Marko 9
9
1Gabiikta Yeesu ak gwayeeshsha, “Aba huumwa gaydarukuneegwa gideaba aba jeani hiji gwanda fuga maygameewa ea eaghus anidaah gheambalmeeda Aseetta gidahittaayda nea gweadu uurda.”
Yeesu ghwayamwa deakta
(Mat 17:1-13; Luk 9:28-36)
2Ing'atta eawooji lah, ghwaat Yeesu Betro bea Yakkobo ea Yohaana uhuumba gijeeni geaw nea gaba geat. Iiduw aba hoowa ghwayamwa deaktaannyi ammadeannyaawa, 3ak eara hang'waakkaaschi gaweriidi muuchchi. Eara aba jeeda ng'eanyiissean ghanyeamanda siida ammu gohuun hang'weakka ea gawerittiidunu. 4Deagheatta geadaah Eliya ea Muusa nea gabalool sea Yeesu. 5Gwayeeshsha Betro Yeesu, ea, “Ginealshoochcheanda, amiy muuchchi gideaba geendi hiji. Anda meesni ghooraji samwagu aba hiji. Ghoriida mabeanyi ang'iing'i niirja gaba Muusa, nea niirja gaba Eliya.” 6Abeeda Betro ea oorjooga ghwanyawa anung'ut muuwda ea ghwaroot eara gichchea gwargu. 7Miighoaw gil ea nuhoonu shamoghooda ak gwadukuta. Ghwanya ghuutta Siida nyaasha jeeda shamoghooda nea gwayi, “Nii Jeepteanyu abwariinyi olleysiiniit.” 8Miighoaw gil ghoang'wearda Ginealanga gichcha, ak amwadaaha siinuut geaghus Yeesu akghwahit ea saawa.
9Iiduw nea ghwararang'aadawa gijeeda gwayeeshsha Yeesu, asi adiiduw goorukusi sih ng'asheega ghwanyawa oadayiin ea eaghus ea nuduunna miyeeda Balleanda Siida. 10Ng'atta Ghoang'ng'waay ng'asheanji, amaduw gwasheang'nyi Saawa nea gwayi gwadeaschi naaha ng'asheanji bea dunnooda miyeedean. 11Iiduw Geannyaash Yeesu nea geyeeshsha, “Anda gwayeena ginealshoodiga Diini gayghanyi goshoohu Eliya?” 12Gwayeeshsha, ada huumwa, “Eliya gayghanyi goshoohu ghwaan gwasissin halanjeassean. Eara gwasa, ghwasaan anda geang'waar aba jeeda Ng'ooruutka Ghaydit gideaba, Balleanda Siida gayghwanyas hang'weanidooda muuchchi nea gefool? 13Geayeeshshineegwa, Eliya ada nihidu, ak gwasma Buuneeda gidagassiida saawa, gawuurji gidaghayi sung'waarda appadaydaannyi.”
Yeesu ghoahaap balleanji beardooschi meang'nyeandeenda
(Mat 17:14-21; Luk 9:37-43a)
14Gaweay ama hitta heeda ginealanga suurja ghwadaa emeetuw nibattiisa geat hoowa, nea gwasheang'dooschi sea ginealshoodiga mwaatkwa bea diineeda Yahuudi. 15Daa Buuneeda Yeesu ghahamng'eanyi muuchchi. Gwasalda gaweay roonnyeeda Yeesu ak gogeachchi. 16Gwayeeshsha Yeesu ginealangaaschi, “Ghwanyawa gosheang'nyeesi naaha ooga fiisu?” 17Deagheatta gwarinna Sih jeeda emeeda ak gwayeeshsha, “Ea Ginealshoochcheanda, heetta geyeadu headaang'u balleanji itteanyu beardooschi meang'nyeandeenda nea iissa ghwanung' ghwaroat eara ghuutta. 18Inyeessa ibalaksa meang'nyeandeenda gwajaksa ng'eanyi nea gabaru ghuutta furghwajeega nea gowiiri geeshatka nea ghabwarghanda. Iyeayeeshshi ginealangaagu orruutta meang'nyeandeenda ghwaraay.”
19Gwayeeshsha Yeesu saawa, “Anda agooga gowoschi seaygeeda mandeawana masaweega! Assagooga gaydeabiita heedeang'wa ea ghoaw eeju? Gaydabattiseegwa ea ghoaw eeju? Heappi ayeanni hedeanyu.” 20Geyeadu balleandida heeda Yeesu. Daa Meang'nyeandeenda Yeesu ghwanung' ghoahiil balleanda ak gobedeaysa ng'eanyi ak goberbeershi nea gabaru ghuutta furghwajeega. Gwayeeshsha Yeesu ghweanda balleanda, 21“Miyeanji gaba eeju?” Gwayeeshsha Siidida, “Ghang'eada jeepcheandumeadaannyi. 22Nea iissa gwajaksa Meang'nyeandeenda jeeda beasta ea jeeda beega, nea gagasa nuusta. Asi immuusi, Gibwaydaneasa ak guweachcheasa!”
23Gwayeeshsha Yeesu, “Gwayi immuusi gili! Aba siida mideawa masaweega manda gichchea gwadilna.” 24Gojuur Siida nea gwayeeshsha, “Asi geandeawi masaweesu miihaw nea giheannean.” 25Daa Yeesu gidawamwaanda emeettuw madeadaannyi gabiissa gojuursa meang'nyeandeenda nea gwayeeshsha, “Meang'nyeandeenda inung' ghwaroat ghuutteaba jeebi nea ghaminyiit, geayi ritteawana saseedeaba jeebi nea adiiduw gudubiiksiina gichcha!” 26Gojuur Meang'nyeandeenda nea gwajaksa balleanda ng'eanyi ak gwaritteaysa. Iisung'ula balleanda aba ng'eanyi ea nuwuurji musta ea gwayeena buuneessean, “Nimi!” 27Gageanu Yeesu ak ghoang'ng'waay geattinda balleanda ak gagatgat. Hean ghang'eat ghaminaada. 28Iiduw nea nuwa Yeesu gah, gaweay headaannyi ginealanga nea gaba geat ak ghoanyaash nea gwayeeshsha, “Ghwasaan anda ghwanyawa aseasa gearaanyi errutta?” 29Gwayeeshsha Yeesu saawa, “Meang'nyeanji bea endean gaba giikka ama jea gwaritta geaghus eamwaash Aseettean gil.”
Yeesu gabiikta gabaloola ng'asheega miyeadannyi
(Mat 17:22-23; Luk 9:43b-45)
30Gawa Yeesu nea godeayi ginealangaaschi, Gaweay nea gwasik jeeda ng'eanyiida Galilaaya. Abeeda Yeesu niny magassa ghwanal buuneeda heeda mida. 31Nea nii abeeda gwasin gideaba niny iyanaal ginealangaaschi gwayeenniisa, “Balleanda Siida gajeenung' goobissa geattinga buuneeda jea ghabwar ghami. Nea ing'atta eawooji samwagu gaygwaduudu.” 32Abeeda Ginealanga mwanala ng'asheanji ak ghoawal ghoanyaash.
Siida haw ng'eaha?
(Mat 18:1-5; Luk 9:46-48)
33Ghwahitta ng'eanyiida Gapernaumu. Iiduw nea nuweay jeeda gheeda ghoanyaash Yeesu ginealangaaschi nea gwayeeshsha, “Ghwanyawa aba naweeda gosheang'nyeesi naaha?” 34Ghwasiinda Saawa, aba gideaba gwachchi nea gwanda naweeda gwasheang'nyeesa gideaba ahaw ng'eaha aba jeannyaawa. 35Hean iiduw gawa Yeesu goopteada ak gaguursa ginealangaaschi attamaniyyeenya. Gwayeeshsha, “Siida gasa ghang'atta madeedeaba suurja dayiina geaw ng'eanyi ea gahuuydeana buuneessean ea ghoaw siida gadiyeesa buuneessean.” 36Gaguursa jeebi mwanang' ak ghwanung' ghaminaada aba madeannyaawa. Gageanu ak gabeashsa geattingaaschi gheatta jeepta ak gwayeeshsha, 37“Siida deapta jeepta uurji nii aba gheawungeasu, ghwadeaptanaan aniini. Nuut siida deaptanaan aniini mwadeaptanaan aniini akghwahit, ghwadeapta eara siida ajeaknean.”
Siida mwahasheasa gaba meatkweedeanya.
(Luk 9:49-50)
38Gwayeeshsha Yohaana Yeesu, “Ea Ginealshoochcheanda, sidaayi siida aruttiida meangeeniga aba gheawungaagu. Geyeeshshi nung'waada aba gideaba siidida mabwaheasa.” 39Gwayeeshsha Yeesu, “Adagudochchuursi, manda siida jea gwasin deamdeamanga sunu nea gwasna gheawungeasu amaduw gwasheamu gwarukuna badaydeanyu ng'asheega munyas. 40Aba gideaba siida mwahasheasa siisi gaba meatkwedeanya. 41Ama siida wassean jea gagoonaneegwa beega jea aleaha gideaba gowoschi fuga Gristo siisi aba huumwa eara niny majaghanyi amwanyasa gimeardaannyi.”
Haleanjeeda eattu ramaseannyeekka
(Mat 18:6-9; Luk 17:1-2)
42“Siida wassean jea ghwanung' ghwaramwasta siyagi aba jeedeaba fiisu manang'i mwasaniin ak ghwanung' gwasin ring'eeda, siisi abeeda ghang'wana gegeanu lagheaneeda haw bea ng'ealdeayda ak geerassa gheattannyi ama hit geejaksa jeeda basooda. 43Iinung' geattindaang'u, adiinya gilaji! Ghang'wana ginyasi eaweega nea gibeahi gattinagi, mwasamwa gideaba gindeawi geattinga sean ak guwi jeeda beasta manda mudeanooda. [ 44Aba hoowa gwanda ghughuutka mameewwa, ea beasta mammissa.] 45Eara geashtaang'u iyaschoardaneey ghang'wana gilaji. Ghang'wana ginyasi eaweega eara beaha geashagi, mwasamwa gideaba gindeawi geashangaagu duwaaw amaduw geejakseey jeeda beasta manda mudeanooda. [ 46Aba hoowa gwanda ghughuutka mameewwa, ea beasta mamissa.] 47Eara gheang'daang'u iyaschoardaneey, ghang'wana giloodu! Ghang'wana guwi jeeda gheambalmeeda Aseetta nea gibeahi ghaang'agi. Mwasamwa gideaba gindeawi gheanyangaagu duwaaw amaduw geejakseey jeeda beasta manda mudeanooda. 48Aba hoowa gwanda ghughuutka mameewwa ea beasta mamissa. 49Gaygaba siisi simmiinna beasta. 50Balang'da gida miy gil. Amaduw balang'da inuhutta samneadaannyi gaygudu esma naaha? Gagasa ahuuwa balang'da aba jeedeang'wa nea gobeayi hoyyoo nea gororoochchi.”
Currently Selected:
Marko 9: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
