Marko 5
5
Yeesu ghoahaap siida bearji meangeenda
(Mat 8:28-34; Luk 8:26-39)
1Muchchu ghwahitta gigheawda basooda ng'eanyiida siyi Geraasi. 2Deagheatta nea gwarinna Yeesu jeeda maleambooda geadaah siisi mideawa meangeenda nea gwaleabu heeda sibunynyiisa buuneeda ak gwaroonnyi. 3Siisi eajusu gobiitta hoowa sibunyyiisa buneedean nea ghanyeamanda siisi ammu ghwarat aba munyaloalajeega. 4Nea eara isiratta munyaloalajeega ghana biingu inyeessa gang'achcheaweada sean nea ghanyea mwoammu sih ghwajoar. 5Inyeessa Gojureadayyi eawa ea askweari nea gahoonna geaw hoowa sibunynyiisa buneedean ea jeesinga beareega nea inyessa ghabwashadawa geaw lagheanga. 6Iiduw nea ghwadaa Yeesu nea gudeasheagi Ghafwach ama hitta heeda ghwahiiy geaw aba mureeda aba madeeda Yeesu 7ak gojuur nea gwayeeshsha, Gendeeyeesi naaha Yeesu sea ang'iing'i, “Balleanda Aseetta haw? Geamuscheey aba gheawunga Aseetta adisawannyean!” ( 8Ghwanyaashtunu aba gideaba niyeeshsha niny, “Ritteaysiina siisi.”)
9Ghoanyaash Yeesu nea gwayeeshsha, “Ghawungaagu ng'eaha?” Gwayeeshsha siidida, “Gheawungeasu geguura ‘Lugooda,’ aba gideaba aseasa geewoschi saang'a.” 10Gamearmearani Yeesu nea gwayeeshsha, aniyean adiguttidaneasa aba ng'eang'i. 11Abeeda gwanda hoowa hawanda ukkurumajeega sihhaghwa aba geeshta heayeeda. 12Gamearmearani, Meangeenda Yeesu nea gwayeeshsha, “Nung' eweaya jeedeaba ukkurumajeegiga.” 13Gwasiksa Yeesu lugoodida bea meangeendean, ak gwaritteaysa siidida ak ghoabitta jeeda ukkurumajeega. Abeeda ukkurumajeega gwariiksa sagalamnyooji iyyeenya. Gamng'aw ukkurumajeega ak ghoabuttaawa geat marechcheanda ak ghwaak basooda sean. 14Gwasalda Fukkwachchi ahaaghwa ukkurumajeega ak gaweay ea ghwahitta mujiini ea heeda mawasa mujiini. Ghapka Buuneeda ghwadaa ng'asheega bunu. 15Gaweay ama hitta hoowa mida Yeesuun ghwadaa siidida eawoojusu ng'uttooschi lugooda meangeenigean nea goopteada nea gookwa hang'daannyi nea nibiiksa fughareadaannyi, ak geabeal. 16Iiduw gwarukusa Fukkwachchi daa ng'asheesu buneessuurja iitta gidabussa siitta bearji meangeendean ea iitta ukkurumajeega. 17Hean gebiissa emus Yeesu gideaba ng'amwana ng'eang'deanya. 18Daa Siidida nea gawa Yeesu jeeda maleambooda gamus godeayi. 19Ghaheawa Yeesu godeayi siidida. Ghoadeal nea gwayeeshsha, “Una ghoah ak girukusi ng'asheega sean fuga ghaheang'wa ea gida nuweattaneey Ng'uttamiida ea gida nubwaydaaydaneey.” 20Gawa Siidida ak gwarukkwiida aloheeda ng'asheega miyaas sissa Yeesu aba jeeda mujiinajeekka attamanamughushiin. Nyas buuneeda iidi bea ng'asheesuun ghahamng'eanyi sean.
Giheapta hudeaba Yayro ea gatmooda waas weleeda hang'da Yeesu
(Mat 9:18-26; Luk 8:40-56)
21Gwading'da Yeesu maleambooda ghoaghaawa basooda ak gawa ama wea gigheawda goreemsa Emeettuw gaweay ghwanyasa hoowa. 22Iiduw ghwahidu heeda siisi suguura Yayro siisi abeeda gaba fuga hees ahaaghwa ghoriida fuga Yahuudi sinnealshachcheewa. Hitta Siisi gobedeaysa madeeda Yeesu nea gwayeeshsha, 23“Jeebi itteanyu mwanang' bea haweega ghabwar miyeeda. Eeniyean beenni waasana geattingaagu ak abeeda gayghahaap.” 24Ghang'eat Yeesu godeayi siidida. Ghabwang'aada emeettuw gamaseaw nea geasaabwan. 25Abeeda gwanda hoowa gatmooni aream foojeanda galeagasean gweannyeew damaniyyeenya. 26Gatmooni abeeda niduulu haleanjeedaannyi aba beatta gealga meanga nea ghanyeamalossiina eara gil gwareanyiisachchi muuchchi. 27Abeeda ninyas iitta Yeesu Ghwaat geeshta ak ghawaas weleeda hang'da Yeesu. 28Gwasin ng'asheanji nea gwayeeshsha Geaw, “Iyawaaschi weleedeaba siisi ghanalli gaydahaap.” 29Hitta nea ghawaasa geaw weleeda hang'da Yeesu deagheatta gageanda gireemdida bea foojeandean. Nea eara iisawsa saseadannyi ghwadaa nimajegiit. 30Jeeng'u Yeesu gidabeada nisuunya urdaannyi gwasachsa ghaat emeeda ak gwayeeshsha, “Ghawaas ng'eaha weleeda hang'deanyu?” 31Gwayeeshsha ginealangaaschi, “Girukutaydiin nea gidaahi gidariistaneey buuneeda?” 32Gong'weerng'weersa Yeesu meadajeega sean ghwadaa ea jea ghwanyas siida ghwanyawa waas. 33Iiduw nea ghwadaah, gatmoodida gideaba nihaap gaweesa Yeesu nea ghabwadanaada aba muuwda ama hitta gwatkuy aba madeadaannyi ak ghoadayda iitta sean. 34Gwayeeshsha, Yeesu gatmooda, “Balleanda gidahaapnyi masaweagaagu, una nea gibeahi seayu nea gagasa ea mabikseey geyoani.”
35Duuw gabalool Yeesu gatmoodida deagheatta ea sichcheagu fiisu leabu gheeh Yayro ak gwayeeshsha, “Yeeptaang'u nimi. Ghwasaan andagideawiidi ginealshoochcheanda?” 36Nyas Yeesu iidi ghoanaawa geaw ak gwayeeshsha, “Adibeali. Heappi ang'iing'i mwasa.” 37Hean ea modeayi fii suuk geaghus Betro, Yakkobo ea Yohaanayda gennyea Yakkobo. 38Ghwahitta gheeh Yayro ak ghwadaa Yeesu emeeda mwahawda heeda mwasakta dabeakka suurja gaguttu heareega nea ghoahaawda. 39Hitta Yeesu gwayeeshsha, “Anda agooga goyyeawdi nea mandaneegwa eara hawdaaw? Balleanda eara miyeeda miighami. Gabeachchi ruweanga akghwahit.” 40Gabarra rear buuneeda. Hean goruutta buuneessean jarooda ama hit gaguursa ghweanda jeepta ea gheamatta jeepta ea ginealangaaschi ghwanyawa adeana ak gaweay hoowa bea gah mida jeeptean. 41Hitta Yeesu ghoang'ng'waay geattinda jeepta nea gwayeeshsha, “Dalittakum,” nea gideaba, “Huda mwanang' ng'eada!” 42Deagheatta gafakna geaw ng'eanyi hudida ak ghang'eat gawa. (Jeeptida abeeda gaba gweenynyeew damaniyyeenya.) Ghwanung' ng'asheanji ghahamng'eanyi buuneeda muuchchi. 43Iiduw gwayeeshsha Yeesu buuneeda, Adiiduw goorukusi gili gwachchi easinnyiin. Ng'atta gwayeeshsha oattawa huda gichchaghwaak.
Currently Selected:
Marko 5: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
