wandījo 26

Isaka na Abimeleki

1Ali lūūlū, yīkagwa nzala hangī ū mu sī yenīyo, kūleka ī nzala ya mu shikū ja ng'wa Abulahamu. Ū Isaka ūja Geela kūlī Abimeleki, ntemi wa Bafilisti. 2Ū SEEBA ūng'wilongela ū Isaka ūng'wīla gīkī, “Ūtizūja Misili, ikalaga mu sī īyo nalīkūwīla kwikala. 3Ikalaga ū mu sī yenīyī ikanza ho, nakūbiza hamò nang'ho; na nakūkūfuuha. Nguno pyī ī sī jenīji nakūkwinha, jibize wingīji wako hamò na shibyalīlwe shako; na nakūgūshikīlīgīja ū mhayo ūyo nang'wilahīlīla so Abulahamu. 4Ī Shibyalīlwe shako nakūshīta shibize na banhū bingī gītī sonda ja ng'wigūlū. Nīyo nakūbinha pyī ī sī jenīji, hama pye a mahanga ga mu sī gakwanukūla mu nzīla ya būbyīle wako. 5Nguno ū Abulahamu walī aniigwile, washimīzīlaga mu katongeelele kane; na a malange gane walī agadimile, pye na a kahelele nī shilagīlo shane.” 6Hūna ū Isaka wikala Geela.

7Alīyo a banhū ba kwene ūlū bamūja ī mihayo ya nke wakwe, wabawīlaga gīkī, “Ilūmbū lyane,” nguno oogohaga ū kūhaya gīkī, “Nke wane.” Wiganikaga, “A banhū ba kūūnū bakūnibūlaga kūlwa nguno ya ng'wa Lebbeka, nguno nsoga no ī lihanga lyakwe.” 8Ū Isaka aho wikala ī lipandī lyenīlo shikū ningī, lūshikū lūmò ū Abimeleki walī mu kaya yakwe walolaga kūbītīla ng'widilisha, ūmona ū Isaka alīhooya nū Lebbeka na kwigusha nang'hwe mu būtogwa. 9A henaho ū Abimeleki ūng'witana ū Isaka ūng'wīla gīkī, “Bebe angū gashi nke wako ū nkīma ng'wenūyo! Hama nibūlī ūkūhayaga gīkī, ‘Ilūmbū lyane?’” Ū Isaka ūshosha, “Nakogohaga gīkī natizūbūlagwa kūlwa nguno yakwe.” 10Nang'hwe ū Abimeleki ūng'wīla, “Mhayo kī ū gwenūyū watwītīlile? Nguno ngosha ose ose ū mu bise ūmu walī ashikile kūshihya nū nke wako, ūtwingīja mu makoye a bise!” 11Hūna lūūlū ū Abimeleki ūbahūgūla pye a banhū alībawīla gīkī, “Ose ose ūyo ūgima kūng'wītīla ya būbi ū munhū ng'wenūyū, nūūlū ū nke wakwe; tambala shilanga akūbūlagwa.” 12Ū ng'waka gwenūyo ū Isaka aho walīma, ī shilīwa īsho akahamba shikaponeka no, nguno ū SEEBA walī amfuuhile no no no. 13Ū munhū ng'wenūyo ongeja ū kūsaba, kūshisha ūbiza nsabi ntaale no; 14Ūkūja madaale ga mitugo, na a ha kaya ūkwīja no a batūmami; kūshisha nose a Bafilisti būng'wītīla wilu. 15Ī nzwinzī ījo jalī jasīmva na batūmami ba ng'wa ise mu shikū ja ng'wa ise Abulahamu, a Bafilisti būjikandīīla, būjichiba pyī ī jose. 16Hama ū Abimeleki ūng'wīla ū Isaka gīkī, “Bebe ī gete saamaga ūtwīngīle ū ng'wenūmu, nguno watūkīlīīlile no!” 17Ng'hana ū Isaka ūsaama aho wikalaga, ūja kwikala mu sī ya ntubīlo, mumo Geela ng'wenūmo. 18Ī nzwinzī ījo jalī jasīmva mu shikū ja ng'wa ise Abulahamu, ījo Bafilisti bakajikandīīla aho wazumalīka ū ise ū Abulahamu, ū Isaka ūjifukūūla hangī; ūjinha na a mina ayo walī wajinha ū ise. 19A batūmami ba ng'wa Isaka bakasīmba lwinzī ū mu sī ya ntubīlo yenīyo, būpandīka lwa nzwīlo ja minzī ga kūyūpumunhīka dūhū. 20Alīyo a badīīmi ba mu Geela būbikoloosha a badīīmi ba ng'wa Isaka; būbayoja balībawīla gīkī, “A minzī genaya gise.” Na lūūlū ū lwinzī lwenūlo, ū Isaka ūlwilīka lina lya Eseki,#26:20 Eseki: Nūūlū makūlū gaho Yombo. nguno bakamūūkīja yombo. 21Būsīmba lūngī, alīyo biza na a ha lwenūlo kūbayoja; ū lwene ūlwitana Sitina.#26:21 Sitina: Makūlū gaho, Wilwisha. 22Ūsegeja wīnga a h'ipandī lyenīlo, ūūkasīmba lūngī; lelo atigelile munhū wa kūbikoloosha a ha lwenūlo. Ū lwene ūlwitana Lehoboti,#26:22 Lehoboti: Makūlū gaho, Ng'wanya; nūūlū Kūgalīhīlwa. ūhaya gīkī, “Ī haha lūūlū ū SEEBA watwinha ng'wanya gwa kwigalīhīja, na kūkwīla mu sī.” 23Alīyo akīnga na a henaho, ūsaamīla Beeli-sheba. 24Ū mu būjikū wa lūshikū lwenūlo ū SEEBA ūng'wilongela; ūng'wīla gīkī, “Ū nene nalī Mulungu wa ng'wa so Abulahamu; yaya ū kogoha nguno nalī hamò nang'ho. Nakūkūfuuha, na a banhū ba shibyalīlwe shako nakūbongeja bakwīle no no no, kūlwa nguno ya ntūmami wane Abulahamu.” 25Ū Isaka ūbeeja ng'walīlo a henaho; ūlīkumīlīja ī lina lya ng'wa SEEBA; ūtūūla ho na ng'hambī yakwe.#26:25 Ng'hambī yakwe: Nūūlū, iheema lyakwe. A batūmami bakwe būsīmba lwinzī ho.

26Kwimanīla ū Abimeleki wiza kūfuma Geela; walī na Ahuzati ngunanhi wakwe mu būsugi, na Pikoli ūyo walī ntaale wa bashilikale bakwe. 27Ū Isaka ūmūja gīkī, “Ni ginehe ng'wanikūūbīja, tūhaya mukanikolwa ng'ūnipeeja nūng'wīngīla?” 28Būnshokeja balīhaya, “Twabonile hape gīkī ū SEEBA alī hamò nang'ho, na lūūlū tūhaya gīkī, ‘Shiigelile twiyilahīlīle.’ Hū kūhaya twizunīlīje a ha gatī yise nū bebe; 29gīkī ūtūtwītīla mhayo gose gose gwabūbi, gīt'umo na a bise tūtakūkoyije mu mhayo gose gose. Alīyo pye a makanza ayo walī hamò nise twakūgunanhaga chiza, nose lyūshika ikanza lyako lya kūtwīngīla, wīnga mu mhola dūhū. Al'ī haha angū ūūyū ūlī na ja ng'wa SEEBA.” 30Ū Isaka ūbabeegeja shigukulu, būlya na kūng'wa. 31Ha ntondo yaho a bose bizunīlīja mu kwilahīla, hūna ū Isaka ūbafunya kūbashindīkīla, bīnga būja mu mhola. 32Ū lūshikū lwenūlo, a batūmami bakwe ū Isaka būng'wenhela mhola ja lwinzī bakasīmba; būng'wīla, “Twapandīkaga minzī.” 33Ū Isaka ūlwitana ū lwinzī lwenūlo, Shiba.#26:33 Shiba: Īdūgije kūbiza na makūlū ga, kūlahīla Nūūlū, mpungatī. Hū kūhaya lūlī lwinzī lwa haho bakiyilahīgīgīja, Nūūlū, lwa mpungatī. Kūshisha na lelo īyī ī lina lya nzengo gwenūyo līmanīkile Beeli-sheba.

34Ū Esau aho washisha myaka makūmi anè akantoola Yudisi, nshīke wa Ng'hītī witanagwa Beeli; na Basemati, nang'hwe nshīke wa Ng'hītī witanagwa Eloni. 35A bakīma benabo bakenha būpīna no ū kū ba Isaka nū Lebbeka.

Currently Selected:

wandījo 26: SUKBI15

Highlight

Copy