wandījo 32

Yakobo kūng'ogoha Esau

1Ū Yakobo nang'hwe ūja na lūgendo lwakwe, bamalaika ba ng'wa Mulungu būmanhya nang'hwe. 2Ū Yakobo aho wababona ūhaya, “Ī gete ī yenīyī ng'hambī ya ng'wa Mulungu.” Hūna ī lipandī lyenīlo ūlitana “Mahanaimu.”#32:2 Mahanaimu: Mahanaimu makūlū gaho, ng'hambī ibīlī. 3Ū Yakobo ūtūma banhū kūja Seili, mu sī ya Edomu, ū kūlī nkūlūye ū Esau. 4Ūbakomeleja alībawīla, “Ūlū mulashike ū kūlī ntaale wane, ū nkūjiwa Esau, mukūhaya, ‘Ū nsese wako ū Yakobo alīhaya gīkī, Naalī kū ng'wa Labani, h'ūko naalikalaga kūshisha makanza aya. 5Ī haha nalī na mitugo, ng'ombe, nzobe, ng'holo, na mbūlī; hama nalī na basese bagosha na bakīma. Na lūūlū nalītūma ī nhūng'wa jenīji ū kūlī nkūjiwa ntaale wane, gīkī napandīke kwanukūlwa ū kū būtongi wako.’” 6A banhū abo akabatūma ū Yakobo aho bashoka būhaya, “Twashika ū kūlī nkūlūyo ū Esau, ī haha alī mu nzīla aliza na banhū magana anè, kūlwa kūkūsūng'wanha.” 7Ū Yakobo oogoha no, hama ūzwangana kīngī nasho; a banhū abo walī nabo ūbagabanhya mabità abīlī, pye na a madaale ga mitugo nī ngamīla. 8Nguno akiwīla gīkī, “Ū Esau ūlū ūlīkenaagūla ī libità ī līmò, ī lingī līshikile kūpūlūgūka lyūpeela.”

9Hūna ū Yakobo ūlomba alīhaya, “Ee Mulungu wa ng'wa baba Abulahamu, Mulungu wa ng'wa baba Isaka. Ū bebe h'ūlī SEEBA ūyo ūkaniwīla gīkī, ‘Shokaga kaya kū sī yako na kū badūgūyo, nakūkūbeegeja yawiza.’ 10Ū nene nsese wako natigeleelilwe ū bebe ūnīītīle ū wiza bose wenūbo, nūūlū kūnoolekeja ū būtogwa wenūbū. Nguno aho nalīgūkīla ū mongo gwenūyū naalī iyene dūhū na nang'ha gwane, alīyo ī haha nalī na mabità abīlī! 11Nalīkūlomba ūnipīje ū mu nkono gwa nkūlū wane ū Esau, nguno naloogoha; akwiza anidumīle anikenaagūle ū nene na a baana, na a baninabo. 12Alīyo bebe ng'wenekīlī ūkahaya hape gīkī, ‘Nakūkūbeegeja yawiza;’ na gīkī, ‘Nakūbīīta a banhū ba būbyīle wako babize bingī gītī maseni ga ha nyanza, ayo gatūdūla kūbalwa.’”

Manong'ho ga ng'wa Yakobo kūlī Esau

13Ū būjikū wa lūshikū lwenūlo ūbūmalīla henaho; ū mu shikolo īsho walī nasho, ūsolanhya shimò na shimò sha kūūnong'ha ū Esau. 14Akasola mbūli magana abīlī na ng'hulyati makūmi abīlī, ng'holo magana abīlī na ng'ondi makūmi abīlī. 15Ūsola na ngamīla ng'hīma makūmi adatū na baana bajo, ng'ombe makūni anè na nzagamba ikūmi, nzobe ng'hīma makūmi abīlī na nzobe ng'hosha ikūmi. 16Aho wajisolanhya ūjitūūla mu makono ga basese bakwe; būlī idaale lyūbiza iyene. Hūna ūbawīla a basese bakwe gīkī, “Tongelagi gwike ng'wilekela ng'wanya a ha gatī y'idaale n'idaale.” 17Ū wa kūbūtongi ūnagīīla ī ya kūhaya; ūng'wīla, “Ū nkūlū wane ū Esau ūlū alakūpuunīle akūbūje gīkī, ‘Ū bebe ūlī wa ng'wa nani? Nū kūko ūjile halī?’ Na gīkī, ‘Ī mitugo jose jenīji ūlījiswaga ja ng'wa nani?’ 18Ng'wīlage, ‘Ja nsese wako Yakobo; inong'ho lya kūng'winha nkūjiwa ntaale wakwe Esau, nū wei alīho a ha numa aliza.’” 19Nū wa kabīlī ūnangīīla gīko, nū wa kadatū, kūshisha pye a bose abo baswagaga madaale; ūbawīla gīkī, “Būlī ūmò wing'we ūlū ūmanhya nū Esau, hayagi mihayo yenīyo dūhū. 20Izūkagwi gete ū kūhaya ī gīkī, ‘Nū wei ū nsese wako ū Yakobo alīho a ha numa aliza.’” Nguno wiganikaga gīkī, “A manong'ho aya nalīntūmīla genaya gakūmpoja, hama naliganika nū nene akūnanukūla ūlū nibona nang'hwe.” 21Hūna a manong'ho ga ng'wa Yakobo gūtonga, ū wei ng'wenekīlī wikala a ha ng'hambī ū būjikū wenūbo.

Yakobo kwifuka na Munhū būjikū pe

22Ū mu būjikū wenūbo, ū Yakobo ūbūūka ūbasola a bake bakwe na a bakīma a basese, hamò na a bitūnja bakwe abo ikūmi na ūmò, ūbakīja ū mongo gwa Yaboki. 23Aho wamala kūbakīja ū mongo, ūshikīja nī shikolo shakwe pye. 24Ū wei ūsaaga iyene ko; munhū nebe wifuka nang'hwe kūshisha būjikū pe. 25Ū munhū ng'wenūyo aho wabona gīkī atūng'heebaga ū Yakobo ū mu lifuka, ūnkuumya h'iguha lya lūnyonga lwa lūkunu lwakwe; ū lūnyonga lwa lūkunu lūtyūka. 26Hūna ū munhū ng'wenūyo ūhaya, “Nilekelage naje, weela ū būjikū.” Alīyo ū Yakobo ūshosha, “Ndūhū natūkūlekelaga kūshisha ūnifuuhe!” 27Ū munhū ng'wenūyo ūmūja, “Ī lina lyako ūlī nani?” Nang'hwe ūhaya, “Nalī Yakobo.” 28Ū munhū ng'wenūyo ūng'wīla, “Ī lina lyako ūtitanwa hangī Yakobo, ūlī Isilaeli; nguno wilwishije na banhū nū Mulungu, ūbiza ntindi.” 29Hūna ū Yakobo ūhaya, “Nalīkūlomba ūniwīle ī lina lyako.” Nang'hwe ūnshokeja, “Lyakī ī lina lyane ūlīlībūja?” Hūna ūmfuuha aho balī henaho. 30Ū Yakobo ūlitana ī lina ly'ipandī lyenīlo gīkī, “Penieli;” ūhaya, “Nguno nibonaga na Mulungu būshū kū būshū, alīyo nūchīlwa shigongo, nī haha nataalī nalīho nalī mpanga.” 31Aho līlīfuma ī līīmi nang'hwe ūshimīza kwīnga ī Penieli, akūlibagīlaga kūlwa nguno ya lūkunu lwakwe. 32H'ī nguno yene kūshisha lelo īyī a Baisilaeli batalyaga ī nyama ya ha lūge ūlo lūlūnganije ha lūnyonga lwa lūkunu. Nguno ū lūnyonga lwa lūkunu lwa ng'wa Yakobo lūkakuumiwa bbihī nū lūge lwenūlo.

Currently Selected:

wandījo 32: SUKBI15

Highlight

Copy