Marko 13
13
Yeesu gabaloola nyarjeawda Gheeda Sibatta Aseetta
(Mat 24:1-2; Luk 21:5-6)
1Damanda ritteawa Yeesu jeeda Gheeda Sibatta Aseetta gwayeeshsha siyagi was Ginealaneadaannyi, “Ea Ginealshoochcheanda, ang'wearda gealsu hesiin gissam, ea lagheanga ghayi sideasa!” 2Ghwalamda Yeesu ak gwayeeshsha, “Ghamneawa gidaahi gealsu heesiin? Lagheang'su ghayi sideasaan manda dea jea enung'usa heeda aaragi. Gajeeng'ng'adeadu sean.”
Sawanadeeda ea ghabasta
(Mat 24:3-14; Luk 21:7-19)
3Eaweechcha Yeesu goopteada aba uhuuda Gijeeda Masaytunajeega deaschi Gheeda Sibatta Aseetta gaweay geaba Betro ea Yakkobo ea Yohaana sea Andereya ak ghoanyaash Yeesu nea gaba geat gideaba,
4“Aniyean rukuneasa ng'asheesu gayghoaw eeju? Ak gajerroorda naaha aba hinnoodeaba ng'asheesu.” 5Gwayeeshsha Yeesu saawa, “Ashageada adagwareenganneegwa sih. 6Aba gideaba gayghapka Fuga saang'a jea ghapkaana gheawungeasu nea gwayi, siida aniini gil! Ak aba sareani gaygwareengani fuga saang'a. 7Iyoayiinyi ng'asheega ng'uchcheadinga ea gijuureanda ng'uchcheeda ea adoohirbabannyi. Ng'asheesu mayghwashiy hinnooda, duukku mudeanooda ea miighoaw. 8Gaygaba ng'eanyiini ng'uchchi nuut, gaygaba Sugoochcheanji ng'uchchi nuut, gaygwasaw ng'eanyiida gichcha ak gaygang'eeda gejeadinga. Ng'asheesu seaniin gaygawuurji lajooda gatmooda jea gwaji.
9“Asi agooga ashageada, aba gideaba gayghwadeagwa Buuneeda gheeda sirgweachcha, nea geabwareagwa aba jeesinga ghoorajeega sinnealshachcheewa. Gajeayadeagwa madeeda fuga hees ea madeeda sugoodiga appadaydeanyu, ak abeeda gajahuuwa mushoodigeasu aba madeannyaawa. 10Nea hinnooda jea ghwahidu mudeanooda ng'eanyiida, abeeda gajeasurukusa buuneessean Giijasta miy. 11Nea eara isiyadeagwa gheeda sirgweachcha, ea adoohirbabannyi, appadayda ng'asheega jea arukuta, ihidu damandida, arukuta ng'asheanda wassean sinyunneegwa, aba gideaba mii agooga gil fuga jea gabalool, gaygabalool Gurorooda Ghaydit. 12Nea Siida gayghwala bwadaw oorjeeda ghaamwat ak genuus, nea Bwaabwa gayghwala bwadaw orjeadaannyi, eara Diibiga gayghabwar ghweaniga nyaawa ak gwanuuseada. 13Ak agooga gayghwasteagwa Buuneeda aba gheawungeasu. Nea siida jea ghamilikghta ea gagul damandida bea mudeanoodean, siisi gayghaghu.”
Gidamuy jea gweadu nyariida
(Mat 24:15-28; Luk 21:20-24)
14“Asi iyoadaayi gidamuy jea gweadu nyariida nea niminaada aba heeda mahaguuwsiina, (Siida assoamwa ea dajeeng'na gidawas) asi abeeda fuga mida ng'eanyiida Yudeeya ea dasalsiina iheenga heayeeniga. 15Abeeda siida deeppa eanyasa uhuuda gheeda adaghwararang'aan, aduwi geanni eara gidamida gah jea aadana geadi. 16Siida deeppa eanyasa jeeda madamnyeanda eara hang'da badayda ghwanyawa nung'wa ghoah adaghamwaghaada. 17Eshshiina gadeemga was bungaroodiga ashageada, ea gadeemga reer diibiga aba damandida! 18Gomoorayi ea mwahinna ng'asheesu munyasiin damandida bea gorogedean. 19Aba gideaba damandida gaygwanda sawanadeeda manda dea jea eegala ghang'eada deaghayi nubwada Aseetta ng'eanyiida ea gagul ghamneawa. Ak ea maygudu gabiigu gichcha dea jea gawuurji nih. 20Inyeeda gwachchi ea moong'ayiida Ng'uttamiida askwearjoojikka ghanyeamanda siisi jea ghwalalaan. Amaduw appadahuukka fuga loossa geaw anisuuy Ng'uttamiida askwearjoojikka.
21“Asi iyeeshshineegwa Siida, ‘Ang'wearda Gristo gwanda hiji,’ ghana gwayi, ‘Gwanda hoowa,’ adoamwaschi. 22Aba gideaba gayghwahidu Fuga was Gristohajeega ng'uyyeega ea sibanga ng'uyyeega, gayghoahiimu gwadeagooda ea ng'asheega deamdeameadi, aba hutteawda fuga loat Aseetta. 23Asi agooga ashageada. Aniini nearukuneegwa ng'asheega sean heeda mii ghwahinna.”
Hinnooda Balleanda siida
(Mat 24:29-31; Luk 21:25-28)
24“Asi askwearjoojigiga nea ning'atta ng'asheandida ng'waaniin, gaygwattuudu gheang'da Aseetta nea eara sheeda ea maygudu goboong'u. 25Nea miinga humng'eeda gaygoobittu nea gaygwaduumduum uurda humng'eeda. 26Ak gajeadaah Balleanda Siida nea gwashubeana jeeda shamoghuutka nea gaygwandeawa uurda haw ea gigheambiitta. 27Ak Gaygoojeakta giijasoodigaaschi bea humng'eeda godearsa meadajeega assang'wan bea ng'eanyiida gaweay goweamu fuga loossa geaw, ghang'eada mudeanooda ng'eanyiida ea ghoaw mudeanooda humng'eeda.”
Gidanaal fii shabogheechcheanda
(Mat 24:32-35; Luk 21:29-33)
28“Agooga ang'ulla shabogheechcheanda. Gwanda gichchea ghoanaleagwa. Iyabit seenga nea ghafiirfiir gea nyawiiri gajanala gideaba domeelda nineekkiit. 29Gwasnu eara agooga iyoadaayi ng'asheesu nea ghwahindu, anala gideaba Balleanda Siida nineekkiit muuchchi. 30Gearukuneegwa aba huumwa, Seaygeani bea ghamneawean mayghwanaawda nea miyadaaha ng'asheesu. 31Humng'eeda ea ng'eanyiida gaygammudean. Duukku ng'asheegeasu ea maygammudean.
Manda siinnal askearjeanda ghana damanda
(Mat 24:36-44)
32“Dukku askwearjeandida, ghana damandida manda siida nal. Eara giijasoodiga humng'eeda, ghana Balleanda Aseetta. Siinnal geaghus Bwaabwa akghwahit. 33Ashageada nea ghoang'ng'wearu, aba gideaba mwoanali damanda jea gawaseewa. 34Gawuurji Siisi ghayi wea bareannyeekka ak gwaruuda nea ghwanung'wa gheeda fuga gadiyeeda. Nea nigeanu ak gaba siisi adaw gichchea gwasin ak gageanu ghwayiin furiischochcheanda jea gafur dooshta nea gwayeeshsha milmiliida. 35Asi oang'ng'wearni adoolilli aba gideaba mwoanali eaweetta jea ghwahinna siida bea gheeda, gwadeeppa ghwahidu shing'ada, ghana gwadeeppa ghwahidu eaweedagweena, ghana gwadeeppa ghwahidu beashatta, ghana gwadeeppa ghwahidu nea gorearu Aseetta. 36Asi oang'ng'wearni gajiiduw gwashameegwa ak ghabwardaneegwa ng'eenyi nea goondi jeerruweanga. 37Gichchea darukuneegwa oagasean, gaydayi, Oang'ng'wearni, adoolilli!”
Currently Selected:
Marko 13: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
