Marko 8
8
Yeesu ghoang'aatta fii sagalamnyooji ang'wan
(Mat 15:32-39)
1Iiduw ghabwat geat emeettuw gichcha, ea ghwasang'ayiit. Abeeda fiisu mandeawana gichchaghwaak. Hean gaguursa Yeesu ginealangaaschi ak gwayeeshsha, 2“Aniini ghabwaydi fiisu aba gideaba neandeayeesi hiji nea ghamneawa ea eawetteaba samwagu gil, nea mighwanyas gilak. 3Iyeasiksi gaweay ghoah nea ghwaat jalooda gwanda gea jea gohiili aba naweeda, aba gideaba jeani gwanda fuga leabu heshsheagi.” 4Geyeeshsha Yeesu aba girrukusa Ginealangaaschi, “Ghamneawa mukkattajeega jea goolang'u fiisu denuun gajegeannana yeenu aba dareabeedi.” 5Gwayeeshsha Yeesu ginealangaaschi, “Gondeawi mukkattaji hada aba hiji?” Gwayeeshsha Ginealanga, “Aba hiji gendeawi mukkattaji ispwa.”
6Hean ghwalamda Yeesu ak gwayeeshsha, anung' gobiitpiit buuneeda aba ng'eanyi. Hit gageanu Yeesu mukkattajeegiga ghwanyawa assispwaan ak ghanyi ghamwaash Aseetta. Gageanu ak gwalakkiisa ginealangaaschi nea gwayeeshsha, oattawaada buuneeda. Ghoadaw Ginealanga buuneeda mukkattajeegiga. 7Abeeda gwanda eara ghweayeesu ng'ay. Gageanu Yeesu ak ghamwaash Aseetta earaba ghweayeesu ama hit ghoadaw ginealanga nea gwayeeshsha, oattawa buuneeda. 8Gweagiischi fugiga seaniin ea gwalang'u. Hit agiischooda buuneeda nea gewweamu lajanga abit ghwannyiit soscheew ispwa. 9Nea monneeda fuga ghwanyawa sing'ng'aatta ea sagalamnyooji ang'wan. Hit agiischooda gwasiksa Yeesu buuneeda gaweay. 10Deagheatta gawa Yeesu jeeda maleambooda nea godeayi ginealangaaschi ak gaweay ng'eanyiida Dalmanuutta.
Fuga Farisaayo gagasa gwadeagooda
(Mat 16:1-4)
11Ghapka fuga was Farisaayajeega heeda Yeesu ak gwasheang'nyi sea Yeesu. Nea abeeda geegasa eaghas aba jeeda baloaldaannyi, geegasa gwasin gwadeagooda jea ghoahiimu gideaba niny huumwa gil gojeagu Aseetta. 12Gagiisan Yeesu aba guroroadaannyi aba ng'asheanji ak gwayi, “Anda fiisu bea seaygeaniin gagassiidunu gwadeagooda? Adiiduw. Aba huumwa fiisu bea seaygeaniin mwajeattaw gwadeagooda.” 13Ghang'eat Yeesu ghang'amwa ng'eang'da nyaawa. Gwading'da maleambooda ak gawa ea ghoaghaawa basooda.
Mattawanda fuga Farisaayo ea dea Heroode.
(Mat 16:5-12)
14Abeeda Ginealanga Yeesu niroossa eaditta mukkattajeega deayeat, abeeda aba jeeda maleambooda gwandeawa mukkattajanjagi akghwahit. 15Iiduw gwareekusa Yeesu ginealangaaschi nea gwayeeshsha, “Ashageada mattawanda Farisaayajeega ea dea Heroode.” 16Iiy Ginealanga ng'asheesu gabiissa gwasheang'nyi sean nea gwayi, “Nii ghamneawa ghwanyaashtunu aba gideaba mekkari mukkatte aba hiji.” 17Gabaygwajeeng'u Yeesu ak gwayeeshsha, “Anda agooga gosheang'nyeesi ng'asheega nyootta mukkatte? Asseara giloanalli ghana gili ojeeng'u mandana? Eara ihengeagwa mwariishta? 18Assagooga gondeawi gheanyanga ak ea mwoang'ng'weardani? Gondeawi iidiga ak ea mwoayiinyani gili? Ammwoapkaadi eara gidaghayi 19eaweeda ghayi ealakkisiini mukkattaji muut fuga ghayi as sagalamnyooji muudi? Heappi isiwweamu lajanga ghwannyiit soscheew hada?” Geyeeshsha, “Ghwannyiit soscheew damaniyyeenya.” 20“Ama mukkattajeega ghayi abwanajaadi assispwa ak ghwaak fii sagalamnyooji ang'wan, iiduw nea gowweamu lajanga abit ghwannyiit soscheew hada?” Geyeeshsha, “Ispwa.” 21Hean gwayeeshsha, “Ak ea miyajeeng'ni?”
Yeesu ghoahaap siida ng'oaw bea ng'eanyiida Betsayda
22Ghwahitta Yeesu ng'eanyiida Betsayda nea godeayi ginealangaaschi. Hean gweadu Buuneeda siisi ng'oaw ak geemus Yeesu gideaba waasana geattingaagu. 23Ghoang'ng'waay Yeesu geattingeaba siitta ng'oawiin, gorutteawa jeeda ghooriida, ak gang'ushsha gheanyanga aba ng'usheega, ak ghwayiin geattingaaschi uhuuda ak gwayeeshsha, “Heappi gimmuusi daaha gili?” 24Ng'atta ghoang'wearda Siidida ng'oawiin ak gwayeeshsha, “Ghadaayi buuneeda ak gawuurji geediga nea gawelweel.” 25Gabiikta Yeesu ghoang'ng'waay gheanyangeaba siidida. Hean ghoang'wearda siidida muuchchi. Gabiikta ghanyangaaschi ghoang'wearda. Ghwadaah halanjeassean mahophopsiina eara gil. 26Ng'atta gwayeeshsha Yeesu siidida, “Asi una ghoah nea adiski hoowa bea gharang'dean.”
Betro godeaga geaw Yeesu
(Mat 16:13-20; Luk 9:18-21)
27Gawa Yeesu nea godeayi ginealangaaschi nea gaweay hoowa bea gharang'weakka Gaysariyayda Filippiin. Duuw gwanda naweeda, ghoanyaash Yeesu ginealangaaschi nea gwayeeshsha, “Heappi buuneeda ibalool gwayeena geawoschi ng'eaha?” 28Ghwalamda Saawa ak gwayeeshsha, “Buuneeda mwaatkwa gwayeena guwosi Yohaaneedida abattisachchiin, nea mwaatkwa gwayeena guwosi Eliya nea mwaatkwa gwayi gwadeeppa wosa siyagi aba jeeda sibanga ghayi bea garayi.” 29Hean ghwalamda Yeesu ak ghoanyaash saawa nea gwayeeshsha, “Ama agooga goyeennyi geawoschi ng'eaha?” Ghwalamda Betro ak gwayeeshsha, “Ang'iing'i guwosi Gristo.” 30Gwareekusa Yeesu saawa nea gwayeeshsha, “Adiiduw goorukusi sih iitteanyu.”
Yeesu gabaloola sawanadeeda ea nuusta ea dunnoadaannyi
(Mat 16:21-28; Luk 9:22-27)
31Gabiissa hean goneali Yeesu ginealangaaschi nea gwayeeshsha, “Asi anala gideaba Balleanda Siida gayghwanyas sawanadeeda haw muuchchi nea gayghaheawa gweargwa, ea ashoohoodiga hees ea ginealshoodiga diini. Gaygwanuus ama ng'atta eawooji samwagu gaygwaduudu.” 32Ng'asheesu gwarukuta Yeesu muuchchi nea mwafnya eara gil. Hean ghwaat Betro Yeesu hichpa geaw ak gowoowsa. 33Ghwasach ghaat Yeesu gong'weersa ginealangaaschi ama hit gowoowsa Betro nea gwayeeshsha, “Ng'amwana madedeanyu ang'iing'i guwosi Shattaani! Ng'asheesu bea jeeda uhuudang'uun ghanyea maleapna heeda Aseetta. Suh ng'asheega uhuuda siida gil.” 34Gaguursa Yeesu emeettuw sang'aan ea ginealangaaschi ak gwayeeshsha, “Siida wassean igasa gweadu geeshteanyu, ea adaghwarar geaw, geaghus gageanu behiidaannyi ak gweadu geeshteanyu. 35Aba gideaba siida gasa ghoaghu aweagaaschi gaygabeagu, amaduw siida beagu aweagaaschi appadaydeanyu ea badayda Giijasta miy gayghoaghu. 36Heappi ghamneawa siida eara ghwanyas halanjeassean bea muunda ng'eanyiida gaygwaloossa naaha, ihutteawi aweagaaschi? 37Ama siida gayghoadayda naaha jea ghoalaaja aweagaaschi? 38Siida wassean aba seaygeani bea ring'eeda biissa ea meawalla Aseettean, siida isinnean gheanyanga ea ng'asheegeasu, abeeda Balleanda Siida gaygwasissa gheanyanga siidida, damanda jea ghwaana nea nighambiit ghwaan sea giijasoodiga ghaydidi bea humng'eeda.”
Currently Selected:
Marko 8: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
