Marko 6
6
Yeesu geaheawa aba Nasareetti
(Mat 13:53-58; Luk 4:16-30)
1Ghabeawa Yeesu hoowa ak gawa ea gawa ng'eang'da nyaawa nea godeayi ginealangaaschi. 2Muchchu nea eaweeda mideewa sabatto gil, gawa jeeda ghoriida fuga Yahuudi sinnealshachcheewa gonealshi. Ghahamng'eanyi fuga saang'a aleeysiit nea gwayeena, “Assiisi ghwanyasa yeenu ng'asheesu? Ea bareaynadi bea uhuudean. Ak gwasindaan deamdeamanga sina 3Neada nii ea mii siidida sina behajeega was oorjeeda Mariya bea gennyea Yakkobo bea geaba Yose bea Yuda ea Simon? Neada eara haweega ghaamwat ea manda ng'eang'i?” Geamwachmwach ng'asheagaaschi. 4Ghwalamda Yeesu ak gwayeeshsha saawa, “Eara sibaneeda geaghus ghoadaw mureeda fuga sheagi. Sughus fuga ng'eang'da nyaawa ea gea was genoojigaaschi ea fugeaba gheannyi, aba saawa siisi mawuurji gil.” 5Iiduw Yeesu ea mudugwasin deamdeamanga aba hoowa. Ghoang'ng'waay iheeng'spa fiisu ng'ay miyeani ak gaheaba. 6Ghahamng'eanyi Yeesu idaah gidamwamwasta buuneeda ng'asheagaaschi.
Yeesu gojeakta ginealangaaschi attamaniyyeenya
(Mat 10:5-15; Luk 9:1-6)
Iiduw gwaskeada Yeesu gealga aba hoowa nea gonealshi. 7Gaguursa ginealanga attamaniyyeenyean ak gojeakta nea ghwanung' gabadiinna iyyeenya iyyeenya. Ghabiiw uurda jea ghwajoara meangeenda 8Gwayeeshsha, “Asi aweayeena nea adiiduw ghoasapchi geadi. Daba siisi aada geadi bileangida akghwahit. Eara gichcha ayaaga adoayaadi geadi, ghana shageeda, ghana lappiya. 9Gwayeeshsha, oallaabwa geekka ak ea adoalassi hang'weakka iyyeenya.” 10Gabiikta gwayeeshsha, “Gheeda wassean jea ahitta ak ghwadeaptaneegwa oppiidana ea eaghus ea noang'ami hoowa. 11Nea iyoahitti ng'eanyiida deeppa ea meadeaptaneegwa nea ghanyea mealeyseegwa eara iit, iyoabeawi ng'eang'da nyaawa alalakta birjeanda geeshangeagwa. Abeeda gajea gibuhanda nyaawa gil.” 12Hean ghang'eatng'eat giijasoodiga gaweay. Gwarukkwiisa buuneeda gideaba, Adukkuunana ng'asheega munyas bea ring'eeda. 13Ng'atta goruutta meangeenda saang'a, ak ghwayeasha fuga miyeani nagheeda ak gaheaba.
Miyeeda Yohaaneeda abattisachchi
(Mat 14:1-12; Luk 9:7-9)
14Hean imuchchu eara sugoochcheanda siyi Heroode aninyas iitta ng'asheega sina. Abeeda Yeesu nigeawiit iitta muuchchi. Gwanda fugeena, “Nii gwaduudu Yohaaneeda ghayi abattisachchi, ak ghoaw uuri ghamneawa sinna ng'asheesuun.” 15Buuneeda mwaatkwa gwayi, “Nii gwadeppea Eliya gil. Nea mwaatkwa gwayi, Nii gwadeppea sibaneeda. Anda gawuurji siyagi bea sibanga ghayi bea garayi.” 16Nyas iitta Heroode gwayeena, “Nii ghamneawa niduudu Yohaaneeda ghayi alaji gheatta.” 17Ghayi abeeda eaweechcha gojeakta Heroode shirikkareadaannyi ghoang'ng'waay Yohaana ak gwajaksa ghealooniga, aba ng'asheespa gatmooni suguura Herodiya ghayi geena oorjeeda gennyea Heroode suguura Filippo. Ghayi abeeda Heroode ghaghi gatmooni bea oorjeeda ghamwadiin. 18Nea ghayi abeeda ea niyeeshsha Yohaana Heroode, “Mammiseey gheana gatmooda oorjeeda geamadu.”
19Hean ghwasit Herodiya muuchchi Yohaana ea gidabal gwanuus. Geaghus gideaba mwoammu. 20Heroode niny ghoawal gheang'da Yohaana. Aba gideaba ghwanal beadi Yohaana siida doabiwaat biissa ea ghaydit gil. Inyeessa Heroode gafur Yohaana nea ghabwariiy goleeysiit girgweageadaannyi ak iissa ghwanung' gwasawana jeadaannyi. 21Eaweechcha ghwanyas gheatta Herodiya, eaweetta sineewa Heroode ghwelmeeda damanda ghayi sijiila. Gaguursa fuga hees ahaaghwa ng'eanyiida, ea fuga hees bea shirikkara ea fuga hees mida mwadi bea ng'eanyiida Galilaaya. 22Iiduw ghwahidu Hudeaba Herodiya ak ghang'atta gawa madeeda Heroode ea rabastannyi ak ghang'was muuchchi ea gahoosa jeesinga buuneeda. Iiduw gwayeeshsha Heroode hudida bea Herodiyahiin, “Ng'alaan gidigasayi was sean gaydagoonnyi.” 23Ghwaak Sugoochcheanda habeawooda nea gwayeeshsha, “Ng'alaan gidigasayi wassean eara ng'eanyiini ahaghwiin ghammuuschi dalach bugusta deadeennyi ak geagoonnyeey.”
24Iiduw gwaritta Hudida ak gaweesa ghaamwat ak ghoanyaash nea gwayeeshsha, “Iyya gaydang'al naaha sugoochcheanda?” Ghwalamda ghaamwat ak gwayeeshsha, hudaannyi, “Eshshiina geagasayi uhuuda Yohaaneeda abattisachchi.” 25Ghafwach Hudida ea ghwahitta heeda sugoochcheanda ak gwayeeshsha, “Geagasayi gonean uhuuda Yohaaneetta abattisachchiin nea ginung' eayiin jeeda harakta.” 26Iiy Sugoochcheanda ng'asheanji gagiisan muuchchi. Apkaat habeawajeega ghwanyawa ak aba madeeda rabasta ghwaraay gichchea ghaheawaatta ng'asheenji. 27Gojeakta shirikkarajeandaannyi furiisachchi nea gwayeeshsha. Ng'eada lamwaja uneanni uhuuda Yohaaneeda abattisachi. Gawa shirikkarajeanda ea ghwanyasa Yohaana ghealooniga ama hitta ghwalach gheatta. 28Gweanna shirikkarajeanda uhuuda Yohaana jeeda harakta ak ghoadaw hudeaba Herodiya ak ghoadaw ghaamwat. 29Nyas iitteaba ng'asheesu Ginealanga Yohaana ghapka ama hidu gageanda musta Yohaana ak gaweay gabuy.
Yeesu ghoang'aatta fii sagalamnyooji muut
(Mat 14:13-21; Luk 9:10-17; Yoh 6:1-14)
30Muchchu ea nibiigu fuga ghayi ajeakta Yeesu was Ginealangaaschi, hidu ghoadaw Yeesu iitta ginnisin ea gidanaal buuneeda. 31Ghwalamda Yeesu ak gwayeeshsha saawa, “Aweayeena hichpa geat ak ghonyoo afuufa gili mwanang'.” Yeesu gwarukuta ng'asheanji idaah emeeda heeda maweayi suurja ghapka ea amwanung' ghwanyasa saawa eara gheatta agiischooda. 32Iiduw Gaweay saawa nea gaba geat jeeda maleambooda nyaawa ak gosiipta gaweay hichpa geat. 33Ghwadahaada Fuga saang'a gidabeada ak geanal gideaba saawa gil. Gwasalda buuneeda gosheeda aba geeshanga ghwalach mujiinajeega sean ea ghwanyoaha ng'eanyi saawa. 34Duughwahitta ghuutta basooda ghoang'wearda Yeesu ak ghwadaa emeettuw ak ghabwayda aba gideaba inyeessa buuneeda ea nuwuurji gisilga nyaah haghweadochchean. Hean gabiissa Yeesu ghoanaal ng'asheega saang'a. 35Geeyi bwak ama niriikghta gamikta geyeeshsha Yeesu aba girrukusa ginealangaaschi, “Nukkwa ghamneawa nimikta nea geenda dareabeetta manda sih. 36Siksiina buuneeda gaweay madameega ea gharang'weakka gwasheaysa geat gichchaghwaak.” 37Ghwalamda Yeesu ak gwayeeshsha, “Oattawa agooga buuneeda gichchaghwaak.” Ghwalamda Saawa ak gwayeeshsha Yeesu, “Gajeweaya eashaaha mukkattajeega aba dinaaraji#6:37 Dinaari: Lappiyeeda hit aba giidawda siida gadiyi aba askweareanagi aba damandida. bughalaji iyyeenya akkeattawji ghwaagi?”
38Gabiikta Yeesu ghoanyaashta nea gwayeeshsha, “Heappi gondeawi mukkattaji hada? Aweayeana ong'ng'wersiina.” Weay gong'weersa gabiigu ak gwayeeshsha, “Aba hiji gendeawi mukkattaji muut ea ghweayi iyyeenya.”
39Hean gwayeeshsha Yeesu ginealanga anung' gobiitpiit buuneeda aba heeda mida nyeega nyawiiri nea ghoanung' gwasna gharmuchcheekka eatta fii bughala ea gea eatta fii haradam ea damanamughuush. 40Hean Geanung' gobiitpiit buuneeda nea geanung' gwsna gharmuchcheekka eatta fii bughala ea gea eatta fii haradam ea damanamughuush. 41Ngatta gageanu Yeesu mukkattajeekka ghwanyawa ammuudiin ea ghweayeekka ghwanyawa assiyyenyean ak gong'weersa humng'eeda ak gabadiischeesa Aseetta. Gageanu mukkattajeega ghwanyawa ak ghabwanajaada aba geattingaaschi ak ghoadaw ginealangaaschi gwalakkiisa buuneeda. Eara ghweayeega ghwanyawa assiyyeenya ghwanung' goguulli buuneessean. 42Gweagiischi fugiga seaniin ea gwalang'u. 43Hit agiischooda buuneeda gewweamu mukkattajeega abit ea ghweayeega abit ak ghwannyiit soscheew damaniyyeenya. 44Nea fuga sing'ng'attaawa mukkattajeega ghwanyawa ea sagalamnyooji muut, headiga akghwahit.
Yeesu ghabeawa badayda beega
(Mat 14:22-33; Yoh 6:15-21)
45Deagheatta ghwanung' Yeesu gaweay ginealangaaschi jeeda maleambooda nea gwayeeshsha, oshsheeda oakghaawana basooda aweayeena hoowa bea ng'eanyiida Betsaydaan. Aniini gaghanyi dahuuydean daheelli emeeda. 46Iiduw nea niheelli buuneeda gawa uhuumba heaya gamus Aseetta. 47Ghoaw shing'ada nea maleambooda gwanda bugusta basooda nea Yeesu gaba geaw aba ng'eanyiida ghajaam. 48Ang'wearda ghwadaa nea gwadeawiit ginealangaaschi aba manmanda maleambooda nea ghwaak milaada aba gideaba goyuuk maleambooda jeammeeda. Ghargayeew ghabeawa Yeesu badayda beega nea gaweesa ginealangaaschi mida jeeda maleambooda. Gawa nea gwahinda gili jea ghwasuut. 49Hean sidaah nea ghabeawa badayda beega Goguul nea ghaghay gili daa malonghajeanda. 50Sidaah ghang'ut sean muuwuda. Iiduw ghwanya ghuutta Yeesu nea gwayeeshsha, “Asi abissiina ahawda! Siida aniini gil adoabealli!” 51Gwading'da niny maleambooda ak ghahawuda jeammeeda. Ghwanung' ghahamng'eanyi saawa muuchchi. 52Ghabeal muuchchi aba gideaba mwanala ng'asheega ghayi bea mukkatte. Nea gwasin hang'ooynachcheekka guroruunatka nyaawa.
Yeesu ghoahaap fuga Genasareetti
(Mat 14:34-36)
53Ng'atta nea gogeawusa ng'eanyiida Genasareetti, ghwanung' goduuw maleambooda nyaawa aba ghuutta basooda. 54Hitta nea ghwararang'aana jeeda maleambooda gabay ghwadaa Buuneeda ak geanal. 55Gwasalda Buuneeda gaweay gealga ak gwasareenu fuga miyeani siyeattuuna muuchka nyaawa eayaat heeda wassean siyiing'sa Yeesu. 56Heeda laah Yeesu sean mida gharang'weakka ghanea mujiinajeega gil, ghanea madameega, inyeessa Geayiin fuga miyeani gheatta naweeda gawa ghwanyasa nea geeyeeshsha geat eara ghanyi ghawaap weleeda hang'daannyi gaygaheaba buuneeda. Ak ghoaw huumwa fuga waasa geat weleeda Yeesu gaheaba.
Currently Selected:
Marko 6: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
