Marko 3
3
Yeesu ghoahaap siida aptu geattinda
(Mat 12:9-14; Luk 6:6-11)
1Iiduw gabiikta Yeesu hoowa bea jeeda ghoriida sinnealshachcheewa nea abeeda gwanda hoowa siida aptu geattinda. 2Abeeda gwanda Fiisu gasa ghoahaakta Yeesu, hean ghoamuughu ghwadaa ea jea ghoahaap siidida eaweeda sabatto. Aba sareani geegasa gichchea eanyasta ramaseanda jea eahhaaktoawa 3Iiduw gwayeeshsha Yeesu siidida aptu geattindean, “Beenni hiji bea mwadiin.” 4Ng'atta ghoanyaash Yeesu fukka nea gwayeeshsha, “Ghwadoabiiwi gideaba geesin ng'asheanda miy eaweeda sabatto ghana gideaba geesin ng'asheanda muy; ghang'wana gideaba geakghu eaweega ghana gideaba gelakku? Ameasha ghuttannyi geasiinda.” 5Hean ghoaduup ghaang' Yeesu buuneeda aba nyarasta ak ghang'ut giseaneega idaah hang'ooynachcheekka guroruunatkeaba fugiga. Gwayeeshsha siitta aptu geattindean, “Asi adoabiiwa gattindaang'u.” Ghoadoobiiw siidida geattindaannyi ak gabiikta geattinda gamajegiit. 6Deagheatta gwaritta jarooda fuga was Farisaayajeega ak gaweay gang'weaschi sea fuga Heroode, ghwadaawdaaw gichchea ghwanyasta gheatta nuusta Yeesu.
Fuga saang'a mida ghuutta basooda
7Gawa Yeesu nea goodeayi ginealangaaschi ea gaweay hoowa bea ghuutta basoodean. Ghwaat geeshta Yeesu Emeettuw. Fiisu gwaleabu ng'eanyiida Galilaaya ea ghoaw ng'eanyiida Yudeeya. 8ea gea Yerusaleemu ea ghoaw Idumeaya, ea ghoaw eenda suguura Yordaan, ea ghoaw murdajeega mujiinajeega geaba Diro ea Sidooni. Iiy emeeda ng'asheega sina Yeesu goreemu ghapka headaannyi. 9Daa Yeesu gida jea ghwariista buuneeda aba ghuutta basooda gwayeeshsha ginealangaaschi, “Anung' gosiibu maleambooda amwariisan buuneeda.” 10Abeada nihaap fuga saang'a, ghapka Fuga geyoonung'weakka nea gagasa ghanyi ghawaas Yeesu. 11Nea fuga bearji meang'nyeandeenda inyoo gwaroonnyi Yeesu, gobedeaysa madeadaannyi nea goojuur nea gwayeeshsha, “Ang'iing'i guwosi Balleanda Aseetta!” 12Iiduw gwareekusa Yeesu meangeenda nea ghoang'waniit gideaba, adoorukusi buuneeda siideawoschi!
Yeesu gagwalu giijasoodi damaniyyeenya
(Mat 10:1-4; Luk 6:12-16)
13Iiduw gawa Yeesu amawea uhuuda heayeeda gagurriisa fuga gasa niny, Gaweay heeda fugiga.
14Gagwalu fii damaniyyeenya jea godeaydooschi jea ghoow Giijasoodigaaschi jea gaweay gwarukkwiida Giijasta. 15nea fiisu geattaw gheambalmeeda jea goruutteawa meangeenda. 16Abeeda fiisu attamaniyyeenya sigwaluun geaba Simoneeda (amaduw gang'assa gheawunga siyi Betrohi,) 17ea geaba Yakkobo ea Yohaana was oorjooga Sebedaayo (ghayi ng'assa Yeesu gheawunga siyi Bwaneegi, ghwanyawa isiyam ghuut gajeeyi Oorjooga Mbagiida.) 18Ea Andereya ea Filippo, ea Bartolomayo, Mattayo ea Domaso, Yakkoboyda Alfaayo ea Dadeo, ea Simoneeda leabu Ganaani, 19ea Yuudayda Iskariyotti was siida amaduw ghwala bwadaw.
Yeesu ea Belsebuuli
(Mat 12:22-32; Luk 11:14-23; 12:10)
20Iiduw nee nuwa Yeesu ghooh gagaweesa heeda emeettuw ea eamudu ghwanyas niny gheatta agiischooda. 21Nyas iittaannyi Fuga gheannyaawa gaweay ghoang'ngwaay nea geaghay gili ning'ul geeska. 22Nea Ginealshoodiga diineeda Yahuudi leabu Yerusaleemu, saawa gwayi Yeesu, “Gwandeawa Belsebuuli! Ak ghahoan meangeenda aba uurda meang'nyeandeenda haw.” 23Iiduw gaguursa saawa headaannyi, ak ghoanyaash nea gwasin ak gwayeeshsha, “Ghamneawa Shattaani ghoang'ng'wa ghahoan Shattaani? 24Sugoochcheandumeeda imaweechchi sugoochcheandumeeni ea maygahuweada. 25Nuut gichcha eara fuga jeeda gheadassagi idardawaat gheawi ea maygahuweada. 26Eara shattaani ing'uchchi geaw, ea maygudu gageanu askwearjoojiga gaygabiissa gammudean.
27“Gheeda siida mwaay biissa ahoauur manda siida jea gabadaksa gawa gah ghoareat haleanjeadaannyi. Geaghus abeeda ea sirada siisi bea gheedean abeeda gheawi ghoammu sih gawa jeeda gheeda ak ghwaat haleanjeeda. 28Aba huumwa Gearukuneegwa, ring'oojiga sean sina buuneeda manda dea majeesamsa, eara ng'asheega munyas rittuuna ghuusiga buuneeda gaygwasamsa Aseetta. 29Sinung' siida rukkuuna ng'asheega munyas badayda Gurorooda Ghaydit, siisi majeesamsa, gwandeawa ring'eeda eeweaga manda mudeanooda.” ( 30Yeesu abeeda gwarukuna ng'asheesu fuga baloolla gideaba, “Niny gwandeawa meang'nyeandeenda.”)
Gheamatta Yeesu sea oorjooga gennyea Yeesu
(Mat 12:46-50; Luk 8:19-21)
31Iiduw ghwahidu Gheamatta Yeesu nea godeana oorjooga gennyea Yeesu ak ghaminaada aba jarooda ak gojeakta siida gawa gaguursa aba gah. 32Abeeda goobiitpiit emeettuw nea gwaneaweesa ak geyeeshsha, “Gagasseey Geamadu ea oorjooga giyeang'wa aba jarooda.” 33Ghwalamda Yeesu ak gwayeeshsha fugiga, “Iyya ea oorjooga giyeanya geabeang'a?” 34Gwasachsa ghaat fugiga ghwanyawa abiitpidiin ak gwayi, “Ang'ulla Iyya ea oorjooga iyya fiisu gil! 35Siida nyoo gwasna haleanjeeda bwariiy Aseetta, siisi gayghoaw oorjeediyya, nea gayghoow eara hudiyya, nea gayghoaw iyya.”
Currently Selected:
Marko 3: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
