wandījo 28

Yakobo kūja kū ng'wa Labani

1Hūna ū Isaka ūng'witana ū Yakobo ūmfuuha, ūng'hūgūla alīng'wīla gīkī, “Yaya gete ū kūtoola nkīma wa mu Kanaani ūmu. 2Jaga Padani-alamu kū ng'wa gūkūyo Betueli, ūkatoolele kwenūko; ū nkīma ūkūpandīkīla ha ng'wa mamiyo Labani, ū nsīzaye wa noko. 3Ū Mulungu Ndūji wa shose,#28:3 Mulungu Ndūji wa shose: Shiheb, Eli-shadai. wei ng'wenekīlī akwīlūkīle mbango, na akwīte kūbiza na būbyīle būtaale, hangī akongeje no no no, kūshisha ūbize ihanga lya banhū bingī. 4Akwinhe ī ja ng'wa Abulahamu, ū bebe hamò nū būbyīle wako; wīdime ī sī īyo Mulungu akang'winha Abulahamu, īyo ūkwikalaga muyo gītī ūlī nobeji, ībize yako ya wikomangīle.” 5Na lūūlū ū Isaka ūnaga ū Yakobo, ūbūūka ajile Padani-alamu kū ng'wa Labani ng'witūnja wa ng'wa Betueli muna Alamu, ū nsīzaye wa ng'wa Lebbeka, ū nina wa ba Yakobo na Esau.

6Ū Esau ūbona gīkī ū Isaka wamfuuha ū Yakobo, ūntūma Padani-alamu kūjūtoolela kwenūko, ūmfuuha alīnagīla akūng'wīlaga, “Ūtizūtoola nkīma wa Kanaani.” 7Ūmona wabiigwa a ba ise nū nina, ūja ng'hana ī Padani-alamu. 8A henaho ū Esau ūdeeba hape gīkī, a bakīma ba Kanaani baalī batanyegije ū ise, ū Isaka. 9Nang'hwe ūja kū ng'wa Ishimaeli ng'witūnja wa ng'wa Abulahamu, ūkantoola Mahalati, nshīke wa ng'wa Ishimaeli; ūyo wal'ilūmbūye wa ng'wa Nebaiyoti. Ūbiza ongeja nkīma ūngī a bake abo walī nabo kūfuma kale.

Shilooti sha ng'wa Yakobo

10Ū Yakobo ūbūūka kwīnga ī Beeli-sheba, ūgumha ajile Halani. 11Ūshika ipandī ilebe ūlenda henaho, nguno ī līīmi līkagwa; aho wila ū būjikū ūsola iwe lyalī bbihī henaho ūlītūūla ū kū ntwe ūliisagūja gītī nsago, ūlaala. 12Kwimanīla waloota shilooti alībona ngaji ītūūlilwe ha sī, alīyo īkuumije ng'wigūlū; na bamalaika ba ng'wa Mulungu bakwītūmamīlaga kūlinha na kwika. 13Ū kwigūlya ya ngaji yenīyo, walīko ū SEEBA īmīīlile; ūhaya gīkī, “Ū nene nalī SEEBA, Mulungu wa ng'wa Abulahamu ntaale wako, na Mulungu wa ng'wa so Isaka.#28:13 Wa ng'wa Abulahamu ntaale wako, na Mulungu wa ng'wa so Isaka: Shiheb, wa ng'wa so Abulahamu, na Mulungu wa ng'wa Isaka. Ī sī yenīyī aho walaalaga nakūkwinha bebe hamò nū būbyīle wako. 14Ū būbyīle wako būkūbiza na banhū bingī gītī lūbuubu lwa ha sī, hama ūkūtana#28:14 Ūkūtana: Ūkūgalīha 53. ūsambaale hose hose, ng'weli, kīya, sukuma na dakama. Pye a banhū ba mu sī bakwanukūla kūbītīla mulī bebe na būbyīle wako. 15Nakūbiza hamò nang'ho, nīyo nakūkūlang'hana būlī kwene ūko ūkūja. Hanuma nakūkūshosha hangī ū mu sī yenīyī. Natīko kūkūleka, kūshisha nīshikīlīje īyo nalīkwisagīja.”

16Ū Yakobo aho wabbamhuka ū mu tūlo yakwe, wandya kwiganika gīkī, “Ī gete ū SEEBA alīho a h'ipandī lyenīlī, nūūlū īkī naalī natamanile ū nene.” 17Akogoha no; ūhaya, “Ī lipandī lyenīlī līlī na lyoogohya itaale; ī lyenīlī lītūbiza ipandī līngī lyose lyose, ūlū ītī numba ya ng'wa Mulungu, a henaha hū a ha mita gwa kwingīlīla ng'wigūlū!” 18Ī ntondo yaaho ī dilū, ū Yakobo ūbūūka ūlīsola ī liwe īlo walī walītūūla kū ntwe ūliisagūla; ūlyīmīlīja gītī ng'hīngī, hūna ūliitīīla maguta a higūlya. 19Ī lipandī lyenīlo ūlitana Beeseli#28:19 Beeseli: Makūlū gaho, Numba ya ng'wa Mulungu. nūūlū īkī ū nzengo gwa kwenūko gwitanagwa Luzi. 20Hūna ū Yakobo ūlahīla alīhaya gīkī, “Ū Mulungu ūlū ūbiza hamò nū nene, ūnilang'hana nū mu lūgendo ūlo nalīīja lwenūlū, ūninha na shilīwa hamò na shizwalo sha kūzwala, 21kūshisha nashoke kū kaya ya ng'wa baba nalī mhola, ū SEEBA akūbiza Mulungu wane. 22A h'iwe īlo naalītūūla lyīmīīla gītī ng'hīngī lyenīlī, īkūbiza ho numba ya ng'wa Mulungu; nū mu shose īsho ūkūninha, nakūkwinha īmò ya ng'wikūmi.”

Currently Selected:

wandījo 28: SUKBI15

Highlight

Copy