi meang'nyeanda. Meang'nyeanda geaghus gagasa fuga miyeani. Asi eara Aniini mwawuni dagasa fuga doobiweadi. Ghawunnyi dagasa fuga ring'eega.”
Raditta jalooda
(Mat 9:14-17; Luk 5:33-39)
18Eaweechcha ghwarat jalooda ginealanga Yohaana ea gea Farisayajeega. Ghapka Buuneeda ak ghoanyaash Yeesu nea gwayeeshsha, “Anda ginealanga Yohaana ea gea Farisaayajeega gwarada jalooda nea gaagu amwarada?” 19Ghwalamda Yeesu ak gwayeeshsha, “Fuga suguursa nyeangiida imidahiji siidageeshshi ghoang'ng'wa ghwaat jalooda? Inyoo gwanda hiji siida geeshshi fuga suguursa mayghwaat jalooda. 20Amaduw gwanda eaweetta jea egeandeawa siida geeshshi eaweechcheanji fuga suguursa gayghwaat jalooda.
21“Manda siida ammu gwalagu weasta hang'deesh ak ghawaasa hang'da waas. Iisisin ng'asheanji abeeda gayghwaloadadawa weastida eshiin hang'da waas ak abeeda ghami hang'da muuchchi. 22Ghanyeamanda siida jea ghwayiin difaayeeda eashish jeesinga sheargweega woosi. Iisisin ng'asheanji gayghabwashaada difaayi sheargweega, ak abeeda gaygwanyara sheargweega ak gaweay difaayi. Difaayeeda eashish geyiina jeeda sheargweega eashish!”
Ng'asheega sabatto
(Mat 12:1-8; Luk 6:1-5)
23Eaweachchanjagi mideewa ng'eanyiida sabatto, gawa Yeesu nea gwasik jeesinga madameega ngano Damani beawaan gwahirjeaweada Ginealangaaschi muschoonga ngano. 24Gwayeeshsha Farisaayajeega Yeesu, “Ng'ulla ghwasaan anda ginealangaagu gwasin ng'asheanda meseamma eaweetta sabatto?” 25Ghwalamda Yeesu ak gwayeeshsha, “Heappi miyoassoamwana gidaghayi sin Dawdi ea fugaaschi iyeachchih. 26Gawa jeeda gheeda Aseetta ak ghwaak mukkattajeega siyiin madeda Aseetta. Ng'asheanji geesin damanda waseewa Habiyattaari ashoohoochcheanda haw. Mukkatteani geaghus ghwaak ashoohoodiga nea gaba geat. Amaduw ghwaak Dawdi ak ghoadaw eara fuga mideawa.” 27Ng'atta gwayeeshsha Yeesu, “Sabatto geesissa buuneeda miigideaba buuneeda geesissa sabatto gil! 28Asi Balleanda Siida Ng'uttaniida gil eara aba sabatto.”
Currently Selected:
Marko 2: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
