wandījo 25

Kūcha kwa ng'wa Abulahamu

1Ū Abulahamu akatoola nkīma ūngī, lina lyakwe witanagwa Ketula. 2Ū nkīma ng'wenūyo ūmyalīla ū Abulahamu ba Zimulani, Yokishani, Medani, Midiani, Ishibaki na Shua. 3Ū Yokishani akababyala ba Sheba na Dedani; a bitūnja ba ng'wa Dedani baalī ba Ashulimu, Letushimu na Leumimu. 4A bitūnja ba ng'wa Midiani baalī ba Efa, Efeli, Hanoki, Abida na Elida; a bose benaba baalī ba būbyīle bo ng'wa Ketula. 5Gwike ū Abulahamu akang'winha Isaka pyī ī sabo yakwe. 6Alīyo a bitūnja ba kūbyalwa na bakīma bakwe a bangī, akabagabanhya manoong'ho; hama aho ataalī kūcha, ūbasaamya bīnga a halī ng'witūnja wakwe ū Isaka; ūbasaamīja kū sī ya kīya.

7Ī myaka ya būlamu bo ng'wa Abulahamu ī yose yalī igana na makūmi mpungatī n'ītanò (175). 8Hūna ū Abulahamu ūzumalīka mu būnamhala bowiza; ūjīkwa, wisangīja na bang'wawe alī namhala wa myaka mingī. 9A bitūnja bakwe a ba Isaka nū Ishimaeli būnjīkīla ū ng'wipilinga lya Makipela, īlo līlī hihī na Mamule, ng'wilaale lya Ng'hītī, ū Efuloni ng'wana Zohali. 10H'ī lilaale īlo Abulahamu akalīgūla kūfuma kū Bahītī. Ū ng'wenūmo h'ūmo akajīkīlwa ū Abulahamu hamò nū nke ū Saala. 11Ū Abulahamu aho wacha, ū Mulungu ūng'witīīla ningī no ū ng'witūnja wakwe ū Isaka. Ī shikū jene wasangwa akwikalaga Beeli-lahai-loi.

Shibyalīlwe sha ng'wa Ishimaeli

12Īyī yene mihayo ya ng'wa Ishimaeli, ng'witūnja wa ng'wa Abulahamu, ūyo Haagali muna Misili, ū ntūmami wa ng'wa Saala, akamyalīla Abulahamu. 13Aya mina ga bitūnja ba ng'wa Ishimaeli, gīt'umo kwihela kwa kūbyalwa kwabo kwalī kūlī, Ū ng'witūnja wa kwandya kūbyala ū Ishimaeli walī Nebaioti; hūna wiza Kedali, Adibeeli, Mibusamu, 14Mishima, Duma, Masa, 15Hadadi, Tema, Jetuli, Nafishi, Kedema. 16A benaba hū baalī bitūnja ba ng'wa Ishimaeli; hama nīyo a genaya ha mina ga basugi ba ng'anda ikūmi n'ibīlī, kūlenganīla na mizengo, hamò na ng'hambī jabo. 17Ī myaka ya būlamu bo ng'wa Ishimaeli ī yose yalī igana na makūmi a adatū na mpungatī (137). Ūzumalīka, ūjīkwa, wisangīja na bang'wawe. 18Ī shibyalīlwe shakwe shikazenga ng'wipandī lya kwandīja Havila kūja Shuuli, bbihī na lūbīmbī lwa sī ya Misili, kūjīlīīla Ashuli. Gwike bikalaga na wanishi ū kū bichaabo pyī ī shikū!

Kūbyalwa ba Esau na Yakobo

19Īyī yene mihayo ya ng'wa Isaka, ng'witūnja wa ng'wa Abulahamu; ū Abulahamu akamyala Isaka. 20Ū Isaka aho alīntoola ū Lebbeka walī na myaka makūmi anè. Ū Lebbeka walī ng'wana Betueli, muna Alamu wa Padani-alamu; na walī ilūmbūye lya ng'wa Labani muna Alamu. 21Ū Isaka akanombela ū nke nguno walī ngūmba; ū SEEBA ūng'wigwa, ūbūcha nda. 22A baana aho balī ū mu nda būyūnkoya#25:22 Būyūnkoya: A boi bikoyaga, būnkoya ū ninabo mu gīko. ū ninabo; kūshisha nose ūhaya, “Nibūlī nalīkoya gīkī?” Ūja kūmūja SEEBA ū mhayo gwenūyo.

23Ū SEEBA ūng'wīla,

“Ū mu nda yako galīmo

mahanga abīlī,

Ū mu būbyīle wako jikwilonga

ng'anda ibīlī

Ījo jitī na būsangī.

Ū lūmò lūkūbiza na nguzu

kūtinda ū lūngī;

ū ntaale akūntūmamīla ū ndo.”

24Ū mu nda yakwe baalīmo baana bagosha babīlī ba mabasa; aho lyashika ī likanza lya kūbyala, 25Ūyo akwandya kūfuma walī waza, nīyo ū mīlī gwakwe gwalī gītī igoodi lya booya; na lūūlū būng'witana Esau.#25:25 Esau: Esau, makūlū gaho wa booya; nūūlū Edomu, makūlū gaho waza. 26Ū nzunaaye ūkūūbīja haho na haho, wiza andimile kwishiigina ū Esau; ū mhayo gwenūyo gūng'wenheleja kwitanwa Yakobo.#25:26 Yakobo: Yakobo, makūlū gaho, ndiimi w'ishigina (nūūlū nomolomo). Ū Lebbeka aho alībabyala a baana benabo, ū Isaka walī na myaka makūmi atandatū (60).

Esau kūjinja būbyalwa bo kwandya

27A bayanda benabo aho bakūla, ū Esau akabiza ng'hīīgi kalalamba; ūyūdīla kū matogolo. Lelo ū Yakobo ūbiza munhū nembeezu wa kwikala ha kaya. 28Ū Isaka walī atogilwe nyama ja ndimu, na lūūlū akantogwa no ū Esau; alīyo ū Lebbeka ūntogwa ū Yakobo.

29Lūshikū lūmò ū Yakobo walī wazuga shihele#25:29 Shihele: Nūūlū shihembe. sha ndīngū; ū Esau wiza atuubile kīngī nasho, ū kūfuma ū kū matogolo ūko wadīlaga. 30Ūng'wīla ū Yakobo, “Alinisabūlīlage ho a banashihele a baaza benabo nalye, naakatuubaga!” (H'ī nguno yene akitanwa Edomu). 31Nang'hwe ū Yakobo ūnshokeja, “Nijingījage tame ū būbyalwa wako wa kwandya.” 32Ū Esau ūshosha alīhaya, “Bebe lekaga ī liguusha, ū nene nalībūlagwa lūtuubo, būkūnigunanha kī ū būbyalwa bo kwandya?” 33Ū Yakobo ūng'wīla, “Nilahīlīlage tame!” Wilahīla ng'hana; ūnjingīja Yakobo ū būbyalwa wakwe wa kwandya. 34Hūna ū Yakobo ūng'winha ū Esau ngatī na shihele sha ndīngū, ūlya. Aho wamala kūlya ūng'wa, hūna ūbūūka ūfuma ūja. Ū Esau ūbiza wabūdalaha ū būbyalwa wakwe wa kwandya!

Currently Selected:

wandījo 25: SUKBI15

Highlight

Copy