wandījo 27

Yakobo kūfuuhwa

1Ū Isaka aho wanamhalala no no no, kūshisha a miso gakwe goya ū kūbona, lūshikū lūmò ūng'witana ū ng'witūnja wakwe ū ntaale, ū Esau; ūng'wīla, “Ng'wanone!” Nang'hwe widīka, “Kalame baba!” 2Ūhaya, “Ūlībona gīkī ī haha naakūlaga, hama ū lūshikū lwa kūcha kwane natamanile lūkūbiza nanalī. 3Ali lūūlū, solaga ī shilanga shako, ū ntana nū būta wako; ūje kū matogolo ūkanibūlagīle ndimu. 4Wībeeje chiza, ūnizugīle shilīwa shawiza, īsho nashitogilwe, ūnenhele nize nalye, nakūfuuhe aho nataalī kūcha.”

5Ali lūūlū, ū Lebbeka wandegelekaga ū Isaka aho alīng'wīla ū ng'witūnja wakwe ū Esau. Hūna ū Esau wīnga, ūja ū kū matogolo kūhīīga ndimu gīkī enhe. 6Nang'hwe ū Lebbeka ūng'wīla ū ng'witūnja wakwe ū Yakobo gīkī, “Bebe nang'wigwaga ū so alīng'wīla ū nkūlūyo ū Esau; gīkī, 7‘Jaga ūkahīīge ndimu, wize ūnibeegeje shilīwa shawiza; nalye nakūfuuhe kū būtongi bo ng'wa SEEBA aho nataalī kūcha,’ 8Hūna lūūlū ng'wanone, nidegelekage gete, wīte ūmo nalīkūlagīīlīla: 9Jaga ū kwidaale lya mitugo, ūkanenhele tūbūli tūbīlī tūsongi, nize nameegeje ū so shilīwa shawiza, īsho ashitogilwe; 10Ūkantengele alye, akūfuuhe bebe aho ataalī kūcha.” 11Ū Yakobo ūng'wīla ū nina gīkī, “Angū nahene ū nkūlū wane, ū Esau, ū mīlī gokwe gūlī na mabooya, ū nene nalī n'ikoba isheeku. 12Ū baba ūlū ūnikuumya natūmanīka dūhū gīkī nalīnemba, niyenheleje kūpandīka izumo a ha ng'wanya go kwanukūla mbango?” 13Ū nina ūng'wīla, “Ng'wanone ī lizumo ni līnigwīlage nene; ū bebe ītaga dūhū ūmo nalīkūwīlīla, jaga ūkanenhele!”

14Ng'hana ūja ūkajenha, wiza ūng'winha ū nina ūbeeja ī shilīwa ī shawiza īsho wal'atogelilwe ū ise. 15Hūna ū Lebbeka wīsola ī myenda ya ng'witūnja wakwe ū ntaale, ū Esau, ī yawiza gete īyo walī amīkīlile; ūnzwalīkīja ū ng'witūnja wakwe ū ndo, ū Yakobo. 16Na a makono gakwe ūgakumba makūnza ga mbūli, pye nī nhingo ū mu sheeku. 17Hanuma ūng'winha ū ng'witūnja wakwe ū Yakobo ī shilīwa shawiza īsho walī wazuga, nū ngatī ūyo walī wagūbeeja. 18Ūja nasho ū kūlī ise; aho washika ūng'wīla, “Baba.” Namhala widīka, “Nalīho ng'wanone; nani ū ng'wenūyo?” 19Ū Yakobo ūnshokeja ū ise gīkī, “Nalī Esau ng'witūnja wako, ū wa kwandya kūbyalwa; naagwīta ūyo walī waniwīlaga. Gūngūmūkaga lūūlū baba ūlye ī nyama ya ndimu īyo naakūbūlagīlaga, ūnifuuhe na kūnifuuha.” 20Ū Isaka ūmūja, “Ni kinehe lelo wangūha gīkī ū kūpandīka ng'wanone?” Nang'hwe ūshosha, “Ū SEEBA Mulungu wako, hū ng'wene wanīīlūkīla kupandika waagu!” 21Ū Isaka ūng'wīla, “Al'egeelaga aha ng'wanone nakūkuumye, namane ūlū ng'hana h'ūlī bebe ū ng'witūnja wane ū Esau nūūlū yaya.” 22Ū Yakobo wegeela a halī ise ū Isaka; aho wankuumya ūhaya, “Ī lilaka lya ng'wa Yakobo, alīyo a makono a gene ga ng'wa Esau gete.” 23Ūlemeelwa ū kūng'witegeleja, nguno a makono gakwe gaalī na booya gītī ga nkūlūye ū Esau; hūna lūūlū ūmfuuha. 24Gwike akankomela kūmūja hangī gīkī, “Ū bebe h'ūlī ng'wene gete ū ng'witūnja wane ū Esau?” Ūshosha, “Nalī nene gete baba.” 25Hūna ūhaya, “Ng'wanone nenhelage aha lūūlū ī ndimu yako nalye nakūfuuhe.” Ū Yakobo ūng'wenhela ūlya, ūng'wenhela na divai, nayo ūng'wa. 26Hūna ū ise ū Isaka ūng'wīla, “Nzūgū aha lūūlū ng'wanone ūnibbipe.” 27Na ng'hana ūja ho ūkambbipa. Ū Isaka aho gwang'wingīla ū ng'waso gwa myenda yakwe ūmfuuha alīhaya gīkī,

“Ee ūyū gwene ng'waso gwa

ng'witūnja wane,

gūbange gītī ng'waso gw'ilaale

Īlo SEEBA ng'wenekīlī

alyīlūkīlile mbango.

28Ū Mulungu akwinhe lūme

kwīnga kwigūlū,

na shizeeze kūfuma mu

būsabi bo ha sī;

na mhona ya shilīwa na wingī

wa divai.

29Mahanga ga banhū gakūtūmamīle,

na ng'anda ja banhū jiiname

kū būtongi wako;

Ūbize ntaale kū baana ba ng'wing'we,

a baana ba ng'wa noko biiname

kū būtongi wako.

A bose abo bakūkūzuma

bagwīlwe izumo;

na a babo bakūkūfuuha

nabo bīīlūkīlwe mbango.”

30Ū Isaka aho wamala kūmfuuha ū Yakobo, ū Yakobo ūfuma hanze wīnga ū mulī ise. Lītakūlile ikanza ūshika nū nkūlūye ū Esau, afumile ū kwihīīga. 31Nangwe ūng'wenhela ū ise ī shilīwa shawiza īsho walī wameegeja. Aho washika ūhaya, “Baba gūngūmūkaga lūūlū ūlye ī nyama ya ndimu īyo naakūbūlagīlaga, ūnifuuhe” 32Ū ise ū Isaka ūbūja, “Nani hangī?” Nang'hwe ūshosha, “Nalī ng'witūnja wako, ng'witūnja wako, ū Esau, ū wa kwandya kūbyalwa.” 33Ū Isaka ūdetema no; kūnū alīyomba gīkī, “Nani lūūlū ūyo wahīīgaga ndimu ūnenhela nūlya? Naamalaga kūlya, nūmfuuha aho ū bebe ūtaalī kwiza; na ng'hana ū ng'wenūyo wafuuhagwa!” 34Ū Esau aho wigwa ī mihayo ya ng'wa ise ūtandūka kūlīla ng'hūngū n'ilaka lya higūlya, kūnū alīng'wīla ū ise gīkī, “Nifuuhage nū nene baba, nifuuhage nane!” 35Alīyo ūnshokeja alīhaya, “Ū nzunayo wizaga mu masala sala ūjisola ī jako.” 36Ū Esau ūhaya, “Ū ng'wenūyo batantūngīlīgije ū kūng'wilīka gīkī Yakobo? Nguno washisha ng'hangala ibīlī lūūlū ī haha akūninyeekejaga. Akandya ūnitaaja būbyalwa wane wa kwandya, ī haha ūūyū wajisola nī jane!” Hūna ūbūja, “Ūtanilekeelelile nūūlū hado nane ī mbango?” 37Ū Isaka ūhaya, “Nang'wītaga kūbiza ntaale ū kūlī bebe; na a badūgūye pye naabīītaga kūbiza basese bakwe. Nī mhona ya shilīwa, nū wingī bo divai nang'winhaga wei; numho lūūlū nakūkwītīla gūlī kinehe ng'wanone?” 38Ū Esau ūng'wīla ū ise gīkī, “Ūlī na lūbango lūmò dūhū baba? Baba nifuuhage nane” Ū Esau ūlīla no n'ilaka lya higūlya! 39Ū ise ū Isaka ūng'wīla gīkī,

“Ū wikalo wako būkūbiza kūle nī

shizeeze sha kūfuma mu būsabi

bo ha sī;

kūle na lūme lwa kwīnga kwigūlū.

40Ūkūyūlya sha kwikoobela na līlūshū,

nīyo ūkūbiza nsese ū kūlī ndūgūyo.

Alīyo ūlū ūdūla kwihuluguma,

Ūkūlīponya ī lijooki lyakwe lītizikala

līkūkandīkīgije.”

Būpelanu bo ng'wa Esau

41Ū Esau akankolwa no ū Yakobo kūlwa nguno ya ījo ise akamfuuha. Ūng'wikanwa ū mu ng'holò yakwe; wiwīla gīkī, “Ī shikū ja kūnīla ū baba jilī hihī no, nakūmūlaga dūhū ū nzuna wane ū Yakobo.” 42Ū Lebbeka ūwīlwa īyo akīhaya ū ng'witūnja wakwe ū ntaale, ū Esau. Ūtūma nhūng'wa ū kūlī ng'witūnja wakwe ū ndo, ū Yakobo; wahayiza ūng'wīla, “Managa gīkī, ū nkūlūyo ū Esau alī n'iganiko lya kūkūbūlaga hū yike ī ng'holò yakwe. 43Ali lūūlū ng'wanone, ītaga gīt'umo nalīkūwīlīla, peelaga wangū ūje Halani kūlī nsīza wane Labani. 44Jaga ūkikale kwenūko kū ng'wakwe kūshisha ikanza lībīte, ū būpelanu wa nkūlūyo wike. 45Ū būpelanu ūbo akūpelanīlile ū nkūlūyo ūlū būshila, nī yīyo wang'wītīlile yenīyī wīyīība, nakūkūtūmīla ko nhūng'wa ūshoke kaya. Nibūlī munichīle būbīlī wing'we mu lūshikū lūmò?”

46Hūna ū Lebbeka ūng'wīla ū Isaka gīkī, “A bakīma a Bahītī benaba baaninogije ū nene, nīyo nū būpanga bone natūbūlūmbaga. Ī gīsī ūlū nū Yakobo ūtoola kūfuma ū mu bashīke ba Bahītī gītī aba, a bakīma ba mu sī īyī, numho ū būpanga bone būkūbiza būlī na solobo kī lūūlū?”

Currently Selected:

wandījo 27: SUKBI15

Highlight

Copy