Marko 7
7
Ng'asheega sing'ng'wanyaana fugeaba garayi
(Mat 15:1-9)
1Ghapka fuga mwaatkwa was Farisaayajeega nea godeana ginealshoodiga diineeda Yahuudi nea gwaleabu Yerusaleemu ama hidu goweameesa heeda mida Yeesu. 2Hidu nea ghoang'wearda ghwadaa ginealanga mwaatkwa bea Yeesu gweagiischi nea meahuuna geattinga. 3Aba gideaba fuga was Farisaayajeega ea fuga sean was emeeda Yahuudi inyeessa gwasinda ng'asheega gidaghayi ang'ng'wanyaanda fugeaba garayi; iissa ea mayghwaak gil nea meahuuna geattinga muuchchi. 4Saawa mayghwaak gida leabu jarooda nea menyooghanyi ehhuun. Gwanda seareeda ghayi sing'ng'wanyaan inyeessa gehhuun gweerajeega, ea dahuunatka, ea bwakkurajeega gharinga. 5Ghoanyaash Yeesu, fuga was Farisaayajeega sea ginealshoodiga diineeda Yahuudi, “Ghwasaan anda ginealangaagu moang'ng'waanya ng'sheega ghayi bea fugeaba garayi? Eara iyagiischi ghwaakta geattinga mehhuuna?” 6Ghwalamda Yeesu ak gwayeeshsha, “Fuga ammiittu geat! Niiw huumwa ramoraneeda ghayi rukutteawa. Isaya badahukkeagwa,
‘Ghayi gwayi Aseetta,
Fiisu gwasinnunean mureeda aba ghuusiga akghwahit,
nea guroruunatka nyaawa
easheagewean.
7Earra gabattean ghanyea maygwaloossa gil.
Aba gideaba goneali buuneeda humeannyeekka
mawasa geasu was gea buuneeda.’
8Agooga ghoanung'waadi digheanda Aseetta ak ghoang'ng'waanyi fughareenga buuneeda.”
9Gabiikta Yeesu ak gwayeeshsha, “Agooga gowoschi milmili. Ghoanalli amulsiina deaweedeeda Aseetta aba ng'asheegeangwa oang'ng'wanyaannyi. 10Ghayi gwayeeshsheegwa Muusa, ‘Sissiina gweanu ea geamadu mureeda.’ Nea, ‘Siida imwaashta ghwaan ghana ghaamwat gagasa ghami.’ 11Ghoayamnyi Agooga ak goyeeshshi, ‘Siida imideawa gili ghwanyawa jea ghoadaw ghwaan ghana ghaamwat, amaduw gwayi gili Gorbani.#7:11 Gorbani: Gideaba gili sittaw Aseetta 12Abeeda siisi gajeaninyas gidajeagamulsiinda weetta ghwaan ghana weetta ghaamwat.’ 13Nii ghamneawa Gidofooldi ng'asheanda Aseetta gil, aba ginealshoodeang'wa oang'ng'wanyaadi. Nea goosnayi eara ng'asheega saang'a uurji suh.”
Ng'asheega ng'utta buuneeda ririnnyeanda
(Mat 15:10-20)
14Ghabwadageat Yeesu emeeda ama hit gwayeeshsha, “Oalleaydiit oagasean ak gojeeng'u. 15Manda gichchea gawa jeessiida leabu jarooda, jea ghang'uda siida ririnnyeanda. Amadukku ng'asheanda leabu jeessiida ea gea ng'utta siida ririnnyeanda gil.” [ 16Siida agar iitta adayiinya ng'asheesu.] 17Iiduw nea gwaheelli emeeda nea gawa jeeda ghoriida ghoanyaash Ginealangaaschi ng'asheega gwachchi galla geadiin. 18Gwayeeshsha Yeesu, “Asseara agooga moanali? Moanali gideaba gidawea jeessiida leabu jarooda, mwoammu ghang'uda siida ririnnyeanda, 19Aba gideaba mawa jeeda gurorooda, gawa jeeda siyeakkiisa hamitta. Amaduw gwaritta jarooda.” (Aba sareani Yeesu gohiimsa buuneeda gideaba hamichchoojiga sean ghwadoabiiw.) 20Gabiikta Yeesu gwayeeshsha, “Siida geaghus ghang'uda ririnnyeanda ng'asheega munyas leabu jeadaannyi. 21Aba gideaba ng'asheega leappu jessiida gwaleabu jeeda guroroadaannyi nea giikka munyasiini gil, nea hiseadayeandumeeda, 22Ea gwadishta, ea nuusta buuneeda, mealuleega, shidoodeaba ghaang', munyinda, lachng'eanyiida, ririnynyeanda, geawunda gheang'da, ging'weakka, ghwarjeeda ea lendeeda. 23Ng'asheesu munyas seaniin gwaleappu jih ak gang'utta fii ririnnyeanda.”
Masaweespa gatmu
(Mat 15:21-28)
24Ghabeawa Yeesu hoowa, ak gawa ng'eanyiida Diro. Aba hoowa iiduw gawa jeemba ghoah nea magassa ghwanal sih amaduw ghwaraay ghafuy geaw. 25Abeeda gwanda Gatmooni mida jeebi ittaannyi bea haweega beardooschi meang'nyeandeenda, nea aninyas iitta Yeesu, Ghwaan ama hidu gobedeaysa madeadaannyi. 26Gatmooni abeeda gaba emoojiga. Gaba ng'eanyiida Foynikkeeda mida jeeda Sirya. Hidu Gatmooni gwayeeshsha Yeesu, Aniyean nung' gwaritteaysa hudeanyu meang'nyeandeenda. 27Ghwalamda Yeesu ak gwayeeshsha, “Ameasa ghanyi gwalang'u diibiga, mwadoabiiwa gideaba gegeanu hamitta diibiga ak geejaksa gudajeega.” 28Gwayeeshsha Gatmoodida, “Ea Siida mureeda, eara gudajeega inyeessa goliim murmurga abuutpuut diibiga iyagiischi.” 29Gwayeeshsha Yeesu, “Aba ng'asheanji ghamneawa irguun, una ghoah hudaang'u niritteaysa meang'nyeandeenda!” 30Gawa Gatmoodida ghoah ama hitta ghwadaa hudaannyi gawiilgeaw aba bulaliida nea niritteaysa meang'nyeandeenda.
Yeesu ghoahaap siisi miiy manda ghuutta.
31Ghang'eat Yeesu gawa ghang'amwa ng'eanyiida Diro. Gawa ak gwasik ng'eanyiida Sidooni, ak ghwahitta Basooda siyi Galilaaya, nea gwasik mujiinajeega attamanamughuush suguura Dekapooli. 32Ghwahidu heeda Yeesu Fiisu eattu siisi miiy bissa ea manda ghuutta. Sihhiidu geyeeshsha Yeesu, aniyean mwasa ang'ng'waanya uhuudeaba siisi. 33Gageanu Yeesu siidida ak gorutteawa jeeda emeeda. Hit gageanu ak ghoabuutta mooringaaschi jeesinga iidiga, gang'ushsha nea gageanu ak ghwasat ng'ushapta. 34Hean gong'weersa Yeesu humng'eeda, amahit gosiima, ak gwayeeshsha siida ghwanyawa miyaan, “Efwatta!” Nea gideaba, “Jaadana.” 35Hean gabiissa ghwajaada idigeaba siidida ak goottina ng'ushapta, ak eara ghuttaannyi gabiissa ghoammu gabalool. 36Ng'atta gwayeeshsha Yeesu buuneeda, ng'asheesu easinnyiin adiiduw ghoanung' ghwayiiy eara siida. Nea iissa gidaheawaatta gideaba adoorukuti ada ghoaraanya buuneeda rukutteayda. 37Ghahamng'eanyi Buuneeda muuchchi nea gwayi, “Gwasin ng'asheega sean nea ghoadoabiiw, ghwanung' gwayiing'shi fuga miinyi nea eara gea manda ghuusiga gabalool!”
Currently Selected:
Marko 7: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
