YouVersion Logo
Search Icon

Mareko 15

15
O Iesu i Luma o Pilato
(Mata 27.1-2,11-14; Luka 23.1-5; Ioane 18.28-38)
1O le taeao po lava na feiloa‘i ai ositaulaga sili, ma toeaina, ma a‘oa‘o tulafono, ma le fono uma, ma faia la latou taupulega. ‘Ua sāisāi e i latou Iesu ma tu‘uina atu ‘iā Pilato. 2‘Ona fesili atu lea o Pilato ‘iā te ia, “O oe ‘ea o le tupu o tagata Iutaia?”
‘Ona tali atu lea o Iesu, “O lea lava ‘ua e fai mai ai.”
3‘Ua molia fo‘i Iesu e ositaulaga sili i mea e tele, 4‘ona toe fesili atu lea o Pilato ‘iā te ia, “E leai ‘ea sau tali i nei mea e tele ‘ua molia ai oe e i latou?”
5A ‘ua lē tali atu Iesu, ‘ona matua ofo ai lea o Pilato.
‘Ua Fa‘asalaina Iesu i le Oti
(Mata 27.15-26; Luka 23.13-25; Ioane 18.39-19.16)
6O tausamiga uma o le Paseka, e masani ‘ona fa‘asa‘olotoina ai e Pilato se pagotā e talosaga mai ai tagata ‘iā te ia. 7O aso ia sa i ai i le falepuipui le tagata e igoa ia Parapa fa‘atasi ma isi tagata fouvale o ē na fasiotia ni tagata i le fouvalega sa faia. 8‘Ua potopoto mai tagata e to‘atele, ma ‘ua fai atu ‘iā Pilato, e fa‘asa‘oloto se pagotā e pei ‘ona masani i tausamiga fa‘apenei. 9A ‘ua tali atu Pilato ‘iā te i latou, “Tou te manana‘o ‘ea ia ‘ou fa‘asa‘olotoina atu ‘iā te ‘outou le tupu o tagata Iutaia?” 10Auā ‘ua iloa e ia o le lotoleaga o ositaulaga sili na tu‘uina atu ai Iesu ‘iā te ia.
11A o ositaulaga sili, ‘ua fa‘aoso e i latou tagata e fai atu ‘iā Pilato ia fa‘asa‘olotoina Parapa. 12A ‘ua toe fesili atu Pilato ‘iā te i latou, “O le ā la le mea e tatau ‘ona ‘ou faia i lē ‘ua ta‘ua o le tupu o tagata Iutaia?”
13‘Ona ‘alalaga mai lea o i latou, “Fa‘asatauro ‘iā te ia.”
14‘Ona fesili atu lea o Pilato, “O le ā ‘ea se mea leaga na faia e ia?”
A ‘ua atili ai ‘ona ‘alalaga leo tetele i latou, “Fa‘asatauro ‘iā te ia.”
15‘Ua manatu Pilato e fa‘aloto malie i tagata, o lea na fa‘asa‘olotoina ai e ia Parapa. ‘Ua uma ‘ona sasaina e ‘iā Iesu, ‘ona tu‘uina atu ai lea o ia ‘ia fa‘asatauroina.
‘Ua Fa‘atauemu Fitafita ‘iā Iesu
(Mata 27.27-31; Ioane 19.2-3)
16‘Ua ‘aveina Iesu e fitafita i totonu o le lotoā, o le maota lea o le kovana, ‘ona fa‘apotopotoina lea o le ‘au uma. 17‘Ua fa‘a‘ofu e i latou Iesu i ‘ofu mūmū pāuli, ma faia fo‘i le pale i la‘au tuitui ma tu‘uina i lona ao. 18‘Ona tula‘i fa‘aaloalo lea o i latou ma fai atu, “Talofa le tupu o tagata Iutaia!” 19‘Ua tā fo‘i e i latou lona ao i le u ma feanu ‘iā te ia; ‘ua to‘otuli fo‘i i latou ma ifo ‘iā te ia. 20‘Ua uma a latou tauemuga ‘iā te ia, ‘ona to‘esea lea o le ‘ofu mūmū pāuli ‘ae fa‘a‘ofuina o ia i ona lava ‘ofu. ‘Ona ta‘ita‘iina atu lea o ia e i latou ia fa‘asatauroina.
‘Ua Fa‘asaturoina Iesu
(Mata 27.32-44; Luka 23.26-43; Ioane 19.17-27)
21‘Ua alu ane fo‘i le tagata Kurene e igoa ia Simona, o le tamā o Alesana ma Rufo, o lo‘o sau o ia mai le vao e aga‘i mai i le ‘a‘ai, ‘ona tu‘uina atu fa‘amalosi lea e i latou le satauro ‘iā te ia na te amoina.#Roma 16.13 22‘Ona ta‘ita‘i atu lea o Iesu e i latou i le fanua e igoa o Kolokota, o lona uiga, “O le nofoaga o le ulupo‘o.” 23‘Ua avane fo‘i e i latou ‘iā te ia le uaina ‘ua fefiloi ma le muro, ‘ae le‘i talia e ia. 24‘Ona fa‘asatauroina lea o ia e i latou ma ‘ua faia fo‘i e i latou le vili e tufatufaina ai ona ‘ofu ‘iā te i latou.#Sala 22.18 25O le itūlā e iva i le taeao na fa‘asatauroina ai o ia e i latou. 26Na tusia fo‘i le fa‘aaliga i le mea na molia ai o ia, “O le Tupu o tagata Iutaia.” 27‘Ua fa‘asatauroina fo‘i o ia e i latou fa‘atasi ma tagata faomea e to‘alua, o le isi i le itū taumatau ma le isi i le itū tauagavale. #15.27 O nisi fa‘aliliuga e fa‘aopoopo i ai le fuai‘upu 28: ‘Ua taunu‘u ai le Tusi, ‘ua fa‘apea mai: “ ‘Ua faitauina o ia fa‘atasi ma tagata solitulafono.”
29‘Ua ‘upuvale fo‘i i latou o ē na ui ane, ‘ua lūlū o latou ulu ma fai atu, “Oi! o oe o lē e lepetia le malumalu ma toe fausia i aso e tolu,#Sala 22.7; 109.25; Mare 14.58; Ioane 2.19 30inā fa‘aola ia oe ‘iā te oe lava ma alu ifo i lalo mai le satauro!”
31‘Ua fa‘apea fo‘i ‘ona tauemuina o ia e ositaulaga sili ma aolafoga, ‘ua fai ane i latou, “Na fa‘aolaina e ia isi tagata, ‘ae le mafai e ia ‘ona fa‘aolaina ia lava. 32Inā alu ifo ia i lalo mai le satauro le Keriso le tupu o Isaraelu, se‘i o tatou va‘ai atu i ai ‘ona tatou talitonu ai lea ‘iā te ia.”
‘Ua tauemu fo‘i ‘iā te ia e na fa‘asatauroina fa‘atasi ma ia.
O le Maliu o Iesu
(Mata 27.45-56; Luka 23.44-49; Ioane 19.28-30)
33O le itūlā e sefulu ma le lua i le aoauli na pogisā ai le nu‘u uma se‘ia o‘o i le itūlā e tolu. 34O le itūlā fo‘i e tolu na ‘alaga leo tele ai Iesu, “Eloi, Eloi, lama sapatani?” O lona uiga, “Lo‘u Atua e, lo‘u Atua e, aiseā ‘ua e tu‘ulafoa‘iina ai a‘u?”
35‘Ua fa‘alogo atu nisi o e na tutū ai, ‘ona fai ane lea, “O lo‘o vala‘au o ia ‘iā Elia.” 36‘Ua momo‘e ane le isi o i latou ma fufui le omomi i le uaina ‘o‘ona ma fa‘amau i le pito la‘au. ‘Ona tu‘uina atu ai lea e ia i le fofoga o Iesu; ‘ua fai atu fo‘i o ia i tagata, “Se‘i o tatou va‘ava‘ai pe sau Elia e ‘ave ifo o ia mai le satauro.”
37‘Ua ‘alaga leo tele Iesu, ‘ona maliu ai lea o ia.
38‘Ona saeluaina lea o le ‘ie pupuni o le malumalu e amata ifo i luga e o‘o lava i lalo. 39O le ta‘ita‘i‘au sa tu e fa‘afeagai tonu ma le satauro, na va‘ai atu o ia ‘ua maliu Iesu, ‘ona fai ane lea, “E moni lava o le Alo o le Atua le tagata lenei.”
40Sa i ai isi fafine sa matamata mamao mai, e pei o Maria le Makatala, ma Maria le tinā o Iakopo le itiiti ma Iose, ma Salome; 41o ē na mulimuli ‘iā Iesu ma ‘au‘auna ‘iā te ia a o i Kalilaia o ia, ‘atoa ma isi e to‘atele o ē na ō mai fa‘atasi ma ia mai Ierusalema.
Iesu i le Tu‘ugamau
(Mata 27.57-61; Luka 23.50-56; Ioane 19.38-42)
42‘Ua o‘o i le afiafi o le aso o le Sauniuniga, o le aso lea e soso‘o ma le Sapati, 43‘ona alu ane ai lea o Iosefa le Arimataia, o se sui fa‘aaloalogia o le Fono, o lē sa fa‘atalitali i le o‘o mai o le Mālō o le Atua, ‘ua alu atu o ia ma le loto tele ‘iā Pilato ma fa‘anoi i ai mo le tino o Iesu. 44‘Ona ofo ai lea o Pilato ‘ina ‘ua fa‘alogo ‘ua maliu Iesu; ma ‘ua vala‘au atu i le ta‘ita‘i‘au ma fesili atu ‘iā te ia po ‘ua leva ‘ona maliu o ia. 45‘Ua iloa e Pilato i le fa‘amatalaga a le ta‘ita‘i‘au ‘ua maliu Iesu, ‘ona fa‘atagaina lea e ia Iosefa e ‘ave le tino maliu. 46Na fa‘atauina fo‘i e ia le ‘ie lino, ‘ona tu‘uina ifo lea e ia le tino o Iesu ma ‘ua afīafī ai i le ‘ie lino, ‘ona tu‘uina lea o ia i le tu‘ugamau na foa i le papa. ‘Ona fuli ane lea e ia le ma‘a tele ma pupuni ai le gutu o le tu‘ugamau. 47Sa va‘ava‘ai fo‘i Maria le Makatala ma Maria le tinā o Iose i le mea na tu‘uina ai Iesu.

Currently Selected:

Mareko 15: SCNT

Highlight

Share

Copy

None

Want to have your highlights saved across all your devices? Sign up or sign in

Free Reading Plans and Devotionals related to Mareko 15

YouVersion uses cookies to personalize your experience. By using our website, you accept our use of cookies as described in our Privacy Policy